KAYATTAYO nga ipategdatayo dagiti tattao. Kasta kadi met ti kayatmo?​— a Dakamaten kadatayo ti Biblia ti maipapan iti babai a ni Dorcas, a dinungdungngo ti adu a tattao.

Agnanaed ni Dorcas idiay Joppe, maysa a siudad iti igid ti Baybay Mediteraneo. Agarup 56 kilometro laeng ti kaadayo ti Jerusalem manipud Joppe. Maysa ni Dorcas kadagiti immuna nga adalan ni Jesus.

Apay ngata nga impatpategda unay ni Dorcas?​— Kunaen ti Biblia nga adu ti naimbag nga inaramidna ken nangipaay iti naimbag a sagsagut. Nalabit nagaramid iti nasasayaat a kawes para kadagiti balo a babbai. Kas inaramid ni Jesus, inkasaba met ni Dorcas ti maipapan iti pudno a Dios a ni Jehova.

Ammom kadi ti dakes a napasamak ken Dorcas?​— Nagsakit iti nakaro ket natay. Naladingitan  ti amin a gagayyemna. Isu a nangibaonda iti tattao a mapan iti pagdagdagusan ni apostol Pedro nga agarup 16 kilometro ti kaadayona. Impakaasida nga umay a dagus ni Pedro. Idi nakasangpet ni Pedro, dagus a napan iti ayan ni Dorcas. Agsangsangit ti amin a babbai, ket impakitada ken Pedro dagiti kawesda nga inaramid ni Dorcas.

Kalpasanna, imbaga ni Pedro a rummuar pay laeng dagiti adda iti siled ni Dorcas. Addan dagiti milagro a naaramidan ni Pedro ken ti dadduma nga apostol, ngem awan pay kadakuada ti nangpagungar iti natay. Ania ngata itan ti aramiden ni Pedro?​—

Nagparintumeng ni Pedro iti abay ti bangkay, nagkararag ken Jehova, sana imbaga a bumangon ni Dorcas. Ket agpayso a bimmangon! Inyawat ni Pedro ti imana tapno makatakder ti babai. Kalpasanna, inayabanna dagiti balo a babbai ken ti dadduma pay ket imparangna ti napagungar. Mailadawam kadi ti ragsakda?​—

Ania ti masursurotayo iti daytoy a salaysay maipapan iti panagungar ni Dorcas? Ipakita daytoy a no tulongam ti sabsabali, adu met kadakuada ti mangipateg kenka. Ngem ti kapatgan, laglagipen ken dungdungnguennaka ti Dios. Dinanto malipatan dagiti naimbag nga inaramidmo iti sabsabali. Ket gunggonaannakanto iti naragsak a biag nga agnanayon iti inkarina a nalinteg a baro a lubong.