Kaʼans a paalaleʼex

¿Baʼaxten jach yaabiltaʼab Dorcas?

TULÁAKLOʼON k-uʼuyik u kʼaʼabéetil k-yaabiltaʼal. ¿Bey wa a tuklik xan techoʼ? *... Le Bibliaoʼ ku tʼaan tiʼ Dorcas, juntúul koʼolel jach yaabiltaʼan.

Le koʼolelaʼ juntúul tiʼ le yáax máaxoʼob tu tsaypachtoʼob Jesusoʼ yéetel kajlaj tu kaajil Jope, junpʼéel kaaj yaan naatsʼ tu kʼáaʼnáabil le Mediterraneooʼ yéetel kex 14 leguas (56 kilometroʼob) u náachil tiʼ Jerusalén.

¿Baʼaxten a tuklik jach yaabiltaʼan kaʼach Dorcas?... Le Bibliaoʼ ku yaʼalikeʼ letiʼeʼ tu beetaj siibaloʼob yéetel tu beetaj uláakʼ baʼaloʼob maʼalobtak. Yaʼab baʼax eʼesikeʼ letiʼeʼ ku chuyik nookʼoʼob utiaʼal u síi tiʼ le máaxoʼob kimen u yíichamoʼoboʼ. Tsʼoʼoleʼ ku tsikbaltik tiʼ tuláakal máak tu yoʼolal Jéeoba jeʼex tu beetil Jesusoʼ.

 ¿A wojel wa baʼax úuch tiʼ Dorcas?... Letiʼeʼ jach táaj kʼojaʼanchajeʼ ka kíimi. Tumen tuláakal u amigoʼob jach yaachaj u yóoloʼobeʼ, tu túuxtoʼob tʼanbil le apóstol Pedrooʼ. Le apostolaʼ kex 4 leguas (16 kilometroʼob) u náachil le tuʼux bijaʼanoʼ yéetel aʼalaʼabtiʼ ka séeb taalak. Ka kʼuch le apostolaʼ ook teʼ naj tuʼux yaan Dorcasoʼ, le koʼoleloʼoboʼ táan kaʼach u yookʼloʼob le ka tu yeʼesoʼobtiʼ le nookʼoʼob beetaʼab tiʼob tumen Dorcasoʼ.

Pedro túuneʼ tu yaʼalaj ka láaj jóokʼkoʼob teʼ najoʼ. Letiʼ yéetel uláakʼ apostoloʼobeʼ tsʼoʼok u yáax beetkoʼob milagroʼob baʼaleʼ mix juntéen u líiʼsoʼob kimenoʼob. ¿Baʼax a tuklik tu beetaj Pedro ka tsʼoʼoki?...

Xolaj teʼ tuʼux yaan le kimenoʼ ka orarnaj tiʼ Jéeoba. Tsʼoʼoleʼ tu yaʼalaj tiʼ Dorcas ka líikʼik, ¡letiʼ túuneʼ kaʼa líikʼi! Pedroeʼ tu tichʼaj u kʼab tiʼeʼ ka tu yáantaj líikʼil, tsʼoʼoleʼ tu yaʼalaj tiʼ u maasil ka ookkoʼob u yiloʼoboʼ. ¿Bix a tuklik tu yuʼubilubaʼob ka tu yiloʼob líikʼ Dorcas?...

Koʼox ilik baʼax jeʼel k-kanik tiʼ úuchik u líiʼsaʼal Dorcasoʼ. Le tsikbalilaʼ ku yeʼesikeʼ wa ka weʼesik a wutsil tiʼ u maasileʼ yaʼab máax ken u yaabiltech. Tsʼoʼoleʼ u maas maʼalobileʼ Dioseʼ yaan u yaabiltkech, maʼ ken u tuʼubs le baʼaxoʼob maʼalobtak ka beetkoʼ yéetel yaan a kuxtal utiaʼal mantatsʼ ich kiʼimak óolal teʼ Paraísooʼ.

XOK TA BIBLIA

Beetaʼanoʼob [Hechos] 9:36-43

Apocalipsis 21:3-5

[Tsolajil]