Familiana ukat sapa mayni Bibliat yatxatañataki yanapanaka

AKA uraqpachanxa, Jehová Diosan Qhanañchirinakapax 2009 marat aksarux janiw chika semananxa pä kuti tantachasxtanti, jan ukasti mä kutikiw tantachasxtanxa. Maynïr tantachäw lantix Familiana Diosar Yupaychañataki Aruma ukat Bibliat sapa mayni yatxatañasatakiw Uraqpachan Jilïr Irpiri jilatanakaxa chʼamañchtʼapxistu. ¿Uka wakichäwit askinak apsusktanti?

Kuna tuqinakatsa yatxatapxirista sasaw walja jilat kullakanakax jisktʼasipxi. Chiqansa, kunjamas lurasiñapa ukatakix janiw mä wakichäwix utjkiti, jan ukasti familian pʼiqtʼirinakaw familiapatakjam amtxapxañapa, ukat sapäsipki uka jilat kullakanakasa jupanakaw amtxapxañaparaki.

¿Kunjamsa lurapxaspa? Yaqhipanakax taman utjki uka tantachäwinakatakiw waktʼayasiñ yatipxi, ukampis janiw sapa kutis ukhampun lurksnati. Jan ukasti, familpachaw Bibliat liytʼapxsna ukat Bibliat apstʼat qillqatanakatsa yatxataraksnawa. Ukat familian jiskʼa wawanakax utjchi ukhax yamas mä dramar uñtasitwa waktʼayapxaraksna. Ukampirusa, janiw sapa kutis Tantachasiñ Utanjam jisktʼanakampi lurasiñapäkiti. Jan ukasti, kunjamatsa familian jan axsartʼas sumat parltʼasiñax utjaspa ukatakjam wakichasiñapawa. Ukhamatwa Familiana Diosar Yupaychañataki Aruma siski uka tantachäwix taqinitakis wali askïni.

Kimsa wawan mä jilatax akham sasaw qillqatayna: “Sapa semanatak Biblia liyiñataki wakichäwix utjki ukarjamaw lurapxta. Nayraqatxa, taqiniw jayäkipan liytʼapxta, ukatsti kawkïr tʼaqatsa wawanakajax jukʼamp yatxattʼaniñ munapxi uk sapa mayniw ajlltʼasipxi. Ukxarusti, taqiniw tantachtʼasipxta, kunsa sapa maynix yatxattʼanipxatayna ukwa qhanañchtʼapxi. Paqallq marani Michael wawajax amuyataparjamaw dibujtʼi jan ukax mä jiskʼa tʼaqa qillqtʼi. Ukat Davitax 13 maraniwa, Kaitlynasti 15 maranirakiwa, jupanakas uñjapkaspa ukhamwa Bibliat liytʼasax qillqtʼapxaraki. Sañäni, Génesis 40 jaljanxa, Faraonan tʼantʼa luriripampi ukat vino askatiripampix mä samkwa samkasipxatayna sasaw qhanañchi, Kaitlynax uka tuqit liytʼasaxa jupas Joseyamp chik carcelankkaspa ukhamwa qillqatayna” sasa.

Chiqansa, taqi familianakax janiw kikpäpkiti, inas jumatakix yaqha yanaptʼanakax askirakïchispa. Ukhamasti, akxar jutki uka jananwa walja yanaptʼanak jikxatarakïta, uka yanaptʼanakampiw familiamampi jan ukax Bibliat sapak yatxatasax yantʼasma. Inas yaqha amuytʼamax juman utjarakchi.

[6, 7 jananakan recuadropa/fotopa]

 ¿Wawanakamax qʼaxu wayn tawaqüxapxiti?

• Kunsa wayn tawaqunakax yatiñ munapxi sat libron mä yatichäwipat liytʼasaw qhanañchtʼapxasma.

• Biblian parlki uka sarnaqäwinakat maya liytʼapxasma ukat akham sasaw jisktʼapxarakisma: “Kuns jumax lurasmäna” sasa (La Atalaya 1996 mayo 15, jana 14, 17-18 tʼaqanaka uñxattʼäta).

• Kuna amtanaksa jichhpacha ukat qhipat phuqsna uka tuqinakatwa parlaraksna.

• Diosan markapan utjki uka videonak uñjasaw amuykiptʼapxsna.

• “Wayn tawaqunakataki” siski ukwa Yatiyañataki sat revistat yatxatapxsna.

¿Chacha warmikïpxtati?

• Familian sum jakasiñatakixa kunas munasi sat libronwa 1, 3 ukat 11-16 yatichäwinakat yatxattʼapxsna.

• Bibliat sapa mayni jukʼamp yatxattʼasaw mä jiskʼa tʼaqat qhanañchtʼapxsna.

• Taman Bibliat Yatxatañataki jan ukax Yatiyañataki revistat taman yatxatañatakiw wakichtʼasipxsna.

• Kunjamatsa chacha warmjamax jukʼamppach yatiysna uka tuqit parlakiptʼapxsna.

¿Sapakïsktati jan ukax sapakich Diosan markapankta?

• Kimsa uru jachʼa tantachäwin mistki uka qillqatanakampiw yatxattʼsna.

• Jichha mara jan ukax nayra maranak mistki uka Anuario qillqatwa liytʼapxsna.

• Yatiykasin kunanaksa jisktʼapxistu ukar qhanañchañatakiw yatxatsna.

• Kunjamsa jaqinakamp parltʼañ qalltsna, ukwa yatsupsna.

¿Wawanakamax jiskʼäsipkiti?

• Biblian utjki uka sarnaqäwinakatwa mä dramjam lurapxsna.

• ¡Despertad! revistan 30, 31 jananakatwa yatxataraksna.

• Yaqha wakichäwinaksa waktʼayaraksnawa (“Chʼamachasitasax janiw inamayäkaniti” siski uka yatichäwi Yatiyañataki 2011 febrero15, jana 11 uñxattʼäta).

• Yatiyañataki revistan “Wawanakar yatichañataki” siski uka yatichäwit qhanañchtʼaraksna.