Mga Suhestion Para sa Pampamilyang Pagsamba Asin Personal na Pag-adal

SA KAPINONAN kan 2009, liniwat kan mga kongregasyon nin Mga Saksi ni Jehova sa bilog na kinaban an saindang iskedyul nin mga pagtiripon. Pinagsaro an duwang pagtiripon sa laog kan semana, asin dinagka an gabos na gamiton an bakanteng banggi para sa pampamilyang pagsamba o personal na pag-adal. Inaaprobetsaran na daw nindo an bagong areglong iyan? Lubos daw kamong nakikinabang dian?

Iniisip-isip nin nagkapira kun anong publikasyon an maninigo nindang gamiton sa pampamilyang pagsamba. Bako man katuyohan kan Namamahalang Grupo na mag-establisar nin sarong pamamaagi para sa gabos na pamilya. Mantang laen-laen an kamugtakan, angay sanang turotimbangon kan lambang payo nin pamilya o indibiduwal kun paano ninda magagamit sa pinakamarahay na paagi an semanal na aktibidad na ini.

An nagkapira nag-aandam para sa mga pagtiripon kan kongregasyon, alagad dai man kaipuhan na pirmeng arog kaiyan an pampamilyang pagsamba. An iba nagbabasa nin sono sa Kasuratan na impormasyon, pinag-oolayan asin iinaakto pa ngani iyan, nangorogna para sa kapakinabangan kan saradit na aki. An hapot-simbagan na pamamaagi, arog kan ginigibo sa pagtiripon kan kongregasyon, tibaad dai man pirmeng kaipuhan o bako nganing kawiliwili. An relaks na kamugtakan parateng mas nakakatabang sa pagigin buhay kan pag-orolay asin sa pagrinibayan nin mga ideya. An siring na kamugtakan nakakatabang sa pag-isip nin bagong mga ideya, na huli kaiyan magigin memorable asin nakakagayagaya para sa gabos an aktibidad na iyan.

An sarong ama na may tolong aki nagsurat: “Haros gabos na ginigibo mi basado sa pagbasa sa Biblia. Patienot na binabasa kan kada saro sa samo an mga kapitulo, nagpipili an mga aki nin sarong puntong sisiyasaton, dangan ipinepresentar ninda an nasiyasat ninda. Si Michael [siete anyos] parateng nagdodrowing o nagsusurat nin parapo sa sadiri niang tataramon. Si David asin Kaitlyn [13 asin 15 anyos] nagsusurat nin manongod sa sarong estorya sa Biblia na garo man sana sinda an nakaheling mismo kan pangyayari. Halimbawa, kan binabasa mi an manongod sa interpretasyon ni Jose sa mga pangatorogan kan panadero asin kopero ni Faraon, nagsurat si Kaitlyn nin sarong estorya na garo man sana sia an preso na nakaheling mismo kan mga pangyayari.”—Gen., kap. 40.

Natural sana na laen-laen an kamugtakan. An pamamaagi na epektibo sa sarong indibiduwal o pamilya tibaad sa iba bako. Maheheling sa kahon sa sunod na pahina an nagkapirang suhestion na puedeng gamiton sa saindong pampamilyang pagsamba o personal na pag-adal. Posibleng marhay na makakaisip kamo nin dakol pang iba.

[Kahon/Ritrato sa pahina 6, 7]

 Para sa mga pamilya na may mga aking tin-edyer:

• Basahon asin pag-olayan an Questions Young People Ask—Answers That Work.

• Imahinara na nabuhay kamo kaidtong mga panahon kan Biblia. (Helingon An Torrengbantayan na Mayo 15, 1996, pahina 14, parapo 17-18.)

• Pag-olayan an panghaloyan asin madali sanang aboton na mga pasohan.

• Sa panapanahon, magdalan o magheling nin video na basado sa Biblia asin pag-olayan iyan.

• Pag-olayan an kabtang na “Para sa mga Hoben” na nasa An Torrengbantayan.

Para sa mga mag-agom na mayong aki:

• Pag-olayan an kapitulo 1, 3, 11-16 kan librong An Sekreto sa Kaogmahan nin Pamilya.

• Pag-olayan an resulta kan pagsiyasat dapit sa mga puntong nakua sa pagbasa sa Biblia.

• Mag-andam para sa Pag-adal sa Biblia kan Kongregasyon o Pag-adal sa Torrengbantayan.

• Pag-olayan an mga paagi nin pagpahiwas sa saindong ministeryo bilang mag-agom.

Para sa mga tugang na mayong agom o miembro nin pamilyang bakong gabos Saksi:

• Pag-adalan an bagong mga publikasyon na ilinuwas sa mga pandistritong kombension.

• Basahon an bago asin nakaaging mga Yearbook.

• Magsiyasat dapit sa parateng mga ihinahapot nin mga tawo sa saindong teritoryo.

• Mag-andam nin mga presentasyon para sa ministeryo sa langtad.

Para sa mga pamilyang may saradit na aki:

• Iakto an mga eksena sa Biblia.

• Magkawat nin mga memory game, arog baga kan nasa pahina 30 asin 31 kan Awake!

• Kun minsan, magplano nin interesanteng aktibidad. (Helingon an “Studying the Bible—In the Zoo!” sa Awake! na Marso 8, 1996, pahina 16-19.)

• Pag-olayan an kabtang na “Tokdoan an Saindong mga Aki” na nasa Torrengbantayan.