Dagiti Pamay-an Para iti Panagdaydayaw ti Pamilia ken Personal a Panagadal

NANGRUGI idi 2009, maminsan laengen nga aggimong dagiti Saksi ni Jehova iti tengnga ti lawas. Gapu iti dayta a panagbalbaliw, paregtaennatayo ti Bagi a Manarawidwid nga usarentayo ti maysa a rabii iti tengnga ti lawas para iti panagdaydayaw ti pamilia wenno personal a panagadal. Ap-aprobetsarenyo kadi daytoy baro nga urnos? Mabembenipisiarankayo kadi iti dayta?

Ania ti rumbeng nga adalentayo bayat ti panagdaydayaw ti pamiliatayo? Saan a mangipaspasdek ti Bagi a Manarawidwid iti maymaysa nga urnos para iti amin a pamilia. Gapu ta nagduduma ti kasasaad, maitutop a ti ulo ti pamilia wenno indibidual ti mangkita no kasano ti kasayaatan a pannakausar dayta a linawas a panagadal.

Dadduma ti agsagana para kadagiti gimong ti kongregasion, ngem saan laeng a dayta ti mabalin nga aramiden iti panagdaydayaw ti pamilia. Adda dagidiay mangbasa iti salaysay iti Biblia, pagsasaritaan, ken idramada pay dayta tapno magunggonaan dagiti ubbing. Saan a kasapulan a saludsod ken sungbat ti panagdaydayaw ti pamilia kas iti gimong ti kongregasion. Ad-adda a makaparegta ti panagsasarita ken panagririnnanud iti kapanunotan no relaks ti panagadal. Ken adu pay ti mapanunotyo a mamagbalin iti panagadalyo a makaparagsak iti amin.

Insurat ti maysa nga ama nga addaan iti tallo nga annak: “Masansan a ti ar-aramidenmi ket naibatay iti nabasami iti Biblia. Tunggal maysa basaenna a nasakbay dagiti kapitulo sa mangpili iti sukimatenna ken iparangna dagita. Ni Michael [agtawen iti pito] ket masansan nga agdrowing wenno agsurat maipapan iti nabasana. Da David ken Kaitlyn [agtawen iti 13 ken 15] mangisuratda iti salaysay iti Biblia a kasla mabuybuyada ti mapaspasamak. Kas pagarigan, idi binasami ti panangilawlawag ni Jose iti tagtagainep ti panadero ken ti agaw-awit iti kopa ni Faraon, isalaysay dayta ni Kaitlyn a kasla isu ket maysa a balud a mangpalpaliiw iti sumaganad a mapasamak.”​—Gen., kap. 40.

Gagangay a nagduduma ti kasasaad. Ti epektibo iti maysa a pamilia wenno indibidual ket mabalin a saan nga epektibo iti dadduma. Adda sumagmamano a pamay-an a naidatag iti kahon a mabalinyo nga aramiden iti panagdaydayaw ti pamiliayo wenno iti personal a panagadalyo. Sigurado nga adu pay a pamay-an ti mapanunotyo.

[Kahon/Ladawan iti panid 6, 7]

 Kadagiti pamilia nga addaan iti annak a tin-edyer:

• Basaen ken pagsasaritaanyo ti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo.

• Panunotenyo nga addakayo idi tiempo ti Biblia. (Kas pagarigan, kitaenyo Ti Pagwanawanan a Mayo 15, 1996, panid 14, parapo 17-18.)

• Pagsasaritaanyo dagiti babassit ken dadakkel a kalat.

• Pasaray agbuya ken pagsasaritaanyo ti naibatay iti Biblia a video.

• Usigenyo ti benneg ti Pagwanawanan a “Para Kadagiti Agtutubo.”

Kadagiti agassawa nga awanan annak:

• Pagsaritaanyo ti kapitulo 1, 3, 11-16 ti libro a Ti Sekreto ti Kinaragsak iti Pamilia.

• Pagsaritaanyo dagiti punto a nasukimatyo iti panagbasayo iti Biblia.

• Agsaganakayo para iti Panagadal iti Biblia ti Kongregasion wenno Panagadal iti Pagwanawanan.

• Pagsaritaanyo no kasano a mapalawayo ti ministerioyo kas agassawa.

Kadagiti awanan asawa wenno saan a Saksi ti kapamiliana:

• Adalenyo dagiti baro a publikasion a naawatyo iti kombension distrito.

• Basaenyo ti agdama ken napalabas a Tinawen a Libro.

• Sukimatenyo ti sungbat dagiti gagangay a saludsod iti teritoriayo.

• Agsaganakayo kadagiti presentasion para iti tay-ak ti ministerio.

Kadagiti pamilia nga addaan babassit nga annak:

• Idramayo dagiti eksena ti Biblia.

• Agay-ayamkayo kas iti adda iti panid 30 ken 31 ti Agriingkayo!

• Pasaray mangaramidkayo iti aktibidad a mangpaandar iti imahinasionyo. (Kitaenyo ti “Pannakaadal ti Biblia​—Idiay Zoo!” iti Agriingkayo! a Marso 8, 1996, panid 16-19.)

• Adalenyo ti benneg ti Pagwanawanan nga “Isuroyo Dagiti Annakyo.”