Epanọ A Sai ro Ru Egagọ Uviuwou gbe Uwuhrẹ Ebaibol Omobọ Ohwo

EVAỌ ubrobọ emuhọ ukpe 2009, a jọ ikoko Isẹri Jihova nọ e rrọ akpọ na soso ru inwene jọ kpahe iwuhrẹ rai. A rehọ iwuhrẹ nọ a jẹ hai ru evaọ edẹ ivẹ ziọ ẹdẹ ọvo, yọ a tuduhọ ahwo kpobi awọ re a rehọ owọwọ jọ ro ru egagọ uviuwou hayo uwuhrẹ Ebaibol omobọ ohwo. Kọ whọ be rehọ uvẹ nana ru iruo ziezi? Kọ who bi wo erere noi ze vọvọ?

Ahwo jọ a riẹ obe nọ u fo nọ a re ro ru egagọ uviuwou rai hi. Ugboma Esuo na o gwọlọ fodẹ obe jọ nọ uviuwou kpobi u re ro ru egagọ uviuwou hu. Nọ orọnọ iyero iviuwou e rrọ oghẹrẹ ovo ho na, enọ i wuzou uviuwou gbe omomọvo a rẹ salọ ebe nọ i fo kẹ ae.

Iviuwou jọ a rẹ ruẹrẹ oma họ kẹ iwuhrẹ ukoko, rekọ orọnikọ oye ọvo họ egagọ uviuwou hu. Efa a re se ebe ukoko na, rehọ ae t’ẹme kugbe, jẹ tubẹ rehọ ae ru edrama, maero fiki emaha nọ e rrọ uwou na. Orọnikọ ẹsikpobi u re kiehọ họ re a rọ enọ gbe iyo ru egagọ uviuwou, wọhọ epanọ ma rẹ jọ obọ Ọgwa Uvie ru na. O rẹ mai woma re a ru egagọ uviuwou evaọ oghẹrẹ nọ udu u re ro te ohwo kpobi otọ. Onana u re ru nọ ohwo kpobi ọ sae rọ zọhọ fihọ egagọ uviuwou na, a ve je wo omawere riẹ.

Oniọvo-ọmọzae jọ nọ o wo emọ esa o kere nọ: “Ebaibol ma jẹ hai se ro ru egagọ uviuwou mai. Omomọvo o re se oria nọ ma ti ro ru egagọ uviuwou mai na kpahotọ, emọ na a vẹ kiẹ kpahe eware jọ nọ a se ku, a vẹ jọ etoke egagọ uviuwou na fodẹ oware nọ a kiẹ via kẹ ohwo kpobi. Michael [nọ ọ rrọ ikpe ihrẹ] ọ rẹ drọ uwoho hayo rọ eme obọ riẹ kere eware jọ nọ o se ku fihotọ. David [nọ ọ rrọ ikpe 13] gbe Kaitlyn [nọ ọ rrọ ikpe 15] a re kere kpahe ikuigbe Ebaibol wọhọ ẹsenọ a jọ etẹe okenọ eware na e jẹ via. Wọhọ oriruo, nọ ma je se kpahe okenọ Josẹf ọ rọ fotọ ewezẹ idibo Fẹro nọ e jọ uwou-odi, Kaitlyn o kere iku na wọhọ ẹsenọ ọ jọ uwou-odi na jẹ ruẹ eware nọ e jẹ via.”—Emu., uzou avọ 40.

Evaọ uzẹme, iyero iviuwou e rrọ epọvo na ha. Obe nọ u re woma kẹ ohwo jọ hayo uviuwou jọ o rẹ sai woma kẹ ọfa ha. Ma jọ ẹkpẹti nọ ọ rrọ aro na dhesẹ eware jọ nọ a sai ro ru egagọ uviuwou hayo uwuhrẹ omobọ ohwo. Ababọ avro, whọ sai roro ku efa.

[Ẹkpẹti/​Uwoho nọ o rrọ ẹwẹ-obe avọ 6, 7]

 Rọkẹ iviuwou nọ emọ ikpe ikpegbọ e rrọ:

• Wha se jẹ t’ẹme kpahe obe na Questions Young People Ask—Answers That Work.

• Wha se jẹ ta kpahe ikuigbe Ebaibol, wha ve je fi oma rai họ iyero ahwo nọ wha se kpahe na. (Rri Uwou-Eroro Na ọrọ June 1, 1996, ẹwẹ-obe avọ 12, edhe-ẹme avọ 17-18.)

• Wha ta kpahe itee nọ wha sai le t’obọ evaọ obọnana gbe enọ wha rẹ sai le t’obọ evaọ obaro.

• Wha te gbe oke jọ h’oma, wha riwi ividio ukoko na jọ jẹ ta ẹme kpahe iẹe.

• Wha t’ẹme kpahe uzoẹme nọ o be hae roma via evaọ Uwou-Eroro Na nọ o ta nọ: “Rọkẹ Izoge Na.”

Rọkẹ imava-orọo nọ i wo emọ họ:

• Wha ta kpahe uzou 1, 3, 11-16 orọ obe na Edidi Evawere Uviuwou.

• Wha ru ekiakiẹ kpahe eria Ebaibol re wha ta eware nọ wha kiẹ via kẹ ohwohwo.

• Wha ruẹrẹ oma kpahe kẹ Uwuhrẹ Ebaibol Ukoko hayo Uwuhrẹ Uwou-Eroro Na.

• Wha ta kpahe idhere nọ whai imava wha sae rọ nya haro evaọ odibọgba na.

Rọkẹ inievo nọ e re rọo ho hayo enọ ahwo uviuwou rai jọ e rrọ ukoko ho:

• Se ebe ekpokpọ nọ a siobọno evaọ ikokohọ ubrotọ.

• Se Yearbook ekpokpọ gbe erọ anwae.

• Ru ekiakiẹ kpahe enọ nọ a be hae nọ evaọ ẹkwotọ rai.

• Ruẹrẹ izoeme nọ whọ sae rọ ta usiuwoma họ.

Rọkẹ iviuwou nọ emaha e rrọ:

• Wha rọ ikuigbe Ebaibol ru edrama.

• Wha nọ enọ no Ebaibol ze, wọhọ enọ e rẹ roma via evaọ ẹwẹ-obe avọ 30 gbe 31 ọrọ Awake!

• Wha ru oware okpokpọ ẹsejọ. (Rri uzoẹme na “Omodawọ na O Rrọ Uvrẹvru Hu!” evaọ Uwou-Eroro Na ọrọ February 15, 2011, ẹwẹ-obe avọ 11.)

• Wha rehọ uzoẹme na “Wuhrẹ Emọ Ra” nọ o be hae roma via evaọ Uwou-Eroro Na ru egagọ uviuwou.