Mibelu ya mua kuenza ntendelelu wa mu dîku ne kudilongela
Mibelu ya mua kuenza ntendelelu wa mu dîku ne kudilongela
KU NTUADIJILU kua tshidimu tshia 2009, bisumbu bia Bantemu ba Yehowa biakatuadija kuenza bisangilu dituku dimue munkatshi mua lumingu pamutu pa matuku abidi. Bua dishintuluka edi, Kasumbu kaludiki kavua katukankamije bua kutuadija kuenza ntendelelu wa mu dîku anyi kudilongela ku lumingu luonso pa dituku dituvua tuenza Dilonga dia mukanda. Utuku ulonda ndongamu eu anyi? Malu audi usungula bua kuenza dituku didibu batushile edi, adi mua kukuambuluisha wewe ne bena mu dîku diebe bikole.
Mmalu kayi atudi ne bua kulonga mu ntendelelu wa mu dîku? Kasumbu kaludiki ki nkaleje malu adi bena mu dîku mua kulonga lumingu luonso to. Dîku ne dîku didi ne adi majinga. Nunku mfumu wa dîku udi ne bua kuela meji bua majinga adi nawu bena mu dîku diende ne kusungula malu adi mua kubambuluisha. Bantu badi kabayi ne mêku badi pabu mua kusungula bua kuenza mudimu bimpe ne dîba didibu babashile edi.
Bena mu amue mêku batu balongolola bisangilu bia tshisumbu pamue. Kadi kuenza nunku nkayaku ki nkudi kukengela bua ntendelelu wa mu dîku to. Bena mu makuabu mêku batu babala Bible anyi malu adi mu mikanda yetu ne bayukidilangana pamue pa malu au. Bakuabu batu balongolola muyuki kampanda wa mu Bible mu dinaya. Kuenza nunku kutu kutamba kuambuluisha bana batekete. Nunku kabiena bikengela kuenza ntendelelu wa mu dîku bu mututu tuenza bisangilu bia tshisumbu mutubu babala bikoso ne bela nkonko to. Ntendelelu wa mu dîku udi ne bua kuikala tshikondo tshitudi tuetu bonso mua kuakula ne kuleja malu adi mu mutshima. Ntshikondo tshitudi mua kuela meji ne kuyukidilangana pa malu mimpe atuvua babale mu Bible. Tuetu tuenza nunku, ntendelelu wa mu dîku neasankishe muena mu dîku yonso.
Tatu kampanda wa bana basatu udi uleja tshitubu benza pa tshibidilu mu Ntendelelu wa mu dîku. Muanende wa kumpala ngua bakaji, diende Kaitlyn, udi ne bidimu 15, muibidi diende David, udi ne bidimu 13 ne muisatu Michael, udi ne bidimu 7. Mu Ntendelelu wabu wa mu dîku batu bakonkonona nshapita ya mu dibala dia Bible dia ku lumingu luonso. Tshia kumpala, muntu yonso udi wanji kudibadila nshapita eyi. Tshibidi, bana badi basungula bualu kampanda budibu basue kumanya bimpe. Pashishe badi bambila baledi babu malu adibu bapete mu dibala diabu. Misangu ya bungi, Michael utu uzola anyi ufunda bualu budiye mubale. David ne Kaitlyn batu imue misangu bafunda pa dibeji bualu budibu babale mu Bible bienza anu bu ne: bavuapu pavua bualu abu buenzeka. Tshilejilu, lumingu kampanda bavua babale muyuki udi mu Genese nshapita wa 40 udi wakula bua tshikondo tshivua Yosefe mumvuije bena mudimu babidi ba Palô bilota biabu. Kaitlyn wakafunda bualu ebu bienze anu bu ne: uvua pende mu buloko umona bivua bienzeka.
Etshi tshidi anu tshilejilu tshimue patupu tshia mudi bena mu mêku mua kuenza ntendelelu wa mu dîku. Bu mudi muntu yonso mushilangane ne mukuabu, nunku muntu yonso anyi dîku dionso didi mua kusungula malu adi madiakanyine. Kazubu kadi mu tshiena-bualu etshi kadi ne imue ngenyi ya malu atudi mua kuenza mu ntendelelu wa mu dîku anyi didilongela. Udi mua kukeba ngenyi mikuabu miakanyine.
[Kazubu/Tshimfuanyi mu mabeji 6, 7]
Bua mêku adi ne bana:
• Balayi ne nuyukidilangane pa nshapita kampanda wa mukanda wa Les jeunes s’interrogent—Réponses pratiques.
• Difuanyikijayi bu ne: nuvuapu tshikondo tshivuabu bafunda Bible. (Tshilejilu, tangilayi Tshibumba tshia Nsentedi tshia dia 15/5/1996 dibeji dia 14, tshikoso tshia 17-18.)
• Yukidilanganayi pa tshinudi balongolole bua kuenza mu mudimu wa Yehowa mpindieu ne mu matuku atshidi alua.
• Tangilayi umue wa ku filme yetu ne nuyukidilanganapu.
• Longayi tshiena-bualu tshia “Buenu nuenu bansonga” tshidi mu Tshibumba tshia Nsentedi.
Bua bena dibaka badi kabayi ne bana:
• Yukidilanganayi pa nshapita wa 1, 3, 11-16 ya mu mukanda wa Nsapi wa disanka mu dîku.
• Nubale ne nulonge imue nshapita ya mu Bible ne nuyukidilangane pa malu anudi nupetamu.
• Nulongolole Dilonga dia Bible dia tshisumbu anyi dilonga dia Tshibumba tshia Nsentedi.
• Nuyukidilangane pa mushindu unudi mua kuvudija mudimu unudi nuenzela Yehowa.
Bua badi kabayi ne dîku anyi badi mu dîku pamue ne bantu bakuabu badi kabayi Bantemu:
• Longa mukanda mupiamupia utuvua bapete mu mpungilu wa distrike.
• Bala Annuaire wa tshidimu tshidi panshi ne ya bidimu bishale.
• Longa mua kuandamuna nkonko mishilashilangane itu bantu bela paudi ubayisha.
• Longolola amue malu audi mua kuakula paudi uyisha bantu.
Bua mêku adi ne bana batekete:
• Longololayi muyuki kampanda wa mu Bible bua kuwenza mu dinaya.
• Enzayi manaya, bu mudi adi mu dibeji dia 30 ne 31 mu Réveillez-vous!
• Enzayi bualu kampanda budi busaka bana bua kunana lungenyi. (Tshilejilu, bala tshiena-bualu tshia “Étudier la Bible au zoo!” tshidi mu Réveillez-vous! wa 8/3/1996 dibeji dia 16-19.)
• Balayi pamue biena-bualu bia mu tshiena-bualu tshinene tshia “Longesha bana bebe” tshidi mu Tshibumba tshia Nsentedi.