Yore Minyalo Tigo e Lamo mar Joot Kata e Puonjruok mar Ng’ato Owuon

E CHAK higa 2009, ne otim lokruok e chenro mar chokruoge kanyakla mag Joneno mag Jehova e piny mangima. Chokruoge ariyo ma ne itimo e kor juma ne oriw karachiel, kendo ne ojiw ji duto mondo oti gi odiechieng’ ma ne odong’ thuolono, e timo lamo mar joot kata puonjruok mar ng’ato owuon. Be isebedo kitiyo maber gi chenro manyienno? Be iyudo ber mogundho kuom chenrono?

Jomoko osebedo ka penjore kuom weche ma ginyalo puonjore e lamo mar joot. Bura Maduong’ ok chan loso chenro achiel ma joot ka joot onego otigo. Nikech chal mar ji opogore, en gima owinjore ka jogo magin wiye udi, kata ng’ato ka ng’ato owuon, onon kaka ginyalo tiyo e yo maber moloyo gi thuolono.

Jomoko osebedo ka tiyo gi thuolono e timo ikruok ne chokruoge mag kanyakla, kata kamano, lamo mar joot ok oriwo mano kende. Jomoko osebedo ka somo Ndiko, wuoyo matut kuom Ndiko, kata mana timo drama e wi Ndiko, to moloyo mondo gikony nyithindgi matindo. Ok ochuno ni kinde duto nyaka uti gi yor penjo gi dwoko kaka wajotimo e chokruogewa. Lamo mar joot onego obed kinde ma joot winjo ka gin thuolo mar wuoyo kendo jiwore ng’ato gi ng’ato. Thuolo ma kamano konyo joot yawo pachgi, kendo mano nyalo miyo kindeno obed mamoro joot duto.

Wuoro moro ma nigi nyithindo adek wacho kama: “Gik ma wasebedo ka watimo wuok ahinya e somo mar Muma. Waduto wajosomo motelo sula mag Muma, nyithindwa yiero weche moko ma ginyalo timone nonro, kae to ginyisowa gik ma gisepuonjore. Kinde mang’eny, Michael [jahigini abiriyo] jagoro pichni kata ndiko weche moko matin motudore gi nonro mare. David kod Kaitlyn [ma johigini 13 kod 15] nyalo ndiko weche moko e wi sigana moro ei Muma ka gitimore ka gima gin joneno. Kuom ranyisi, kane wasomo e wi lek ma Josef ne oloko ne jated mkate gi jalos divai mar Farao, Kaitlyn nondiko wechego ka gima ne en achiel kuom jomotwe e jela, ma neno gik matimore.”—Chak., sula 40.

En adier ni, chal mag ji opogore. Yore manyalo tiyo ne ng’ato kata joot moko, ok bi tiyo ne jomamoko. Sanduk maluwo nyiso yore mogwaro munyalo tiyogo e lamo mar joot kata e puonjruok mar ng’ato owuon. In bende inyalo paro kuom yore mamoko mathoth.

[Sanduk/Picha manie ite 6, 7]

 Ne joot ma nigi rowere:

• Somuru kendo wuouru kuom weche manie Maswali Ambayo Vijana Huuliza—Majibu Yafanyayo Kazi.

• Timuru ikruok kutiyo gi “To nade ka . . . ?” (Ne Mnara wa Mlinzi ma Mei 15, 1996, ite mar 14, paragraf 17-18.)

• Wuouru kuom chenro muketo munyalo chopo sani koda e kinde mabiro.

• Kinde ka kinde, unyalo neno kendo wuoyo kuom vidio malero Muma.

• Nonuru sula ma wigi wacho ni, “Ne Rowere” e Ohinga mar Jarito.

Ne joma okendore to onge nyithindo:

• Nonuru sula 1, 3, 11-16 mar Be Inge’yo Gima Kelo Mor mar Joot?

• Wuouru kuom weche mupuonjoru bang’ somo Muma kendo timo nonro.

• Timuru ikruok ne Puonjruok Muma e Kanyakla kata ne Puonjruok mar Ohinga mar Jarito.

• Wuouru kuom kaka unyalo medo timo mathoth e tij Nyasaye kanyachiel.

Ne owete koda nyimine maok nie kend, kata joma wuok e udi ma jomoko ok gin Joneno:

• Puonjreuru buge manyien mogol e chokruoge distrikt.

• Somuru Kitabu cha Mwaka masani koda machon.

• Timuru nonro kuom penjo ma ji hinyo penjo e alworau mar lendo.

• Ikuru weche mubiro tiyogo e tij lendo.

Ne joot ma nigi nyithindo matindo:

• Timuru drama mag weche Muma.

• Timuru tuke makonyo e paro weche kaka majayudore e Amkeni!, ite mag 30 kod 31.

• Kinde ka kinde timuru gik mayawo pach nyithindo. (Ne “Puonjruok Muma —E Kuonde Miritoe Le!” e Amkeni! ma Mach 8, 1996, ite mag 16-19.)

• Nonuru sula ma wiye wacho ni, “Puonj Nyithindi” e Ohinga mar Jarito.