Saray Suhestion Parad Panagdayew na Pamilya tan Personal ya Panagaral

DIAD gapo na 2009, walay inuman na saray kongregasyon na saray Tasi nen Jehova ed interon mundo diad eskedyul na aral da. Say duaran aral et impaniba da, tan pinaseseg so amin ya samay datin eskedyul ed CBS et usaren la parad panagdayew na pamilya odino personal a panagaral. Kasin nagagawaan yo iyan balon uksoyan? Kasin baleg so nitutulong na saya ed sikayo?

Itetepet na arum no anto so aralen da diad panagdayew na pamilya ra. Ag-angiter so Mananguley ya Ulop na espisipikon paraan ya kaukolan a tumboken na kada pamilya. Lapud nandurumay situasyon, responsabilidad na ulo na kada pamilya odino na kada indibidual so pampili na aralen a sinimba.

Dakel ya pamilya so manpaparaan parad aral ed kongregasyon. Balet, wala ni ray nagawaan diad panagdayew na pamilya. Saray arum et babasaen, pantotongtongan, tan iyaakto da ni ingen iray istorya ed Biblia pian makaaral iray ugugaw. Agmet kaukolan ya naynay lan tepet tan ebat so gawaen a singa diad aral ed kongregasyon. Lalon makatulong no relaks so amin pian mas maligsay pantotongtong tan paniiteray ideya. Diad ontan et lalo tayon makapanisip, tan magmaliw itan ya makapalikliket tan agnalingwanan ya okasyon.

Oniay insulat na aman walaay taloran anak: “Masakbay lan babasaen na kada sakey ed sikami so Biblia, manpili iray ugugaw na labay dan i-research, insan da ipresenta iray naaralan da. Si Michael [manedad na pitora] et mabetbet ya mandro-drowing odino mansulat nipaakar ed abasa to. Si David tan Kaitlyn [manedad na 13 tan 15] et isusulat day abasa ra a singano nanenengneng day nagagawa. Alimbawa, sanen babasaen mi so nipaakar ed interpretasyon nen Jose ed kugkugip na panadero tan manangasikasoy alak nen Faraon, say impangisulat nen Kaitlyn et singa sikatoy sakey a prison akaimaton ed agawa.”​—Gen., kap. 40.

Siempre, nandurumay situasyon na kada pamilya. Walaray epektibo ed sakey a pamilya ya ag-epektibo ed sananey. Diad biek a pahina et wadtan iray suhestion ya sarag yon usaren ed panagdayew na pamilya yo odino diad personal a panagaral. Balet seguradon wala ni ray arum a nanonotan yo.

[Kahon/Litrato ed pahina 6, 7]

 Parad pamilyan walaay tinedyer ya ananak:

• Basaen tan pantongtongan so Questions Young People Ask​—Answers That Work.

• Imadyin yon manbibilay kayo nen panaon na Biblia. (Nengnengen so Say Panag-bantayan ya Mayo 15, 1996, pahina 14, parapo 17-18.)

• Pantongtongan iray maganon nadampot tan mas mabayag a nadampot a kalat.

• Sagpaminsan, manbantay tan pantongtongan so base ed Biblian video.

• Pantongtongan so artikulo ed Panag-bantayan ya “Parad Saray Kalangweran.”

Parad sanasawan anggapoy anak:

• Pantongtongan so kapitulo 1, 3, 11-16 na libron Say Sekreto na Liket ed Pamilya.

• Inabang iray punton a-research diad impanbasay Biblia.

• Manparaan parad Panagaral na Kongregasyon ed Biblia odino say Panagaral na Panag-bantayan.

• Pantongtongan no panon yon napalaknab so ministeryo yon sanasawa.

Parad saray andiay asawa tan bukor toy Tasi’d pamilya:

• Aralen iray balon publikasyon ya naawat ed distriton kombension.

• Basaen so balo tan daan iran Yearbook.

• Man-research nipaakar ed kaslakan ya itetepet na totoo diad teritorya yo.

• Manparaan na pigaran presentasyon parad panagpulong.

Parad pamilyan walaay angkelag nin ananak:

• Iyakto iray eksena ed Biblia.

• Manggalaw na memory game, a singa saramay walad pahina 30 tan 31 na Awake!

• Sagpaminsan, manisip na duma iran paraan. (Nengnengen so “Nabawbawi Yoy Sagpot Yo!” diad Panag-bantayan ya Pebrero 15, 2011, pahina 11.)

• Pantongtongan so artikulo ed Panag-bantayan ya “Ibangat Yoy Ananak Yo.”