Sawas kan ong Kaudok en Peneinei oh Pein Omw Onop Paipel
Sawas kan ong Kaudok en Peneinei oh Pein Omw Onop Paipel
SANGETE ni tepin pahr 2009, mwomwohdiso kan en Sounkadehdehn Siohwa kan nan sampah pwon sohla kin tuhpene ni soutik riau ahpw re tepida tuhpene pak ehute. Pwehki wekidekla wet, Pwihn me Kin Apwalih Mwomwohdiso nan Sampah Pwon kin kangoange kitail en doadoahngki ehu soutik kan ong kaudok en peneinei de pein atail onop Paipel. Ke kin isaneki doadoahngki koasoandi kapw wet? Dahme ke pilada ken wia soutiko kak uhdahn seweseiuk oh pil omw peneinei?
Dahme kitail pahn doadoahngki ong atail kaudok en peneinei? Pwihn me kin apwalih mwomwohdiso nan sampah pwon sohte kin koasoanehdi dahme ehu peneinei pahn onopki nan ehuehu wihk. Anahn en ehuehu peneinei kin wekpeseng. Ihme kahrehda e konehng tapwin peneinei en medewe dahme eh peneineio anahne oh pilada dahme pahn keieu sewese irail. Peneinei ehu de irail me kiripw kan pil kak kilang ia duwen ar kak doadoahngki koasoandi wet ni ahl me keieu mwahu.
Ekei peneinei kin kaunopada ong mihting en mwomwohdiso kan, ahpw kaidehn ihte met me kitail kak wia. Ekei peneinei kin koasoiahpene dahme re wadek sang Paipel de pil ekei ire sang neitail sawaspen Paipel kan. Pil ekei kin kamwomwada ehu poadopoad en Paipel. Met kin uhdahn mwahu ong seri tikitik kan. Kitail sohte anahne wadek parakrap oh wia peidek oh pasapeng kan ahnsou koaros duwehte me kin wiawi nan mihting kan. Kaudok en peneinei anahne wia ahnsou ehu me koaros kak koasoipene oh nda dahme mi nan mohngiongirail. Kitail kak medewehla dahme kitail wadek sang nan Paipel oh koasoiapene. Ni ahl wet, soutik kan me peneinei kin kohpene pahn wia ahnsou kaperen ong koaros.
Emen pahpa me naineki seri silimen koasoia: “Dahme se kin kalapw wia kin kohsang wadawad en Paipel. Emenemen kiht kin wadekala irelaud kan mwohn at kin onop. Seri kan kin pilada ekei ire pwe ren ropada, oh re kin kasalehda dahme irail diaradahr. Michael [sounpar isuh] kin kalapw wiahda ehu mahlen de ntingihedi ehu parakrap. David oh Kaitlyn [sounpar 13 oh 15] kin ntingihdi ehu koasoipen Paipel nin duwen madamadau en emen me kin kilikilang dahme wiawio. Karasepe, ni ahnsou me se wadekpene duwen Sosep eh kawehwe ouraman en nein Parao nah sounkohwahn waino oh pil kaunen wia pilawao, Kaitlyn ntingihdi dahme wiawi ni eh mwomwehda me ih emen me selidi me kilikilang dahme wiawi.”—Sen., irelaud 40.
Irair kan kin wekpeseng. Dahme kin mwahu ong emenemen de ehu peneinei mwein sohte pahn mwahu ong ekei. Menlau kilang ekei sawas kan nan koakono. Ke kak doadoahngki sawas pwukat ong amwail kaudok en peneinei de pein omw onop Paipel. Mwein ke kak pil medewehda ekei wiepe teikan.
[Kilel kan nan pali 23]
Ong peneinei kan me naineki seri me sounpar 13-19:
• Nin duwen peneinei ehu, wadekpene Paipel ni ngihl laud. Emen sang nan peneinei, mwein pahpao, kak wadek audepen koasoi ko, meteikan kak alasang irail kan me mi nan koasoio oh wadek dahme irail koasoia.
• Koasoia arail mehn akadei kan ong ahnsou mwotomwot de ahnsou reirei.
• Ekei pak, kilang oh koasoiapene ehu kasdo en Paipel.
• Koasoiapene Kahn Iroir me oaralap koasoia “Ong me Pwulopwul kan.”
Ong pwopwoud me sohte naineki seri:
• Ehukihpene ire kan me kumwa ropada sang nan wadawad en Paipel.
• Kaunopada ong Onop en Paipel en Mwomwohdiso de Onop en Kahn Iroir.
• Koasoiapene wiepe kan me kumwa kak kalaudehkihla amwa doadoahk en kalohk nin duwen pwopwoud ehu.
Ong brother oh sister pwulopwul kiripw kan de irail kan me mi nan peneinei ehu me arail pelien lamalam wekpeseng:
• Onop sawaspen Paipel kan me kumwail ahpwtehn alehdi sang mihting tohrohr kan.
• Wadek Yearbook (lokaiahn wai) me kapw oh pil men mahs ko.
• Wia roporop ong peidek kan me kalapw pwarada nan omw wasahn kalohk.
• Kaunopada kisin padahk mwotomwot kan ong kalohk.
Ong peneinei me naineki kisin seri kan:
• Kamwomwada ekei poadopoad kan en Paipel.
• Koasoiapene pwuhken Sukuhlki Sang Sounpadahk Lapalapo.