San yu kan du na a Osofamiri Anbegi noso te yu e studeri yu wawan?

NA A BIGIN fu 2009, wan kenki kon na den gemeente konmakandra fu Yehovah Kotoigi na heri grontapu. Den tu mindriwiki konmakandra e hori now tapu wán dei èn ala sma kisi a deki-ati fu gebroiki a tra dei fu hori na Osofamiri Anbegi, noso fu studeri den wawan efu den no abi wan osofamiri. Yu e hori yusrefi na a seti disi? Yu e kisi wini fu en?

Son sma aksi densrefi san den musu du te den e hori na Osofamiri Anbegi. A Tiri Skin no wani bosroiti gi ala osofamiri san den musu du. Fu di a situwâsi fu ibri sma de tra fasi, meki a bun taki ibri osofamiri edeman noso ibri sma bosroiti gi ensrefi san na a moro bun sani fu du ibri wiki.

Son sma e sreka densrefi gi den gemeente konmakandra, ma a no dati wawan den musu du na a Osofamiri Anbegi. Son sma e leisi wan sani fu Bijbel gi makandra, den e taki fu wan pisi tori fu Bijbel, èn son leisi den e prei wan drama fu wan Bijbel tori. Disi bun spesrutu gi den yongu pikin. A no ala ten a de fanowdu fu hori wan sortu aksi-nanga-piki takimakandra neleki fa wi e du na den konmakandra èn son leisi a no bun fu du dati tu. A bun fu meki ala sma firi switi na a okasi dati. Disi e meki en makriki gi ala sma fu taki san den e denki. Te ala sma e firi bun, den o suku moro fasi fu meki na okasi disi de wan prisiri sani di den wani du ibri wiki.

Wan papa di abi dri pikin skrifi: „Moro furu wi du sani di abi fu du nanga wan pisi di wi leisi na ini Bijbel. Ibriwan fu wi e leisi den kapitel na fesi, den pikin e taki sortu pisi den wani ondrosuku moro fini, èn baka dati den e sori san den leri. Nofo tron Michael [di abi seibi yari] e teken wan sani noso a e skrifi san a leri. Son leisi David nanga Kaitlyn [di abi 13 nanga 15 yari] e skrifi fu wan Bijbel tori neleki densrefi ben de drape e luku san e pasa. Fu eksempre, di wi ben e leisi fa Yosef fruklari a dren fu a bakriman nanga a man di ben e kanti win gi Farao, dan Kaitlyn skrifi fu a tori neleki en ben de wan fu den strafuman di ben e luku san e pasa.”​—Gen., kap. 40.

A no de fu taki dati ibriwan sma en situwâsi de tra fasi. San bun gi a wan sma noso osofamiri, no abi fu de so gi wan trawan. A faki e sori wan tu sani di unu kan du leki osofamiri, noso te yu wawan de. Kande yu sabi tra sani di yu kan du tu.

 [Faki/​Prenki na tapu bladzijde 6, 7]

Gi osofamiri di abi tini:

• Leisi èn taki fu den tori na ini a buku Wat jonge mensen vragen ​— Praktische antwoorden.

• Luku wan Bijbel tori èn aksi: „San yu ben o du efu yu ben de drape?” (Luku A Waktitoren fu 15 mei 2011, bladzijde 3, 4.)

• Taki fu sani di unu wani du now na ini a diniwroko fu Yehovah èn na ini a ten di e kon.

• Ten na ten unu kan luku wan fu den DVD fu wi èn taki fu en.

• Taki fu den Waktitoren artikel di nen „Gi den yonguwan”.

Gi trowpaar di no abi pikin:

• Taki nanga makandra fu kapitel 1, 3, 11-16 fu a buku A sroto gi wan kolokoe osofamiri.

• Leisi èn ondrosuku wan tu kapitel na ini Bijbel èn taki fu san unu leri.

• Sreka gi a Gemeente Bijbelstudie noso a Waktitoren-studie.

• Taki nanga makandra fa unu kan du moro na ini a diniwroko leki trowpaar.

Gi brada nanga sisa di no trow, noso gi den wan di de na ini osofamiri pe ala sma no e anbegi Yehovah:

• Studeri den nyun buku di wi kisi na den distrikt kongres.

• Leisi a lasti Yaribuku nanga den wan fu den yari di pasa.

• Ondrosuku fa yu kan gi piki tapu aksi di furu sma na ini a kontren fu yu abi.

• Sreka fa yu kan taki nanga sma na ini a preikiwroko.

Gi osofamiri di abi yongu pikin:

• Prei wan drama fu wan Bijbel tori.

• Prei wan sani pe yu e gebroiki prenki fu meki den memre sani moro bun.

• Du sani nanga den di e yepi den fu skrifi noso fu teken fa wan tori pasa na ini Bijbel ten. (Luku na artikel „A muiti di yu e meki no sa de fu soso!” na ini a Waktitoren fu 15 februari 2011, bladzijde 11.)

• Luku den Waktitoren artikel di nen „Leri den pikin fu yu”.