Mbamhen mba Eren Mcivir u hen Tsombor shi Henen Kwagh sha Tseeneke

HII ken mhii u inyom i 2009 la je, atôônanongo a Mbashiada mba Yehova gema shighe ve u eren mkombo. Yange i magh mbamkombo mba uhar mba i eren ken atô u kasua la, nahan i taver hanma or ishima ér nana tôô ian i hen aikighe shon sha u eren mcivir u hen tsombor shin henen kwagh sha tseeneke u nan. U ngu dondon mserakaa u he ne kpa? U ngu zuan a iwasen sha mi tsembelee kpa?

Kanyi i doo u se time sha mi ken mcivir u hen tsombor laa? Mbahemenev mba Shin Tine mba pasen icombor kwagh u vea time sha mi ken hanma kasua ga. Mbamgbe mba icombor mba kwaghmôm ga. Nahan hanma orya nana hen sha mbamgbe mba tsombor u nan shi nana tsua kwagh u una hemba wasen u la. Shi mba ve lu a icombor ga kpa, ve tsua gbenda u hemban doon u vea er tom a shighe ve yô.

Icombor igen ka i wa iyol sha mbamkombo mba tiônnongo imôngo. Kpa ka kwagh u se er ken mcivir u hen tsombor cii la ga. Icombor igen ka i ôr Bibilo shin ma ngeren u ken ityakerada yase shi i lam sha mi imôngo. Mbagenev ka ve er iniumbe sha ma kwagh u i er ken Bibilo yô. Kwagh ne ka a hemba wasen mbayev mba kiriki cii.

Ter ugen u lun a mbayev utar nger ér: “Kwagh u se eren la hembe haren sha Bibilo i ôron. Hanmô wase ka nan vande ôron mtom ma Bibilo ma i gbe u se va ôr la tsuaa, nahan mbayev ve tsua akaa agen ve tôv sha mi, maa ve va pase kwagh u ve zough a mi la. Ashighe kpishi Michael [ngu anyom ataankarahar] ka a kpela ma foto shin a nger kwagh i kuma ikyumhiange i môm. Ashighe agen David [ngu anyom 13] vea Kaitlyn [ngu anyom 15] ka ve nger kwagh sha kwagh u i er ken Bibilo la er ka or u yange nan nenge kwagh la sha ashe a nan nahan. U tesen ikyav yô, shighe u se lu ôron kwagh u mpase u Yosev pase mnyam ma or u kaan Farao bredi man or u toon un kwaghman la, Kaitlyn nger kwagh er un ngu orkwar u yange nan lu her nan lu nengen er kwagh la lu eren nahan.”—Gen. ityough 40.

Sha gbaaôndo je, mbamlu mba iorov mba kposo kposo. Kwagh u una wase or môm shin tsombor la alaghga una wase mbagenev nahala ga. Ngeren u kiriki u a lu ken ngeren ne la, due a mbamhen mbagenev mba a fatyô u dondon shighe u eren mcivir u hen tsombor la shin kwaghhenen u sha tseeneke yô. Alaghga u fatyô u duen a mbamhen mbagenev kpaa.

[Ngeren u kiriki/Ufoto mba sha peeji 6, 7]

 Sha ci u icombor i lun a agumaior:

• Ôr nen takerada (zwa Buter) u Questions Young People Ask—Answers That Work la shi lam nen sha mi.

• Wa nen iyol sha kwagh u i yer ér “What if . . . ?” situation (“Aluer kwagh er nahan yô, se er nena?”) la. (Ôr Iyoukura i zwa Buter i Mei 15, 1996, peeji 14, ikyumhiange i sha 17-18.)

• Lam nen sha akaa a ne fatyô u tsuan ner ne er shighe kpuaa man a ne er shighe gôgônan la.

• Nengen nen icer i vidio yase sha ashighe ashighe shi lamen nen sha mi.

• Nenge nen ngeren u ken Iyoukura u a lu a itinekwagh ér “Sha ci u Agumaior” la.

Sha ci u noov man kasev mba lun a ônov ga:

• Time nen sha ityough 1, 3, 11-16 ki takerada u Kwaghmyer u Msaanyol hen Tsombor la.

• Lam nen sha akaa a ne tev sha mi ken Bibilo i ôron ve ne zough a mi la.

• Wa nen iyol sha mkombo u Bibilo i Henen ken Tiônnongo shin u Iyoukura i Henen la.

• Lam nen sha igbenda i ne fatyô u hemba pasen kwagh yô.

Sha ci u anmgbianev mba nomso man mba kasev mba lun kwav:

• Hen nen ityakerada i i dugh a mi sha mkohol la.

• Ôr nen Yearbook mba tsev man mba hev cii.

• Tôv nen sha mbamlumun mba sha mbampin mba i pin hen haregh wen fele fele la ken ityakerada yase.

• Wa nen iyol sha igbenda i pasen kwagh shi nan ityakerada ken won.

Sha ci u icombor i lun a mbayev mba kiriki:

• Er nen iniumbe sha akaa a ken Bibilo.

• Er nen anumbe a umbur akaa, er a i tesen sha peeji 30 man 31 ken magazin u Awake! la nahan.

• Ashighe agen ne fatyô u duen a kwagh u ne er yô. (Nenge ngeren u ken Awake! u Maaci 8, 1996, u a lu a itinekwagh ér “Studying the Bible—In the Zoo!,” sha peeji 16-19 la.)

• Time nen sha ngeren u ken Iyoukura u a lu a itinekwagh ér “Tese Ônov Ou” la.