Tuku natlawayaw akxni kakninaniyaw Dios kfamilia chu akxni kiakstukan kgalhtawakgayaw

ENERO kata 2009, xtatayananin Jehová xlikalanka Katiyatni tsukuw tlawayaw kʼakgtum kilhtamaku, tamakxtumit nema xkgalhiyaw akgtiy kilhtamaku. Lakgkgolotsin tiku Pulalinkgo xTatayananin Jehová kinkawanikgon pi nakakninaniyaw Dios kfamilia o kinchatunukan nakgalhtawakgayaw kilhtamaku nema xtatlawa tamakxtumit kcongregación. ¿Liwana limaklakaskimaw kinkilhtamakukan?

Lhuwa natalan kakgalhskinkan tuku nakatalikgalhtawakgakgo xfamilia. Ni talakaskin pi putum familias watiya tuku nalikgalhtawakgakgo, chatunu chatunu nalaksaka tuku tlakg namakgtaya o namakgtaya xfamilia.

¿Tuku tlan natlawakgo uma kilhtamaku? Wi tiku likgalhtawakgakgo tuku naʼakxilhkgo ktamakxtumit, pero ni talakaskin kajwatiya uma natlawayaw. Tlan nalikgalhtawakgayaw xTachuwin Dios, nalikgalhchuwinanaw tuku wan maktum likgalhtawakga o asta tlan xtlawaw akgtum «obra de teatro», tlakg tlan nawan komo kfamilia wilakgo laktsu kamanan. Na ni talakaskin pi putum kilhtamaku natlawayaw takgalhskinin chu takgalhtin chuna la tlawakan ktamakxtumit. Tlakg tlan nawan komo lipaxuw natlawayaw, chuna ni tuwa nakgalhchuwinanatit chu putum tlan nawankgo tuku lakapastakkgo. Na ni tuwa katimakgkatsikgolh nawankgo tuku lakpuwankgo chu uma tamakxtumit lipaxuw nawan.

Chatum tala tiku kgalhi kgalhtutu xkamanan tsokgli: «Atsinu ni putum kilhtamaku wa klikgalhtawakgayaw Biblia. Kimputumkan pulana klikgalhtawakgayaw capítulos, chu kamanan putsanankgo tuku lakgatikgo. Chu alistalh ktamakxtumiyaw xlakata nakinkawanikgoyan tuku katsinikgolh. Michael [akgtujun kata kgalhi] max tlawa dibujo o tsokga akgtum párrafo. David chu Kaitlyn [kgalhikgo 13 chu 15 kata], tsokgkgo xtachuna la akxilhkgolh tuku lalh. Akgtum liʼakxilhtit, akxni klikgalhtawakgaw [kcapítulo 40 xla Génesis] xtamanaxnat tiku tlawa kaxtalanchu chu tiku xmaxki xvino faraón, tuku tsokgli Kaitlyn xtakgaxmata la komo akxilhli José».

Xlakata akgatunu familia ni lakxtum, max wix wi tuku atanu tlan nakitaxtuniyan. Kpáginas nema aku mimakgolh natekgsa makgapitsi tastakyaw nema tlan namaklakaskina akxni miakstu nakgalhtawakgaya o akxni nakatakgalhtawakgaya mi familia. ¿Wi atanu tuku tlan xtlawa?

 [Epígrafe xla página 31]

Familias tiku kgalhikgo lakgkgawasan chu laktsuman:

• Kalikgalhtawakgatit chu kalichuwinantit akgtum capítulo xla libro Los jóvenes preguntan.

• Kalikgalhtawakgatit tiku lichuwinan Biblia chu kakgalhskininanti: «¿Tuku xtlawa wix?» (kaʼakxilhti La Atalaya 15 xla mayo kata 1996, página 14, párrafos 17 chu 18).

• Kalichuwinantit tuku xtlawatit nema ni lhuwa kilhtamaku limakgantaxtikan chu nema lhuwa kilhtamaku limakgantaxtikan.

• Kaʼakxilhtit chu kalichuwinantit videos xalak Biblia.

• Kalikgalhtawakgatit «El rincón del joven» nema limin La Atalaya.

Familia tiku ni kgalhikgo kamanan:

• Kalikgalhtawakgatit capítulos 1, 3 chu 11, 12, 13, 14, 15 chu 16 xla libro El secreto de la felicidad familiar.

• Kalakputsananitit chu kalichuwinantit textos nema likgalhtawakgalh chatunu chatunu.

• Kalikgalhtawakgatit tuku nataʼakxilha kTakgalhtawakga nema takilhtinit kBiblia kCongregación o tuku natalikgalhtawakga krevista Makatsinina.

• Kaʼakxilhtit la tlakg lhuwa kilhtamaku nalichuwinanatit Dios.

Tiku nina tamakgaxtokgkgonit o tiku xfamilia ni xtatayana Jehová:

• Kalikgalhtawakgatit likgalhtawakga nema mastakan ktamakxtumit xaʼakgtutu kilhtamaku.

• Kalikgalhtawakgatit Anuario xla uma kata o kata nema titaxtukgonita.

• Kaputsatit xtakgalhtin takgalhskinin nema katlawanikanatit akxni lichuwinanatit Dios.

• Katlawatit la komo matsukitipatit nalichuwinanatit Dios.

Familias tiku kgalhikgo laktsu kamanan:

• Katlawatit pi wa litaxtuyatit nema lichuwinan Biblia.

• Katlawatit takgaman nema wilakgolh kpáginas 30 chu 31 xla ¡Despertad!

• Kalakkaxwilitit wi tuku natlawayatit (kaʼakxilhti artículo «Estudiamos la Biblia en el zoológico», xla ¡Despertad! 8 xla marzo kata 1996, kpáginas 16 asta 19).

• Kalikgalhtawakgatit sección nema wanikan «De padres a hijos», xla revista La Atalaya.