Te haamoriraa utuafare e ta tatou iho haapiiraa

MAI Tenuare 2009 mai â, ua faatano te mau amuiraa a te mau Ite no Iehova i ta ratou mau putuputuraa. Ua amuihia na putuputuraa e piti o te hebedoma. Ua faaitoito mai te Tino aratai ia faaohipa i te po aita e putuputuraa no te haamoriraa utuafare e no ta tatou iho haapiiraa. Te faaohipa maitai ra anei outou i te reira? Ta outou i maiti e rave i taua po ra, e tauturu rahi ïa ia outou e to outou utuafare.

Eaha râ te haapii i ta tatou haamoriraa utuafare? Aita te Tino aratai i faaoti eaha ta te mau utuafare e hiˈopoa i te mau hebedoma atoa. E ere hoê â tupuraa to ratou. Na te upoo utuafare e hiˈo eaha te tano aˈe no to ˈna utuafare e na te taata taitahi e faaoti e nafea ia faaohipa maitai i tera taime.

E faaineine te tahi mau utuafare i te mau putuputuraa. E ere râ tera anaˈe te haamoriraa utuafare. E taio vetahi i te Bibilia aore ra i te mau papai Kerisetiano, a tauaparau atu ai. E faaineine te tahi atu i te hoê hautiraa aamu Bibilia. Mea maitai roa te reira no te mau tamarii. Aita e titauhia ra ia faatere i te haamoriraa utuafare mai te hoê putuputuraa, i reira e taiohia ˈi te paratarafa a tuuhia ˈtu ai te uiraa. Ia riro râ te haamoriraa utuafare ei taime e aparau ai te tahi i te tahi, a faaite atu ai i to ratou manaˈo. Ei taime atoa e faaohipa ˈi i to tatou feruriraa e e tauaparau ai no nia i ta tatou i taio i roto i te Bibilia. Mea na reira ïa te mau po haamoriraa utuafare e riro ai ei taime oaoa no te melo taitahi.

Teie ta te hoê papa e toru tamarii i papai: “E pinepine matou i te taio i te Bibilia. E taio matou taitahi na mua i te mau pene no te hebedoma. I muri iho, e maiti te mau tamarii i te tahi mau manaˈo ta ratou e hinaaro e faahohonu. Ia oti, e faaite mai ratou i ta ratou mau maimiraa. E pinepine Michael [e 7 matahiti] i te hamani i te hoê hohoˈa aore ra i te papai i ta ˈna i taio. Area David raua Kaitlyn [13 e 15 matahiti], e papai ïa i te hoê aamu Bibilia mai te huru ra e o raua te taata mataitai. Ei hiˈoraa, i to matou taioraa i to Iosepha tatararaa i te moemoeâ a na toopiti tavini a Pharao, ua papai Kaitlyn i te aamu mai te huru ra e tei te fare tapearaa oia a mataitai ai i te ohipa e tupu ra.”—Gen. pene 40.

Parau mau, e ere hoê â tupuraa to te mau utuafare e to te taata taitahi. Na ratou taitahi ïa e faaoti eaha te mea maitai aˈe no ratou. I muri nei, te vai ra te tahi mau manaˈo no ta tatou haamoriraa utuafare e no ta tatou iho haapiiraa. Peneiaˈe, te vai atoa ra to oe.

[Tumu parau tarenihia/Hohoˈa i te mau api 28, 29]

 Utuafare e taurearea:

• A taio i te buka Les jeunes s’interrogent—Réponses pratiques e a tauaparau.

• A feruri e tei te tau faataahia i roto i te Bibilia outou. (A hiˈo i Te Pare Tiairaa o te 15 no Me 1996, api 14, par. 17, 18.)

• A aparau i ta outou i opua e rave i roto i te taviniraa a Iehova i teie nei e a muri aˈe.

• A mataitai i te hoê hohoˈa video niuhia i nia i te Bibilia e a tauaparau.

• A hiˈopoa i te tuhaa “No to tatou feia apî” o Te Pare Tiairaa.

Feia faaipoipo aita e tamarii:

• A aparau i nia i te buka Te ravea e itehia ˈi te oaoa i te utuafare, pene 1, 3, 11-16.

• A taio e a hiˈopoa i te tahi mau pene o te Bibilia, a tauaparau atu ai.

• A faaineine i te Haapiiraa Bibilia a te amuiraa aore ra i te Haapiiraa o Te Pare Tiairaa.

• A tauaparau e nafea ia tavini atu â ia Iehova.

Feia taa noa aore ra o ratou anaˈe to roto i te parau mau:

• A haapii i te mau papai apî i matara mai i te tairururaa mataeinaa.

• A taio i te mau Annuaire apî e tahito.

• A faaineine e nafea ia pahono i te uiraa rau a te taata i roto i te pororaa.

• A faaineine i te mau faaiteraa no te pororaa.

Utuafare e tamarii rii:

• A faaineine i te mau hautiraa aamu Bibilia.

• A faaohipa i na api 30 e 31 o te Réveillez-vous! ei hautiraa.

• A rave i te tahi mea e faaohipa ˈi te tamarii i to ratou feruriraa. (A hiˈo i te tumu parau “Haapiiraa i te Bibilia—I te aua animala!” o te A ara mai na! o te 8 no Mati 1996, api 28-31.)

• A hiˈopoa i te tuhaa “A haapii i ta oe mau tamarii” o Te Pare Tiairaa.