Boch Ban’en Nrayog ni Ngan Rin’ ko Fol Bible ni Tabinaw nge Fol Bible Nra Be’ Ma Ir Rok

U TABOLNGIN e duw ni 2009, me thilyeg e pi ulung ko Pi Mich Rok Jehovah rogon e muulung ni yad ma tay. Fa gal muulung ni yima tay u lukngun e wik e kan taarebnag, min pi’ e athamgil nga laniyan’ urngin e walag ni ngar ted reb e blayal’ ndariy e muulung riy ni fan ko fol Bible ni tabinaw ara fol Bible nra be’ ma ir rok. Ga be fol ko re yaram ney, ma be yib angin ngom, fa?

Boch e walag e yad ma lemnag ko mang babyor e ba fel’ ni ngar filed u nap’an e fol Bible ni tabinaw. Der lemnag fare Ulung ni Ma Pow’iyey ara Governing Body ni ngar dugliyed taab n’en ni nge fol chon e tabinaw riy. Bochan nra reb e tabinaw ma rogon, mab fel’ ni nge fal’eg i yaliy e piin lolugen e tabinaw ara piin ni yad be yarmiy e fol Bible ni tabinaw rogon ni ngan rin’ e re n’ey nib fel’ rogon ma ra yib angin.

Boch e girdi’ e yad ma tay e binem e blayal’ ni fan ko ngan fal’eg rogoy ko muulung. Machane susun ndabi par ni goo ireram e n’en ni ngan rin’. Boch e walag e yad ma beeg e babyor, ara yad ma weliy, ara yad ma yan u yaan boch e thin nu Bible u taabang, nib ga’ ni fan ko piin bitir. Ere fol Bible ni tabinaw ni gad ma tay e de t’uf ni ngan rin’ ni bod e muulung ni yima beeg e paragraph min fith e deer. Susun ni ireray e ngiyal’ ni nge be’ me weliy e n’en ni bay u laniyan’. Ku aray e ngiyal’ ni ngad lemnaged boch ban’en ma gad weliy murung’agen e pi n’en ni kad beeged u Bible nra pi’ e athamgil nga lanin’uy. Faan gad ra rin’ ni aray rogon, ma aram e rayog ni nge gubin e girdi’ mar felfelan’gad ko n’en ni yibe rin’.

Reb e matam ni bay dalip e bitir rok e yoloy ni gaar: “N’en ni gamad ma rin’ e ba ga’ ni bay rogon ko thin nu Bible ni yima beeg ni gubin e rran. U m’on ko rofen nem ma ra bagamad ma ke mu’ i beeg e pi guruy nib t’uf ni ngan beeg. Ngemu’ ma ra bagayad fapi bitir me mel’eg ban’en ni nge fal’eg i gay murung’agen me weliy. Michael [ni medlip e duw rok] e ba ga’ ni ma yoloy yaan ban’en ara yoloy boch e thin. Ma David nge Kaitlyn [ni 13 nge 15 e duw rorow] e bay yu ngiyal’ ni yow ma weliy murung’agen reb e chep u Bible ni susun e yow be guy e n’en ni ke buch. Nap’an ni gamad be beeg murung’agen fa gal lik’ay rok faen ni ma fek e kap rok Farao nge faen ni ma lith e flowa ni weliy Josef fan, me weliy Kaitlyn murung’agen e re n’ey ni gowa ir reb e kalbus ni be guy e n’en ni be buch.”​—Gen., guruy ni 40.

Re n’ey e kemus nreb e kanawo’ nrayog ni nge fol e tabinaw riy u nap’an e fol Bible rorad. Bochan nra be’ ma rogon, ma ra be’ ara reb e tabinaw ma ir e nge dugliy e bin nib fel’ nra yib angin ngorad. Fare kahol ni bay ko re article ney e be weliy boch ban’en nrayog ni ngan rin’ u nap’an e fol Bible ni tabinaw ara fol Bible nra be’ ma ir rok. Machane sana ka bay boch ban’en nrayog ni ngam rin’ed.

[Box/​Picture on page 22, 23]

 Tabinaw ni bay e fel’ yangaren riy:

• Ngan beeg e thin nu Bible nib ga’ lamay. Rayog ni nge beeg e matam ara reb i chon e tabinaw e thin rok faen ni yoloy fare thin nu Bible, ma tin ka bay e girdi’ e rayog ni ngar beeged e thin ko piin ni yibe weliy murung’agrad.

• Ngan weliy murung’agen boch ban’en ni yibe nameg ni ngan rin’ boch nga m’on nge boch ban’en ni yibe nameg ni ngan rin’ e chiney.

• Ngan yaliy reb e kachido ko ulung min weliy murung’agen.

• Ngan weliy fare thin ni bay ko Wulyang ko Damit ni kenggin e “Fan Ngak e Piin Bitir.”

Piin mabgol ndariy e bitir rorad:

• Ngan weliy u taabang e n’en ni kan pirieg u murung’agen boch ban’en ni kan beeg u Bible.

• Ngan fal’eg rogoy ni fan ko Fol Bible ko Ulung ara Fol Wulyang ko Damit.

• Ngan weliy boch e kanawo’ nrayog ni ngan yoornag e pi n’en ni yibe rin’ ni fan ngak Jehovah.

Pi walag ni muchugbil ara piin nde taareb e michan’ rorad chon e tabinaw rok:

• Ngan fil e pi babyor nib beech ni ka fin nni pi’ u nap’an e convention.

• Ngan beeg boch e Yearbook ni kab beech nge boch ni ke n’uw nap’an.

• Ngan fal’eg i gay e fulweg u boch e deer nib ga’ ni yima fith u nap’an e machib.

• Ngan lemnag boch ban’en ni ngan weliy u nap’an e machib.

Tabinaw ni bay e bitir riy ni kab achig:

• Ngan yan u yaan boch ban’en ni kan beeg u Bible.

• Ngan weliy fare thin ni bay ko Wulyang ko Damit ni kenggin e “Mu Skulnag Pi Fakam.”