Nakua Ninda an Mesiyas!

‘Nakua mi an Mesiyas.’—JUAN 1:41.

1. Taano ta ibinareta ni Andres na: ‘Nakua mi an Mesiyas’?

NAKATINDOG si Juan na Bautisador kaiba an duwa sa mga disipulo nia. Mantang parani si Jesus, ipinahayag ni Juan: “Uya, an Kordero nin Dios!” Si Andres asin an saro pang disipulo suminunod tolos ki Jesus asin nagdanay na kaiba nia kan aldaw na idto. Pagkatapos, hinanap ni Andres an tugang niang si Simon Pedro asin iiniba ki Jesus pagkatapos na maogmang ibareta na: ‘Nakua mi an Mesiyas.’—Juan 1:35-41.

2. Paano kita makikinabang sa orog pang pagsiyasat sa mga hula dapit sa Mesiyas?

² Mantang nag-aagi an panahon, si Andres, Pedro, asin iba pa magkakaigwa nin dakol na oportunidad na siyasaton an Kasuratan saka lubos na ihahayag ninda na si Jesus na taga Nazaret an ipinanugang Mesiyas. Mapapakosog an pagtubod niato sa Tataramon nin Dios asin sa Linahidan nia mantang ipinapadagos niato ngonyan an pagsiyasat sa mga hula dapit sa Mesiyas.

“Uya, an Hade Mo Minadatong”

3. Anong mga hula an naotob sa matriumpong paglaog ni Jesus sa Jerusalem?

³ An Mesiyas matriumpong malaog sa Jerusalem. An hula ni Zacarias nagsabi: “Magogma ka nin labilabi, aking babae kan Sion; magkurahao ka sa kaogmahan, aking babae kan Jerusalem: uya, an saimong hade madolok sa saimo, banal asin paraligtas, maboot, asin nagñagñabayo sa sarong asno, siring man sana sa sarong ogbon na lalaki nin sarong babaeng asno.” (Zac. 9:9) An salmista nagsurat: “Pagomauon an minadatong sa gñaran ni Jehova.” (Sal. 118:26) Dai puedeng maniobrahon ni Jesus an gigibohon kan kadaklan kaidto. Minsan siring, bilang kaotoban kan hula, sarong kadaklan an gikan sa boot na nagkururahaw na may dakulang kagayagayahan. Mantang binabasa nindo an pagkasaysay, imahinaron na yaon kamo duman asin nadadangog an maogmang mga boses.—Basahon an Mateo 21:4-9.

4. Ipaliwanag kun paano naotob an Salmo 118:22, 23.

⁴ Minsan ngani dakol an masikwal ki Jesus sa ibong kan mga kredensial bilang Mesiyas, sia mahalagang marhay para sa Dios. Arog kan ihinula, si Jesus ‘dinuhagi asin dai iginalang’ kan mga habong magtubod sa ebidensia. (Isa. 53:3; Mar. 9:12) Minsan siring, pinasabngan nin Dios an salmista na magsabi: “Si gapo na isinikual nin si magña parapatindog, naguing pamayohan nin si [anggulo]. Ini hale ki Jehova.” (Sal. 118:22, 23)  Sinabi ni Jesus an tekstong ini sa mga nagkokontra sa saiya na mga miembro nin relihion, asin sinabi ni Pedro na naotob iyan ki Cristo. (Mar. 12:10, 11; Gui. 4:8-11) Si Jesus talagang nagin an pundasyon na “gapo nin [anggulo]” kan Kristianong kongregasyon. Minsan ngani isinikwal sia kan mga tawong mayong pagtubod, para ‘sa Dios sia pinili asin mahalaga.’—1 Ped. 2:4-6.

Pinasaloiban Asin Binayaan!

5, 6. Ano an ihinula asin naotob mapadapit sa pagpasaloib sa Mesiyas?

⁵ Ihinula na an Mesiyas papasaloiban nin traydor na kaibaiba. Naghula si David: “An tauo nin sakuyang katoninogñan, na sa saiya ako naniniuala, idtong nagkakakan kan sakong tinapay, binuhat tumang sa sakuya si bool kan bitis.” (Sal. 41:9) Ibinibilang na magkatood an duwang tawo na magkaibanan na nagkakakan nin tinapay. (Gen. 31:54) Kaya an pagpasaloib ki Jesus ni Judas Iscariote an pinakamaraot na klase nin pagtraydor. Dinara ni Jesus an atension sa kaotoban kan propetikong mga tataramon na iyan ni David kan sabihon Nia sa mga apostol an manongod sa mapasaloib sa saiya: “Dai ako nagtataram dapit saindo gabos: ako tatao kan sakong magña pinili: alagad tagñaning maotob an kasuratan, An nagkakakan kan sakong tinapay nagitaas tumang sako kan saiyang bool.”—Juan 13:18.

⁶ An mapasaloib sa Mesiyas maako nin 30 pidasong pirak—presyo nin sarong oripon! Kan sambiton ni Mateo an hula sa Zacarias 11:12, 13, ipinaheling nia na papasaloiban si Jesus karibay kan siring kasadit na kantidad nin kuarta. Alagad taano ta sinabi ni Mateo na ihinula ini paagi sa “profetang si Jeremias”? Kan panahon ni Mateo, an Jeremias posibleng nasa enotan kan sarong grupo nin mga libro sa Biblia na kaiba an Zacarias. (Ikomparar an Lucas 24:44.) Nungkang nagastos ni Judas an kuartang ini na nakua nia sa maraot na paagi, huling iinapon nia iyan sa templo dangan sia naghale asin naghugot.—Mat. 26:14-16; 27:3-10.

7. Paano naotob an Zacarias 13:7?

⁷ Magkakawararak pati an mga disipulo kan Mesiyas. “Lugadon mo an pastor,” an isinurat ni Zacarias, “asin pabayaan mo na magkawararak an mga nasa aripompon.” (Zac. 13:7, NW) Kan Nisan 14, 33 C.E., sinabihan ni Jesus an mga disipulo nia: “Kamo gabos magkakasiringkog sa sako gñunian na bangui: huli ta nasusurat, Lulugadon ko an pastor, asin an carnero sa aripompon magkakawararak.” Asin iyan an eksaktong nangyari, huling isinaysay ni Mateo na “an gabos na discipulo nagbaraya [ki Jesus], asin nagdurulag.”—Mat. 26:31, 56.

Inakusaran Asin Kinolgan

8. Sa anong mga kamugtakan naotob an Isaias 53:8?

⁸ An Mesiyas bibistahon asin kokondenaron. (Basahon an Isaias 53:8.) Kan mag-aagahon  kan Nisan 14, an bilog na Sanhedrin nagtiripon, ginapos si Jesus, asin dinara sia sa Romanong Gobernador na si Poncio Pilato. Inusisa nia si Jesus asin naaraman nia na mayo man lamang ini nin kasalan. Minsan siring, kan hapoton ni Pilato an kadaklan kun gusto nindang butasan si Jesus, sinda nagkururahaw: “Ipako sia”! asin hinagad ninda na patalingkason an kriminal na si Barabas. Sa kagustohan ni Pilato na mapaogma an kadaklan, pinatalingkas nia si Barabas, ipinalatigo si Jesus, asin ipinapako ini sa harigi.—Mar. 15:1-15.

9. Ano an nangyari kan panahon ni Jesus na ihinula sa Salmo 35:11?

⁹ Putik na mga saksi an matestigo tumang sa Mesiyas. “Nagbabangon an mga madahas na saksi,” an sabi kan salmistang si David. “An dai ko aram ihinahapot sako.” (Sal. 35:11, An Banal na Biblia [Edisyon na 2007]) Siring kan ihinula, “an magña poon nin magña sacerdote asin an bilog na consejo [“Sanhedrin,” NW], nagharanap nin putik na saksi tumang ki Jesus, tagñaning ikapagadan ninda sia.” (Mat. 26:59) Sa katunayan, dakol o “balakid an magña nagsaraksi nin putik tumang saiya, asin an saindang magña pagsaksi dai nagkabaragay.” (Mar. 14:56) Dawa kaputikan an testimonya, baliwala ini para sa panatikong mga kaiwal ni Jesus, na naghingoang gadanon sia.

10. Ipaliwanag kun paano naotob an Isaias 53:7.

¹⁰ An Mesiyas dai magirong sa atubangan kan mga nag-aakusar sa saiya. Si Isaias naghula: “Sia pinasakitan asin kinologan, alagad ta dai nia binoka an saiyang gñoso: dinara sia sa gadanan na garo cordero: asin garo carnero sa atubagñan kan saiyang magña parabono, dai sia nagguirong, asin dai nia binuka an saiyang gñoso.” (Isa. 53:7) Kan si Jesus inaakusaran o ‘isinusumbong kan mga poon nin mga saserdote, asin kan mga magurang, dai sia nagsimbag nin ano man.’ Si Pilato naghapot ki Jesus: “Dai mo nadadagñog kun gurano kadakol na magña bagay an ipinagsasaraksi tumang saimo?” Minsan siring, “dai nia sia sinimbag ni sarong tataramon lamang: kaya an gobernador naggñalas na gayo.” (Mat. 27:12-14) Dai piglait ni Jesus an mga nag-aakusar sa saiya.—Roma 12:17-21; 1 Ped. 2:23.

11. Ano an nangyari bilang kaotoban kan Isaias 50:6 asin Miqueas 5:1?

¹¹ Ihinula ni Isaias na kokolgan an Mesiyas. “Itinao ko an sakuyang hauak sa magña paralugad, asin an sakuyang magña pisgñi sa magña naggagabot kan sakuyang bohok,” an isinurat kan propeta. “Dai ko tinago an sakuyang lalauogon sa magña kamudahan asin sa magña kinospa.” (Isa. 50:6) Ihinula ni Miqueas: “Lulugadon ninda an hokom sa Israel nin sarong sogkod sa pisgñi.” (Miq. 5:1) Bilang pagpatunay sa kaotoban kan mga hulang ini, an kagsurat kan Ebanghelyo na si Marcos nagsabi: “Pinonan kan iba na paglutaban [si Jesus], asin pagtahoban an saiyang lalauogon, asin pagsontokon sia, patin pagsabihan, Toode; asin pinagsorontok sia kan magña oficial.” Sinabi ni Marcos na an mga soldados “[pinakol] sia sa payo nin sarong gaho, asin linutaban sia, asin nagrolohod sinda na [sagin] nagsasamba saiya.” (Mar. 14:65; 15:19) Siempre, mayong dahelan an mga tawong idto na abusohon si Jesus nin siring kaiyan.

Maimbod Sagkod sa Kagadanan

12. Paano naotob ki Jesus an Salmo 22:16 asin Isaias 53:12?

¹² Ihinula an pirang bagay dapit sa pagpako sa Mesiyas sa harigi. “Pinalibotan ako nin mga tampalasan,” an sabi kan salmistang si David. “Linabot ninda an sakong mga kamot saka bitis.” (Sal. 22:16, BPV) * Sa pagsaysay sa sarong pangyayari na aram na marhay kan mga nagbabasa nin Biblia, an kagsurat kan Ebanghelyo na si Marcos nagsabi: “A las nueve na [nin aga], asin ipinako ninda sia sa cruz [“harigi,” NW].” (Mar. 15:25) Ihinula man na an Mesiyas iiiba sa mga parakasala. “Pinabolos nia an saiyang buhay sagkod sa kagadanan,” an surat ni Isaias, “asin ta ibinilang sia sa magña tampalasan.” (Isa. 53:12) Kaya “ipinako man na kaiba [ni Jesus] an duang tulisan, an saro sa too, asin an saro sa wala.”—Mat. 27:38.

13. Sa anong paagi naotob ki Jesus an Salmo 22:7, 8?

 ¹³ Ihinula ni David na lalaiton an Mesiyas. (Basahon an Salmo 22:7, 8.) Piglait si Jesus mantang nagsasakit sa hariging pasakitan, huling isinaysay ni Mateo: “An magña nagaragui nagturuyatuya saiya, na nagtaragñotagño kan saindang magña payo, asin nagsasarabi, Ika na magaba kan templo, asin sa laog nin tolong aldao mapatindog kaiyan, lumigtas ka sa saimo man sana: kun ika an Aki nin Dios, [tumanggal] ka sa cruz [“hariging pasakitan,” NW].” Kaagid kaiyan, an mga poon nin mga saserdote, eskriba, asin kamagurangan na lalaki nagtuyatuya sa saiya asin nagsabi: “Nagligtas sia sa iba, sa saiya man sana dai nakakaligtas. Sia an Hade nin Israel; [tumanggal] sia gñunian sa cruz [“hariging pasakitan,” NW], asin magturubod kita sa saiya. Sia nanarig sa Dios; iligtas sia nia gñunian, kun baga may pagmakolog saiya, huli ta sia nagsabi, Ako iyo an Aki nin Dios.” (Mat. 27:39-43) Pero, an gabos na ini tinagalan ni Jesus na may dignidad. Sarong marahay nanggad na halimbawa para sa sato!

14, 15. Ipaliwanag kun paano naotob an espesipikong mga hula mapadapit sa gubing kan Mesiyas asin pagtao sa saiya nin suka.

¹⁴ Pagsusurugalan an gubing kan Mesiyas. “Pinagbaragña sa sainda ninda si sakuyang magña gubing,” an isinurat kan salmista, “asin si sakuyang gubing pinagsurugalan.” (Sal. 22:18) Iyan an nangyari huling “kan ikapako na [si Jesus kan Romanong mga soldados], pinagbaragña ninda sa sainda an saiyang magña gubing, na pinagsurugalan.”—Mat. 27:35; basahon an Juan 19:23, 24.

¹⁵ An Mesiyas tatawan nin suka asin apdo. “Pinagbugtakan pa ako nin apdo na kakanon [“nakakahilong tinanom,” NW], asin sa sakong kapahaan pinainom pa ako nin suka.” (Sal. 69:21) Si Mateo nagsasabi sa sato: “Pinainom [ninda si Jesus] nin arak na sinalakan nin apdo: asin kan manamitan nia, dai idto ininom.” Pagkatapos, an “saro sa sainda nagdalagan, asin nagkua nin sarong esponja, asin binasa nia idto sa suka, asin tinogod sa sarong gaho, asin ipinainom saiya.”—Mat. 27:34, 48.

16. Ipaliwanag kun paano naotob an propetikong mga tataramon sa Salmo 22:1.

¹⁶ An Mesiyas garo baga papabayaan nin Dios. (Basahon an Salmo 22:1.) Kaoyon kan hulang iyan, “pag-a-las-tres [nin hapon] si Jesus nagkurahao sa halangkao na tigñog, Eli, Eli, lama, sabactani? na an boot sabihon, Dios ko, Dios ko, tadao ta pinabayaan mo ako?” (Mar. 15:34) Dai nawaran si Jesus nin pagtubod sa saiyang langitnon na Ama. Si Jesus pinabayaan nin Dios sa mga kaiwal nia paagi sa paghale kan Saiyang  proteksion tanganing lubos na mabalo an integridad ni Cristo. Asin paagi sa pagkurahaw na iyan ni Jesus, inotob nia an Salmo 22:1.

17. Paano naotob an Zacarias 12:10 asin Salmo 34:20?

¹⁷ An Mesiyas tutusokon, alagad dai mababari an saiyang mga tolang. An mga nakaistar sa Jerusalem ‘mahiriling sa Saro, na saindang pinagtogbok,’ o tinusok. (Zac. 12:10) Asin an Salmo 34:20 nagsasabi: “Iniingatan nin KAGURANGNAN an gabos niyang tolang; mayong nababari maski saro kaiyan.” (BPV) Sa pagpatunay kan mga puntong ini, si apostol Juan nagsurat: “Binono [“ginarod,” BPV] an . . . herog [ni Jesus] kan saro kan magña soldado na may garod, asin tolos man bominolos an dugo asin tubig. Asin an nakahiling kaini [si Juan] nagpatotoo, asin an saiyang patotoo tunay na gayo . . . An magña bagay na ini nangyari, tagñaning maotob an kasuratan, Daing tolang sia na mababare. Asin may iba pang kasuratan na nagsasabi, Totorohokan ninda sia na saindang binono.”—Juan 19:33-37.

18. Paano si Jesus ikinalobong kaiba kan mga mayaman?

¹⁸ Ilolobong an Mesiyas kaiba kan mga mayaman. (Basahon an Isaias 53:5, 8, 9.) Kan hapon nang marhay kan Nisan 14, “sarong mayaman na taga Arimatea, na gñinagñaranan Jose,” an naghagad ki Pilato kan bangkay ni Jesus, asin tinogotan sia. An pagkasaysay ni Mateo nagsabi pa: “Kinua ni Jose an bangkay, asin pinatos idto sa sarong malinig na tamong na lino, asin ibinugtak idto sa saiyang sadiring lolobgñan na bago, na tinuki nia sa gapo: asin pinaliguid nia an sarong dakulang gapo sa tata kan lolobgñan, asin sia naghale.”—Mat. 27:57-60.

Irukyaw an Mesiyanikong Hade!

19. Ano an nangyari bilang kaotoban kan propetikong mga tataramon sa Salmo 16:10?

¹⁹ An Mesiyas bubuhayon liwat. Si David nagsurat: “[Dai] mo [Jehova] pababayaan an sakuyang kalag dian sa lolobgñan.” (Sal. 16:10) Imahinara an pagkabigla kan mga babae na nagduman sa linobngan kan bangkay ni Jesus. Naheling ninda duman an sarong anghel na nagsulot nin pisikal na hawak, na nagsabi sa sainda: “Dai kamo magkatirikbahan: hinahanap nindo si Jesus na taga Nazaret, na ipinako . . . : sia nabuhay liwat; dai na sia digdi: hiligña nindo an lugar na binugtakan ninda saiya!” (Mar. 16:6) Sa kadaklan na nasa Jerusalem kan aldaw nin Pentecostes 33 C.E., ihinayag ni Pedro: “Naaraman [ni David] ini, sia nagtaram dapit sa pagkabuhay-liwat kan Cristo, na sia dai pinabayaan na masa infierno [“Hades,” NW], ni an saiyang laman na makahiling nin kalapaan.” (Gui. 2:29-31) Dai itinogot nin Dios na malapa an pisikal na hawak kan namomotan niang Aki. Apuera kaiyan, si Jesus milagrosong binuhay sa espiritu!—1 Ped. 3:18.

20. Ano an ihinula manongod sa pamamahala kan Mesiyas?

²⁰ Arog kan ihinula, ipinahayag nin Dios na si Jesus an Aki nia. (Basahon an Salmo 2:7; Mateo 3:17.) Siring man, an mga kadaklan irinukyaw si Jesus asin an maabot na Kahadean, saka magayagaya tang sinasabi sa iba an manongod sa saiya asin sa maogmang pamamahala nia. (Mar. 11:7-10) Dai na mahahaloy, lalaglagon ni Cristo an mga kaiwal nia mantang nangangabayo sia para ‘sa katotoohan, kapakumbabaan, asin katanosan.’ (Sal. 2:8, 9; 45:1-6) Sa panahon na iyan, an paghade nia magtatao nin katoninongan asin prosperidad sa bilog na daga. (Sal. 72:1, 3, 12, 16; Isa. 9:6, 7) Pribilehio nanggad niato na ibalangibog an katotoohan na ini bilang Mga Saksi ni Jehova, na an namomotan na Aki namamahala na sa langit bilang Mesiyanikong Hade!

[Nota sa Ibaba]

Ano an Isisimbag Nindo?

• Paano si Jesus pinasaloiban asin binayaan?

• Ano an nagkapirang bagay na ihinula dapit sa pagpako ki Jesu-Cristo sa harigi?

• Taano ta kombensido ka na si Jesus an ipinanugang Mesiyas?

[Mga Hapot Para sa Pag-adal]

[Ritrato sa pahina 13]

Kaotoban nin anong mga hula an matriumpong paglaog ni Jesus sa Jerusalem?

[Mga Ritrato sa pahina 15]

Si Jesus nagadan para sa mga kasalan niato, alagad sia namamahala na ngonyan bilang Mesiyanikong Hade