Mesia Idia Davaria!
‘Ai be Mesia ai davaria vadaeni.’—IOA. 1:41.
1. Dahaka dainai Andrea ia gwau: ‘Ai be Mesia ai davaria vadaeni’?
IOANE BAPATISO be ena hahediba taudia rua ida idia gini noho lalonai, Iesu be idia dekenai ia raka lao. Vadaeni, Ioane ia gwau: “Itaia, Dirava ena Mamoe Natuna!” Ioane Bapatiso ena hahediba taudia rua, Andrea bona Ioane, be maoromaoro Iesu murinai idia raka bona unai dina ibounai ia idia bamoa. Gabeai, Andrea be ena tadikaka Simona Petero dekenai ia lao bona mai moale ida ia gwau: ‘Ai be Mesia ai davaria vadaeni.’ Bena Petero ia hakaua lao Iesu ia hedavari henia totona.—Ioa. 1:35-41.
2. Mesia ena peroveta herevadia ita stadilaia karana ese edena dala ai ita do ia durua?
2 Unai nega amo, Andrea, Petero, bona ma haida be Toretore Helagadia idia stadilaia namonamo bona idia abia dae momokani Iesu be gwauhamata Mesiana. Hari, ita ese Mesia ena peroveta hereva ma haida do ita stadilaia. Unai amo Baibel bona Iehova ese ia abia hidi Mesiana do ita abidadama henia.
“Emu King be Oi Dekenai Ia Mai Noho”
3. Iesu be king bamona Ierusalema dekenai ia vareai neganai, edena peroveta herevana ia guguru?
3 King bamona Ierusalema dekenai do ia vareai. Sekaraia ia peroveta, ia gwau: “Umui Ierusalema dekenai noho taudia e, do umui moale, mai boiboi danu do umui moale. Umui itaia, emui King be umui dekenai ia mai noho. Ia be mai ena hamauria kara danu. Ia ese ia dekenai idia tuari henia taudia ia halusia momokani. To ia be mai manau danu, bona doniki dekenai ia guia. Doniki ena natuna ena latanai ia guia lao.” (Sek. 9:9) Salamo torea tauna ia gwau: “Dirava ese, Lohiabada ena ladana dainai ia mai noho tauna, be do ia hanamoa.” (Sal. 118:26) Iesu be Ierusalema hanua ai ia vareai neganai, hutuma be mai moale bada ida idia boiboi. Iesu ese ia hamaorodia lasi unai do idia karaia totona. To, idia karaia karana ese Sekaraia ena peroveta herevana ia hagugurua. Unai siri oi duahia neganai, mani oi laloa oi be idia huanai oi noho bona edia moale regena oi kamonai diba.—Mataio 21:4-9 duahia.
4. Salamo 118:22, 23 be edena dala ai ia guguru?
4 Ena be momo ese do idia abia dae lasi Iesu be Mesia, to Dirava ese ia ia laloa bada. Peroveta herevadia hegeregerena, momo ese Iesu idia matauraia lasi. Idia be abidadama lasi taudia. (Isa. 53:3; Mar. 9:12) To, Baibel ia gwau: “Inai nadi, ruma haginia taudia ese idia ura henia lasi, to hari ia be ruma ena kona nadi badana momokani ia gini noho. Inai be Lohiabada ena kara.” (Sal. 118:22, 23) Nega ta, Iesu ese tomadiho gunalaia taudia dekenai unai hereva ia gwauraia. Bona Petero ia gwau unai peroveta herevana be Iesu bona kongrigeisen ia laulaulaia. Ia gwau kongrigeisen be ruma ta bamona, bona Iesu be Keristani kongrigeisen ena kona nadi badana. Ena be abidadama lasi taudia ese idia abia dae lasi Iesu be Mesia, to “Dirava ese ia abia hidi bona Dirava dekenai ia be dava bada gauna.”—1 Pet. 2:4-6; Mar. 12:10, 11; Kara 4:8-11.
Turana ta ese Ena Mase Dalana Ia Karaia Bona Haida Idia Heau Boio
5, 6. Mesia ena mase dalana be edena bamona idia perovetalaia? Bona edena dala ai ia guguru?
5 Turana ta ese ena mase dalana do ia karaia. Davida ia peroveta, ia gwau: “Egu turana lalokau danu, lau abidadama henia tauna, egu aniani [“paraoa,” NW ] ia ania noho tauna, ia ese danu lau ia hadikaia noho.” (Sal. 41:9) Baibel negadiai, taunimanima be paraoa idia ania hebou neganai, ia hahedinaraia idia be tura namodia. (Gen. 31:54) Unai peroveta herevana ese ia hahedinaraia Mesia ena tura namona ta ese ena mase dalana do ia karaia! Iesu be unai tauna ia herevalaia neganai, iena aposetolo taudia ia hamaorodia: “Lau be umui ibounai lau herevalaia lasi. Lau abia hidi taudia lau diba. Unai amo Toretore Helagadia do ia guguru, ia gwau: ‘Guna egu paraoa ia ania tauna be egu inai tauna ai ia lao.’ ” (Ioa. 13:18) Iesu be Iuda Iskariote ia herevalaia, ia be ena aposetolo tauna ta bona iena turana. Iuda be unai ia karaia neganai, Davida ena peroveta herevana ia guguru.
6 Siliva moni 30 amo ena mase dalana ia karaia, bona unai be hesiai tauna ta ena davana! Mataio ia gwau Iuda ese siliva moni 30 amo Iesu ena mase dalana ia karaia bona unai ese Sekaraia 11:12, 13 ena peroveta herevana ia hagugurua. To, Mataio ia gwau Ieremia ena peroveta herevana ia guguru. Dahaka dainai Mataio ia gwau Ieremia, to unai peroveta herevana be Sekaraia ese ia gwauraia? Mataio ena nega ai, Baibel buka haida idia atoa hebou bona Sekaraia bukana danu ia noho, to Ieremia bukana be unai buka edia lista dekenai ia hedinarai guna. Unai dainai Mataio be Ieremia ena ladana ia gwauraia. To, Iuda be unai siliva moni 30 ia gaukaralaia lasi. Ia ese dubu helaga lalonai unai moni ia negea bona “sibona ia tauadae.”—Mat. 26:14-16; 27:3-10.
7. Sekaraia 13:7 be edena dala ai ia guguru?
7 Ena hahediba taudia idia heau boio. Sekaraia ia gwau: “Mamoe naria tauna, . . . do oi alaia mase, vadaeni mamoe be gabu idauidau do idia heau boio.” (Sek. 13:7) Nisan 14, 33 C.E. ai, Iesu ese ena hahediba taudia ia hamaoroa: “Inai hanuaboi ai, lau dekenai do ia vara gauna dainai umui ibounai do umui moru, badina Toretore Helagadia ia gwau: ‘Lau ese mamoe naria tauna do lau alaia mase, bona mamoe be gabu idauidau dekenai do idia heau lao.’ ” Unai ia vara momokani. Mataio ia gwau hahediba taudia ibounai ese Iesu idia rakatania bona idia heau.—Mat. 26:31, 56.
Do Idia Samania Bona Dadabaia
8. Isaia 53:8 be edena dala ai ia guguru?
8 Kota dekenai do idia abia lao bona idia hamasea. (Isaia 53:8 duahia.) Nisan 14 daba ai, Sanhedrin ena Kota taudia ibounai idia hebou. Iesu ena imana be varo amo idia kwatua bona Roma ena Gavana Pontio Pilato dekenai idia hakaua lao. Pilato ese Iesu ia nanadaia bona ia davaria ia be kerere ta ia karaia lasi. Unai dainai, Pilato ese hutuma ia nanadaia bema Iesu do ia ruhaia, to idia boiboi bada, idia gwau: “Au dekenai kokoa kau!” Idia ura Pilato ese Banaba, kara dika tauna, do ia ruhaia. Pilato ia ura hutuma ia hamoalea dainai, Banaba ia ruhaia. Bena ena tuari taudia ia oda henia Iesu do idia kwadia bona au dekenai do idia kokoa kau.—Mar. 15:1-15.
9. Iesu ena nega ai Salamo 35:11 be edena dala ai ia guguru?
9 Koikoi taudia ese do idia samania. Davida ia gwau: “Samania koikoi taudia idia toreisi noho, lau karaia lasi kerere totona, lau idia samania noho.” (Sal. 35:11) Unai peroveta hereva hegeregerena, “dubu biagudia bona Sanhedrin taudia ibounai be Iesu do idia samania koikoi taudia idia tahua, ia idia hamasea totona.” (Mat. 26:59) Baibel ia gwau, momo ese Iesu do idia samania koikoi, to edia hereva be idauidau. (Mar. 14:56) Iesu ena inai taudia be unai koikoi herevadia idia laloa lasi, to edia ura badana be ia idia hamasea.
10. Isaia 53:7 be edena dala ai ia guguru?
10 Ia idia samania taudia dekenai do ia haere lasi. Isaia ia peroveta, ia gwau: “Idia dagedage henia, bona idia hisihisi henia, to ia ese iena uduna ia kehoa lasi. Mamoe ena natuna be, idia alaia gabuna dekenai idia hakaua lao bamona, o mamoe be huina utua taudia edia vairanai, regena ta ia karaia lasi bamona, ia ese hereva ta ia gwauraia lasi.” (Isa. 53:7) “Dubu biagudia bona tau badadia ese ia idia samania neganai, hereva ta ia gwauraia lasi.” Bena Pilato ese ia nanadaia: “Oi dekenai idia gwauraia samania hereva ibounai oi kamonai lasi, a? To Iesu ia haere lasi, hereva ta danu ia gwauraia lasi, unai dainai gavana ia hoa bada.” (Mat. 27:12-14) Iesu be iena inai taudia ia hereva dika henidia lasi.—Roma 12:17-21; 1 Pet. 2:23.
11. Isaia 50:6 bona Mika 5:1 be edena dala ai idia guguru?
11 Isaia ia peroveta Mesia do idia botaia. Ia gwau: “Egu doruna idia botaia taudia dekenai lau koua gwauraia lasi, bona idia ese lau idia hereva dika henia neganai, edia hereva lau hadokoa gwauraia lasi. Idia ese egu auki huina idia veria, bona egu vairana dekenai idia kanudia neganai, lauegu vairana lau hunia lasi.” (Isa. 50:6) Danu, Mika ia gwau: “Au amo Israela ena lohia tauna ena medena do idia botaia.” (Mika 5:1, BHğ) Gabeai, Mareko ia hahedinaraia unai peroveta herevadia be Iesu idia herevalaia. Ia gwau: “Haida be ia idia kanudia, ena vairana idia koua, idia paisia, bona ia dekenai idia gwau: ‘Bema oi be peroveta tauna, vadaeni ai oi hamaoroa daika ese oi ia paisia!’ Bona kota ena ofesa taudia ese ena vairana idia pataia murinai, ia idia abia lao.” Ma ia gwau, tuari taudia ese siriho amo Iesu ena kwarana idia kwadia, idia kanudia, bona idia tui diho idia tomadiho henia totona. (Mar. 14:65; 15:19) Momokani, Iesu dekenai unai bamona idia karaia be maoro lasi.
Dirava Ia Badinaia Ela Bona Ia Mase
12. Salamo 22:16 bona Isaia 53:12 be edena dala ai idia guguru?
12 Au dekenai do idia kokoa kau. Davida ia gwau: “Kara dika taudia orea ta ese lau idia hagegea. Idia be sisia bamona lau idia koua noho, egu imana bona aena idia koria noho.” (Sal. 22:16) Baibel idia duahia taudia idia diba, bona Mareko ena Evanelia bukana ia hamomokania, unai peroveta herevana be ia guguru. Mareko ia gwau, daba 9 oklok ai Iesu ena imana bona aena be au ta dekenai idia kokoa kau. (Mar. 15:25) Peroveta herevana ma ta ia gwau, Mesia be kara dika taudia danu ia mase hebou. Isaia ia gwau: “Iena mauri ia atoa diho, bona kerere taudia danu ia mase hebou.” (Isa. 53:12) Iesu ia mase neganai, “henaohenao taudia rua be ia badinai au dekenai idia tauadae, ta be ena idibana kahanai bona ta be ena laurina kahanai” bona unai peroveta herevana ia guguru.—Mat. 27:38.
13. Salamo 22:7, 8 be edena dala ai ia guguru?
13 Davida ia peroveta, Mesia do idia hereva dika henia bona hevasehalaia. (Salamo 22:7, 8 duahia.) Iesu be hisihisi auna dekenai ia noho neganai, taunimanima ese idia hereva dika henia. Mataio ia gwau: “Idia raka hanai taudia be ia idia hereva dika henia bona edia kwarana idia davea, idia gwau: ‘Oi gwau dubu helaga do oi hadikaia bona dina toi lalonai do oi haginia lou, vadaeni oi sibona oi hamauria! Bema oi be Dirava ena natuna, hisihisi auna amo oi diho!’ ” Dubu biagudia, taravatu hadibaia taudia bona tau badadia be ia idia hevasehalaia, idia gwau: “Ma haida ia hamauria, to ia sibona ia hamauria diba lasi! Ia be Israela ena King, namona be hisihisi auna amo ia diho bona ia do ita abidadama henia. Ia be Dirava ia abidadama henia, namona be Dirava ese hari do Ia hamauria bema Ia ura henia, badina ia gwau, ‘Lau be Dirava ena Natuna.’ ” (Mat. 27:39-43) Ena be Iesu be hisihisi bada ia davaria, to ia badu henidia eiava ia gwau henidia lasi. Ita dekenai ia be haheitalai namona.
14, 15. Salamo 22:18 bona Salamo 69:21 be edena dala ai idia guguru?
14 Laki gadara ta amo ena dabua do idia haria. Davida ia peroveta ia gwau: “Lauegu dabua idia haria noho. Egu dabua be laki dekenai idia haria.” (Sal. 22:18) Unai ia vara momokani. Baibel ia gwau Roma tuari taudia ese Iesu be au dekenai idia kokoa kau murinai, gadara ta amo ena dabua idia haria.—Mat. 27:35; Ioane 19:23, 24 duahia.
15 Vinega bona wain iditana do idia henia. Peroveta herevana ia gwau: “Lau be hitolo neganai, mase havaraia muramura lau dekenai idia henia. Lau ranu mase neganai, vinega sibona lau dekenai idia henia.” (Sal. 69:21) Ita diba unai peroveta herevana be ia vara momokani badina Mataio ia gwau: “Iesu dekenai wain ida idia mikisia muramura iditana idia henia, to sisina ia mamia murinai, ia ura lasi ia inua.” Gabeai, “idia ta ia heau lao, spansi ta ia abia bona wain iditana lalonai ia udaia, bena au ta dekenai ia atoa bona Iesu dekenai ia henia, ia inua totona.”—Mat. 27:34, 48.
16. Salamo 22:1 be edena dala ai ia guguru?
16 Toana be Dirava ese ia rakatania. (Salamo 22:1 duahia.) Mareko ia gwau adorahi 9 oklok bamona Iesu be ia boiboi ia gwau: “ ‘Eli, Eli, lama sabakatani?’ anina be, ‘Egu Dirava e, egu Dirava e, dahaka dainai lau oi rakatania?’ ” (Mar. 15:34) Namo lasi ita laloa Iesu be ena Tamana ia abidadama henia lasi dainai, unai bamona ia hereva. Lasi, to ia diba ena mase negana ai, ena tamana be ena inai taudia edia dagedage karana do ia koua lasi. Oibe, unai nega ai Iesu ia hahedinaraia, herevana hisihisi bada ia davaria, Dirava ia badinaia ela bona ia mase. Iesu be ataiai ia noho herevana ia gwauraia neganai, Salamo 22:1 ena hereva ia guguru.
17. Sekaraia 12:10 bona Salamo 34:20 be edena dala ai idia guguru?
17 Inai taudia ese do idia gwadaia, to ena turia ta do idia makohia lasi. Sekaraia ia gwau Ierusalema taudia ese idia gwadaia Tauna do idia itaia. (Sek. 12:10) Salamo 34:20 ia gwau, Dirava ese “unai tau do ia naria namonamo, vadaeni iena turiana ibounai do idia namo, ta do idia makohia lasi.” Aposetolo Ioane ia gwau unai peroveta herevadia be idia vara momokani. Ia gwau: “Tuari tauna ta ese ena ohena be io amo ia gwadaia bena maoromaoro rara bona ranu idia diho. Bona unai gaudia ia itaia tauna ese unai gaudia ia gwauraia hedinarai bona iena hereva be momokani.” Ioane ma ia gwau: “Unai gaudia idia vara unai amo Toretore Helagadia ena hereva ia guguru, ia gwau: ‘Ena turia ta be do idia makohia lasi.’ Bona Toretore Helagadia ena hereva ma ta ia gwau: ‘Idia ese idia gwadaia Tauna do idia itaia.’ ”—Ioa. 19:33-37.
18. Isaia 53:9 be edena dala ai ia guguru?
18 Kohu momo taudia ida do idia guria. (Isaia 53:5, 8, 9 duahia.) Nisan 14 adorahina ai, “taga tauna ta Arimatea amo,” ese Pilato ia noia Iesu ena tauanina do ia abia bona ia guria, bona Pilato ese gwaumaoro ia henia. Mataio ia gwau: “Iosepa ese Iesu ena tauanina ia abia bona dabua namo hereana amo ia kumia, bona iena guria gabuna matamatana, nadi ai ia geia matuna lalonai, Iesu ena tauanina ia atoa. Bona guria gabuna ena vareai gabuna be nadi badana amo ia koua murinai, ia lao.”—Mat. 27:57-60.
Mesia Iseda King Ita Hanamoa!
19. Salamo 16:10 be edena dala ai ia guguru?
19 Iehova ese do ia hatorea isi lou. Davida ia gwau: “Mase taudia edia gabu dekenai, oi [Iehova] ese lau do oi rakatania lasi.” (Sal. 16:10, NW ) Nisan 16 ai, hahine haida be Iesu ena gara gabuna dekenai idia lao bona aneru ta ese idia ia hamaoroa: “Umui hoa lasi. Lau diba umui be Iesu umui tahua noho, ia be au dekenai idia kokoa kau Nasareta tauna. Ia be ia toreisi lou vadaeni, bona iniseniai ia noho lasi. Itaia! Ia idia atoa gabuna be inai.” (Mar. 16:6) Gabeai, Pentekoste 33 C.E. ai, aposetolo Petero be Ierusalema ai idia hebou hutuma dekenai Davida ena peroveta hereva Salamo 16 ai ia herevalaia. Ia gwau: “Davida be Keriso ena toreisi lou be guna ia diba bona unai ia herevalaia, ia gwau, Dirava ese Keriso be Mase Gurina dekenai ia rakatania lasi ena tauanina ia bodaga totona.” (Kara 2:29-31) Unai dainai, Dirava be hoa karana ta ia karaia, ia ese Iesu ia hatorea isi lou, bona guba dekenai ia daekau.—1 Pet. 3:18.
20. Baibel ese Mesia ena lohia dalana be edena bamona ia gwauraia?
20 Dirava do ia gwau Iesu be iena Natuna. (Salamo 2:7; Mataio 3:17 duahia.) Iesu be Ierusalema dekenai ia vareai neganai, hutuma ese ia bona ena Basileia idia hanamoa. Hari ita danu ese Iesu ita hanamoa. Mai moale ida ma haida dekenai ia bona ena Basileia ita herevalaia. (Mar. 11:7-10) Kahirakahira, Keriso be “hereva momokani bona kara maoromaoro gimaia totona” ia tuari neganai, ena inai taudia do ia haorea momokani. (Sal. 2:8, 9; 45:1-6) Bena tanobada ibounai do ia lohiaia. Taunimanima ibounai be maino ai do idia noho bona edia ura gaudia ibounai do idia abia. (Sal. 72:1, 3, 12, 16; Isa. 9:6, 7) Iehova ena lalokau Natuna, Iesu Keriso, be guba ai ia lohia noho. Ita be Iehova ena Witnes taudia bona hereva momokani be ma haida dekenai ita harorolaia be hahenamo badana!
Edena Bamona Do Oi Haere?
• Iesu ena turana ta ese ena mase dalana ia karaia bona haida idia heau boio ena peroveta herevadia be edena dala ai idia guguru?
• Iesu ena mase idia perovetalaia herevadia be edena dala ai idia guguru?
• Dahaka dainai oi abia dae momokani Iesu be Mesia?
[Study Questions]
[Picture on page 13]
Iesu be king bamona Ierusalema dekenai ia vareai neganai, edena peroveta herevadia idia guguru?
[Pictures on page 15]
Iesu be iseda kara dika dainai ia mase, to hari ia be King ta
