Paasivaat Missiarsiusoq!
Paasivaat Missiarsiusoq!
“Missiarsi naapipparput.” — JOHANNESI 1:41.
1. Andreasip ‘Missiarsimik naapitsinerannginnerani’ qanoq pisoqarpa?
JOHANNESIP KUISISUP ajoqersukkani marluk ilagai. Jiisusi tungiminnut qanilliartortillugu Johannesi ima oqarpoq: “Tassa Guutip savaaraa.” Johannesip ajoqersugaasa, Andreasip Johannesillu, Jiisusi ingerlaannaq malilerpaat ullullu sinnera ilagalugu. Kingusinnerusukkut Andreasip qatanngutini Siimuut-Petrusi naapippaa imalu oqarfigalugu: “Missiarsi naapipparput.” Taava Jiisusimukaqatigaa. — Johannesi 1:35-41.
2. Missiarsi pillugu siulittuutinik misissuinerput qanoq iluaqutigissavarput?
2 Piffissap ingerlanerani Andreasi, Petrusi allallu Allakkanik misissueqqissaarput kingusinnerusukkullu qularatik oqarsinnaalerlutik Jiisusi Missiarsiusoq neriorsuutigisaq. Maanna Missiarsi pillugu siulittuutit suli allarpassuit sammissavavut. Tamanna Biibilimik Jiisusillu Jehovamit Missiarsiusussatut toqqagaaneranik upperinninnitsinnut nakussatsissutaassaaq.
“Takuat, kunngivit ornippaatit”
3. Jiisusi kunngisut Jerusalemimut isermat siulittuutit suut eqquuppat?
3 Missiarsi kunngisut Jerusalemimut iserumaartoq. Zakaria ima siulittuivoq: “Qiimmattarit, Zionip pania, tipaatsullutit torlulagit, Jerusalemip pania! Takuat, kunngivit ornippaatit iluarluni ajugaallunilu, qanilaarluni siutituup qaani qimusserluni, siutituup arnavissap piaraata qaani.” (Zakaria 9:9) Tussiaasiortoq ima allappoq: “Pilluaqqusaali [Jehovap] aqqani tikiuttoq!” (Tussiaat 118:26) Inuppassuit Jiisusip Jerusalemimut iseriartornerani qiimmattarlutik taamatut suaartarput. Jiisusi taakkua taama iliornissaannik peqqussuteqanngilaq. Inuilli siulittuutigineqartutorluinnaq iliorput. Tamatuma allaatigineqarnera atuartillugu pisimasut takorluukkit nuannappaluttullu tusaasutut illugit. — Atuakkit Matthæusi 21:4-9.
4. Tussiaat 118:22, 23 qanoq eqquuppa?
4 Jiisusi inuppassuarnit Missiarsitut akuerineqanngikkaluartoq Guutip isaani erlinnartuuvoq. Siulittuutigineqartutut inuppassuit Jiisusi uumissorpaat suutinnagulu. Inuit taakku uppissuseqanngillat. (Esaja 53:3; Markusi 9:12) Biibilimili ima allassimavoq: “Ujarak illuliortut narrugisaat ujaraalerpoq teqeqquulluni tunngaviusoq. Tamassa [Jehovap] nammineq suliaa, tupinnangaarpoq isitsinnut.” (Tussiaat 118:22, 23) Ilaanni Jiisusip siulittuut taanna eqqaavaa upperisarsiornikkut imminut akeraasut oqaluukkamigit. Aamma Petrusip siulittuut taanna Jiisusimut ilagiinnullu tunnganerarpaa. (Markusi 12:10, 11; Apustilit Suliaat 4:8-11) Jiisusi ilagiinni kristumiuni ‘ujaranngorpoq teqeqqussaq’ tunngaviusoq. Inunnit guutiitsunit ajattorneqaraluarluni ‘Guutimit qinigaavoq erlinnartuutitaallunilu’. — 1 Petrusi 2:4-6.
Killuutigineqarpoq imminiigaallunilu!
5, 6. Missiarsip killuutigineqarnissaa qanoq siulittuutigineqarpa, qanorlu eqquuppa?
5 Missiarsip ikinngutiminit killuutigineqarnissaa siulittuutigineqarpoq. Daavi ima siulittuivoq: “Allaat ikinngutima tatigisama timiusamik nereqatigisama kimmissarpaanga.” (Tussiaat 41:10) Biibilip nalaani nereqatigiinneq ikinngutigiinnermut ersiutaasarpoq. (1 Mosesi 31:54) Taamaattumik Judasip Iskariotip Jiisusimik killuutiginninnera ajorluinnartumik iliorneruvoq. Jiisusip killuutiginnitsini eqqartorpaa apustilini ima oqarfigigamigit: “Oqaatsinni tamassi pinngilassi; nalunngilarami kikkut qinersimallugit, Allakkanili allassimasut uku eqquuttussaassapput: Timiusamik nereqatigisama kimmissarpaanga.” — Johannesi 13:18.
6 Missiarsimik killuutiginnittoq killuutiginnissasoq sølvit 30-t pillugit — inussiap akiata nalinga pillugu! Zakaria 11:12, 13-imi allassimasut eqqarsaatigalugit Matthæusi allappoq Judasip Jiisusi sølvit 30-t pillugit killuutigigaa. Soormiuna Matthæusi allattoq “pruffiitikkut Jeremiakkut” tamanna siulittuutigineqartoq? Matthæusip nalaani Jeremiap allagai allakkani arlalinni ataatsimoortuni Zakariap allagaanik ilalinniittuni siullersaasimasinnaapput. (Naleqqiuguk Lukasi 24:44). Judasip sølvit 30-t taakku atunngilai, aningaasammi naalaffimmut miloriuppai, qimagullunilu imminut nivinngarpoq. — Matthæusi 26:14-16; 27:3-10.
7. Zakaria 13:7-imi siulittuutigineqartoq qanoq eqquuppa?
7 Missiarsi ajoqersukkaminit imminiigaassasoq. Zakaria ima allappoq: “Paarsisoq persuttaruk savat paarisai siammartillugit.” (Zakaria 13:7) Ukiumi 33-mi nisanip 14-ianni Jiisusip ajoqersukkani ima oqarfigai: “Unnuaq manna ilissi tamassi tunukkumaarpassinga, allassimavormi: ‘Paarsisoq persuttarumaarpara, savat paarisai siammartillugit.’” Taamatorpiarlu pisoqarpoq, Matthæusimi allappoq ajoqersukkat tamarmik Jiisusi immineeraat qimaallutillu. — Matthæusi 26:31, 56.
Unnerluutigineqarpoq persuttarneqarlunilu
8. Esaja 53:8 qanoq ililluni eqquuppa?
8 Missiarsi eqqartuussisunut sassartitaassasoq toqumullu eqqartuussaassasoq. (Atuaruk Esaja 53:8). Nisanip 14-ianni ullaassakkut Killisiuisoqatigiinnut ilaasortat tamarmik katersortinneqarput. Taakkua Jiisusi qilersortippaat Romamiullu naalagaatitaannut Pontiusi-Pilatusimukaallugu. Taassuma Jiisusi apersoreeramiuk pinngitsuutippaa. Pilatusilli inuppassuit aperigamigit Jiisusi iperagaatissanerlugu, taakku ima akipput: “Nappakkamut kikiattoruk!” (NV) Jiisusi iperagaatinnagu Barabba, pinerluttuusoq, iperagaatikkusuppaat. Pilatusip inuppassuarnit iluarisaajumalluni Barabba iperagaatippaa, Jiisusi iperartortillugu naggataatigullu nappakkamut kikiattugassanngortillugu. — Markusi 15:1-15.
9. Tussiaat 35:11 Jiisusimut tunngatillugu qanoq eqquuppa?
9 Missiarsi eqqunngitsumik unnerluutigisaassasoq. Daavi ima allappoq: “Nalunaajaasut sallusut sassarput, apersorpaannga ilisimasaqarfiginngisannik.” (Tussiaat 35:11) Siulittuutigineqartutorpiaq “palasiunerit Killisiuisoqatigiillu tamarmiusut Jiisusimut sallusumik nalunaajaasussarsiorput toqutassanngortikkumallugu.” (Matthæusi 26:59) Biibilimi allassimavoq ‘amerlasuut taanna sallullutik nalunaajaassutigigaat, nalunaajaataalli assigiinngitsut’. (Markusi 14:56) Jiisusimut akeraasut nalunaajaasut taassuminnga salluliuutiginninnerat soqutiginngilaat. Taanna toqutaatikkusuinnarpaat.
10. Siulittuut Esaja 53:7-imiittoq qanoq eqquuppa?
10 Missiarsip unnerluutiginnitsini akissanngikkai. Esaja ima siulittuivoq: “Erloqisitaavoq naalliutsitaallunilu, qaninili ammanngilaa; soorlu savaaraq toqukkiartorneqartoq, soorlu sava kissarneqartilluni nilliallanngitsoq, qarni ammanngilaa.” (Esaja 53:7) Jiisusi ‘palasiunerit utoqqaanertallu unnerluussutaannut akinngilluinnarpoq’. Pilatusi ima aperivoq: “Illit pillutit unnerluussuterpassuit tusaanngiligit?” Jiisusilli ‘oqaatsimik ataatsimilluunniit akinngilaa naalagaatitaq tupigusungaalersillugu’. (Matthæusi 27:12-14) Jiisusip akeqqani oqalorujuutinngilai. — Romamiut 12:17-21; 1 Petrusi 2:23.
11. Esaja 50:6 aamma Mika 4:14 qanoq eqquuppat?
11 Esaja siulittuivoq Missiarsi persuttarneqarumaartoq. Esaja ima allappoq: “Qatigaga manivara anaalerisunut, uminnillu nutsuisut ilaginnaannarpakka, kiinara assinngilara asissuisunut qitseraasunullu.” (Esaja 50:6) Mika ima siulittuivoq: “Israelip naalagaa ajaappissamik ulussamigut anaaneqarpoq!” (Mika 4:14) Siulittuutit taakkua eqquunnerat uppernarsarlugu Markusi ima allappoq: “Ilaasa qitseralerpaat kiinaalu ulillugu tilluarlugulu oqarfigalugulu: ‘Eqqoriaagit!’ Kiffallu anaataminnik anaalilerpaat.” Markusi allappoq sakkutuut ‘sullortuumik niaquatigut anaaleraat qitserarlugulu, seeqqummerlutillu pallorfigigaat’. (Markusi 14:65; 15:19) Soorunami inuit taakku Jiisusimik taamatut pinninnissaminnut pissutissaqanngillat.
Toqumut allaat aalajaappoq
12. Tussiaat 22:17 aamma Esaja 53:12 qanoq eqquuppat?
12 Missiarsi nappakkamut kikiattugaalluni toqutaajumaartoq. Daavi ima allappoq: “Qimmit ilusimavaannga, avatangersimavaannga pinerluttut ataatsimoortut, assakka isikkakkalu putusimavaat.” (Tussiaat 22:17) Soorlu Biibilimik atuartartut nalunngikkaat aamma soorlu Markusi iivangkiiliumi allattoq, siulittuut tamanna eqquuppoq. Markusi allappoq Jiisusi nappakkamut kikiattugaasoq ullaakkut nalunaaquttap qulingiluat missaani. Assai isigaalu nappakkamut kikiattugaapput. (Markusi 15:25) Siulittuummi allami siulittuutigineqarpoq Missiarsip ajortuliortut toqoqatigissagai. Esaja ima allappoq: ‘Inuunini toqumut tunniuppaa inatsisinillu unioqqutitsisunut ilaliussaatilluni.’ (Esaja 53:12) Tamanna eqquuppoq ‘taassumunnga ilagitillugit piiaasut marluk sanningasulimmut [nappakkamut, NV] kikiattorneqarmata, aappaa talerpiata tungaani aappaalu saamiata tungaani’. — Matthæusi 27:38.
13. Tussiaat 22:8, 9 qanoq eqquuppa?
13 Daavi siulittuivoq Missiarsi mitaatigineqarumaartoq. (Atuakkit Tussiaat 22:8, 9). Jiisusi nappakkami anniartitaaffimmiitilluni mitaatigineqarpoq. Matthæusi ima allappoq: “Saneqquttullu mitaatigaat ileqimisaartorlutillu oqarlutik: ‘Naalaffimmik ingutserisutit sanaqqiisutillu ullut pingasut ingerlaneranni, Guutip ernerippatit imminut annaanniarit, sanningasulimmiillu [nappakkamillu anniartitaaffimmit, NV] aqqarit.’ Palasiunerittaaq allakkanillu ilisimasut utoqqaanertallu ilagalugit taamatut mittatigaat ima oqarlutik: ‘Allat annaattaraluaramigit imminut annaanneq sapilerpoq. Israelip kunngia, sanningasulimmiit [nappakkamit anniartitaaffimmit, NV] maanna aqqarli, taava upperilissavarput. Guuti tatigaa, taassuma nuannarisariguniuk maanna aniguisilliuk. Oqarpormi: Guutip erneraanga.’” (Matthæusi 27:39-43) Jiisusi naalliuppoq, eqqissisimavorli. Uagutsinnut maligassaalluarpoq.
14, 15. Nassuiaruk Missiarsip atisaasa taassumalu sungarnitsumik imigassinneqarnissaata siulittuutigineqarnerat qanoq eqquunnersut.
14 Missiarsip atisai immeraatigineqarumaartut. Daavi ima allappoq: “Atisakka imminnut agguaappaat ilupaaralu immeraatigalugu.” (Tussiaat 22:19) Taamatorpiaq pisoqarpoq. Biibilimi allassimavoq Romamiut sakkutuui Jiisusi nappakkamut kikiattoreeramikku taassuma atisai immeraatigalugit imminnut agguaakkaat. — Matthæusi 27:35; atuaruk Johannesi 19:24.
15 Missiarsi sungarnitsumik seernartumillu imigassinneqarumaartoq. Ima siulittuutigineqarpoq: “Nerlerpaannga sungarnitsumik imerusuersarlungalu seernartumik.” (Tussiaat 69:22) Nalunngilarput siulittuut tamanna eqquuttoq, Matthæusimi ima allappoq: “Viinnimik sungarnitsumik akusamik imigassippaat; ooqattaaraluaramiulli imerumanngilaa.” Kingusinnerusukkut ‘taakkua ilaata arpalluni svampi tigullugu seernartumik milluarteriarlugu sullortuumut kappullugu immippaa’. — Matthæusi 27:34, 48.
16. Siulittuut Tussiaat 22:2-miittoq qanoq eqquuppa?
16 Missiarsi Guutimit qimanneqarsimasorinassasoq. (Atuaruk Tussiaat 22:2). Markusi allappoq ‘akunnerit qulingiluaanni Jiisusi nipitoorsuarmik nillertoq: “Eloí, Eloí! lamá sabaktáni?” — isumaqartoq: “Guutiga, Guutiga! Sooq qimappinga?”’ (Markusi 15:34) Jiisusi taama oqarami imaanngilaq Ataatani qilammiusoq upperiunnaarsimagaa. Guutip Jiisusi akeraanut illersorunnaarpaa taassuma assuarnaassusia tamakkiisumik misilinneqarniassammat. Jiisusi nipitoorsuarmik nillermat, “Guutiga, Guutiga! Sooq qimappinga?” siulittuut Tussiaat 22:2-miittoq eqquuppoq.
17. Zakaria 12:10-mi aamma Tussiaat 34:21-mi siulittuutigineqartut qanoq eqquuppat?
17 Missiarsi kapineqarumaartoq, saarngili nallorneqassanngitsut. Zakaria allappoq Jerusalemimiut ‘kapisartik qiviassagaat’. (Zakaria 12:10) Aamma Tussiaat 34:21-mi allassimavoq Guutip taassuma ‘saarni tamaasa paarigai ataaserluunniit nallorneqassanngitsoq’. Apustilip Johannesip siulittuutit taakku eqquunnerarpai, ima allakkami: “Sakkutuulli ilaata qalugiusaminik saneraatigut kapivaa, erniinnarlu aak imerlu anialerput. Tamatuminnga takunnittup tamanna nalunaajaatigaa ilississaaq uppeqqullusi.” Johannesi aamma ima allappoq: “Tamanna pivoq oqaatsit allakkaniittut uku eqquuteqqullugit: ‘Saarngi nallorneqassanngillat.’ — aamma oqaatsit allakkaniittut allat uku: ‘Kapisartik qiviassavaat.’” — Johannesi 19:33-37.
18. Jiisusip pisuut akornanni ilineqarnissaanik siulittuut qanoq eqquuppa?
18 Missiarsi pisuut akornanni ilineqassasoq. (Atuakkit Esaja 53:5, 8, 9). Nisanip 14-ianni unnukkut ‘angutip pisuup Arimatæamiup Josefimik atillip’ Pilatusi aperaa Jiisusip timaa tigusinnaanerlugu, akuerisaavorlu. Matthæusi ima allappoq: “Josefip Jiisusip timaa tigullugu ilupaassiamut ipeqanngitsumut immuppaa, ilivissamullu nutaamut qaarsumi namminerminut ilullisitarisimasaminut ilivaa, ilerfullu paava ujarassuarmik assakartitsivigaa qimagullunilu.” — Matthæusi 27:57-60.
Kunngi Missiarsiusoq unnersiutigisiuk!
19. Siulittuut Tussiaat 16:10-miittoq qanoq eqquuppa?
19 Missiarsi makititaajumaartoq. Daavi ima allappoq: ‘Toqusut inaannut iginnianngilarma.’ (Tussiaat 16:10) Nisanip 16-ianni arnat iliveq Jiisusip ilineqarfia takusarpaat. Takorlooriaruk qanoq tupaallatsigisimassasut inngili ilivermiittoq takugamikku! Inngilip arnat ima oqarfigai: “Annilaaqinasi! Jiisusi Nazaretimioq sanningasulimmut [nappakkamut, NV] kikiattorneqarsimasoq ujarparsi. Makissimavoq, maaniinngilaq. Takuuk, aajuna ilineqarfia!” (Markusi 16:6) Kingusinnerusukkut, ukiumi 33-mi piinsip ulluani, apustilip Petrusip inuppassuit oqalugiarfigai. Daavi pillugu ima oqarpoq: “Siumut ilisimavaa eqqartorlugulu Kristusip toqusunit makinnissaa, oqarami toqusut inaanniiginnassanngitsoq timaalu aserornermik takusaqassanani.” (Apustilit Suliaat 2:29-31) Guutip ernermi asangaakkami timaa asiutikkusunngilaa. Tupinnartuliornikkulli Jiisusi qilammi inuunermut makitippaa! — 1 Petrusi 3:18.
20. Missiarsip naalakkersuinissaa qanoq siulittuutigineqarpa?
20 Guuti oqarpoq Jiisusi erneralugu. (Atuakkit Tussiaat 2:7; Matthæusi 3:17). Jiisusi Jerusalemimut isermat inuppassuit taanna taassumalu naalagaaffissaa unnersiutigaat. Ullumikkut uaguttaaq taanna taassumalu naalagaaffia kajumilluta oqaluussissutigisarpavut. (Markusi 11:7-10) Qanittukkut Kristusip akeqqani sequmisissavai ‘sorsukkiartoruni illersorlugit sallusuissut naapertuilluarnerlu’. (Tussiaat 2:8, 9; 45:2-7) Taava nunarsuarmi tamarmi naalakkersuilerumaarpoq, inuillu tamarmik eqqissillutik sunillu amigaateqaratik inuussapput. (Tussiaat 72:1, 3, 12, 16; Esaja 9:5, 6) Jehovap ernera asangaagaa, Jiisusi Kristusi, qilammi kunngiulereerpoq. Jehovamut nalunaajaasuunerput sallusuissutinillu taakkuninnga oqaluussissutiginnissinnaanerput immikkut pisinnaatitaaffigaarput!
Qanoq akissavit?
• Jiisusip killuutigineqarlunilu imminiigaanissaanik siulittuutit qanoq eqquuppat?
• Jiisusip toqunissaa pillugu siulittuutit qanoq eqquuppat?
• Sooq illit qularutiginngiliuk Jiisusi Missiarsiusoq?
[Atuaqqissaarnermi apeqqutit]
[Qupp. 15-mi assiliartaq]
Jiisusi kunngisut Jerusalemimut isermat siulittuutit suut eqquuppat?
[Qupp. 17-mi assiliartaq]
Jiisusi ajortivut pillugit toquvoq, maannali kunngitut Missiarsitut naalakkersuivoq
