Amuwanini Mesiya!
Amuwanini Mesiya!
“Tunawani dehi Mesiya.”—YOW. 1:41.
1. Chumanyi chaleñeleli Anderi yabidiki nindi: “Tunawani dehi Mesiya”?
YOWANU MPAPATISHU wadiña hamu nawatumbanji ayedi. Chamumweniyi Yesu nakwinza, Yowanu wahosheli nindi: “Talenu Mwana kamukoku waNzambi.” Anderi niatumbanji amakwawu henohu hiyakumulondela Yesu nawa ashakamini nindi ifuku dimu. Nkumininaku, Anderi wamuwanini mana kwindi, Shimona Petulu, nawa wamulejeli nindi: “Tunawani dehi Mesiya.” Kuhiñahu Anderi wamutwalili Petulu kudi Yesu.—Yow. 1:35-41.
2. Indi kudiza wuprofwetu wahoshaña hadi Mesiya kukutukwasha ñahi?
2 Chimwahitili mpinji, Anderi, Petulu, niantu amakwawu adiña nakukoleka kwakudiza Nsona nikuhosha chikupu nawu Yesu diyi Mesiya akaninuwu. Ichi dinu tudizenu wuprofwetu wawuvulu wamuBayibolu wahoshaña hadi Mesiya. Chumichi chikutukwasha kukuhwelela chikupu Bayibolu nikukuhwelela muntu atondawu kudi Yehova kwikala Mesiya.
“Tala, Mwanta Weyi Hakwinza”
3. Wuprofwetwinyi washikijeweli hampinji yeñililiyi Yesu muYerusalema neyi mwanta?
3 Mesiya wakeñila muYerusalema neyi mwanta. Wuprofwetu waZekariya wahosha nawu: “Eyi mwana kaZiyona wamumbanda, zañalalaku chacheni; eyi mwana kaYerusalema wamumbanda, Dikuwi. Tala, Mwanta weyi hakwinza kudeyi. Waloña, wukweti wamwinu; wadizoza, wudi nakwendela hachimbulu, hamwana kachimbulu.” (Zek. 9:9) Ñimbi yamasamu wasonekeli nindi: “Kisu kisu yenowu wukwinza mwijina daYehova.” (Mas. 118:26) Mazaza awantu hiyakubilela namuzañalu hampinji yeñilileñayi Yesu muYerusalema. Yesu halejeli antu chuma chateleluwu kwilaku, ilaña akoñeli kwesekeja nachashimwini wuprofwetu. Chimukutañaña iyi nsañu fwikijenu chuma chamwekeni nikutiya antu chabidekeleñawu namuzañalu.—Tañenu Matewu 21:4-9.
4. Indi nsona yaMasamu 118:22, 23 yashikijeweli ñahi?
4 Yesu walema kudi Nzambi hela chakwila antu amavulu hiyakamwiteja nawu diyi Mesiyaku. Kwesekeja nachahosha wuprofwetu antu amavulu amuheleli Yesu nawa atoñojokeleña nawu himuntu wamukunkulwayi. Awa antu hiyadiña nachikuhweleluku. (Isa. 53:3; Maku 9:12) Bayibolu yahosha nawu: “Ilola dalekeli antuñi dinabalumuki dehi himutu wakwiwombu. Yehova diyi nachikoñi.” (Mas. 118:22, 23) Yesu washimwini iyi nsañu kudi akwansakililu adiña nakumudimbulula, nawa Petulu wahosheli nindi iyi nsañu yashikijeweli hadi Kristu. (Maku 12:10, 11; Yil. 4:8-11) Yesu diyi wekalili “ilola dakwiwombu” muchipompelu chawakwaKristu. Hela chakwila amukaanini kudi antu abula kujila, diyi ‘atondawu kudi Nzambi, nawa walema.’—1 Pet. 2:4-6.
Amufutukili Nawa Amushiyili!
5, 6. Indi wuprofwetu washimwini nawudi kutalisha hakumufukejela Mesiya, nawa washikijeweli ñahi?
5 Mesiya akamufukejela kudi muntu wakamwekana neyi hibwambu dindi. Davidi waprofweteli nindi: “Ibwambu damami aweni nadikata nindi, inakuhwelela, yowu wadiilaña yakudya yami; nannyamwini dehi katutu kindi.” (Mas. 41:9) Kumpinji yakunyima antu adiilileña hamu yakudya ayimweneña nawu hiyebwambu namuntu. (Kutach. 31:54) Dichi iwu wuprofwetu watalisha mukwila nawu muntu wadiña ibwambu daMesiya wakakoña chuma chomisha mbaña. Yesu wahosheli hakushikijewa kwamazu aDavidi awuprofwetu hampinji yahosheliyi hadi muntu wamufukejeleli nawa walejeli apostolu indi nindi: “Hinayiteni wejima wenuku; awa inatondi nayiluki; ilaña nalondi mukanda wajila wulumbuluki welawu nawu, Muntu wadyaña yakudya yami nannyamwini dehi katutu kindi.”—Yow. 13:18.
6 Muntu wakamufukejela Mesiya wakamulandisha namakumi asatu asiliva, wuseya wuyalandileleñahu nduñu. Kushindamena haZekariya 11:12, 13, Matewu washimwini nindi Yesu amulandishili hawuseya wantesha. Muloñadi Matewu chahosheleliyi nindi ichi chuma chamwekeni achishimwineñahu dehi ‘kuhitila mudi kaprofwetu Yeremiya’? Muloña mukanda waYeremiya mpinji yikwawu diwadiña watachi “mumukanda wawatuprofwetu,” wabombeleluhu niwuprofwetu waZekariya. (Esekejenu Luka 24:44.) Yudasi hadiili ana mali makumi asatu asilivaku. Wayinatilili mutembeli ‘wafuminuku, wayili nakudikudika.’—Mat. 26:14-16; 27:3-10.
7. Indi mazu ekala haZekariya 13:7 ashikijeweli ñahi?
7 Atumbanji twaMesiya akapalañana. Zekariya wasonekeli nindi: “Mutapi kabiña, nyikoku yipalañani ndundu.” (Zek. 13:7) Hanisani 14, muchaaka cha 33 C.E., Yesu walejeli atumbanji twindi nindi: “Wejima wenu mukudimboka hansañu yami; muloña anasoneki nawu, Nakatapa kabiña, nyikoku yeyinda akayipalañesha ndu-ndu.” Ichi dichuma chamwekeni. Matewu wahosheli nindi “atumbanji ejima amushiya nikumushiya [Yesu], atemoka nikutemoka.”—Mat. 26:31, 56.
Amwinkeli Muloña Nawa Amweteli
8. Indi nsona yaIsaya 53:8 yashikijeweli ñahi?
8 Mesiya akamutwala muchota nikumuhisha namuloña. (Tañenu Isaya 53:8.) Hefuku daNisani 14, akwachota chaSanihedilini abulakeni hamu, amukasili Yesu, nakumuhana kudi Nguvulu wawaRoma Pontusi Pilatu. Pilatu wamwihwili Yesu nawa hamuwanini namuloñaku. Ilaña chenhwiliyi izaza nindi yamusubuluku Yesu, izaza dawantu hiyakubidika nawu: ‘Mupopelenu hamutondu wakuyandishila’ nawa abidikili nawu ayisubwiluku Baranaba mbanji. Dichi walejeli antu jindi kumuvupola Yesu, nikumupopela hamutondu.—Maku 15:1-15.
9. Indi wuprofwetu wahaMasamu 35:11 washikijeweli ñahi?
9 Ayinsahu akutwamba akamutwambila Mesiya. Davidi wasonekeli nindi: “Ayinsahu akweti makudi hiyakunyamuka, hiyakuñihula yuma yinabuli kwiluka.” (Mas. 35:11) Kwesekeja nachahosha wuprofwetu, “akulumpi jawatupristu, niakwachota ejima, hiyakukeñakeña nsañu yakumutwambila Yesu, kulonda amujahi nachu.” (Mat. 26:59) Eñañi, “amavulu ashimwini wunsahu wakumutwambila, wunsahu wawu hiwatiyañenuku.” (Maku 14:56) Ayilumbu jaYesu hiyashili muchima kuwunsahu wakutwamba washimwineñawuku, muloña akeñeleña hohu nawu Yesu yafwi.
10. Indi wuprofwetu wahaIsaya 53:7 washikijeweli ñahi?
10 Mesiya hakayakula akwakumutwambilaku. Isaya waprofweteli nindi: “Amukabishili, hakudizozelamu, kwasama mukanwa kindi nehi, neyi mwana kamukoku akutwalawu nakujaha, neyi chamwenañayi mukoku hadi akwakumutewula zo-o, dichi niyena haasamini mukanwa kinduku.” (Isa. 53:7) Eñañi Yesu “chamwinkeluwu muloña kudi akulumpi jawatupristu nikudi akulumpi, haakwili izuku.” Pilatu wamwihwili nindi: “Iyi yuma yayivulu yidi nakukushimunawu hiwunayitiyuku?” Ilaña, Yesu “hamwakwili hela izu nidimuku; nguvulu hakuhayama nankashi.” (Mat. 27:12-14) Yesu hayitukili ayilumbu jinduku.—Rom. 12:17-21; 1 Pet. 2:23.
11. Indi wuprofwetu wahaIsaya 50:6 niMika 5:1 washikijeweli ñahi?
11 Isaya waprofweteli nindi Mesiya akamweta. Isaya wasonekeli nindi: “Akwakwetana nayinkeli nyima yami, akwakubwita wevu nayinkeli makidi ami. Hinabutili kumesu ami kuchina nsonyi hela mazeñuku.” (Isa. 50:6) Mika waprofweteli nindi: “Mukwakusompesha Isarela akamweta mutondu kwikidi.” (Mika 5:1) Maku washimwini nindi iwu wuprofwetu wahosheleña hadi Yesu, wasonekeli nindi: “Anakwawu hiyakutachika kumufwijila [Yesu] mazeñi, hiyakumubuta kumesu, hiyakumweta makaha, hiyakumwila nawu, Profwetaku. Niatulama hiyakumutambola nakumwetola namakasa.” Maku wahosheli nindi amashidika “Hiyakumweta kumutu neteti, hiyakumufwijila mazeñi, hiyakufukama nakudifukula kudi yena.” (Maku 14:65; 15:19) Dichi, hiyateleli kumukabisha Yesu muniyi njilaku, muloña kwosi chuma chakoñeliyi.
Wadiña Washinshika Kushika Nikukufwa
12. Indi wuprofwetu wahaMasamu 22:16 nihaIsaya 53:12 washikijeweli ñahi hadi Yesu?
12 Mesiya wakafwila hamutondu wakuyandishila. Davidi wahosheli nindi: “Izaza dawakwakwila chatama anankumañeni, analokoli nimakasami ninyendu yami.” (Mas. 22:16) Hakushimuna chuma chamwekeni chelukawu antañi aBayibolu, Maku mukwakusoneka Nsañu Yayiwahi wahosheli nindi: ‘Hamupopeleluwu hamutondu wakuyandishila hadiñi haora yamuchisatu [kwakwihi naora yamuchitanu nachiwana nantentemena].’ (Maku 15:25) Wuprofwetu wukwawu washimwini nawu Mesiya wakafwila hamu nawakwanshidi. Isaya wasonekeli nindi: “Chamwañiliyi wumi windi hakufwa nanochu chamubombeluwu hamu nawakwakuputola.” (Isa. 53:12) Dichi ‘Yesu amupopeleli hamutondu wakuyandishila chimu nayena atupondu ayedi, wumu kuchikasa chindi chachidiilu, mukwawu kuchimunswa.’—Mat. 27:38.
13. Indi wuprofwetu wahaMasamu 22:7, 8 washikijeweli ñahi?
13 Davidi waprofweteli nindi antu akamutuka Mesiya. (Tañenu Masamu 22:7, 8.) Antu amutukili Yesu hampinji yakabakeneñayi hamutondu wakuyandishila. Matewu watulejaña nindi: “Hiyakumutukola kudi antu ahitilañaku, hiyakumulembola nanyitu yawu, nawu, Eyi wasandaña tembeli, hiwukuyituña cheñi mumafuku asatu, damwini; neyi wuMwana kaNzambi, sulukaku [kumutondu wakuyandishila].” Akulumpi jawatupristu, ansoneki, niakulumpi hiyakumuhoshola nawu: “Waamwinini akwawu, yomweni hanatweshi kudamwinaku. Yena hiMwanta wawaIsarela asuluki [kumutondu wakuyandishila] katataka, tumwitiyi. Wakuhwelelaña Nzambi; neyi namukeñi amupulwishi katataka; muloña yena welaña nindi niMwana kaNzambi.” (Mat. 27:39-43) Yesu wakabakeni, ilaña wadiña wawunda nawa hahosheluhu chuma chatamaku. Dichi watwimikilili chakutalilahu chachiwahi.
14, 15. Indi wuprofwetu wahoshaña hayakuvwala yaMesiya nihakumwinka vinega nawu yanwi, washikijeweli ñahi?
14 Akadipañila mahina aMesiya nachinjikijilu chakusakula nachu. Davidi wasonekeli nindi: “Yuma yami yakuvwala anadipañili mukachi kawu, Mupila wami hiyakusakula nachinjikijilu chakusakula nachu.” (Mas. 22:18) Ichi dichuma chamwekeni ‘amashidika awaRoma chanamupopeluwu hamutondu wakuyandishila, adipañila nimahinindi nachinjikijilu chakusakula nachu.’—Mat. 27:35; tañenu Yowanu 19:23, 24.
15 Mesiya akamwinka vinega niwalwa wabatuka nawu yanwi. Wuprofwetu wahosha nawu: “Anyinkeli nimutondu walula nawu dyaku, chinatiyili mpwila anyinkeli vinega nawu nwaku.” (Mas. 69:21) Tuneluki netu iwu wuprofwetu washikijeweli muloña Matewu watuleja nindi: “Hiyakumwinka walwa wabatuka wabombashana nandulu anwi; chanawutompiyi, kuwinwa kwonti kwindi. Wumu hakunyakala kunona siponja, hakuyisha muwalwa wabatuka hakuyisha kwiteti, hakumwinka nindi anwi.”—Mat. 27:34, 48.
16. Indi mazu ekala haMasamu 22:1 ashikijeweli ñahi?
16 Chikamwekana neyi Mesiya akamushiya kudi Nzambi. (Tañenu Masamu 22:1.) Maku watuleja nindi: “Haora yamuchitanu nachiwana [kwakwihi na ora yamuchisatu namwana] Yesu hakubilela nezu dañovu nindi, Eloyi, Eloyi, lama sabakatani, chaya mukwila nawu, Nzambi yami, Nzambi yami, wunanshiyilidi kanka wami?” (Maku 15:34) Yesu halekeli kumukuhwelela Tata yindi wamwiwuluku. Nzambi wamushiyili Yesu kankawindi nawayilumbu jindi chakadi kumukiña kulonda Kristu yamwekeshi kashinshi kindi kudi Yehova. Kuhitila mukubilela, Yesu washikijili mazu ekala haMasamu 22:1.
17. Indi nsona yaZekariya 12:10 niMasamu 34:20 yashikijeweli ñahi?
17 Mesiya akamupwika, ilaña mafwaha indi hiyakayikotolaku. Antu amuYerusalema “akatala hadami alokweluwu.” (Zek. 12:10) Nsona yaMasamu 34:20 yahosha nawu: “[Nzambi] wahembaña mafwahindi ejima; nidimu dakukotokahu kwosi.” Kapostolu Yowanu wahosheli nindi iwu wuprofwetu washikijeweli, wasonekeli nindi: “Ishidika wumu hakumupwika [Yesu] iyoña kukabavu, henohu hikukwidika nimashi nimeji. Owu [Yowanu] wamweni yumiyi nekali chinsahu, niwunsahu windi walala, . . . Yumiyi ayilili kulonda nyikanda yajila yilumbuluki, yeliluwu nawu, Hiyakakotola hoku ifwaha dindi nidimuku. Nicheñi mukanda wajila wukwawu nawu, Akatala hadi yena apwikiluwu.”—Yow. 19:33-37.
18. Indi Yesu amujikili ñahi nawakwamaheta?
18 Mesiya akamujiikila hamu nawakwamaheta. (Tañenu Isaya 53:5, 8, 9.) Chikuneli melela hefuku daNisani 14, “muntu waheta, wafumini kuAramateya, ijina dindi Yosefu,” walombeli mujimba waYesu kudi Pilatu, nawa amwinkeli. Matewu watuleja nindi: “Yosefu hakutambula mujimba, hakuwujiñajiña mwihina ditooka dakadi majilu, hakuwukamika mwijamu dindi dadiha dapokweliyi yomweni mwilola; kuchisu chejamu hakukunkumwinaku, ilola deneni, hakufumaku.”—Mat. 27:57-60.
Muhamekenu Mesiya, Mwanta Wetu!
19. Indi wuprofwetu wahamukanda waMasamu 16:10 washikijeweli ñahi?
19 Yehova wukamusañula Mesiya. Davidi wasonekeli nindi: ‘Yehova hiwakanshiya muSheluku.’ (Mas. 16:10) Toñojokenu chahayamini ambanda ayili kwijamu kwajikiluwu mujimba waYesu. Chiyashikili kwijamu awenenuku kañelu wadibalumwini, wayilejeli nindi: “Bayi muhayamaku; mudi nakukeña Yesu kaNazareta apopeleluwu [hamutondu wakuyandishila]; wasañuka dehi mudi afu; hadi munuku; talenu hamukamikiluwu!” (Maku 16:6) Kapostolu Petulu wahosheli nenzavu dawantu apompeleli muYerusalema hefuku daPentakosta 33 C.E., nindi: “[Davidi] chamwenañahu dehi chumichi, hakutena nsañu yakusañuka kwaKristu kwamudi afu, nindi hiyamushiyili mukaluñaku [mwijamu], hela mujimba windi hiwamweni kutokaku.” (Yil. 2:29-31) Nzambi halekeli mujimba waMwanindi akeñayi wutokiku. Dichi, wamusañwili muchihayamisha kuwumi wakuspiritu!—1 Pet. 3:18.
20. Indi wuprofwetu wahosha nawudi kutalisha hachiyuulu chaMesiya?
20 Nzambi wukashimuna nindi Yesu hiMwanindi. (Tañenu Masamu 2:7; Matewu 3:17.) Yesu cheñililiyi muYerusalema izaza dawantu damuhamekeli nikulemesha Wanta windi. Makonu ninetu twamuhamekaña Yesu twashimwinaña hadi yena niWanta windi kudi antu amakwawu. (Maku 11:7-10) Katataka Kristu yajilumuni ayilumbu jindi ‘chakendayi chachiwahi munsañu yalala, nikuwunda, nikuloña.’ (Mas. 2:8, 9; 45:1-6) Wakayuula iseki dejima. Antu ejima akashakama mukuwunda nawa akaheta yuma yejima. (Mas. 72:1, 3, 12, 16; Isa. 9:6, 7) Yesu Kristu Mwana kaYehova wakeñayi hiMwanta wunakuyuula mwiwulu. Hikukooleka kweneni hakwila aYinsahu jaYehova anakushimwina nsañu yalala kudi antu!
Mukwakula Nenudi?
• Indi Yesu amufukejeleli ñahi nikumushiya?
• Indi wuprofwetu wahosheleña hakufwa kwaYesu washikijeweli ñahi?
• Muneluki ñahi chikupu nenu Yesu diyi Mesiya?
[Malwihu aKuzatisha haKudiza]
[Mwevulu wudi hefu 13]
Yesu weñilili muYerusalema neyi Mwanta
[Nyevulu yidi hefu 15]
Yesu watufwilili kukola nyiloña yetu, ilaña chayinu mpinji hiMwanta wunakuyuula
