Messia An Hmu Ta!
Messia An Hmu Ta!
“Messia kan hmu ta.”—JOH. 1:41.
1. “Messia kan hmu ta,” tih thu puan chhuah hmain eng thil nge thleng?
BAPTISTU JOHANA chu a hnungzuitu mi pahnih nên an ding a. Anmahni lam pana Isua a lo kal lai chuan, Johana chuan, “En teh u, Pathian Berâm No saw,” a ti a. Andria leh zirtîr dang chuan Isua an zui nghâl a, chu mi nî chuan a hnênah an awm ta reng a. A hnua Andria’n a unaupa Simon Petera a hmuh chuan: “Messia kan hmu ta,” tih thu phûrawm tak hrilhin, Isua lamah a hruai a ni.—Joh. 1:35-41.
2. Engtin nge Messia chungchâng hrilh lâwknate kan bih chian zêlna chu kan hlâwkpui ang?
2 Hun a kal zêl chuan Andria te, Petera te, leh mi dangte chuan Pathian Lehkha Thute ngun taka zir theihna hun tam tâwk an nei ang a, Nazaret Isua chu thutiam Messia a nihzia tih tak zetin an la puang chhuak ang. Messia chungchâng hrilh lâwknate kan bih chian zêlna hian Pathian Thu kan rinna leh a Hriakthiha kan rinna a tichak ngei ang.
“En Teh, I Lal Chu . . . A Lo Kal”
3. Isua ropui taka Jerusalem-a a luhna chuan eng hril hlâwkna nge a thlen famkimtîr?
3 Messia chu Jerusalemah ropui takin a lût ang. Zakaria hrilh lâwkna thu chuan: “Aw Zion fanu, nasa takin hlim la; Aw Jerusalem fanu, au chhuak rawh; ngai rawh, i lal i hnênah a lo kal e; mi fel a ni a, hnehtu a ni; inngaitlâwm takin sabengtung chungah a chuang a, sebengtung no chung ngeiah,” a ti a. (Zak. 9:9) Fakna hla phuahtu chuan: “LALPA hminga lo kal chu a eng a thâwl e,” tiin a ziak a ni. (Sâm 118:26) Isua Jerusalem khuaa a lo luh chuan mipuite chu hlim takin an au va; chu chu Isua tihtîr a ni lo. Mahni rilru puak chhuakin hrilh lâwkna ang chiahin an ti a ni. Chu mi chungchâng thuziak i chhiar lai chuan thil awm dân mitthlain, an hlim au thâwm vêl chu hriat tum ang che.—Matthaia 21:4-9 chhiar rawh.
4. Sâm 118:22, 23 thlen famkim nâna thilthleng chu sawi rawh.
4 Messia a nihzia finfiahna a nei chung pawhin Isua chu mi tam takin an hnâwl a; mahse, Pathian tân chuan a hlu reng. Sawi lâwk ang chiahin, Isua chu chhinchhiahna âwih duh lotute “hmusit leh duh lohvin” a awm a. (Is. 53:3; Mk. 9:12) Mahse, Pathian chuan fakna hla phuahtu chu: “In satute lung duh loh kha a kila lung ṭangkai ber a lo ni ta. Chu chu LALPA tih a ni,” tia sawi tûrin a thâwk khum a ni. (Sam 118:22, 23) Isua chuan chu thu chu amah dodâltu sakhaw hruaitute hmaah a sawi chhuak a, Petera pawhin Isuaa a thlen famkim thu a sawi bawk. (Mk. 12:10, 11; Tirh. 4:8-11) Isua chu Kristian kohhran tân “a kila lung pawimawh ber,” a lo ni ta ngei a. Pathian ngaihsak lote hnâwl ni mah se, a ni chu “Pathian ngaihah erawh chuan thlan leh hlu tak a ni.”—1 Pet. 2:4-6.
Phatsan leh Kalsan A Ni!
5, 6. Messia phatsan a nih tûr chungchângah eng nge hrilh lâwk ni a, engtin nge a thlen famkim?
5 Messia chu a ṭhian sual takin a phatsan dâwn tih sawi lâwk a ni. Davida chuan: “Ka ṭhian kawm ngeih, ka rin tak, ka chhang eipui ngei chuan a ke artui ka chungah a lek ta,” tiin a hrilh lâwk a. (Sâm 41:9) Chhang eipui tuemaw chu ṭhian anga ngaih a ni ṭhîn. (Gen. 31:54) Chuvângin Juda Iskariota’n Isua a phatsan chu sualna tâwp khâwk a ni. Isua’n amah phatsantu chungchâng a tirhkohte hnêna a hrilhnaah, Davida hrilh lâwk thu thlen famkimna a nihzia a hriattîr a ni: “In zaa thu ka sawi lo ve; ka thlante chu ka hria, nimahsela chu chu, ‘Ka chhang eituin a ke artui ka chungah a lek ta,’ tih Pathian Lehkha Thu kha a lo thlen theihna tûr a ni,” tiin.—Joh. 13:18.
6 Messia phatsantu chuan tangka 30—sal man tluk lek chu—a dawng ang! Zakaria 11:12, 13 thu ṭanchhanin, Matthaia chuan Isua chu chutiang sum tlêm têa phatsan a nih thu a târ lang a. Mahse, engvângin nge Matthaia chuan chu thu chu ‘zâwlnei Jeremia ziak’ anga a târ lan? Matthaia hun lai chuan Zakaria lehkhabu telna ‘Zâwlnei Lehkhabuah’ Jeremia chu dah hmasak ber niin a lang. (Luka 24:44 nên khaikhin rawh.) Juda chuan dik lo taka a tangka hmuh chu a hmang miah lo; biak ina paih lût a, kal bova a va inawhhlum tâk avângin.—Mt. 26:14-16; 27:3-10.
7. Engtin nge Zakaria 13:7 thu a thlen famkim?
7 Messia zirtîrte meuh pawh an darh ang. Zakaria chuan: “Berâmpu chu vua la, berâm rual an darh ang,” tiin a ziak a. (Zak. 13:7) C.E. 33 Nisan 14-ah, Isua chuan a zirtîrte hnênah: “Zâninah hian in zain ka chung thuah lungni lovin in awm vek ang; ‘Berâm vêngtu chu ka vua ang a, berâm rual chu an darh ang,’ tih ziak a ni si a,” a ti a. A sawi ang ngei chuan a thleng ta tih Matthaia ziak aṭangin kan hre thei a ni: “Zirtîrte zawng zawng chuan amah chu an thlahthlam a, an tlân bo ta vek a,” tia a ziah avângin.—Mt. 26:31, 56.
Puh Chhiat leh Vuak A Ni
8. Eng ang dinhmunah nge Isaia 53:8 thu a thlen famkim?
8 Messia chu a chungthu rêlsak leh thiam loh chantîr a ni ang. (Isaia 53:8 chhiar rawh.) Nisan 14 inṭan tirh lamah, Juda rorêl khâwl Sanhedrin zînga mi zawng zawng chu inhmu khâwmin, Isua chu an phuar a, Rom Ram Awptu Pontia Pilata kutah an hlân a ni. Ani chuan Isua a lo dâwp a, a sualna engmah a hmu lo. Mahse, Pilata’n Isua chhuah a han tum chuan mipuite chu: “Khêngbet rawh,” tiin an au va, a aiah Barabba chhuah zâwk tûrin an ngên a ni. Mipui tihlungawi a tumna lamah Pilata chuan Barabba chu chhuahin, Isua chu a vuak hnuah khenbeh atân a pe ta a ni.—Mk. 15:1-15.
9. Sâm 35:11-a hrilh lâwk angin, Isua hunah eng nge thleng?
9 Hretu derte chuan Messia kalhin thu an sawi ang. Fakna hla phuahtu Davida chuan: “Hretu derte an lo thawk a, ka hriat loh thilahte mi chhâl,” tiin a sawi a. (Sâm 35:11, C.L. Re-edited) He hrilh lâwkna ang chiahin, “Puithiam lalte leh Dân zirtîrtute leh Sanhedrin mi zawng zawngte chuan Isua an tihhlum theih nân dâwta hêkna an zawng an zawng a.” (Mt. 26:59, C.L.R.) A nihna takah chuan, “mi tam takin dâwtin an hêk a, nimahsela an hêkna thu chu a inhmu thei si lo.” (Mk. 14:56) Isua hmêlmate chuan hretu anga an hmante’n Isua chungchâng thudik an sawi leh sawi loh chu an ngai pawimawh lo. Amah tihhlum hrim hrim chu an duh a ni.
10. Isaia 53:7 thlen famkim dân sawi rawh.
10 Messia chuan dâwta puhtute hmaah a kâ a âng lo vang. Isaia chuan: “Ani chu hnehchhiahin a awm a, nimahsela a inngaitlâwm a, a kâ pawh a âng lo; berâm no talh tûra an hruaia ang leh, berâm a hmul mêttu hmâa ngawi renga awma ang maiin; a ni, a kâ a âng lo,” tiin a hrilh lâwk a. (Is. 53:7) Isua chuan “puithiam lalte leh upaten an hêk laiin engmahin a chhâng lo va.” Pilata pawhin: “An hêkna zozai che hi i hre lo em ni?” tiin a zâwt a. Nimahsela, Isua chuan “kam khat mahin a chhâng lo va; chutichuan Ram Awptu chuan mak a ti hle a.” (Mt. 27:12-14) Isua chuan amah puhtute chu a hau lêt lo.—Rom 12:17-21; 1 Pet. 2:23.
11. Isaia 50:6 leh Mika 5:1 thu engtin nge a thlen famkim?
11 Isaia chuan Messia chu vuak a ni ang tih a sawi lâwk. “Ka hnungzâng hi vawtute hnênah ka dawh a, ka biangte hi hmul pawttute hnênah ka dawh bawk a: mualphonaah leh chilah ka hmai ka hup lo,” tiin zâwlnei chuan a ziak a. (Is. 50:6) Mika chuan: “Israel hruaitu chu a biangah tiangin an vuak hi,” tiin a sawi lâwk bawk. (Mik. 5:1) Hêng hrilh lâwknate thlen famkimna chu nemnghetin, Chanchin Ṭha ziaktu Marka chuan: “A ṭhenin amah [Isua] chu chil an chhâk ta pang a, a hmai an tuam a, an hnek a, a hnênah, ‘Sawi rawh,’ an ti a. Tin, chhiahhlawhte chuan an chelh pahin an bêng sawk sawk a,” a ti. Sipaite’n “a lu-ah chuan luangin an vua a, chil an chhâk a, [tih-el nân] ṭhingṭhiin chibai an bûk a,” tih a sawi bawk. (Mk. 14:65; 15:19) Chutianga cheibâwlna dawng tûrin Isua’n thil sual engmah a ti lo rêng rêng.
Thih Thlengin A Rinawm
12. Engtin nge Sâm 22:16 leh Isaia 53:12 thute Isuaa a thlen famkim?
12 Messia khenbeh a nih laia thilthleng tûrte chu sawi lâwk a ni. “Thil ṭha lo titu awm khâwmte chuan mi hual tlat a; ka kut leh ka kete hi an tipawp a,” tiin fakna hla phuahtu Davida chuan a sawi a. (Sâm 22:16) Bible chhiartute hriat lâr tak thilthleng chu sawiin, Chanchin Ṭha ziaktu Marka chuan: “Isua an khenbeh chu fehrehsân lai [zîng dâr kua vêl] a ni,” tiin a sawi. (Mk. 15:25) Messia chu mi sual zînga chhiar tel a ni ang tih sawi lâwk a ni a. Isaia chuan: “A nunna chu thi khawp hiala a leih buaka, bawhchhetute zînga chhiar tela a awm avângin,” tiin a ziak a. (Is. 53:12) Chuvângin, “[Isua] rual chuan suamhmang pahnih an khêngbet ve a, a ding lamah pakhat, a vei lamah pakhat” an khêngbet a ni.—Mt. 27:38.
13. Eng kawngin nge Sâm 22:7, 8 thute hi Isuaa a thlen famkim?
13 Davida chuan Messia hauh a nih tûr thu a hrilh lâwk. (Sâm 22:7, 8 chhiar rawh.) Nghaisakna bana a tawrh laiin, Isua chuan hauhna a tâwk a ni: “Mi vei apiangte chuan an lu thingin, ‘Nang Pathian biak in ṭhiata ni thuma sa lehtu, intidam rawh; Pathian Fapa i nih chuan . . . lo chhuk ta che,’ tiin an tiel a,” tiin Matthaia chuan a ziak si a. Chutiang bawkin puithiam lalte, lehkhaziaktute, leh upate chuan amah tielin: “Mi dang mah a tidam ṭhîn a, mahni a intidam thei si lo. Israel lal a ni alâwm tûnah hian . . . lo chhuk ang hmiang, tichuan amah chu kan ring ang. Pathian a ring alâwm, amah hi a duh chuan tûnah hian chhandam rawh se; ‘Pathian Fapa ka ni,’ a ti si a,” an ti a ni. (Mt. 27:39-43) Chuti chung pawhin, Isua chuan chûng zawng zawng chu zahawm takin a tuar chhuak a ni. Kan tân entawn tûr ṭha a va ni êm!
14, 15. Messia thawmhnaw leh uain thûr pêk chungchânga hrilh lâwknate a thlen famkim dân sawi rawh.
14 Messia thawmhnaw atân ṭhum vâwr a ni ang. Fakna hla phuahtu chuan: “Ka silhfênte an insem a, ka kawr atân ṭhum an vâwr a,” tiin a ziak a. (Sâm 22:18) Chutiang tak chuan a thleng a ni, “[Rom sipaite’n Isua] an khenbeh zawhin ṭhum vâwrin a silhfênte chu an insem” tak tak ta si a.—Mt. 27:35; Johana 19:23, 24 chhiar rawh.
15 Messia hnênah uain thûr leh englo khâ pêk a ni ang. “Ka chaw atân englo khâ mi pe lehnghâl a; ka tuihâl lahin uain thûr inah mi pe a,” tiin fakna hla phuahtu chuan a sawi a. (Sâm 69:21) Matthaia chuan: “Uain thûr, englo khâ nêna pawlh, [chu Isua hnênah] in tûrin an pe a; nimahsela a tem veleh a in duh ta lo va. A hnuah, “an zînga mi pakhat a tlân ta nghâl a, spanj a la a, uain thûrin a chiah khat a, tiangah a târ a, a han intîr a,” tih min hrilh a ni.—Mt. 27:34, 48.
16. Sâm 22:1-a hrilh lâwkna thu a thlen famkim dân sawi rawh.
16 Messia chuan Pathianin kalsan anga inhriatna a nei ang. (Sâm 22:1 chhiar rawh.) Hrilh lâwkna ang chiahin, “behliang mun hun lai [chawhnu lam dâr thum vêl] chuan Isua chu aw ring takin, ‘Eloi Eloi, lama sabakthani?’ tiin a au chhuak a, chu chu ‘Ka Pathian, ka Pathian, engah nge mi kalsan?’ tihna a ni.” (Mk. 15:34) Isua chuan a Pa vâna mi a rinna a hloh lo. Pathian chuan Krista rinawmna fiah famkim a nih theih nân, A vênhimna la kiangin, Isua chu a hmêlmate kuta dah pumhlûmin a kalsan a ni. Chutianga au chhuakin, Isua chuan Sâm 22:1 thu a thlen famkimtîr a ni.
17. Engtin nge Zakaria 12:10 leh Sâm 34:20 thute a thlen famkim?
17 Messia chu chhun a ni ang a; mahse, a ruhte chu tihtliah a ni lo vang. Jerusalem khuaa mite chuan ‘an chhuna chu an en ang.’ (Zak. 12:10) Tin, Sâm 34:20 chuan: “[Pathianin] a ruh zawng zawng a vawng ṭha a, Pakhat mah tihtliah a ni lo,” a ti. He thu hi nemnghetin, tirhkoh Johana chuan: “Sipaite zînga mi pakhatin [Isua] nakah feiin a chhun a, tichuan thisen leh tui a chhuak ta nghâl a. A hmutu [Johana] chuan a hriattîr tawh, a thu hriattîr a dik a ni . . . Pathian Lehkha Thu, ‘A ruh pakhat mah tihtliah a ni lo vang,’ tih, thlenna tûrin chûng thil chu a lo awm ta. Tin, Pathian Lekha Thu dangin, ‘An chhuna chu an la en ang,’ a ti bawk a,” tiin a ziak a ni.—Joh. 19:33-37.
18. Engtin nge Isua chu mi hausa hnên lama phûm a lo nih?
18 Messia chu mi hausa hnên lama phûm a ni ang. (Isaia 53:5, 8, 9 chhiar rawh.) Nisan 14 tlai lamah chuan, “mi hausa, a hming Josefa, Arimathai khuaa mi” chuan Pilata hnênah Isua ruang a dîl a, ani’n a lo phalsak a. Matthaia thuziak chuan: “Josefa chuan ruang chu a la a, puan zai sîn fai takin a tuam a, ama thlân thar, lung a kerkuakah chuan a zalh a; thlân kawngkaah chuan lung lian tak a lum a, a kal ta a,” tiin a sawi belh a ni.—Mt. 27:57-60.
Messia Lalber Chu Chawimawi Rawh!
19. Engtin nge Sâm 16:10-a hrilh lâwkna hi a thlen famkim?
19 Messia chu a tho leh ang. Davida chuan: “[Nang, Jehova chuan] ka thlarau Seol hnênah i hnutchhiah dâwn si lo,” tiin a ziak a. (Sâm 16:10) Isua zalh a nihna thlâna lo kal hmeichhiate mak tih dân tûr chu han ngaihtuah teh. Chutah chuan hmuh theiha lo lang vântirhkoh an va hmu a, ani chuan: “Mangang suh u; Isua Nazaret mi an khenbeh kha, in zawng a ni âwm a, a tho leh ta; hetah a awm tawh lo; en teh u, an zalhna hi!” tiin a lo hrilh a ni. (Mk. 16:6) C.E. 33, Pentikost nîa Jerusalema pung khâwm mipui hnênah, tirhkoh Petera chuan: “[Davida’n] chûng chu a lo hriat lâwk reng avângin Krista thawh leh tûr thu a sawi a ni, ‘Mitthi khuaa hnutchhiahin a awm hek lo, a ruang pawh a ṭawih hek lo,’ tiin,” tih thu a puang chhuak a ni. (Tirh. 2:29-31) Pathian chuan a Fapa duh tak ruang ṭawih raltîr chu a phal lo. Chu bâkah, Isua chu thlarau lam nunna neiin, mak takin a kaitho bawk a ni.—1 Pet. 3:18.
20. Sawi lâwk Messia rorêlna chu engtin nge a thlen famkim?
20 Sawi lâwk tawh angin, Pathian chuan Isua chu a Fapa a nih thu a puang. (Sâm 2:7; Matthaia 3:17 chhiar rawh.) Mipuite chuan Isua leh lo thleng tûr Lalram chu an chawimawi a; chutiang bawkin keini pawhin Isua leh a rorêlna chungchâng chu lâwm takin kan sawi a ni. (Mk. 11:7-10) Krista chuan ‘thutak leh thuhnuairawlhna leh felna inbela sakawr chunga chuangin’ a hmêlmate chu a tiboral thuai ang. (Sâm 2:8, 9; 45:1-6) Chutih hunah chuan a rorêlna chuan leilung zawng zawngah remna leh hmuingîlna a awmtîr ang. (Sâm 72:1, 3, 12, 16; Is. 9:6, 7) Jehova Fapa, Isua Krista chuan vânah Messia Lal angin ro a rêl tawh a. Jehova Thuhretu kan nih anga chu mi chanchin kan puang chhuak thei hi chanvo ṭha leh ropui a va ni tak êm! (w11-E 08/15)
Engtin Nge Kan Chhân Ang?
• Engtin nge Isua chu phatsan leh kalsan a nih?
• Isua Krista khenbeh a nih laia thilthleng tûr sawi lâwkte zînga ṭhenkhat chu engte nge ni?
• Engvângin nge Isua chu thutiam Messia a ni tih i rin tlat?
[Zirlai Atâna Zawhnate]
[Phêk 15-naa milem]
Ropui taka Isua Jerusalema a luhna chuan eng hrilh lâwkna nge a thlen famkimtîr?
[Phêk 17-naa milemte]
Isua chu kan sualte atân thi mah se, tûnah Messia Lal angin ro a rêl tawh
