Aromog Da so Mesias!
Aromog Da so Mesias!
“Aromog mi lay Mesias.”—JUAN 1:41.
1. Antoy agawa akin et imbaga nen Andres ya: “Aromog mi lay Mesias”?
AKAALAGEY si Juan a Managbautismo kaibay duara ed saray disipulo to. Sanen anengneng nen Juan a nitan lay Jesus, oniay inkuan to: “Nengneng yo, say Kordero na Dios!” Si Jesus et tampol a tinumbok di Andres tan samay sakey nin disipulo tan akiulop irad sikato ed saman ya agew. Diad saginonor, inanap nen Andres so agi ton si Simon Pedro tan imbaga ton: “Aromog mi lay Mesias.” Insan to intagar si Pedro ed si Jesus.—Juan 1:35-41.
2. Panon itayon nagunggonaan ed panaral tayod arum nin Mesianikon propesiya?
2 No aralen di Andres, Pedro, tan arum ni so Kasulatan, seguradon napaneknekan da ya si Jesus imay insipan ya Mesias. Ombiskeg met so pananisia tayod Salita na Dios tan ed samay Nilanaan to legan tayon ituloy so panaral tayod arum nin Mesianikon propesiya.
“Nia! Onsabi ed Sika so Arim”
3. Antoran propesiya so asumpal sanen linmoob si Jesus bilang ari diad Jerusalem?
3 Say Mesias et onloob ed Jerusalem bilang ari. Oniay impropesiya nen Zacarias: “Manliket ka na balbaleg, O bii ya anak na Dios; oneyag ka, O bii ya anak na Jerusalem; nia, say arim onsabi ed sika; sikato so maptek, tan walaan na panangilaban; mauyamo, tan onkabayo ed sakey ya asno a kabatyan, ed tapew na sakey lanlamang a kilaw ya anak na asno a kabatyan.” (Zac. 9:9) Insulat met na salmista: “Bendito so onla dia ed ngaran nen Jehova.” (Sal. 118:26) Bilang kasumpalan na propesiya, kinmelyaw iray totoo sanen linmoob si Jesus ed Jerusalem. Siempre, ag-ingganggan nen Jesus iray totoo ya gawaen da itan. Legan yon babasaen so salaysay, imadyin yo pan wadman kayo tan likna yoy gayaga ra.—Basaen so Mateo 21:4-9.
4. Ipaliwawa no panon ya asumpal so Salmo 118:22, 23.
4 Si Jesus et mabmabli ed Dios, anggano dakel so agmangawat ed sikato bilang Mesias. Singa nipropesiya, si Jesus et ‘inkaindan tan agpinabli’ na saramay agmanisiad saray ebidensyan sikato so Mesias. (Isa. 53:3; Mar. 9:12) Balet, oniay ibabagay Biblia: ‘Say bato ya impulisay na saray managpaalagey nagmaliw ya ulo na suyok. Si Jehova so nanggawa ed saya.’ (Sal. 118:22, 23) Impaimano nen Jesus iyan teksto ed saramay lider na relihyon ya onsusumpad sikato, tan imbaga nen Pedro ya asumpal iyan propesiya ed Kristo. (Mar. 12:10, 11; Gawa 4:8-11) Si Jesus et talagan nagmaliw a “pinagkapundasyon a bato” na Kristianon kongregasyon. Anggaman impulisay na totoon andiay pananisia, sikatoy “pinili tan mabmabli ed Dios.”—1 Ped. 2:4-6.
Trinaidor tan Tinaynan!
5, 6. Antoy ibabaga na propesiya nipaakar ed pantraidor ed Mesias, tan panon iratan ya asumpal?
5 Say Mesias et traidoren na sakey a maapit a kaulop. Impropesiya nen David: “Anggan say sankaasinggeran a kaarok, samay pampipiaan kon maong, samay mimikan ed siak, et nantraidoran to ak.” (Sal. 41:9, Maung a Balita) Nensaman, say pangan a saniba et pakapatnagan na pankakaaro. (Gen. 31:54) Kanian sankaugesan lan panagtraidor imay ginawa nen Judas Iscariote ed si Jesus. Impaimano nen Jesus so kasumpalan na propesiya nen David sanen tinukoy to no siopay mantraidor ed sikato. Oniay imbaga tod saray apostol to: “Aliwan sikayon amin so tutukoyen ko; kabat ko iramay pinilik. On, pian nasumpal so Kasulatan, ‘Samay mamangan ed tinapay ko et inmalagey sumpad siak.’”—Juan 13:18.
6 Say mantraidor ed Mesias et makaawat na 30 piraso na pilak—bili na sakey ya aripen! Tinukoy nen Mateo so propesiyan walad Zacarias 11:12, 13 sanen inkuan ton si Jesus et trinaidor kasalat na melmelag labat a kantidad. Balet, akin et imbaga nen Mateo ya impropesiya iya “panamegley nen propetan Jeremias”? Nen panaon nen Mateo, say libro na Jeremias et nayarin walad sankaunaan na saray libro na Biblia ya impantutugyop, a ditan et kabiangan so Zacarias. (Ikompara so Lucas 24:44.) Agmet lanlamang apinabangan nen Judas so kuarta ta imbantak to itan ed templo insan nambikkel.—Mat. 26:14-16; 27:3-10.
7. Panon ya tinmua so Zacarias 13:7?
7 Nataytayak iray disipulo na Mesias. Insulat nen Zacarias: “Sugatan mo so pastol ko, et saray karnerok nabuybuyak ira.” (Zac. 13:7) Nen Nisan 14, 33 C.E., imbaga nen Jesus ed saray disipulo to: “Diad sayan labi et taynanan yo ak ya amin, ta walan nisulat, ‘Kabilen ko so pastol, tan saray karnero ed pulok to et nitaytayak.’” Ontan a mismo so agawa ta insulat nen Mateo ya si Jesus et “tinaynan na amin a disipulo tan batik ira.”—Mat. 26:31, 56.
Inakusaan tan Sinakitan
8. Panon ya asumpal so Isaias 53:8?
8 Say Mesias et ukomen tan nasentensiaan na patey. (Basaen so Isaias 53:8.) Nen palbangon na Nisan 14, nantutuplegan so interon Sanhedrin, impabalor day Jesus, tan inyakar dad Romanon Gobernador a si Poncio Pilato. Tinepetan toy Jesus, tan nalmoan ton anggapoy kasalanan to. Nen labay to la komon ya ibulos si Jesus, inyeyag na totoon: “Ipasak!” tan say labay dan nibulos et say kriminal a si Barabas. Lapud labay a pagustoan nen Pilato iray totoo, imbulos toy Barabas, tan impasiplatan toy Jesus, insan to inyawat pian nipasak.—Mar. 15:1-15.
9. Panon ya tinmua so Salmo 35:11?
9 Palson tastasi so mantestigo sumpad Mesias. Insulat nen salmistan David: “Saray totoon mauges mantatasi ra sumpad siak, tan iyaakusa rad siak iray kasalanan ya agkon balot ginawa.” (Sal. 35:11, MB) Tinmua itan a propesiya sanen ‘saray manunan saserdote tan say interon Sanhedrin et nananap na palson testimonya sumpad si Jesus ta pian sikatoy napatey da.’ (Mat. 26:59) Dia tua, ‘dakel so angiter na palson testimonya sumpad sikato, balet ta agmantutunosan iray ibabaga ra.’ (Mar. 14:56) Anggapoy pibabali na saray mamubusol ed si Jesus anggano mantitila irayan testigo. Basta say labay da et ompatey si Jesus.
10. Ipaliwawa no panon ya asumpal so Isaias 53:7.
10 Ag-ebatan na Mesias iray mangaakusad sikato. Impropesiya nen Isaias: ‘Sikatoy dinesdes a maong, anggan sanen sikato so pinairap agto nilukasan so sangi to; singa sakey a kordero a niarap ed panagpateyan, tan singa sakey a karnero a sikato so emel ed arap na saray mamoklis ed sikato, agto nilukasan so sangi to.’ (Isa. 53:7) Sanen si Jesus et “aakusaan na saray manunan saserdote tan mamasiken, sikatoy ag-inmebat a balot.” Tinepetan nen Pilato: “Agmo ta narerengel so dakdakel a testimonya ra sumpad sika?” Ingen ta sikatoy ‘agbalot inebatan nen Jesus kanian nikelawan a maong so gobernador.’ (Mat. 27:12-14) Ag-ininsulto nen Jesus iray angakusad sikato.—Roma 12:17-21; 1 Ped. 2:23.
11. Antoy agawa bilang kasumpalan na Isaias 50:6 tan Miqueas 5:1?
11 Impropesiya nen Isaias a say Mesias et sakitan. “Imparungtal koy beneg ko ed saray managpekpek, tan saray aping ko ed saramay manbabagot na balbas. Agko sinaniban so lupak manlapud saray panag-insulto tan lutda.” (Isa. 50:6, NW) Impasakbay met nen Miqueas: ‘Pekpeken day aping na ukom na Israel.’ (Miq. 5:1) Impanengneng nen Marcos a sarayan propesiya et nipaakar ed si Jesus. Insulat to: “[Si Jesus et] nilutlutdaan da tan sinakbongan day lupa to tan pinoponiti ra tan inkuan da ed sikato: ‘Manpropesiya ka natan!’ Tan kayari ran tinatampal et sikatoy inala na saray lingkor ed korte.” Insalaysay met nen Marcos ya saray sundalo et “pinekpek da na tanubong so ulo to tan nilutlutdaan da, tan tinmatalimukor ira pian mangigalang ed sikato.” (Mar. 14:65; 15:19) Siempre, anggapoy rason pian ontan so gawaen dad Jesus ta anggapo met so kasalanan to.
Matoor Anggad Patey
12. Panon ya asumpal so Salmo 22:16 tan Isaias 53:12?
12 Impropesiya iray detalye nipaakar ed pangipasak ed Mesias. Inkuan nen David: “Say duypo na saray bagel linakob da ak; sikara pinasak da so limalimak tan salisalik.” (Sal. 22:16) Pamilyar iray managbasay Biblia ed sayan insalaysay nen Marcos: “Natan et komatlon oras la [manga alas-9 ed kabuasan], tan sikatoy impasak da.” (Mar. 15:25) Nipasakbay met ya say Mesias et ompatey kaiba iray managkasalanan. Insulat nen Isaias: “Inkalbo to so kamarerwa to angga ed patey, tan nibilang ed saray akasumlang.” (Isa. 53:12) Asumpal iya sanen ‘walay duaran matakew ya impasak met ed abay nen Jesus, sakey ed kawanan to tan sakey ed kawigi to.’—Mat. 27:38.
13. Panon ya asumpal ed si Jesus so Salmo 22:7, 8?
13 Impropesiya nen David a say Mesias et insultoen. (Basaen so Salmo 22:7, 8.) Si Jesus et ininsulto legan ton manpapanabos ed panamairapan a kiew. Oniay imbaga nen Mateo: “Sikatoy binalawbalaw na saray ondadalan, a manpeyeng ira a kuan da: ‘O sika a mangibabagan igebam so templo tan ipaalagey mo itan ed loob na taloy agew, isalbam so inkasika! No sakey kan anak na Dios, epas ka ed satan a panamairapan a kiew!’” Sikatoy inelek-elekan met na saray manunan saserdote pati saray eskriba tan mamasiken, ya inkuan da: “Insalba toy arum, agto balet nisalbay inkasikato! Sikatoy Ari na Israel; onepas komon natan ed satan a panamairapan a kiew ta pian manisia itayo ed sikato. Say Dios so panmamatalekan to, kanian no labay na Dios ya ilaban, natan la komon, ta imbaga ton, ‘Siak so Anak na Dios.’” (Mat. 27:39-43) Nansiansian kalmadoy Jesus tan intepetepel to iratan ya amin. Alay-abig so alimbawa to!
14, 15. Ipaliwawa no panon ya asumpal iray espisipikon propesiya nipaakar ed kawes na Mesias tan say pamainum ed sikato na tuka.
14 Pampapalaranan so kawes na Mesias. Insulat na salmista: “Panaapagan da so saray kawes ko ed inkasikara, tan nampapalaranan da so aysing ko.” (Sal. 22:18) Ontan so eksakton agawa. “Sanen [si Jesus et] nipasak [na saray Romanon sundalo], nanaapagan da iray ilalatop ton kawes a nampapalaranan da.”—Mat. 27:35; basaen so Juan 19:23, 24.
15 Say Mesias et painumey tuka tan ampait a bengatla. Insulat na salmista: “Sinali da ak a pakanen na makasamal a tanaman tan painumen na tuka sanen napgaan ak.” (Sal. 69:21, NW) Imbaga nen Mateo: “Papainumen day Jesus na alak a nilaokan na bengatlan ampait, balet sanen atimtiman to et agto labay ya inumen.” Diad saginonor, ‘binmatik so sakey ed sikara tan angala na espongha tan impasepsep to ed anakseng ya alak tan inyan to ed tanubong insan ipapainum to ed sikato.’—Mat. 27:34, 48.
16. Ipaliwawa no panon ya asumpal imay propesiya ed Salmo 22:1.
16 Singano ikaindan na Dios so Mesias. (Basaen so Salmo 22:1.) Mitunosan ed propesiya, “diad komasiam ya oras [manga alas-3 na ngarem] et inmeyag si Jesus, a kuan to: ‘Eli, Eli, lama sabachthani?’ a no ipatalos et mankabaliksay: ‘Dios ko, Dios ko, akin et pinaulyanan mo ak?’” (Mar. 15:34) Aglabay ya ibaga na saya ya nakalay pananisia si Jesus ed Ama to. Amta ton sikatoy ag-iyagel na Dios ed saray mamubusol ed sikato diad sayan panaon na ipatey to. Pankanawnawa iya nen Jesus a paneknekan a sikatoy lawas matoor ed Dios. Sanen inyeyag nen Jesus a “Dios ko, Dios ko, akin et pinaulyanan mo ak?” asumpal imay propesiya diad Salmo 22:1.
17. Panon ya asumpal so Zacarias 12:10 tan Salmo 34:20?
17 Say Mesias et duyoken, tan saray pukel to et agnaputer. Imbaga nen Zacarias a saray totoo ed Jerusalem et “onnengneng irad sakey a dinuyok da.” (Zac. 12:10, MB) Tan oniay inkuan na Salmo 34:20: “[Protektaan na Dios] so amin a pukepukel to, pian agnaputer so [anggan] sakey ed sikara.” Kinompirma iraya nen apostol Juan sanen inkuan ton: “Dinuyok na sakey ed saray sundalo so diking [nen Jesus] diad panamegley na gayang, tan pinmaway a tampol so dala tan danum. Tan samay akanengneng ed saya [si Juan] so nantasi, tan tua so pantasi to . . . Agawa irayan bengatla ta pian nasumpal so kasulatan: ‘Anggapoy anggan sakey a pukel to a naputer.’ Tan, inkuan met na sakey nin kasulatan: ‘Onnengneng ira ed samay Sakey a dinuyok da.’”—Juan 19:33-37.
18. Panon a niponpon si Jesus ed lubok na saray mayayaman?
18 Say Mesias et niponpon ed lubok na saray mayayaman. (Basaen so Isaias 53:5, 8, 9.) Sanen ngarngarem la na Nisan 14, “sakey a mayaman a lakin taga Arimatea, a manngaran na Jose” so linmad si Pilato pian kerewey bangkay nen Jesus, tan inmabuloy si Pilato. Oniay imbaga nen Mateo: “Inala nen Jose so bangkay, a binalkot toy malinis tan pinon lienzo, tan imparukol to itan ed balon pakanodnonotan a lubok to, ya inungib to ed bato. Tan, kayari ton intulin so baleg a bato ed puerta na pakanodnonotan a lubok, sikatoy tinmaynan.”—Mat. 27:57-60.
Itandoro so Mesianikon Ari!
19. Panon a tinmua so propesiya a walad Salmo 16:10?
19 Napaoli so Mesias. Insulat nen David: “Agmo itilak so kamarerwak ed Sheol.” (Sal. 16:10) Nen Nisan 16, walaray bibiin linmad lubok ya angiponponan ed si Jesus. Imadyin yo pa labat so impakabigla ra sanen anengneng day sakey ya anghel, ya angibagan: “Agkayo la natatakot. Amtak ya aanapen yo si Jesus a Nazareno, a nipasak. Anggapo la dia ta apaoli la. Nengneng yo iyay angiparukolan da ed sikato.” (Mar. 16:6) Oniay inkuan nen apostol Pedro ed saramay totoon wadman ed Jerusalem nen Pentecostes 33 C.E.: “Amta [la nen David] so nipaakar ed kioli na Kristo tan nansalita nipaakar ed satan, a sikatoy agpinaulyanan na Dios diad Hades tan ag-abulok so laman to.” (Gawa 2:29-31) Ag-inabuloyan na Dios ya nabulok so laman na inad-aro ton Anak. Balet wala ni makapadinayew ya ginawa nen Jehova. Pinaoli toy Jesus bilang espiritu!—1 Ped. 3:18.
20. Panon ya asumpal so propesiya nipaakar ed panuley na Mesias?
20 Mitunosan ed propesiya, inyabawag na Dios ya Anak to si Jesus. (Basaen so Salmo 2:7; Mateo 3:17.) Tan sanen linmoob si Jesus ed Jerusalem, sikatoy intandoro na saray totoo, ontan met ed say onsabin Panarian to. Diad panaon tayo, maliket tayo met ya iyaabawag ed arum so nipaakar ed si Kristo tan ed Panarian to. (Mar. 11:7-10) Asingger to lan deralen iray kakabusol to “nisengeg ed katuaan tan kauyamoan tan inkatunong.” (Sal. 2:8, 9; 45:1-6) Ipagamor na uley to so kareenan tan inkadaakan diad interon dalin. (Sal. 72:1, 3, 12, 16; Isa. 9:6, 7) Say inad-aron Anak nen Jehova et Ari la ed tawen. Bilang Tasi nen Jehova, talagan baleg so pribilehyo tayon ipulong irayan katuaan!
Antoy Ebat Mo?
• Panon a trinaidor tan tinaynan si Jesus?
• Antoray detalyin nipropesiya nipaakar ed pangipasak ed si Jesu-Kristo?
• Akin et kombinsido kan si Jesus so insipan a Mesias?
[Tepetepet Parad Panagaral]
[Litrato ed pahina 13]
Antoran propesiya so asumpal sanen linmoob si Jesus ed Jerusalem bilang ari?
[Saray litrato ed pahina 15]
Inatey si Jesus parad kasalanan tayo, balet natan et Ari la
