Mesiasta tarirqanku
Mesiasta tarirqanku
“Mesiastan tarimuyku.” (JUAN 1:41.)
1. ¿Imaraykun Andrés nirqan “Mesiastan tarimuyku” nispa?
BAUTIZAQ JUANMI Andrés, Juan qatikuqninkunawan kasharqan, Jesusta rikuspataq nirqan: “Qhawariychis, paymi Diospa Corderon”, nispa. Chaymi iskayninku Cristota qatikurqanku ch’isiyaqtaq paywan karqanku. Tardeyaykuytan Andrés wawqen Simón Pedrota tarispa kusikuywan nirqan: “Mesiastan tarimuyku”, nispa. Chay qhepamantaq Jesusman pusarqan (Juan 1:35-41).
2. ¿Imaraykun t’aqwishanallanchis Mesiasmanta willaq profeciakunata?
2 Chay qhepamanmi Andrés, Pedro, hukkunapas qelqakunata t’aqwirirqanku. Chaymi mana iskayarqankuchu Nazaret llaqtayoq Jesús prometesqa Mesías kasqanta, chaytataq sut’inta rimarirqanku. Sichus ñoqanchispas Mesiasmanta willaq profeciakunata t’aqwisun chayqa astawanmi Diospa Akllasqan runapi Bibliapipas iñisun.
“Reyniykin hamushasunki”
3. ¿Ima profeciakunan hunt’akurqan Jesús Jerusalenman haykushaqtin?
3 Jerusalenman sumaqta haykunan karqan. Zacariasmi ‘Sión llaqtaq ususinta’ otaq Jerusalenpi tiyaqkunata nirqan: “[¡]Kusisqa takiy! Kayqa Reyniykin hamushasunki, payqa chaninmi, atipaqmi, payqa huch’uyyaykukuqmi, asnopi sillaykusqan hamushan, china asnoq orqo maltanpin hamushan”, nispa (Zac. 9:9). Imayna chaskisqa kananmantan Salmista qelqallarqantaq: “¡Saminchasqan Señor Diospa sutinpi hamuqqa!” nispa (Sal. 118:26). Manapunin Jesusqa runakunata kamachinmanchu karqan profeciaq hunt’akunanrayku chhaynata ninankupaq. ¡May kusisqachá runakunaqa Jesusta chaskirqanku, sonqomantachá qaparirqankupas! (leey Mateo 21:4-9.)
4. ¿Imaynapin hunt’akurqan Salmo 118:22, 23 textopi profecía?
4 Diosmi ancha chaniyoqpaq qhawarinan karqan, runakunataq wikch’uyukunanku karqan. Biblian willarqan mana iñiq runakuna imayna qhawarinanta: “Runakunaq pisichasqanmi qhawarparisqanmi karqan”, nispa (Isa. 53:3; Mar. 9:12). Salmistan ichaqa willarqan: “Wasi perqaqkunaq wikch’usqan rumin esquina hap’iq kapun. Chayqa Señor Diospa ruwasqanmi”, nispa (Sal. 118:22, 23). Jesusmi enemigonkunaman willarqan chay textopi nisqan paymanta rimashasqanta, Pedropas willarqanmi Jesuspi hunt’akusqanta (Mar. 12:10, 11; Hech. 4:8-11). Arí, Jesusmi karqan “esquina hap’iq” rumi, paymi hanaq pachapaq akllasqa iñiq t’aqata hatarichinan karqan. Chay Rumitan “[mana iñiq] runakunaqa wikch’urqanku, Diospaqmi ichaqa akllasqa ancha chaniyoq kawsaq rumi [karqan]” (1 Ped. 2:4-6).
Traicionasqa saqerparisqan karqan
5, 6. ¿Imatan willarqanku wakin profeciakuna Mesías traicionasqa kananmanta? ¿Imaynapin chay hunt’akurqan?
5 Huk amigonmi traicionanan karqan. Davidpa rimasqanmi Mesiaspi hunt’akunan karqan, nirqanmi: “Ñoqawan kuska [“t’antata”, NM] mikhuq confiakusqay manchay amigoymi, awqay sayaripun”, nispa (Sal. 41:9). Ñawpaqqa piwanpas t’antata mikhusqankupin rikuchiqku amigontin kasqankuta (Gén. 31:54). Chaypin yachanchis Davidqa traicionero millay amigomanta rimashasqanta. Jesuspunin qatikuqninkunaman willarqan imaynapi chay profecía hunt’akunanta, nirqanmi: “Manan llapaykichismantachu rimani, ñoqan yachani pikunatachus akllasqayta, ichaqa kayta nini ‘T’anta mikhuqmasiymi ñoqa contra sayarirqan’ niq Qelqa hunt’akunanpaqmi”, nispa (Juan 13:18). Chaytaqa nisharqan Judas Iscariote runamantan.
6 Kinsa chunka qolqerayku traicionananku karqan. Mateon willarqan profecía nisqan hina kamachi runaq vendesqanku preciopi Jesús vendesqa kasqanta. Mateoqa nirqanmi chay profeciata “profeta Jeremías” willasqanta. ¿Imaraykun chayta nirqan Zacarías 11:12, 13 textopi qelqasqa kashaqtin? Yapapaschá Mateoq tiemponpi Jeremías qelqa, profeciakunaq kasqan libropi ñawpaqta rikhuriq, Zacarias qelqapas chaypi rikhurillarqantaq (tupachiy Lucas 24:44). Judasqa manan imatapas ruwarqanchu chaskisqan qolqewan, aswanmi yupaychana wasipi wikch’uspa seq’okapurqan (Mat. 26:14-16; 27:3-10).
7. ¿Imaynatan hunt’akurqan Zacarías 13:7 textopi profecía?
7 Qatikuqninkunan saqerparinanku karqan. Zacariasmi qelqarqan: “Michiqta k’iriy, ovejakunataq ch’eqechisqa kanqa”, nispa (Zac. 13:7). 33 wata 14 nisán killapin Jesús qatikuqninkunata nirqan: “Llapallaykichismi kunan tuta ñoqata saqerpariwankichis. Diospa Simin Qelqan nin: ‘Diosmi michiqta k’irinqa, ovejakunataq ch’eqeripunqaku’, nispa”, nispa. Chayqa hunt’akurqanmi, Mateon willarqan ‘llapa yachachisqankuna sapallanta Jesusta saqerparispa ayqekusqankuta’ (Mat. 26:31, 56).
Tumpasqa maqasqan karqan
8. ¿Imaynapin hunt’akurqan Isaías 53:8 textopi profecía?
8 Wañunanpaqmi huchachananku karqan (leey Isaías 53:8). 14 nisán killapin judío umallikunaTribunalpi huñunakurqanku. Chaypin makinta wataspa Poncio Pilato kamachikuqman apachirqanku. Pilatoqa manan ima huchatapas Jesuspi tarirqanchu, chaymi llapa huñunasqa runakunaman willarqan Jesusta kacharipuy munasqanta, hinan runakunaqa qaparirqanku: “¡Paytaqa chakatay!” nispa. Chay runakunaqa Barrabás huchallikuq runatan Jesuspa rantinpi kacharipunanta munarqanku. Pilatoqa runakunata uyarispan Barrabasta kacharichirqan, Jesusta soq’achispataq k’aspipi warkunankupaq kamachirqan (Mar. 15:1-15).
9. ¿Imaynatan Jesuspi hunt’akurqan Salmo 35:11 textopi profecía?
9 Llulla testigokunan hatarinanku karqan. David hinan Mesiaspas ninan karqan: “Millay mana chanin testigokunan sayarimunku, mana yachasqaytan tapupayawanku”, nispa (Sal. 35:11). Chay profeciapi nisqan hina, “sacerdote umallikunan umalli runakunaq huñunakuyninpi kaqkunapiwan Jesús contra llulla testigota maskharqanku payta wañuchinankupaq” (Mat. 26:59). “Paypa contranpiqa askhan llullakurqanku, ichaqa willakusqankun mana tuparqanchu.” (Mar. 14:56.) Sinchi phiñasqa kaspan enemigonkuna yanqa willakuykunawan Jesusta wañuchiyta munarqanku.
10. ¿Imaynapin Isaías 53:7 textopi profecía hunt’akurqan?
10 Manan rimarinanchu karqan huchachashaqtinku. Isaiasmi willarqan: “Payqa muchuchisqan karqan, ichaqa k’umuykukullarqanmi, manan rimarillarqanpaschu. Nak’anapaq apasqa borrego hinan karqan, millman rutuqninpa qayllanpi oveja hinan upallakurqan, manan payqa rimarillarqanpaschu”, nispa (Isa. 53:7). Chay profeciataqa Jesusmi llapallanta hunt’arqan: “Sacerdote umallikuna kurak runakunapiwan huchachaqtinmi Jesusqa mana imatapas kutichikurqanchu. Chaymi Pilatoqa Jesusta nirqan: –¿Manachu uyarinki qan contra lliw imaymana rimasqankuta? nispa. Jesustaq ichaqa mana huk simillatapas Pilatoman kutichirqanchu, hinan Pilatoqa sinchita muspharqan” (Mat. 27:12-14). Jesusqa manapunin enemigonkunata kutipakurqanchu (Rom. 12:17-21; 1 Ped. 2:23).
11. ¿Imaynatan hunt’akurqan Isaías 50:6, Miqueas 5:1 textokunapi profeciakuna?
11 Maqasqa kanan karqan. Isaiasmi willarqan Mesiaspa ninanta: “Hinallatan wasaypi waqtachikurqani, hinallatan sunkhayta t’irachikurqani, hinallatan k’amichikurqani, uyaypipas thoqaykachikurqani”, nispa (Isa. 50:6). Miqueas qelqapin nillantaq: “¡Israel suyu kamachikuqtan k’umuykachinqaku!” nispa (Miq. 5:1). Chay profeciakuna hunt’akusqanmantan Marcos willarqan: “Hinaspanmi wakinninku thoqaykurqanku, wakintaq ñawinta wataspa saqmarqanku, hinaspan nirqanku: –Watuy, ¿pin saqmashasunki? nispa. Hinallataq guardiakunapas uyanpi ch’aqlarqanku. [...] Hinaspan [soldadokuna] huk soqoswan umanpi waqtarqanku, thoqaykurqanku, qonqoriykukuspataq payta yupaychaq tukurqanku”, nispa (Mar. 14:65; 15:19). Yanqamantapunin tukuy chaykunataqa ruwarqanku.
Wañupunankaman kasukurqan
12. ¿Imaynatan Jesuspi hunt’akurqan Salmo 22:16, Isaías 53:12 textokunapi profeciakuna?
12 Suwata hinan chakinta makinta k’aspipi clavaspa warkunanku karqan. Davidpa willasqanmi Mesiaspi hunt’akurqan, paymi nirqan: “Askha millay runakunan ch’unkukamuwanku, makiykunata chakiykunata t’oqowaspanku”, nispa (Sal. 22:16). Biblia leeqkunaqa yachankun imaynapi chay profecía hunt’akusqanta. Marcosmi willarqan ‘las nueve horasta’ k’aspipi warkusqankumanta (Mar. 15:25). Profeta Isaiasmi willallarqantaq huchasapakunawan kuska wañuchisqa kananta, nirqanmi: “Huchasapakuna hinan wañurqan, pay kikinmi askha runaq huchanta q’epirqan, huchasapakunapaqmi ñoqamanta mañakurqan”, nispa (Isa. 53:12). Chay profeciakuna nisqan hina, “Jesustaqa iskay suwakunatawanmi chakatarqanku, hukninta pañanpi, huknintataq lloq’enpi” (Mat. 27:38).
13. ¿Imaynatan Salmo 22:7, 8 textopi profecía Jesuspi hunt’akurqan?
13 K’aminanku karqan (leey Salmo 22:7, 8). Davidpa nisqan hina, Cristo k’aspipi warkusqa kashaqtinmi runakuna asipayarqanku. Mateon runakuna nisqanmanta willan: “¡Yaw! Dios yupaychana wasita thuniq kinsa p’unchaypi sayarichiyta munaq, qan kikiykitayá qespichikuy. Diospa Churinchus kanki chayqa, cruzmanta uraykamuy, nispa. Chay hinallataqmi sacerdote umallikunapas kamachikuy simita yachachiqkunapas fariseokunapiwan kurak runakunapiwan asipayaspa nirqanku: –Hukkunatan qespichirqan, pay kikintataq mana qespichikuyta atinchu. Israelpa Reynin kaspaqa, ¡cruzmanta kunan uraykamuchun, paypi iñinanchispaq! Diosmanmi hap’ipakun, ‘Diospa Churinmi kani’ ninmi, chhaynaqa, kacharichichunyá, nispanku”, nispa (Mat. 27: 39-43). Tukuy chaykunata nishaqtinkupas manan pisikallpayarqanchu. ¡Jesusqa allin ejemplon karqan!
14, 15. ¿Imaynapin hunt’akurqan Mesiaspa p’achan sorteanankumanta, vinagre ukyachinankumanta willaq profeciakuna?
14 P’achantan sorteananku karqan. Davidmi nirqan: “P’achaytan rakinakunku, p’achaypaqmi sorteanku”, nispa (Sal. 22:18). ¿Imaynatan chay nisqan Cristopi hunt’akurqan? ‘Jesusta chakataspaña [romano soldadokuna] p’achanta rakinakunankupaq sorteasqankupin.’ (Mat. 27:35; leey Juan 19:23, 24.)
15 Vinagreta hayaqetawanmi ukyananpaq qonanku karqan. Salmistan nisqanmi Cristopi hunt’akunan karqan: “Venenotan yarqawaqtinpas mikhuchiwarqanku, vinagretan ch’akiwaqtinpas ukyachiwarqanku”, nispa (Sal. 69:21). Mateo qelqan willan hunt’akusqanmanta: “Chaymi Jesusman hayaqeyoq vino chhaqrusqata qorqanku. Malliykuspataq mana ukyayta munarqanchu. Hukninkutaq phawarispa esponjata soqosman wataykuspa vinagreman challpuykurqan, hinaspan ch’onqananpaq haywarqan”, nispa (Mat. 27:34, 48).
16. ¿Imaynapin Salmo 22:1 textopi profecía hunt’akurqan?
16 Diospas saqerparinman hinan kanan karqan (leey Salmo 22:1). Marcosmi willan imaynatan Salmo qelqapi nisqan hunt’akusqanta: “Hinan Jesusqa las tres horasta sinchita waqyakurqan: [...] ¡Diosníy, Diosníy! ¿Imanaqtinmi saqerpariwanki?”, nispa (Mar. 15:34). Jesusqa manan iñiyninpi chiriyapusqanraykuchu chayta nisharqan. Chhaynari, ¿imaynapitaq Jehová Dios enemigonkunaq makinpi saqerparirqan? Chaytaqa nirqan Jehová Dios manaña pakaykusqanmantan, chhaynapi Jesús pruebakunata wañunankama pay kikinmanta aguantananpaq. Salmo 22:1 textopi profeciaqa Cristopipunin hunt’akurqan.
17. ¿Imaynatan hunt’akurqan Zacarías 12:10, Salmo 34:20 textokunapi profeciakuna?
17 Lanzawanmi t’urpunkuman ichaqa manan tullunta p’akinankuchu karqan. Zacariasmi willarqan: ‘Jerusalenpi tiyaqkunan [...] qhawanqaku t’urpuspa wañuchisqanku qharita’ (Zac. 12:10). Salmo 34:20 textopitaq David nirqan: “Paymi llapa tullunkunata waqaychan, manataqmi huk tullullanpas p’akikunqachu”, nispa. Chaykuna hunt’akusqanta rikuq apóstol Juanmi willarqan: “Huknin soldadon Jesuspa waqtanninta t’urpurqan, kaqratotaq phawamurqan yawarwan unuwan. Chaytaqa [Juan] rikuqpunin willakun, willakusqanqa cheqaqpunin [...]. Chaykunaqa sucederqan: ‘Manan tullunqa p’akisqachu kanqa’, niq Diospa Simin Qelqa hunt’akunanpaqmi. Chay hinallataqmi huknin Qelqapas nin: ‘Qhawanqakun t’urpusqanku runataqa’, nispa”, nispa (Juan 19:33-37).
18. ¿Imaynapin Jesús qhapaqkunawan kuska p’ampasqa karqan?
18 Qhapaqkunawan kuskan p’ampasqa kanan karqan (leey Isaías 53:5, 8, 9). Mateo qelqaq willasqan hina 14 nisán killapin, ch’isinta “Arimatea llaqtayoq qhapaq runa José sutiyoq [...] Pilatoman rispan Jesuspa cuerponta mañakurqan [...]. Chaymi Joseqa Jesuspa cuerponta apaspa sumaq limpio telawan p’istuykurqan, hinaspan qaqapi chayllaraq t’oqochikusqan aya p’ampanaman wantuykurqan. Hatun rumiwan aya p’ampana punkuta wisq’aykuspataq ripurqan” (Mat. 27:57-60).
¡Mesiasta waqyakusun!
19. ¿Imaynapin hunt’akurqan Salmo 16:10 textopi profecía?
19 Kawsarimpunan karqan. Jehová Diosta Davidpa nisqanmi Mesiaspi hunt’akunan karqan, nirqanmi: “Manan ñoqataqa Wañuy-pachapi saqerpariwankichu”, nispa (Sal. 16:10). Runaman tukuspan huk ángel Jesusta p’ampasqanku t’oqoman riq warmikunata nirqan: “Ama mancharikuychischu, ¿chakatasqa kaq Nazaret llaqtayoq Jesustachu maskhashankichis? Payqa kawsarimpunmi, manan kaypiñachu. Qhawaykuychis payta churasqanku cheqasta”, nispa. ¡Chayta uyarispan warmikunaqa anchata admirakurqanku! (Mar. 16:6.) Qhepamanmi 33 watapi Jerusalenpi Pentecostés fiestapi askha runakuna kashaqtin Pedro huk discursota qorqan, nirqanmi: “Davidqa rikushanmanpas hinan Cristoq kawsarimpunanmanta ñawpaqtaña rimarqan sepulturapi mana saqesqachu kananta, manataq aychanpas ismunanta”, nispa (Hech. 2:29-31). Arí, chaypi nisqan hina Jehová Diosqa manan munarqanchu Jesuspa cuerpon ismunanta, aswanmi espíritu cuerpopi kawsarichirqan (1 Ped. 3:18).
20. ¿Imaninmi profeciakuna Mesiaspa kamachikunanmanta?
20 Diosmi Churinta hina reqsikapunan karqan (leey Sal. 2:7; Mat. 3:17). Jesustaqa Mesiasta hinapunin rikunanchis. Jerusalenpi sumaqta chaskisqankuta hinan ñoqanchispas Jesusta kusikuywan waqyakunchis kamachikusqantapas suyakunchis (Mar. 11:7-10). Mesiasqa ‘qhapaq-atiyninpi sillaykusqan llallinanpaq ñawparin, cheqaq-kaypaq maqanakun, wakchakunapaqpas chaninchapun’ (Sal. 2:8, 9; 45:1-6). Kay Hallp’ata kamachikuqtinqa thakpin kawsasun manataqmi imanchispas pisiwasunchu (Sal. 72:1, 3, 12, 16; Isa. 9:6, 7). Jehová Diospa testigonkunaqa munakusqan Churin hanaq pachapi kamachikusqanmanta sumaq kawsay apamunanmantawanmi willamunanchis. ¡May munaymi Diospa Testigon kayqa!
¿Imanispan kutichisunman?
• ¿Mayqen profeciakunan willarqan Jesús traicionasqa, saqerparisqa kananmanta? ¿Imaynatan hunt’akurqan?
• ¿Imakunatan Biblia willarqanña Cristoq wañupunanpaq?
• ¿Imaynapin qan yachanki Jesús prometesqa Mesías kasqanta?
[Tapuykuna]
[13 paginapi dibujo]
¿Ima profeciakunan hunt’akurqan Jerusalenman Jesus haykuqtin?
[15 paginapi dibujokuna]
Mesiasqa ñoqanchisraykun wañurqan, kunantaq hanaq pachapiña kamachikushan
