Den feni a Mesias!

„Wi feni a Mesias.”​—YOH. 1:41.

1. Fu san ede Andreas taki: „Wi feni a Mesias”?

YOHANES A DOPUMAN ben e tanapu nanga tu fu den disipel fu en. Di Yesus ben e waka kon miti den, dan Yohanes bari: „Luku, a Pikin Skapu fu Gado!” Wantewante Andreas nanga a tra disipel bigin waka baka Yesus èn den tan heri dei nanga en. Bakaten Andreas feni en brada Simon Petrus èn a fruteri en a moi sani disi: „Wi feni a Mesias.” Baka dati, a tyari en go na Yesus.​—Yoh. 1:35-41.

2. Fa wi kan kisi wini te wi e ondrosuku tra profeititori di abi fu du nanga a Mesias?

² Bakaten, Andreas, Petrus, nanga tra sma ben o abi nofo okasi fu ondrosuku den Santa Buku fu Bijbel, èn den ben o meki bekènti fayafaya taki Yesus fu Nasaret ben de a Mesias di Gado ben pramisi. A bribi di wi abi na ini Gado Wortu èn na ini a Salfuwan fu en o kon moro tranga te wi e ondrosuku tra profeititori di abi fu du nanga a Mesias.

„Luku! A kownu fu yu e kon”

3. Sortu profeititori kon tru di Yesus kon na Yerusalem leki wan kownu?

³ A Mesias ben o kon leki wan kownu na Yerusalem. A profeiti Sakaria ben taki: „Prisiri srefisrefi, umapikin fu Sion. Bari fu prisiri, umapikin fu Yerusalem. Luku! A kownu fu yu e kon na yu. A e du san reti èn a wini den feanti fu en. A abi sakafasi èn a e sidon na tapu wan buriki, a pikin fu wan umaburiki” (Sak. 9:9). A psalm skrifiman ben skrifi: „Blesi fu a sma di e kon na ini a nen fu Yehovah” (Ps. 118:26). A no ben kan de so, taki na Yesus meki den sma du den sani dati. Na den ipi-ipi sma srefi ben wani bari nanga prisiri èn na so a profeititori kon tru. Te yu e leisi a tori na ini Bijbel, dan pruberi fu si san ben pasa èn pruberi fu yere fa den sma ben de nanga prisiri.​—Leisi Mateyus 21:4-9.

4. Tyari kon na krin fa Psalm 118:22, 23 kon tru.

⁴ Aladi furu buweisi de taki Yesus ben de a Mesias, toku furu sma no poti bribi na ini en, ma gi Gado a prenspari srefisrefi. Soleki fa Bijbel taki na fesi, dan den sma di no ben wani bribi den buweisi, ben ’e spotu [Yesus] èn den ben si en leki wan soso sani’ (Yes. 53:3; Mark. 9:12). Ma Gado ben meki a psalm skrifiman taki: „A ston di den bowman no ben wani, na dati tron a moro prenspari ukuston. Na Yehovah srefi meki taki disi pasa” (Ps. 118:22, 23). Di Yesus taki  nanga den kerki fesiman di ben e gens en, dan a memre den na den wortu dati. Petrus ben taki dati den wortu dati kon tru na ini Krestes (Mark. 12:10, 11; Tori. 4:8-11). Yesus ben tron na „ukuston fu a fondamenti” fu a Kresten gemeente. Aladi sma di no ben e gi yesi na Gado weigri fu poti bribi na ini en, toku ’Gado teki en fu di a prenspari srefisrefi’.​—1 Petr. 2:4-6.

Den tori en èn den gowe libi en!

5, 6. Soleki fa Bijbel e sori, dan fa sma ben o tori a Mesias, èn fa a sani dati kon tru?

⁵ Bijbel ben taki na fesi taki wan mati fu a Mesias ben o tori en. David ben taki na fesi: „A bun mati fu mi di mi ben e frutrow, iya, a sma di ben e nyan mi nyanyan, e suku fu du mi ogri” (Ps. 41:9). Nofo tron na mati ben e nyan nanga makandra (Gen. 31:54). Sobun, di Yudas Iskariot tori Yesus, dan dati ben de a moro hati sani di a ben kan du nanga a mati fu en. Di Yesus ben taigi den apostel fu en taki wan sma ben o tori en, dan a memre den na den wortu fu David. A ben taki: „Mi no e taki fu un alamala. Mi sabi den sma di mi kari. Ma disi e pasa, so taki den sani di skrifi na ini Gado Buku kan kon tru. Drape skrifi: ’A sma di ben gwenti nyan mi nyanyan e suku fu du mi ogri.’”​—Yoh. 13:18.

⁶ A sma di tori a Mesias ben o kisi 30 pisi solfru moni, èn dati na a moni di sma ben e pai gi wan srafu! Mateyus ben taki dati Yudas tori Yesus gi 30 pisi solfru moni nomo èn na so a profeititori na Sakaria 11:12, 13 kon tru. Ma Mateyus taki dati na den sani di „a profeiti Yeremia” taki kon tru. Efu a profeititori skrifi na ini a buku Sakaria, dan fu san ede a e taki fu Yeremia? Kande na ini a ten fu Mateyus, a buku Yeremia ben de a fosiwan fu wan grupu Bijbel buku, èn a buku Sakaria ben de wan fu den buku dati tu. (Luku Lukas 24:44.) Yudas noiti no kisi wini fu a moni di a ben kisi na wan kruka fasi, fu di a trowe en na ini a tempel èn a lon go kiri ensrefi.​—Mat. 26:14-16; 27:3-10.

7. Fa Sakaria 13:7 kon tru?

⁷ Srefi den disipel fu a Mesias ben o gowe libi en. Sakaria ben skrifi: „Naki a skapuman, dan den skapu o panya go na ala sei” (Sak. 13:7). Tapu 14 Nisan fu a yari 33, Yesus taigi den disipel fu en: „Tideneti un alamala o fadon te unu si san pasa nanga mi, bika Gado Buku taki: ’Mi o naki a skapuman, dan den skapu o panya go na ala sei.’” Dati na soifri san pasa, fu di Mateyus skrifi taki „ala den disipel lon gowe libi [Yesus]”.​—Mat. 26:31, 56.

Den krutu en èn den fon en

8. Fa Yesaya 53:8 kon tru?

⁸ Sma tyari en go na krutu èn den gi en  dedestrafu. (Leisi Yesaya 53:8.) Di dei broko tapu 14 Nisan, a heri Grankrutu fu den Dyu kon makandra, den bui Yesus èn den gi en abra na Pontius Pilatus, wan Granman fu Rome. A poti aksi gi Yesus èn a kon si taki Yesus no du nowan ogri. Pilatus ben wani lusu Yesus, ma a pipel bari: „Spikri en na wan postu!” Den ben wani taki a lusu na ogriman Barabas. Fu di Pilatus ben wani plisi a pipel, meki a lusu Barabas, a meki srudati wipi Yesus, èn a libi en gi den sma meki den spikri en na wan postu.​—Mark. 15:1-15.

9. Sortu sani di pasa na ini Yesus ten Psalm 35:11 ben taki na fesi?

⁹ Falsi kotoigi ben o lei gi a Mesias. A psalm skrifiman David ben taki: „Ogri-ati kotoigi e opo kon. Den e aksi mi sani di mi no sabi” (Ps. 35:11). Soleki fa a profeititori ben taki, dan „den edeman fu den priester nanga ala den krutuman fu a Grankrutu fu den Dyu ben e suku kotoigi fu fruteri lei fu Yesus, so taki den ben kan kiri en” (Mat. 26:59). Fu taki en leti, „furu sma ben kon taki lei fu en, ma den alamala ben e taki difrenti sani” (Mark. 14:56). Den feanti fu Yesus ben de nomonomo fu kiri en. Dati meki den no ben abi bisi efu den kotoigi ben e lei.

10. Fruklari fa Yesaya 53:7 kon tru.

¹⁰ A Mesias no ben taki noti na fesi den sma di tyari en go na krutu. A profeiti Yesaya ben taki: „A ben hebi srefisrefi gi en èn a meki sma pina en. Toku a no opo en mofo. A ben de leki wan pikin skapu di den e tyari go srakti èn leki wan skapu di kon babaw na fesi den wan di e koti skapu-wiwiri. A no ben opo en mofo srefisrefi” (Yes. 53:7). „Di den edeman fu den priester nanga den owru man taki ogri fu en, Yesus no piki den.” Pilatus aksi en: „Yu no yere omeni ogri den e taki fu yu?” Toku Yesus „no piki en nowan sani. Dati meki a granman fruwondru srefisrefi” (Mat. 27:12-14). Yesus no ben kosi den sma di tyari en go na krutu.​—Rom. 12:17-21; 1 Petr. 2:23.

11. Fa Yesaya 50:6 nanga Mika 5:1 kon tru?

¹¹ Yesaya ben taki dati sma ben o fon a Mesias. A profeiti ben skrifi: „Mi poti mi baka gi den wan di e gi fonfon èn mi poti mi seifesi gi den wan di e hari sma wiwiri puru. Mi no kibri mi fesi gi spiti nanga sani di ben o gi mi syen” (Yes. 50:6). Mika ben taki na fesi taki den ben o naki a krutuman fu Israel na en seifesi nanga wan tiki (Mika 5:1). Na Evangelie skrifiman Markus ben sori taki den profeititori disi kon tru di a taki: „Dan wan tu fu den bigin spiti na tapu Yesus, den tapu en fesi, den naki en nanga kofu èn den taigi en: ’Efu yu na wan profeiti, dan taigi wi suma naki yu!’ Baka di den naki en na ini en fesi, dan den waktiman fu a krutu-oso tyari en gowe.” Markus taki dati srudati „naki en na tapu en ede tu nanga wan tiki èn den spiti na en tapu. Dan den saka kindi boigi gi en [fu spotu en]” (Mark. 14:65; 15:19). A no de fu taki dati Yesus no du noti fu meki den sma du den sani disi nanga en.

A tan gi yesi na Gado te na dede

12. Fa Psalm 22:16 nanga Yesaya 53:12 kon tru na ini Yesus?

¹² Bijbel ben taki fu wan tu spesrutu sani di ben o pasa te sma ben o spikri a Mesias na wan postu. A psalm skrifiman David ben taki: „Wan bigi grupu ogri-ati sma tapu mi lontu. Neleki wan lew den e beti mi anu nanga mi futu” (Ps. 22:16). Na Evangelie skrifiman Markus e taki fu wan sani di furu sma di e leisi Bijbel sabi. A ben taki: „A ben de wan ten fu neigi yuru mamanten di den spikri en na wan postu” (Mark. 15:25). Bijbel ben taki tu dati sma ben o si a Mesias leki wan sondari. Yesaya ben skrifi: „A dede gi sma èn den ben si en leki wan sondari” (Yes. 53:12). Na so a pasa taki „den poti tu fufuruman na wan postu na sei en, wán na en reti-anusei  èn a trawan na en kruktu-anusei.”​—Mat. 27:38.

13. Fa Psalm 22:7, 8 kon tru na ini Yesus?

¹³ David ben taki dati sma ben o wisiwasi a Mesias. (Leisi Psalm 22:7, 8.) A tru taki sma ben e wisiwasi Yesus di a ben anga na a pinapostu, fu di Mateyus e taki: „Den sma di ben e waka pasa, ben e taki wan lo hati sani fu en èn den ben e seki den ede. Den taki: „Ai, na yu ben o broko a tempel puru èn yu ben o bow en baka na ini dri dei. We, yepi yusrefi dan! Efu yu na wan manpikin fu Gado, dan saka komoto fu a pinapostu!’” Na so a de tu taki den edeman fu den priester, den leriman fu a Wèt, nanga den owru man ben e spotu en èn den taki: „A yepi tra sma, ma a no man yepi ensrefi! En na Kownu fu Israel. Meki a saka komoto fu a pinapostu now, dan wi o bribi en. A e frutrow tapu Gado. Meki Gado frulusu en efu A lobi en, bika a taki: ’Mi na Gado Manpikin’” (Mat. 27:39-43). Toku Yesus tyari ala den sani disi na wan warti fasi. Dati na wan heri moi eksempre gi wi!

14, 15. Spesrutu profeititori e sori san ben o pasa nanga den krosi fu a Mesias èn taki sma ben wani gi en asin. Fa disi kon tru?

¹⁴ Sma ben trowe lòt fu prati den krosi fu a Mesias. A psalm skrifiman ben skrifi: „Den e prati mi krosi na den mindri èn den e iti lòt fu luku suma o kisi den krosi fu mi” (Ps. 22:18). Na dati pasa, fu di „den [srudati fu Rome] spikri [Yesus] na wan postu, èn baka dati den iti lòt fu kan prati den krosi fu en”.​—Mat. 27:35; leisi Yohanes 19:23, 24.

¹⁵ Sma ben o gi a Mesias asin nanga bita. A psalm skrifiman ben taki: „Den gi mi takru wiwiri fu nyan. Di mi ben e drei watra, den suku fu gi mi asin fu dringi” (Ps. 69:21). Mateyus e taigi wi: „Den gi Yesus win fu dringi di ben moksi nanga bita. Ma di a tesi en, a no ben wani dringi en.” Bakaten „wan fu den lon go teki wan sponsu, a nati en nanga swa win, dan a poti en na wan tiki èn a tyari en gi Yesus fu dringi.”​—Mat. 27:34, 48.

16. Sori fa a profeititori na ini Psalm 22:1 kon tru.

¹⁶ A ben o gersi leki Gado gowe libi a Mesias. (Leisi Psalm 22:1.) Soleki fa profeititori ben sori, dan „dri yuru bakadina, Yesus bari nanga wan tranga sten: „’Eli, Eli, lama sabaktani?’ Disi wani taki: ’Mi Gado, mi Gado, fu san ede yu gowe libi mi?’” (Mark. 15:34) Yesus no ben lasi bribi na ini en hemel Tata. Gado ben gi Yesus abra na den feanti fu en fu di A no ben kibri en moro, so taki a ben  kan sori efu a ben o tan gi yesi na en Papa awinsi san pasa. Di Yesus bari kari en Papa, dan Psalm 22:1 kon tru.

17. Fa Sakaria 12:10 nanga Psalm 34:20 kon tru?

¹⁷ Sma ben o dyuku a Mesias, ma den no ben o broko den bonyo fu en. Den sma na ini Yerusalem ben o „si a sma di den dyuku” (Sak. 12:10). Psalm 34:20 e taki: „[Gado] e kibri ala den bonyo fu a sma disi, so taki nowan fu den broko.” Fu sori taki den tori disi kon tru, na apostel Yohanes skrifi: „Wan fu den srudati dyuku wan lansri go na ini Yesus seibere èn wantewante brudu nanga watra kon na doro. [Yohanes,] a sma di fruteri disi, si dati nanga en eigi ai èn san a taki de tru. . . . Den sani disi pasa, so taki a sani di skrifi na ini Gado Buku ben kan kon tru. Drape skrifi: ’Den no sa broko nowan bonyo fu en.’ Wan tra pisi fu Gado Buku e taki tu: ’Den o si a sma di den dyuku.’”​—Yoh. 19:33-37.

18. Fa a du kon taki Yesus beri pe gudusma ben beri?

¹⁸ Den ben o beri a Mesias pe gudusma ben beri. (Leisi Yesaya 53:5, 8, 9.) Tapu 14 Nisan, latilati bakadina, „wan gudu man fu Arimateya kon. A ben nen Yosef” èn a aksi Pilatus a skin fu Yesus. Ne Pilatus gi en primisi fu teki a skin. A tori fu Mateyus e taki moro fara: „Yosef teki a skin èn a domru en na ini wan krin fini linnen-krosi. Dan a poti a skin na ini a nyun grebi fu en di a diki na ini wan stonbergi. Baka di a lolo wan bigi ston go poti na a mofo fu a grebi, a gowe.”​—Mat. 27:57-60.

Gi glori na a Mesias Kownu!

19. Fa Psalm 16:10 kon tru?

¹⁹ A Mesias ben o kisi wan opobaka. David skrifi: „Yu [Yehovah] no o libi mi na ini Grebi” (Ps. 16:10). Prakseri fa den uma ben skreki di den kon na a grebi pe Yesus ben e didon. Drape den si wan engel di taigi den: „No skreki. Mi sabi taki unu e suku Yesus fu Nasaret di sma ben spikri na wan postu. Ma a no de dya. A opo baka. Luku a presi pe den ben poti en” (Mark. 16:6). Na apostel Petrus ben taigi den sma di ben kon makandra na ini Yerusalem, tapu a Pinksterfesa fu a yari 33: „[David] ben sabi kaba taki a Krestes ben o kisi wan opobaka èn a ben taki fu a sani dati tu. A ben taki dati Gado no ben o libi a Krestes na ini Grebi èn en skin no ben o pori” (Tori. 2:29-31). Gado no gi pasi taki a dedeskin fu a lobi Manpikin fu en pori. Boiti dati, na wan wondru fasi, Yesus kisi wan opobaka leki wan yeye!​—1 Petr. 3:18.

20. Fa a Mesias tron Kownu, soleki fa Bijbel ben taki na fesi?

²⁰ Soleki fa Bijbel ben taki, dan Gado ben kari Yesus en Manpikin. (Leisi Psalm 2:7; Mateyus 3:17.) Ipi-ipi sma gi glori na Yesus èn na a Kownukondre di o kon. Wi e prisiri fu taki fu en èn fu a tiri fu en di o tyari blesi kon (Mark. 11:7-10). Heri esi, Krestes o pori den feanti fu en te a o ’rèi en asi èn feti gi sani di tru. Iya, a o feti gi den sma di abi sakafasi èn sosrefi gi retidu’ (Ps. 2:8, 9; 45:1-6). A tiri fu en o tyari freide kon na heri grontapu èn sani o waka bun nanga ala sma (Ps. 72:1, 3, 12, 16; Yes. 9:6, 7). Nownowde, Yehovah en lobi Manpikin e tiri kaba leki Mesias Kownu na hemel! Fu dati ede a de wan bigi grani taki wi leki Kotoigi fu Yehovah kan meki den tru tori disi bekènti.

San yu ben sa piki?

• Fa sma tori Yesus èn fa den gowe libi en?

• Soleki fa Bijbel ben taki na fesi, dan sortu sani pasa di sma spikri Yesus Krestes na wan postu?

• Fu san ede yu e bribi taki Yesus na a Mesias di Gado ben pramisi?

[Aksi fu a tori disi]

[Prenki na tapu bladzijde 13]

Sortu profeititori kon tru di Yesus kon leki wan kownu na ini Yerusalem?

[Prenki na tapu bladzijde 15]

Yesus dede gi den sondu fu wi, ma now a e tiri leki Mesias Kownu