Ol i Painim Pinis Mesaia!
Ol i Painim Pinis Mesaia!
“Mipela i painim pinis Mesaia.”—JON 1:41.
1. Wanem samting i bin kamap paslain long Andru i tok: “Mipela i painim pinis Mesaia”?
JON BILONG BAPTAIS i stap wantaim tupela disaipel bilong en. Taim Jisas i wokabaut i go long ol, Jon i tok: “Lukim, em Pikinini Sipsip bilong God!” Kwiktaim tupela disaipel bilong Jon Bilong Baptais, em Andru na Jon, i bihainim Jisas na stap wantaim em de olgeta. Bihain, Andru i go painim brata bilong en, Saimon Pita, na em i mekim dispela bikpela tokaut: “Mipela i painim pinis Mesaia.” Na Andru i kisim Pita i go lukim Jisas.—Jon 1:35-41.
2. Taim yumi skelim ol tok profet i stori long Mesaia, dispela bai helpim yumi olsem wanem?
2 Bihain Andru, Pita, na ol arapela bai skelim gut Rait Holi na ol bai tokaut olsem tru tumas, Jisas em i Mesaia God i tok promis long salim i kam. Nau bai yumi skelim sampela tok profet moa long Baibel i kamapim klia Mesaia em i husat. Dispela bai helpim yumi long bilip strong moa long Baibel na long man Jehova i makim olsem Mesaia.
“Lukim! King Bilong Yu i Kam”
3. Wanem ol tok profet i kamap tru taim Jisas i go insait long Jerusalem olsem king?
3 Mesaia bai kam long Jerusalem olsem king. Tok profet bilong Sekaraia i tok: “Yupela ol manmeri bilong taun Saion, yupela i mas amamas moa yet na singaut. Lukim. King bilong yupela em i kam nau. Em i gat biknem na em i bin winim ol birua long pait. Tasol em i no save litimapim nem bilong em yet. . . . Na em i sindaun antap long wanpela donki.” (Sek. 9:9) Wanpela man bilong raitim Baibel i tok: “God i ken mekim gut long dispela man i kam long nem bilong Bikpela.” (Sng. 118:26) Bikpela lain manmeri i singaut wantaim bikpela amamas taim Jisas i kam insait long Jerusalem. Jisas i no tokim ol long mekim olsem. Tasol ol i mekim stret samting em tok profet i makim. Taim yu ritim hap bilong Baibel i stori long dispela, tingim olsem yu stap long dispela hap na yu harim ol man i singaut wantaim amamas.—Ritim Matyu 21:4-9.
4. Olsem wanem Song 118:22, 23 i bin kamap tru?
4 Jisas i dia tumas long ai bilong God, maski planti man i no laik bilip olsem em i Mesaia. Olsem ol tok profet i kamapim, planti manmeri i heitim Jisas na tingim em olsem samting nating. Ol dispela manmeri i no gat bilip. (Ais. 53:3; Mak 9:12) Tasol Baibel i tok: “Dispela ston ol kamda i ting em i nogut na ol i rausim, em i kamap nambawan ston bilong strongim banis bilong haus. Bikpela yet i mekim dispela samting i kamap.” (Sng. 118:22, 23) Wanpela taim Jisas i kamapim dispela tok profet taim em i toktok wantaim ol hetman bilong lotu i birua long em. Na Pita i tok dispela tok profet i stori long Jisas na kongrigesen. Em i tok kongrigesen i wankain olsem wanpela haus. As bilong haus i gat wanpela nambawan ston bilong kona. Long wankain pasin Jisas i stap olsem nambawan as ston bilong kongrigesen Kristen. Ol man i no gat bilip ol i no ting olsem Jisas em i Mesaia, tasol “God i bin makim em na em i dia tumas long God.”—1 Pita 2:4-6; Mak 12:10, 11; Apo. 4:8-11.
Wanpela i Kamapim Em Long Ol Birua, na Ol Arapela i Lusim Em
5, 6. Ol tok profet i stori olsem wanem long man i putim Mesaia long han bilong ol birua? Na olsem wanem ol dispela tok profet i kamap tru?
5 Wanpela husat i olsem pren bilong Mesaia bai putim em long han bilong ol birua. Devit i tok profet olsem: “Mi gat wanpela pren, em i poroman tru bilong mi, na em i save kaikai wantaim mi. Tasol em tu i litimapim lek bilong krungutim mi.” (Sng. 41:9) Long taim bilong ol man i bin raitim Baibel, sapos tupela man i kaikai wantaim, dispela i makim olsem ol i stap pren. (Stt. 31:54) Olsem na tok profet i makim olsem wanpela husat i pren bilong Mesaia em bai mekim samting i nogut tru. Em bai putim Mesaia long han bilong ol birua! Jisas i stori long dispela man taim em i tokim ol aposel: “Mi no tok long yupela olgeta, mi save long ol man mi bin makim. Tasol em bilong truim tok i stap long Rait Holi, olsem, ‘Man i bin kisim bret bilong mi na kaikai, em i apim lek bilong en bilong krungutim mi.’ ” (Jon 13:18) Jisas i stori long Judas Iskariot, em wanpela disaipel na pren bilong Jisas. Taim Judas i putim Jisas long han bilong ol birua, tok profet bilong Devit i kamap tru.
6 Man i putim Mesaia long han bilong ol birua bai kisim 30 silva koin, em pe man i givim bilong baim wanpela wokboi nating! Matyu i kamapim tok bilong Sekaraia 11:12, 13 taim em i stori long Judas i putim Jisas long han bilong ol birua bilong kisim 30 silva koin. Dispela tok profet i stap long buk bilong Sekaraia, olsem na i gat wanem as na Matyu i tok em tok profet bilong Jeremaia? Long taim bilong Matyu, ating buk bilong Jeremaia i kam pas long wanpela buk em buk Sekaraia tu i insait long en. Judas i no yusim dispela 30 silva koin long baim ol samting. Em i tromoi mani insait long tempel na i go “hangamapim em yet.”— Mat. 26:14-16; 27:3-10.
7. Olsem wanem Sekaraia 13:7 i kamap tru?
7 Ol disaipel bilong Mesaia bai lusim em. Sekaraia i tok: ‘Kilim wasman i dai, na bai ol sipsip i ranawe nabaut.’ (Sek. 13:7) Long Nisan 14, 33 C.E., Jisas i tokim ol disaipel olsem: “Samting i kamap long mi long dispela nait bai mekim yupela olgeta i pundaun, long wanem, Rait Holi i tok: ‘Mi bai kilim i dai wasman bilong sipsip, na ol sipsip bai ranawe i go nabaut.’ ” Na dispela samting i kamap tru. Matyu i tok olgeta disaipel i lusim Jisas na i ranawe.—Mat. 26:31, 56.
Sampela Bai Sutim Tok na Paitim Em
8. Olsem wanem Aisaia 53:8 i kamap tru?
8 Ol man bai kisim Mesaia i go long kot na tokaut olsem em i mas i dai. (Ritim Aisaia 53:8.) Long moning bilong Nisan 14, ol memba bilong Sanhedrin i bung. Ol i pasim Jisas long rop na kisim em i go long Gavana Bilong Rom, Pontius Pailat. Pailat i givim ol askim long Jisas na bihain em i tok olsem Jisas i no mekim wanpela rong. Tasol taim Pailat i askim ol Juda long ol i laik bai em i larim Jisas i go fri, ol i singaut: “Nilim em long pos!” Ol i tok ol i laik bai Pailat i lusim Barabas, em wanpela raskol, i go fri, tasol Jisas nogat. Pailat i laik amamasim ol man olsem na em i lusim Barabas. Nau Pailat i tokim ol soldia long wipim Jisas na hangamapim em long pos.—Mak 15:1-15.
9. Olsem wanem Song 35:11 i kamap tru long taim bilong Jisas?
9 Bai i gat ol man i sutim tok giaman long Mesaia. Devit i tok: “Ol man bilong giaman i sutim tok long mi long sampela pasin nogut mi no bin mekim.” (Sng. 35:11) Olsem tok profet i kamapim, “ol bikpris na olgeta long Sanhedrin i wok long painim sampela man bilong sutim tok giaman long Jisas na bai ol i ken kilim em i dai.” (Mat. 26:59) Baibel i tok planti man i wok long sutim tok giaman long em, tasol tok bilong ol i no wankain. (Mak 14:56) Ol birua bilong Jisas i no wari olsem ol tok ol man i sutim long Jisas em i giaman. Ol i laik bai em i mas i dai.
10. Olsem wanem Aisaia 53:7 i kamap tru?
10 Mesaia bai i no bekim tok bilong ol man i sutim tok long em. Aisaia i tok profet olsem: “Ol man i bin mekim nogut long dispela wokman, tasol em i daunim em yet na karim pen. Na em i no bin mekim wanpela tok. Em i pasim maus olsem pikinini sipsip ol i kisim i go bilong kilim, na olsem sipsip ol i laik katim gras bilong en.” (Ais. 53:7) Taim ‘ol bikpris na ol hetman i sutim tok long em, em i no bekim wanpela tok.’ Pailat i askim em: “Ating yu no harim hamas tok ol i sutim long yu?” Tasol Jisas “i no bekim wanpela tok long em, olsem na gavana i kirap nogut tru.” (Mat. 27:12-14) Jisas i no mekim tok i daunim ol birua bilong em.—Rom 12:17-21; 1 Pita 2:23.
11. Olsem wanem Aisaia 50:6 na Maika 5:1 i kamap tru?
11 Aisaia i tok profet olsem ol bai paitim Mesaia. Aisaia i tok: “Mi bin larim ol man i paitim baksait bilong mi long kanda na kamautim mausgras bilong mi. Na taim ol i tok nogut long mi na spetim pes bilong mi, mi no bin haitim pes bilong mi long ol.” (Ais. 50:6) Maika i tok profet olsem: “Ol i laik pait long lida bilong Israel.” (Mai. 5:1) Mak i kamapim olsem ol dispela tok profet ol i stori long Jisas. Em i tok: “Sampela i kirap spetim em, ol i karamapim pes bilong em na paitim em na tok: ‘Sapos yu wanpela profet, orait tokim mipela husat i paitim yu.’ Na ol ofisa bilong kot i solapim pes bilong em na kisim em i go.” Mak i tok ol soldia i paitim het bilong Jisas long stik pitpit na spetim em na brukim skru long em. (Mak 14:65; 15:19) I no gat as na ol i mekim olsem long Jisas.
Em i Stap Gut Long God Inap Long Em i Dai
12. Olsem wanem Song 22:16 i kamap tru? Olsem wanem tok bilong Aisaia 53:12 i kamap tru?
12 Mesaia bai dai antap long pos. Devit i tok: “Dispela ol man nogut i raunim mi long olgeta hap . . . [“Olsem laion,” NW ] ol i sutim han na lek bilong mi long tit bilong ol.” (Sng. 22:16) Ol man i save ritim Baibel ol i save long samting i bin kamap, na Gutnius Mak i raitim i kamapim olsem dispela tok profet i kamap tru. Mak i tok ol i bin nilim Jisas long pos long 9 klok long moningtaim. Ol i nilim han na lek bilong en long pos. (Mak 15:25) Narapela tok profet i tok Mesaia bai dai wantaim ol sinman. Aisaia i tok: “Ol manmeri i bin lukim em olsem wanpela man nogut. Tasol em i bin givim laip bilong em yet.” (Ais. 53:12) Dispela i kamap tru taim “ol i hangamapim tupela raskol klostu long em, wanpela long han sut na wanpela long han kais bilong en.”—Mat. 27:38.
13. Olsem wanem Song 22:7, 8 i kamap tru?
13 Devit i tok profet olsem ol man bai tok bilas long Mesaia. (Ritim Song 22:7, 8.) Ol man i tok bilas long Jisas taim em i hangamap long pos. Matyu i tok: “Ol manmeri i go i kam, ol i kirap tok bilas long em, na ol i tantanim het bilong ol na tok: ‘Yu dispela man husat i tok long tromoi tempel i go daun na sanapim gen long 3-pela de, orait helpim yu yet! Sapos yu pikinini bilong God, orait lusim dispela diwai pos na kam daun!’ ” Ol bikpris, ol saveman bilong Lo, na ol hetman i bin tok bilas long em, ol i tok: “Em i bin kisim bek ol arapela, tasol em i no inap kisim bek em yet! Em i King bilong Israel, larim em i lusim diwai pos na kam daun na mipela bai bilip long em. Em i bin bilip long God, olsem na sapos God i amamas long em, orait larim God i kisim bek em bikos em yet i bin tok, ‘Mi Pikinini Bilong God.’ ” (Mat. 27:39-43) Jisas i karim pen, tasol em i stap isi na em i no mekim wanpela tok i no stret. Em i stap olsem gutpela piksa tru yumi ken bihainim.
14, 15. Sampela tok profet i stori long klos bilong Mesaia na ol man bai givim wain nogut long em. Olsem wanem ol dispela tok profet i kamap tru?
14 Ol bai pilai satu long kisim klos bilong Mesaia. Devit i tok: “Ol i tilim klos bilong mi na ol i kisim, na ol i pilai satu bilong makim wanem man i ken kisim saket bilong mi.” (Sng. 22:18) Dispela samting i kamap tru. Baibel i tok bihain long ol soldia bilong Rom i hangamapim Jisas long pos, ol i pilai satu bilong tilim klos bilong em.—Mat. 27:35; ritim Jon 19:23, 24.
15 Ol bai givim Mesaia wain nogut na marasin i gat pait long dring. Tok profet i tok: “Taim mi hangre ol i givim marasin nogut long mi. Nek bilong mi i drai na ol i givim mi wain nogut tasol bilong dring.” (Sng. 69:21) Yumi save olsem dispela tok profet i kamap tru, long wanem, Matyu i tok: “Ol i givim Jisas wain long dring, em wain ol i bin miksim wantaim marasin i gat pait. Tasol taim em i teistim, em i no laik dring.” Na bihain, “wanpela bilong ol i ran i go na kisim spans na putim long wain i pait na pasim spans long stik pitpit na givim em long dring.”—Mat. 27:34, 48.
16. Olsem wanem Song 22:1 i kamap tru?
16 Em bai luk olsem God i lusim Mesaia. (Ritim Song 22:1.) Mak i tokim yumi olsem long namba 9 aua, Jisas i singaut strong olsem: “ ‘Eli, Eli, lama sabaktani?’ mining bilong en: ‘God bilong mi, God bilong mi, bilong wanem yu lusim mi?’ ” (Mak 15:34) Taim Jisas i tok olsem, i no olsem em i no bilip moa long Papa bilong en. Em i save olsem God bai larim ol birua i kilim em i dai. Dispela i opim rot long Jisas long soim olsem em bai stap gut long God maski wanem samting i kamap. Tok profet bilong Song 22:1 i kamap tru taim Jisas i singaut strong olsem, “God bilong mi, God bilong mi, bilong wanem yu lusim mi?”
17. Olsem wanem Sekaraia 12:10 na Song 34:20 i kamap tru?
17 Ol birua bai sutim Mesaia. Ol bai i no brukim ol bun bilong en. Sekaraia i tok olsem ol manmeri bilong Jerusalem bai lukluk long Man ol i bin sutim em. (Sek. 12:10) Na Song 34:20 i tok olsem God i “lukautim em olgeta, na i no gat wanpela bun bilong en i bruk.” Aposel Jon i tok olsem ol dispela tok profet i kamap tru. Em i tok: “Wanpela soldia i sutim sait bilong em long spia, na wantu blut na wara i kapsait. Man i bin lukim dispela samting em i tokaut long en, na tokaut bilong em i tru.” Na Jon i tok moa olsem: “Ol dispela samting i kamap bilong truim tok i stap long Rait Holi olsem: ‘I no gat wanpela bun bilong en bai bruk.’ Na narapela tok i stap long Rait Holi i tok: ‘Ol bai lukluk i go long Man ol i bin sutim long spia.’ ”—Jon 19:33-37.
18. Tok profet i tok ol bai planim Jisas long matmat bilong ol maniman. Olsem wanem dispela tok i kamap tru?
18 Ol bai planim Mesaia long matmat bilong ol maniman. (Ritim Aisaia 53:5, 8, 9.) Long apinun tru long Nisan 14, “wanpela maniman bilong Arimatea i kam, nem bilong en Josep.” Em i go long Pailat na askim long kisim bodi bilong Jisas. Josep i laik planim bodi bilong Jisas, na Pailat i orait long dispela. Matyu i tok: “Josep i kisim bodi na karamapim long gutpela klinpela laplap, na em i putim bodi long nupela matmat bilong em yet. Em i bin katim dispela matmat insait long ston. Em i rolim bikpela ston i go pasim maus bilong matmat na em i go.”—Mat. 27:57-60.
Preisim Mesaia, King Bilong Yumi!
19. Olsem wanem tok profet bilong Song 16:10 i kamap tru?
19 Jehova bai kirapim bek Mesaia. Devit i tok: “Bai yu no larim mi i go i stap long ples bilong ol man i dai pinis,” em long matmat. (Sng. 16:10) Long Nisan 16, sampela meri i go long matmat bilong Jisas. Ol i mas kirapim nogut tru taim ol i lukim wanpela ensel i sindaun insait long matmat ol i katim long ston! Ensel i tokim ol dispela meri: “No ken kirap nogut. Mi save yupela i wok long painim Jisas bilong Nasaret, em ol i bin nilim em long pos. Em i kirap bek pinis, na em i no stap long hia. Em ya! Em ples we ol i bin putim em long en.” (Mak 16:6) Bihain, long Pentikos 33 C.E., aposel Pita i autim tok long bikpela lain manmeri long Jerusalem, em i stori long ol long tok profet bilong Devit long Song 16. Em i stori long Devit olsem: “Em i save pinis na autim tok long kirap bek bilong Krais, olsem God i no lusim em i stap long Matmat na bodi bilong em i no sting na bagarap.” (Apo. 2:29-31) God i no larim bodi bilong Pikinini bilong em i sting long matmat. Na Jehova i mekim samting i gutpela moa. Em i kirapim bek Jisas long kisim laip long heven!—1 Pita 3:18.
20. Ol tok profet i tok wanem long wok king bilong Mesaia?
20 God bai tokaut olsem Jisas i Pikinini bilong en. (Ritim Song 2:7; Matyu 3:17) Taim Jisas i kam insait long Jerusalem, ol manmeri i preisim em na Kingdom bilong en. Long nau, yumi tu i save preisim Jisas. Yumi amamas long tokim ol arapela long em na long Kingdom bilong en. (Mak 11:7-10) Klostu nau, Krais bai bagarapim ol birua bilong em taim em i sindaun long hos “na pait bilong helpim ol man i gat pasin daun na bilong helpim tok i tru na stretpela pasin.” (Sng. 2:8, 9; 45:1-6, NW ) Bihain em bai bosim dispela graun olgeta. Olgeta man bai stap bel isi na bai ol i no sot long wanpela samting. (Sng. 72:1, 3, 12, 16; Ais. 9:6, 7) Jisas Krais, Pikinini em Jehova i laikim tumas, em i stap King pinis long heven. Em wanpela gutpela samting tru bilong i stap wanpela Witnes Bilong Jehova na long tokim ol arapela long ol dispela tok i tru!
Wanem Bekim Bilong Yu?
• Ol tok profet i stori long wanpela bai putim Jisas long han bilong ol birua na ol arapela bai lusim em. Olsem wanem dispela i kamap tru?
• Olsem wanem ol tok profet long indai bilong Jisas i kamap tru?
• Wanem samting i mekim na yu bilip tru olsem Jisas em i Mesaia?
[Askim Bilong Stadi]
[Piksa long pes 13]
Taim Jisas i go insait long Jerusalem olsem king, dispela i truim wanem ol tok profet?
[Ol Piksa long pes 15]
Jisas i dai bilong tekewe sin bilong yumi, tasol nau em i stap King
