Ni Jehova​—“Ti Dios a Mangipaay iti Talna”

“Ti Dios a mangipaay iti talna maadda koma kadakayo amin.”​—ROMA 15:33.

1, 2. Ania a narigat a kasasaad ti mabasa iti Genesis kapitulo 32 ken 33? Ania ti resultana?

 TI LUGAR ket saan nga adayo iti Penuel, iti asideg ti naapres a ginget ti Jaboc iti daya ti Karayan Jordan. Nadamag ni Esau nga agsublin ti kasinginna a ni Jacob isu a sinabetna a kaduana ti 400 a lallaki. Nupay 20 a tawenen manipud inlako ni Esau ti kalinteganna kas inauna, impagarup ni Jacob a nasakit pay la ti nakem ni manongna ket amangan no papatayenna. Gapu ta maamak iti panagkitada, nagipatulod iti agsasaruno a sagut nga agdagup iti nasurok a 550 nga animal. Tunggal pangen ti animal a dumteng ken Esau, ibaga ti adipen ni Jacob a naggapu dagita ken kabsatna.

² Dimteng met laengen ti kanito! Situtured nga immasideg ni Jacob ken ni Esau, nagruknoy​—saan laeng a naminsan no di ket namimpito. Ngem sakbayna, inaramiden ni Jacob ti kapatgan a banag tapno mapalukneng ti puso ti kabsatna. Inkararagna ken Jehova nga ispalenna manipud iti ima ni Esau. Sinungbatan kadi ni Jehova ti kararagna? Wen. “Ni Esau nagtartaray a sumabet kenkuana,” kuna ti Biblia, “ket inarakupna ket nagpasag iti tengngedna ken inagepanna.”​—Gen. 32:11-20; 33:1-4.

3. Ania ti maadaltayo iti napasamak kada Jacob ken Esau?

³ Ipakita ti napasamak kada Jacob ken Esau a masapul a pagreggetantayo a solbaren dagiti tumaud a parikut tapno mataginayon ti talna iti kongregasion. Inkagumaan ni Jacob ti makikappia ken Esau nupay awan dakes nga inaramidna. Saan nga impateg ni  Esau ti kalinteganna kas inauna ken inlakona dayta ken Jacob iti sangamalukong a gisado. (Gen. 25:31-34; Heb. 12:16) Ti inaramid ni Jacob ipakitana a kasapulan ti dakkel a panagregget tapno mataginayon ti talna iti nagbabaetantayo nga agkakabsat. Ipakitana pay a bendisionan ni Jehova ti panagreggettayo a makikappia. Naglaon ti Biblia iti adu a pagarigan a mangipakita no kasanotayo a makikappia.

Ti Kasayaatan nga Ulidan a Suroten

4. Ania ti inaramid ti Dios tapno maispal ti sangatauan iti basol ken ipapatay?

⁴ Ti kasayaatan nga ulidan ti pannakikappia ket ni Jehova​—“ti Dios a mangipaay iti talna.” (Roma 15:33) Panunotem no kasano kadakkel ti insakripisio ni Jehova tapno maikappiatayo kenkuana. Kas managbasol a kaputotan da Adan ken Eva, maikaritayo kadagiti ‘supapak ti basol.’ (Roma 6:23) Ngem gapu iti dakkel nga ayat ni Jehova, inyurnosna ti pannakaisalakantayo. Manipud langit, imbaonna ti dungdungnguenna nga Anak tapno mayanak kas perpekto a tao. Situtulok a nagtulnog ni Jesus ken insakripisiona ti biagna agpaay kadatayo. (Juan 10:17, 18) Pinagungar ni Jehova ti Anakna. Kalpasanna, indatag ni Jesus ken ni Amana ti pateg ti naiparukpok a darana kas subbot tapno dagiti agbabbabawi a managbasol maispalda iti agnanayon nga ipapatay.​—Basaen ti Hebreo 9:14, 24.

5, 6. Ania ti epekto ti naiparukpok a dara ni Jesus iti nadadael a relasion ti Dios iti managbasol a sangatauan?

⁵ Ania ti epekto ti daton a pangsubbot ni Jesus iti nadadael a relasion ti Dios iti managbasol a sangatauan? “Ti pannakadusa a maipaay iti talnatayo naadda kenkuana,” kuna ti Isaias 53:5, “ket gapu kadagiti sugatna adda pannakapaimbag kadatayo.” Imbes a maibilang ti natulnog a sangatauan kas kabusor ti Dios, agbalindan a gayyemna. “Babaen [ken Jesus] addaantayo iti pannakaluk-at babaen ti subbot baeten iti dara dayta, wen, ti pannakapakawan dagiti labsingtayo.”​—Efe. 1:7.

⁶ Kuna ti Biblia: “Ti Dios nakitana a nasayaat nga agtaeng [ken Kristo] ti isuamin a kinanaan-anay.” Ni ngamin Kristo ti kangrunaan a mangitungpal iti panggep ni Jehova. Ania ti panggepna? Tapno ‘ikappia manen iti bagina ti amin a sabsabali pay a bambanag babaen ti naiparukpok a dara’ ni Jesu-Kristo. Gapuna, “amin a sabsabali pay a bambanag” nga inkappia ti Dios iti bagina ket dagiti “bambanag iti langlangit” ken “bambanag iti rabaw ti daga.” Ania dagita?​—Basaen ti Colosas 1:19, 20.

7. Ania dagiti “bambanag iti langlangit” ken “bambanag iti rabaw ti daga” a naikappia iti Dios?

⁷ Gapu iti daton ni Jesus, dagiti napulotan a Kristiano ‘naideklaradan a nalinteg’ kas annak ti Dios ken ‘tagtagiragsakenda ti pannakikappia iti Dios.’ (Basaen ti Roma 5:1.) Natukoyda kas “bambanag iti langlangit” gapu ta nailangitan ti namnamada ken ‘agturayda kas ar-ari iti daga’ ken agserbida kas papadi iti Dios. (Apoc. 5:10) Dagiti met “bambanag iti rabaw ti daga” isuda dagiti agbabbabawi a tattao nga agbiagto nga agnanayon ditoy daga.​—Sal. 37:29.

8. Ania ti epektona kenka no utobem ti kadakkel ti insakripisio ni Jehova tapno maikappia kenkuana ti sangatauan?

⁸ Inyebkas ni Pablo ti naimpusuan a panagyamanna iti subbot idi sinuratanna dagiti napulotan a Kristiano idiay Efeso: “Ti Dios, a nabaknang iti asi, . . . pinagbiagnatayo a maikanunong ken Kristo, uray pay idi nataytayo kadagiti labsing​—babaen ti di kaikarian a kinamanangngaasi naisalakankayo.” (Efe. 2:4, 5) Nailangitan man wenno naindagaan ti namnamatayo, agyamantayo unay iti asi ken di kaikarian a kinamanangngaasi ti  Dios. Mapno ti pusotayo iti panagyaman no usigentayo ti kadakkel ti insakripisio ni Jehova tapno maikappiatayo kenkuana. No tumaud dagiti situasion a mamagpeggad iti talna ken panagkaykaysa ti kongregasion, ditay kadi matignay a makikappia no usigentayo ti inaramid ti Dios?

Ti Masursurotayo Kada Abraham ken Isaac

9, 10. Kasano a pinaneknekan ni Abraham nga isu ket mannakikappia?

⁹ Kuna ti Biblia: “‘Ni Abraham naaddaan iti pammati ken Jehova, ket naibilang dayta kenkuana kas kinalinteg,’ ket isu naawagan ‘gayyem ni Jehova.’” (Sant. 2:23) Impakita ni Abraham ti pammatina babaen ti panagbalinna a mannakikappia. Kas pagarigan, rimsua ti di panagkikinnaawatan iti nagbaetan dagiti agtartaraken iti dinguen ni Abraham ken dagiti agtartaraken iti dinguen ti kaanakanna a ni Lot. (Gen. 12:5; 13:7) Ti laeng solusion ket ti panagsinada. Ania ti aramiden ni Abraham? Nupay laklakay ken nakasingsinged iti Dios, dina impilit nga isu ti masurot. Imbes ketdi, pinaneknekanna nga isu ket pudno a mannakikappia.

¹⁰ Kinunana ken Lot: “Pangngaasim, dika bay-an a ti aniaman a panagririri agtultuloy iti nagbaetanta ken iti nagbaetan dagiti pumapastorko ken dagiti pumapastormo, ta agkakabsattayo. Saan aya a madadaan nga agpaay kenka ti intero a daga? Pangngaasim, suminaka kaniak. No mapanka iti makannigid, ngarud mapanakto iti makannawan; ngem no mapanka iti makannawan, ngarud mapanakto iti makannigid.” Pinili ni Lot ti kadam-egan a lugar ngem saan a nagsakit ti nakem ni Abraham. (Gen. 13:8-11) Nabatad dayta gapu ta idi a dagiti kabusor innalada ni Lot, saan a nagtaktak ni Abraham a nangispal kenkuana.​—Gen. 14:14-16.

11. Kasano a nakikappia ni Abraham kadagiti kaarrubana a Filisteo?

¹¹ Panunotem met no kasano a nakikappia ni Abraham kadagiti kaarrubada a Filisteo iti daga ti Canaan. Ti bubon a kinali dagiti adipen ni Abraham idiay Beer-seba ket ‘inagaw dagiti Filisteo babaen ti kinaranggas.’ Ania ngata ti aramiden ti lalaki a nangparmek iti uppat nga ari tapno maispalna ti kaanakanna nga innalada? Imbes a makilaban ni Abraham tapno maisubli kenkuana ti bubon, pinilina ti agulimek lattan. Idi agangay, simmarungkar kenkuana ti ari dagiti Filisteo tapno makitulag maipaay iti kappia. Sa laeng imbaga ni Abraham ti maipapan iti inagawda a bubon kalpasan a nagsapata a dina dangdangran ti kaputotan ti ari. Nasdaaw ti ari iti naammuanna isu nga insublina ti bubon ken Abraham. No maipapan ken Abraham, nagtultuloy a nakipagnaed a sitatalna kas ganggannaet.​—Gen. 21:22-31, 34.

12, 13. (a) Kasano a tinulad ni Isaac ti ulidan ni amana? (b) Kasano a binendisionan ni Jehova ti mannakikappia a ni Isaac?

¹² Tinulad ni Isaac ti mannakikappia nga amana a ni Abraham. Nabatad dayta iti pannakilangen ni Isaac kadagiti Filisteo. Gapu iti bisin iti amianan ti Beer-lahai-roi iti natikag a rehion ti Negeb, immakar ti sangakabbalayan ni Isaac idiay Gerar, maysa a nadam-eg a lugar a masakupan dagiti Filisteo. Sadiay a binendisionan ni Jehova iti nawadwad nga apit ken dinguen isu nga immapal kenkuana dagiti Filisteo. Gapu ta dida kayat nga umadu ti sanikua ni Isaac a kas iti amana, ginaburanda dagiti bubon a kinali dagiti adipen ni Abraham. Kamaudiananna, kinuna ti ari dagiti Filisteo ken Isaac: “Pumanawka iti sangakaarrubaanmi.” Nagtulnog ti mannakikappia a ni Isaac.​—Gen. 24:62; 26:1, 12-17.

¹³ Kalpasan a pimmanaw ti sangakabbalayan ni Isaac, nagkali manen dagiti adipenna iti bubon. Tinagikua dayta dagiti  agpaspastor a Filisteo. Kas ken amana, saan a nakilaban ni Isaac. Imbes ketdi, nagpakali iti sabali a bubon kadagiti adipenna. Tinagikua manen dayta dagiti Filisteo. Tapno mataginayon ti talna, inyakar ni Isaac ti dakkel a sangakabbalayanna iti sabali a lugar. Nagkali manen sadiay dagiti adipenna iti bubon a pinanagananna iti Rehobot. Idi agangay, immakarda iti nadamdam-eg a rehion ti Beer-seba. Sadiay a binendisionan ni Jehova ken kinunana: “Dika agbuteng, agsipud ta addaak kenka, ket bendisionankanto ken paaduekto ti bin-im maigapu ken Abraham nga adipenko.”​—Gen. 26:17-25.

14. Kasano a pinaneknekan ni Isaac nga isu ket mannakikappia idi nakitulag kenkuana dagiti Filisteo?

¹⁴ Sigurado a kabaelan ni Isaac nga ilaban ti kalinteganna iti amin a bubon a kinali dagiti adipenna. Kinapudnona, ti ari dagiti Filisteo ken dagiti opisialna binisitada ni Isaac idiay Beer-seba tapno makitulagda maipaay iti kappia, a kinunada: “Di agbiddut a nakitami a ni Jehova adda kenka.” Kaskasdi, tapno mataginayon ti talna, mas pinili ni Isaac ti mamin-adu nga umakar imbes a makilaban. Iti kasta, pinaneknekan met ni Isaac nga isu ket mannakikappia. Kuna ti Biblia: “Nangaramid iti padaya maipaay [kadagiti bisitana] ket nangan ken imminumda. Iti sumaganad a bigat nasapada a bimmangon ket nangaramidda kadagiti sinapataan a sasao iti maysa ken maysa. Kalpasan dayta pinagawid ida ni Isaac . . . a sitatalna.”​—Gen. 26:26-31.

Ti Masursurotayo iti Anak nga Ipatpateg Unay ni Jacob

15. Apay a dagiti kakabsat ni Jose makaungetda kenkuana?

¹⁵ Ni Jacob nga anak ni Isaac ket dimmakkel nga “awan pakababalawanna.” (Gen. 25:27) Kas napagsasaritaantayon, inkagumaan ni Jacob ti makikappia iti kabsatna a ni Esau. Sigurado nga adu ti nasursuro ni Jacob iti mannakikappia nga amana a ni Isaac. Komusta met ngay dagiti annak ni Jacob? Kadagiti 12 nga annakna, ni Jose ti ipatpategna unay. Natulnog ken nadayaw ngamin nga anak ken maseknan unay iti pagimbagan ni amana. (Gen. 37:2, 14) Ngem agimon dagiti manongna isu a makaungetda kenkuana. Awanan asi nga inlakoda ni Jose kas adipen sa inallilawda ti amada nga imbagada a pinapatay ti atap nga animal.​—Gen. 37:4, 28, 31-33.

16, 17. Kasano a pinaneknekan ni Jose nga isu ket mannakikappia?

¹⁶ Ni Jehova binendisionanna ni Jose. Idi agangay, isu ket nagbalin a primero ministro​—maikadua a kangatuan iti Egipto. Idi napasamak ti nakaro a bisin, nakadanon dagiti kakabsat ni Jose idiay Egipto ket dida nailasin ti kabsatda gapu iti opisial a kawesna. (Gen. 42:5-7) Naglaka la koma a balsen ni Jose dagiti kakabsatna gapu iti inaramidda kenkuana ken iti amada! Ngem imbes nga agibales, inkagumaanna ti makikappia. Idi nakitana a nagbabawin dagiti kakabsatna, inyam-ammona ti bagina kadakuada: “Dikay masaktan ken dikay kaunget ti bagbagiyo gapu ta inlakodak ditoy; agsipud ta maipaay iti pannakataginayon ti biag imbaonnak ti Dios nga inyun-una kadakayo.” Kalpasanna, inagepanna ti amin a kakabsatna ket nagsangit kadakuada.​—Gen. 45:1, 5, 15.

¹⁷ Idi natayen ti amada a ni Jacob, impagarup dagiti kakabsat ni Jose a balsenna ida. Bayat nga iyeb-ebkasda ti pagam-amkanda, “nagsangit” ni Jose ket kinunana: “Dikay agbuteng. Siak itultuloykonto ti panangabasto kadakayo ken ti babassit nga annakyo iti taraon.” Wen, ti mannakikappia a ni Jose “liniwliwana ida ken nagsao kadakuada buyogen ti panangipanamnama.”​—Gen. 50:15-21.

 “Naisuratda a Pakasursuruantayo”

18, 19. (a) Ania ti maadalmo no usigem ti ulidan dagiti mannakikappia a napagsasaritaantayo? (b) Ania ti mausig iti sumaganad nga artikulo?

¹⁸ Kuna ni Pablo: “Amin a bambanag a naisurat a nasaksakbay naisuratda a pakasursuruantayo, tapno babaen ti panagibturtayo ken babaen ti liwliwa manipud iti Kasuratan maaddaantay koma iti namnama.” (Roma 15:4) Ania ti maadaltayo no usigtayo ti kasayaatan nga ulidan ni Jehova ken kadagiti salaysay iti Biblia maipapan kada Abraham, Isaac, Jacob, ken Jose?

¹⁹ No utobentayo ti kadakkel ti insakripisio ni Jehova tapno maikappia kenkuana ti managbasol a sangatauan, ditay kadi matignay a makikappia iti sabsabali? Dagiti ulidan da Abraham, Isaac, Jacob, ken Jose ipakitana a dakkel ti impluensia dagiti nagannak kadagiti annakda. Ken ipakita pay dagita a salaysay a bendisionan ni Jehova dagidiay mannakikappia. Dayta ti makagapu a ni Pablo tinukoyna ni Jehova kas “Dios a mangipaay iti talna”! (Basaen ti Roma 15:33; 16:20.) Usigen ti sumaganad nga artikulo no apay nga impaganetget ni Pablo a makikappiatayo ken no kasanotayo nga aramiden dayta.

Ania ti Naadalyo?

• Kasano a nakikappia ni Jacob idi agkitada ken Esau?

• Ania ti epektona kenka ti insakripisio ni Jehova tapno maikappia kenkuana ti sangatauan?

• Ania ti nasursurom iti ulidan dagiti mannakikappia a da Abraham, Isaac, Jacob, ken Jose?

[Salsaludsod]

[Dagiti Ladawan iti panid 23]

Ania ti kapatgan nga inaramid ni Jacob idi nakikappia ken Esau?