Jehova Guutiuvoq ‘eqqissisitsisoq’

“Guutip eqqissisitsisup najorlisi tamassi!” — ROMAMIUT 15:33.

1, 2. Pisimasoq suna Mosesimik allakkani siullerni kapitalini 32-mi 33-milu allaatigineqarpa?

TAKORLOORIARUK qatanngutigiit naapigiartut Penuelimi, kuup Jabbokip eqqannguani kuussuup Jordanip kangiani. Qatanngutigiit taakku tassaapput Esaui Jaakulu, sivisuumillu imminnut takusimanngillat. Ukiut 20-t tamatuma siorna Esauip angajulliussutsini qatanngumminut Jaakumut akigisimavaa. Esauip tusaramiuk Jaaku angerlamut aallartoq naapigiarpaa angutit 400-t ilagalugit. Jaakup tamanna tusaramiuk annilaangalerpoq. Eqqarsarpoq qatanngutimi suli kamaakkaani toqunniaraanilu. Taamaattumik Jaakup kiffani aallartippai uumasunik Esauimut tunissutissaminik nassartillugit. Jaakup kiffaasa uumasut Esauimut tunniukkaangamikkit oqarfigisarpaat qatanngutaata tunissutigigai. Jaakup uumasut 550-it sinnillit tunissutigai.

² Qatanngutigiit kiisami naapimmata qanoq pisoqarpa? Jaaku sapiillunilu maniguuppoq. Esaui ornippaa arfineq-marloriarlunilu nunamut pallortarluni! Taamaaliunnginnerminili Jaaku pingaaruteqarnerpaamik iliuuseqarpoq. Jehovamut qinuvoq Esauimit annaateqqulluni. Jehovap Jaakup qinnutaa akivaa. Biibilimi ima allassimavoq: “[Esauip] arpalluni parsiarlugu tikikkamiuk pakkutaarpaa qungasiagullu eqillugu kunillugulu.” — 1 Mosesi 32:12-21; 33:1-4.

3. Jaakumik Esauimillu oqaluttuaq qanoq ilinniarfigisinnaavarput?

³ Oqaluttuamit tamatumannga erserpoq ilagiinni eqqisseqatigiinneq ajornartorsiutinit navianartorsiortinneqarpat ajornartorsiutit aaqqinniarlugit sapinngisarput tamaat iliuuseqartariaqartugut. Jaakup Esaui utoqqatserfigisariaqanngilaa, eqqunngitsuliunnginnami.  Esauimmi angajulliussutsini pingaartinnginnamiuk nerisassanut ataasiagassaannarnut akigaa. Jaakuli Esaui eqqisseqatiginiarlugu sapinngisani tamaat iliuuseqarpoq. (1 Mosesi 25:31-34; Hebræerit 12:16) Jaakup maligassiaanit erserpoq qatanngutivut kristumiut eqqisseqatiginiarlugit iliuuseqangaartariaqartugut. Aamma paasivarput ikioqqulluta Jehova qinnuigigaangatsigu tusartaraatigut. Biibilimi maligassat eqqisseqateqarnermut tunngasut allat eqqartorneqarput. Taakkua ilaat sammilaariartigit.

Maligassiuilluarnerpaaq

4. Guuti inuiaat ajortimit toqumillu annaanniarlugit qanoq iliorpa?

⁴ Eqqisseqateqarnermut tunngatillugu maligassiuilluarnerpaaq tassaavoq Jehova — ‘Guuti eqqissisitsisoq’. (Romamiut 15:33) Eqqarsaatigeriakkit Jehovap ikinngutigilerniassagatsinni iliuuserisimasarpassui. Adamimut Evamullu kinguaajugatta ajortuliortarpugut. Taamaattumillu toqusariaqarpugut. (Romamiut 6:23) Guutilli asangaaramisigut ajortimit toqumillu annaakkumavaatigut. Taamaattumik erni asangaakkani, Jiisusi, qilammit aallartippaa inuttut naammalluinnartutut inunngorsinnaaniassammat ajortivullu pillugit toquniassammat. Jiisusilu kajumilluni Ataatami piumasaa malillugu iliorpoq inuuninilu uagut pilluta tunniullugu. (Johannesi 10:17, 18) Kingusinnerusukkut Jehovap Jiisusi qilammut makitippaa. Qilammi Jiisusip pilliutimi nalinga Jehovamut sassaappaa. Pilliut, imaluunniit utertitsissut, tamanna iluaqutigalugu ajortuliortut peqqissimisut naassaanngitsumik toqunissaraluaminnit annaanneqarsinnaapput. — Atuakkit Hebræerit 9:14, 24.

5, 6. Inuit Guutimut ikinngutaalerniarlutik Jiisusip pilliutaa qanoq iluaqutigisinnaavaat?

⁵ Ajorti pissutigalugu inuit Guutimut akeraanngorput. Inuit Jiisusip pilliutaa qanoq iluaqutigisinnaavaat? Esaja 53:5-imi ima allassimavoq: “Pillaat taassumunnga tuttoq eqqississutigaarput, ikiilu ajorunnaarutigaavut.” Jiisusip pilliutaa iluaqutigalugu inuit naalattut Guutimut ikinngutaalersinnaapput. Biibilimi aamma ima allassimavoq: “Taassumani utertitaavugut aavatigut, ajortitsinnik isumakkeerfigineqarluta Guutip saammaanneragut angingaartukkut.” — Efesosimiut 1:7.

⁶ Biibilimi Jiisusi pillugu ima allassimavoq: ‘Guutip iluarisaa tassaavoq tamarmiussuseq iluunngarmi [Kristusimi] ineqassasoq.’ Tamanna ima paasisariaqarpoq Guutip Jiisusi atorlugu piumasani naammassissagaa. Guutip siunertaa suugami? Tassa ‘tamanik imminut saammaannartitsinissaa Jiisusip Kristusip aavagut eqqissineqalersitsilluni’. Guutimut saammaannartitaasut, imaluunniit Guutimut ikinngutaalersimasut, taakku tassaapput ‘nunamiittut qilammiittullu’. Taakku kikkuugamik? — Kolossemiut 1:19, 20, 1936.

7. ‘Nunamiittut qilammiittullu’ kikkuuppat?

⁷ Kristumiut tanitat Jiisusip pilliutaa iluaqutigalugu Guutip ernerisut ‘iluartuutitaallutillu Guuti eqqisseqatigaat’. (Atuaruk Romamiut 5:1). Taakku Biibilimi ‘qilammiittunik’ taaneqarput Guutimit qilammut makitinneqaramik. ‘Nunamut kunngiussallutillu’ palasiussapput Jiisusi Kristusi peqatigalugu. (Saqqummersitat 5:10, 1936) “Nunamiittut” tassaapput inuit ajortiminnik peqqissimissutiginnittut nunarsuarmilu naassaanngitsumik inuulersussat. — Tussiaat 37:29.

8. Ilagiinni ajornartorsiuteqaraangat Jehovap maligassiuilluarnera qanoq iluaqutigisinnaavarput?

⁸ Paulusip kristumiunut tanitanut Efesosimiunut oqaasiinit erserpoq utertitsissummik qujamasuutiginningaarnera. Ima allappoq: “[Guutip] naakkinninnersuarmigut . . . unioqqutitsinitsinni toqusimagaluartugut Kristusimut ilagitilluta uummartippaatigut — saammaannikkut annaanneqarpusi.” (Efesosimiut 2:4, 5) Tamatta, qilammi nunarsuarmiluunniit inuusussaasugut, Guutip naakkinninnersua ajunngisaarneralu pisassarinngisaraluarput qujamassutigingaarpavut. Aamma Jehovap inunnik eqqisseqateqarnissaminut iliuuserisimasai qujamassutigingaarpavut. Ilaatigut ajornartorsiutit pissutigalugit ilagiinni ataasiussuseqarneq navianartorsiortinneqarsinnaavoq.  Taamatut pisoqaraangat Guutip maligassiuilluarnera eqqarsaatigisariaqarlugulu qatanngutitsinnik eqqisseqateqartuarnissaq noqqaassutigisariaqarparput.

Aaperaat Iisaarlu ilinniarfigikkit

9, 10. Aaperaap allanik eqqisseqateqartuarusunnini qanoq ersersippaa?

⁹ Biibilimi Aaperaat pillugu ima allassimavoq: “‘Aaperaap Guuti upperaa, tamannalu taassumunnga iluartuutitaassutaavoq.’ Guutillu ikinngutaanik taaneqarpoq.” (Jaaku 2:23) Aaperaap allanik eqqisseqateqartuarnermigut Jehovamik upperinninnini ersersippaa. Tamanna erserpoq Aaperaap nersutaataanik jornguatalu Lotip nersutaataanik paarsisut saqitsaatilermata. (1 Mosesi 12:5; 13:7) Aaperaat Lotilu aalajangerput avissaarniarlutik. Maluginiaruk ajornartorsiuteqaleramik Aaperaat qanoq iliortoq. Utoqqaanerugaluarluni Jehovamullu immikkut ittumik attaveqaraluarluni jornguni naalakkerusunngilaa, Lotimilli eqqisseqateqartuarusunnini ersersippaa.

¹⁰ Aaperaap jornguni ima oqarfigaa: “Saqitsaatissanngilagut — uanga illillu, paarsisortakka paarsisortatillu — eqqarleriikkatta.” Imalu nangippoq: “Aamanna nuna ilinnut nunassiffigeriaannaq! Avissaarniarta. Illit saamiup tungaanut piumaguit uanga talerpiup tungaanut pissaanga, illilluunniit talerpiup tungaanut piumaguit uanga saamiup tungaanut pissaanga.” Lotip nunap naggorinnersaa toqqarpaa. Aaperaap Lotip taamatut toqqaanera narrujuummissutiginngilaa. (1 Mosesi 13:8-11) Tamanna paasivarput kingusinnerusukkut akeqqat Loti tigusarimmassuk Aaperaap taanna ingerlaannaq aniguisimmagu. — 1 Mosesi 14:14-16.

11. Aaperaat filisterinik qanoq eqqisseqateqartuarpa?

¹¹ Aamma eqqarsaatigeriaruk Aaperaap Kana’animi filisterinik eqqisseqateqartuarniarluni iliuuseqarnera. Filisterit puilasuliaq Be’ershebami Aaperaap kiffaasa assassimasaat peqqarniisaarlutik arsaarinnissutigisimavaat. Pisimasumi tamatumani Aaperaat iliuuseqanngilaq oqaaseqarnanilu. Kingusinnerusukkut filisterit kunngiata Aaperaat tikeraarpaa eqqississutissamik angerfigeqatigiumallugu. Aaperaap kunngi kinguaavisa inussiarnisaarfiginissaannik uppernarsaaffigereeramiuk aatsaat puilasuliaq tillinneqarsimasoq eqqaavaa. Kunngip tamanna tupaallaatigaa, puilasuliallu Aaperaamit pigineqaqqilernissaa isumagalugu. Aaperaallu nunami eqqissilluni takornartaalluni najugaqaannarpoq. — 1 Mosesi 21:22-31, 34.

12, 13. (a) Iisaap ataatami maligassiaa qanoq malippaa? (b) Jehovap Iisaap eqqisseqateqartuarniarluni iliuuseqarnera qanoq pilluaqquaa?

¹² Aamma Aaperaap ernera, Iisaaq, ataatamisut eqqissinermik nuannarisaqarpoq. Filisterinik eqqisseqateqarniarluni sapinngisani tamaat iliuuseqarpoq. Kaannersuaqarnera pissutigalugu Iisaaq ilaquttanilu Be’er-Lahaj-Ro’i-mit Nunap Kujasissortaanit filisterit najugaqarfiannut Gerarimut naggorinnerusumut nuupput. Jehovap Iisaaq nersutaaterpassuaqalersillugulu karrinik katersuilluarnissaanik pilluaqquaa. Filisterit Iisaaq sinngagilerpaat. Pisuunerulernissaa kissaatiginngilaat, taamaattumillu puilasuliaatai tamaasa issumik milippaat. Naggataatigut filisterit kunngiata Iisaaq ima oqarfigaa: “Qimanniartigut.” Iisaaq filisterinik eqqisseqateqartuarniarluni kunngip peqqusineratut iliorpoq. — 1 Mosesi 24:62; 26:1, 12-17.

¹³ Iisaaq ilaquttanilu nooreermata Iisaap paarsisuutitai puilasuliamik allamik assaapput. Filisterit paarsisuutitaasa Iisaap paarsisuutitai oqqappaat oqarlutik: ‘Uagununa imiiterput’. Iisaap ataatamisut saqitsaateqateqarusunnginnami kiffani puilasuliamik allamik assaaqquai. Filisterit puilasuliaq taanna aamma piginerarpaat. Iisaaq ilaqutaalu pigisarpassuatik nassarlugit filisterinik eqqisseqateqartuarniarlutik nooqqipput. Tassani Iisaap kiffai puilasuliamik assaapput, Iisaallu taanna Rehobotimik taavaa. Kingusinnerusukkut naggorinnerusumut Be’ershebamut nuupput. Tamaani najugaqartillugu Jehovap pilluaqquaa ima oqarfigalugu: “Siooraqinak, najorpakkit! Pilluartikkumaarpakkit kinguaassatit amerlisarlugit kiffara Aaperaat pillugu.” — 1 Mosesi 26:17-25.

14. Filisterit kunngiata Iisaaq angerfigeqatiginiarlugu pulaarmagu Iisaap eqqisseqateqaannarusunnera qanoq erserpa?

 ¹⁴ Iisaap puilasuliat kiffami assataasa tamakkerlugit atornissaat tamaviaarutigilluarsimasinnaagaluarpaa. Filisterit kunngiata nalunngilaa Iisaaq qanoq iliornermini tamani Jehovamit pilluaqquneqartartoq. Kunngip siunnersortaasalu Iisaaq Be’ershebami angerfigeqatiginiarlugu pulaaramikku ima oqarfigaat: “Nalujunnaarparput [Jehovap] najoraatit.” Iisaaq taakkuninnga eqqisseqateqartuarniarluni ataasiaannarnani nuussimavoq. Aamma kunngi siunnersortaalu pulaarmata Iisaap kunngimik eqqisseqateqaannarusunnera erserpoq. Biibilimi ima oqaluttuarineqarpoq: “Iisaap nerersuartippai, nerippullu imerlutillu. Aqaguani ullaakkut makikkamik uppernarsaaffigeqatigiipput; aallalermata Iisaap inuulluaqquai, eqqissillutillu qimappaat.” — 1 Mosesi 26:26-31.

Josefi ilinniarfigiuk

15. Sooq angajuisa Josefi eqqissillutik oqaloqatigisinnaanngilaat?

¹⁵ Iisaap ernera, Jaaku, eqqissinermik nuannarisaqartuuvoq. (1 Mosesi 25:27) Soorlu sammereeripput, Jaaku angajuminik, Esauimik, eqqisseqateqarniarluni sapinngisani tamaat iliorpoq. Jaakup ataatami, Iisaap, eqqisseqateqarnermut tunngatillugu maligassiuilluarnera ilinniarfigaa. Aamma Jaakup ernerisa ataatartik ilinniarfigaat? Jaakup Josefi ernerminit aqqaneq-marlunnit allanit asaneruaa. Josefip ataatani ataqqillugulu naalappaa, Jaakullu taanna tatigaa. (1 Mosesi 37:2, 14) Biibilimili allassimavoq Josefi angajuisa ima sinngagitigileraat eqqissillutik oqaloqatigisinnaanagu. Ima uumigitigilerpaat inussiatut tunillugu ataatartillu salloqittarlugu nersummit qaasuttumit toqutaasimasoq. — 1 Mosesi 37:4, 28, 31-33.

16, 17. Josefi qatanngutini eqqisseqatigiuarumallugit qanoq iliorpa?

¹⁶ Jehovap Josefi pilluaqquaa. Piffissap ingerlanerani Josefi Egyptenimi ministeriuninngorpoq, tassa Egyptenimi pissaaneqarnerpaamut tullersortinngorpoq. Kana’animi kaannersuaqarmat Josefip qatanngutai Egypteniliarput nerisassarsiniarlutik. Josefi naapikkamikku ilisarisinnaanngilaat Egyptenimiutut atisaqarmat. (1 Mosesi 42:5-7) Josefip qatanngutini imminik ataataminillu ajortumik pinnissimanerattut pisinnaagaluarpai. Josefilli akiniaanani eqqisseqatigai. Qatanngutimilu iliuuserisimasatik peqqissimissutigimmatigit Josefi ilisaritippoq ima oqarluni: “[Tamanna] aliasuutigissanngilarsi kanngusuutiginagulu Guutip inuit inuunerannik annaassiumalluni siuningaatigulli aallartimmanga.” Taava “Josefip qianngarmi qatanngutini tamaasa immikkut pakkullugit kunippai”. — 1 Mosesi 45:1, 5, 15.

¹⁷ Ataatartik, Jaaku, toqummat Josefip qatanngutai Josefi imminnik akiniaarusulissasoralugu annilaangapput. Josefip annilaanganerat paasigamiuk qiavoq imalu oqarluni: “Siooraqinasi! Uanga ilissi qitornasilu isumagiumaarpassi.” Pisimasumi tamatumani erseqqippoq Josefi eqqissinermik nuannarisaqartuusoq. Josefip “tuppallersarlugillu asannittumik oqaluffigai”. — 1 Mosesi 50:15-21.

“Allassimapput uatsinnut ilinniutissaallutik”

18, 19. (a) Maligassiat allaaserisami matumani sammisavut illit qanoq iluaqutigaagit? (b) Allaaserisami tulliuttumi suna sammineqassava?

¹⁸ Paulusi ima allappoq: “Siornatigummi allagaasut tamarmik allassimapput uatsinnut ilinniutissaallutik, nikallujuilluta Allakkallu tunissutaat tuppallersaatigalugit neriuuterput aalajangiussinnaaqqullugu.” (Romamiut 15:4) Jehova, maligassiuilluarnerpaaq, aamma Aaperaat, Iisaaq, Jaaku Josefilu sumik ilinniarfigaavut?

¹⁹ Jehovap imminut ikinngutaalersinnaaniassagatta iliuuserisimasai eqqarsaatigeqqissaaraangatsigit inunnik allanik eqqisseqateqartuarniarluta sapinngisarput tamaat iliuuseqarusulertarpugut, ilaa? Aaperaap, Iisaap, Jaakup Josefillu maligassiaannit erserpoq angajoqqaat  meeqqaminnut maligassaalluarsinnaasut allanik eqqisseqateqarnissaannik ilinniartitsinermikkut. Aamma oqaluttuanit taakkunannga erserpoq Jehovap allanik eqqisseqateqarniarluta iliuuseqarnerput pilluaqqusaraa. Paasinarluinnarpoq Paulusip Jehova ‘Guutitut eqqissisitsisutut’ allaatigimmagu. (Atuakkit Romamiut 15:33; 16:20). Allaaserisami tulliuttumi sammissavarput eqqissinermik noqqaassutiginnittuunissatta pingaaruteqarnera sooq Paulusip erseqqissarneraa aamma qanoq allanik eqqisseqateqartuarsinnaanersugut.

Suna ilikkarpiuk?

• Jaaku Esaui eqqisseqatiginiarlugu naapinnginnerani qanoq iliuuseqarpa?

• Jehovap imminut ikinngutaalersinnaaniassagatta iliuuserisimasai eqqarsaatigeqqissaaraangakkit qanoq killinneqaatigisarpigit?

• Aaperaat, Iisaaq, Jaaku Josefilu sumik ilinniarfigaagit?

[Atuaqqissaarnermi apeqqutit]

[Qupp. 19-mi assiliartat]

Jaakup Esaui eqqisseqatiginiarlugu iliuuserisaa pingaarnerpaaq suua?