Jehova—“Remna Pathian” Chu
Jehova—“Remna Pathian” Chu
“Remna Pathian chu in zaa hnênah awm rawh se.”—ROM 15:33.
1, 2. Genesis bung 32 leh 33-ah eng dinhmun khirh tak nge chuang a, chu chu eng anga chinfel nge a nih?
JORDAN lui chhak lam, Jabbok lui ruam bula awm Penuel bula thilthleng a ni a. Esauva chuan a phirpui Jakoba a lo hâwng dâwn tih a hria a ni. Esauva’n a unaupa hnêna a fa tîr nihna a hralhna chu kum 20 lai liam tawh mah se, Jakoba chuan a unaupa’n tihhlum duh khawpin amah a la hua ang tih a hlau va. Esauva chun a mi 400 hruaiin, a hmuh thiam loh a unaupa lam panin a thawk a. Jakoba chuan buaina a chhuah a hlauh avângin, Esauva hnênah chuan a belhkhâwmin ran 550 lai a thawn a. Chutianga ran rual a thawn apiangin, Jakoba chhiahhlawhte chuan Esauva hnênah a unaupa thilpêk a nih thu an hrilh zêl a ni.
2 An intawh hun chu a lo thleng ta! Jakoba chuan huaisenna lantîrin Esauva lam a pan a, vawi khat mai ni lo, vawi sarih lai lei siin chibai a bûk a ni. Mahse, Jakoba chuan thil pawimawh ber chu a lo ti tawh a. Esauva kut ata chhan chhuahna dîlin Jehova hnênah a lo ṭawngṭai tawh a ni. Jehova chuan a ṭawngṭaina chu a chhâng em? Chhâng e. Bible chuan: “Esauva chu amah lâwm tûrin a tlân a, a pawm a, a ir a chuktuah a, a fâwp a,” tiin min hrilh a ni.—Gen. 32:11-20; 33:1-4.
3. Jakoba leh Esauva chanchin aṭangin eng nge kan zir?
3 Jakoba leh Esauva chanchin hian Kristian kohhran chhûnga awm remna tibuai thei harsatnate a lo chhuah hunah ching fel tûra theihtâwp kan chhuah a pawimawhzia min hriattîr a. Jakoba chuan Esauva nêna inrem dân kawng a zawng a; mahse, chu chu a unaupa laka thil sual a tih vâng leh ngaihdam dîl a ngaih vâng a ni lo. Esauva’n a fa tîr nihna hlut lova, Jakoba thil chhum kawi lei nâna a hman vâng zâwk a ni. (Gen. 25:31-34; Heb. 12:16) Nimahsela, Jakoba’n Esauva a pan dân chuan Kristian unaute nêna kan inrem theih nâna hma kan lâk chin tûr a târ lang chiang hle. Chu bâkah, remna siam tûra hma kan lâkna Pathian dikin mal a sâwm ṭhîn tih a târ lang bawk. Bible-ah chuan remna siamtu ni tûra min zirtîrtu entîrna dang tam tak a chuang a ni.
Entawn Tûr Ṭha Ber Chu
4. Sual leh thihna ata mihringte chhan chhuah nâna Pathian ruahmanna siam chu eng nge ni?
4 Remna siamtu entawn tûr ṭha ber chu “remna Pathian,” Jehova hi a ni a. (Rom 15:33) Amah nêna inlaichînna muanawm tak kan neih theih nâna a thiltihte hi han ngaihtuah teh. Adama leh Evi thlah mi sual kan nih avângin, “sual man . . . thihna” chu kan phu ve rêng a ni. (Rom 6:23) Mahse, a hmangaihna nasa tak avângin Pathian Jehova chuan a Fapa chu mihring ṭha famkim anga lo piang tûra vân aṭanga rawn tîrin, chhandam kan nih theihna tûrin ruahmanna a siam a. Fapa pawhin inhuam taka a thu zâwmin, Pathian hmêlmate kuta thi tûrin a inpe a ni. (Joh. 10:17, 18) Pathian dik chuan a Fapa duh tak chu a kaitho leh a, chu mi hnuah ani chuan mi sual inlam lêtte chatuan boralna ata chhan chhuah nân a thisen chhuak hlutna chu a Pa hnênah a hlân a ni.—Hebrai 9:14, 24 chhiar rawh.
5, 6. Engtin nge Isua thisen chuan Pathian leh sual nei mihringte inkâra inlaichînna chhe tawh chu a nghawng?
5 Engtin nge Pathian Fapa tlanna inthawina chuan Pathian leh sual nei mihringte inkâra inlaichînna chhe tawh chu a khawih? Isaia 53:5 chuan: “Kan thlamuanna [inremna] tûra thununna chu a chungah a tla a; a vuakna vualtea tihdamin kan awm ta,” tiin a sawi a. Tûnah chuan thuâwih mihringte chuan Pathian hmêlma anga en hlawh tawh lovin, amah nêna inlaichînna muanawm tak an nei thei tawh a ni. “[Isua] thisen avângin amahah chuan kan tlanna kan nei a ni—a khawngaihna ngahzia ang zêla kan bawhchhiatnate ngaihdamna chu.”—Eph. 1:7.
6 Bible chuan: “Famkimna tinrêng chu [Kristaa a] awm reng . . . hi Pa lungnihzâwng tak a ni,” tiin a sawi a. Chutiang a nih chhan chu Krista chu Pathian thiltum thlen famkimna tûra mi pawimawh ber a nih vâng a ni. A nih leh Jehova thiltum chu eng nge ni? Isua Krista “thisen chuan remna lo siamin, amahah chuan engkim amah nên a inremtîr hi” a ni. Pathianin amah nêna a inremtîr thil “engkim” chu “leia thil awmte” leh “vâna thil awmte” hi a ni. Chûng chu engte nge ni?—Kolossa 1:19, 20 chhiar rawh.
7. Pathian nêna inrema awmtîr “leia thil awmte” leh “vâna thil awmte” chu engte nge ni?
7 Tlanna chuan Pathian fate anga ‘thiam changa awm’ hriak thih Kristiante chu “Pathian nên inremin” a awmtîr thei a. (Rom 5:1 chhiar rawh.) Anni chu vân lam beiseina nei, Pathian puithiamte anga ‘lei chunga ro rêl tûr’ an nih avângin, “vana thil awmte” tia sawi an ni a. (Thup. 5:10) “Leia thil awmte” chu leia chatuan nunna la chang tûr, mi inlamlêtte an ni thung a ni.—Sâm 37:29.
8. Pathian Jehova’n mihringte’n amah an rem leh theih nâna hma a lâk nasat dân ngaihtuahna chuan engtin nge a nghawng che?
8 Jehova ruahmanna a ngaihhlutzia sawi chhuakin Paula chuan Ephesi khuaa hriak thih Kristiante hnênah heti hian a ziak a ni: “Pathian chuan khawngaihna a ngahin . . . kan bawhchhiahtnate avânga thi kan nih lai meuh pawhin Krista rualin min tinung ve a, khawngaihnaa chhandam in ni ta e,” tiin. (Eph. 2:4, 5) Kan beisei chu vân lam nunna emaw, lei lam nunna emaw pawh ni se, a khawngaihna leh ngilneihna nasa tak avângin Pathian chungah bat kan nei nasa hle. Pathian Jehova’n amah nêna mihringte an lo inrem leh theih nâna hma a lâk nasatzia kan ngaihtuah hian kan thinlung hi lâwmin a khat a ni. Kohhrana inremna tichhe thei dinhmunte kan tawn hian, Pathian entawn tûr siam ngun taka ngaihtuahna chuan remna siamtu ni tûrin min chêttîr tûr a ni lâwm ni?
Abrahama leh Isaaka Entawn Rawh
9, 10. Engtin nge Abrahama chu a ran pute leh Lota ran pute inkâra inhnialna a chhuah khân remna siamtua a ṭan?
9 Thlahtu Abrahama chungchângah Bible chuan heti hian a sawi a ni: “Abrahama chuan Pathian a ring a, chu rinna chu a felnaah ruat a ni, . . . tichuan Pathian ṭhianah vuahin a awm ta a,” tiin. (Jak. 2:23) Abrahama rinna chu remna a duhzia aṭangin a lang chiang hle. Entîr nân, Abrahama berâm rualte a lo pun tâk hle chuan, a ran pute leh Lota ran pute inkârah inhnialna a lo chhuak ta a. (Gen. 12:5; 13:7) Abrahama leh Lota an awm hran chu a chinfel dân tûr awmchhun a ni. Engtin nge Abrahama chuan chu dinhmun khirh tak chu a hmachhawn dâwn? Upa zâwk leh Pathian ṭhian a nihna ṭanchhana thu tlûkna siam mai lovin, Lota nêna inrem a duhzia a lantîr zâwk a ni.
10 Abrahama chuan Lota hnênah: “Khawngaih takin, nang leh keia kârah, i ran pute leh ka ran pute kârah pawh inhnialna awm suh se; unau kan ni si a, Ram chu a pum puiin a awm duai lo vem ni? Khawngaih takin ka hnên ata hi intihrang mai rawh: nang vei lama i kal chuan kei ding lamah ka kal ang a; a nih loh leh, nang ding lama i kal chuan kei vei lamah ka kal ang e,” tiin a hrilh a. Lota chuan ram ṭha zâwk chu a thlang a; mahse, Abrahama chuan a haw chuang lo. (Gen. 13:8-11) A hnua mi rûn hmang sipaite’n Lota an man pawh khân, Abrahama chuan chhan chhuah a hreh lo bawk.—Gen. 14:14-16.
11. Engtin nge Abrahama’n a ṭhenawm Philistin-ho nêna inremna a ûm?
11 Abrahama’n Kanaan rama a ṭhenawm Philistin-ho nêna inremna a ûm dân pawh hi ngaihtuah bawk teh. Philistin-ho chuan Abrahama chhiahhlawhte’n Beer-sebaa tuichhunchhuah an laih chu an “chhuhsak” a. Chu chu engtin nge lal pali ṭang khâwm pawh hneh a, Lota chhan chhuaktu chuan a chhân lêt? Abrahama chuan beih lêt a, a tuichhunchhuah neih leh ai chuan ngawih a chuh zâwk a ni. A hnuah chuan, Philistin lal chuan Abrahama chu remna thu thlunpui tumin a va tlawh a. Philistin-ho thlahte chunga khawngaihna lantîr tûra chhia a chham hnuah chauh Abrahama chuan a tuichhunchhuah chhuhsak a nih thu chu a sawi chhuak a ni. Lal chuan chu thu a hriatin mak a ti hle a, Abrahama tuichhunchhuah chu a pekîr leh a. Abrahama chu Philistin-ho nêna inrem takin an ramah mi khual angin a awm chhunzawm ta zêl a ni.—Gen. 21:22-31, 34.
12, 13. (a) Engtin nge Isaaka chuan a pa a entawn? (b) Engtin nge Jehova chuan Isaaka remna duhna chu mal a sâwm?
12 Abrahama fapa Isaaka pawhin remna ûm kawngah a pa chu a entawn a. Chu chu Philistin-ho a cheibâwl dân aṭangin a hmuh theih a ni. Ṭâm a tlâk avângin Isaaka chuan a chhûngte chu a awmna Chhim rama Beer-lahai-roi aṭangin, hmâr lama awm Philistin-ho ram ṭhatna lai Gerar hmunah a pêmpui a. Chutah chuan Jehova’n buh leh bâl leh ran lamah mal a sâwm nasa hle a. Philistin-ho chuan an îtsîk ṭan ta a ni. Isaaka chu a pa ang bawka a hausak ve an duh loh avângin, Philistin-ho chuan chu mi hmuna Abrahama chhiahhlawhte tuichhunchhuah laih chu leiin an hnawh pinsak a. A tâwpah Philistin-ho lal chuan Isaaka chu ‘an hnên ata kal bo daih’ tûrin a hrilh ta hial a. Remna duh mi Isaaka chuan a thu chu a zâwm ta a ni.—Gen. 24:62; 26:1, 12-17.
13 Isaaka’n a awmna hmun chhuahsan a, a aia hla zâwka awm hmun a khuar hnu chuan, a ran pute chuan tuichhunchhuah dang an lai leh a. Philistin-ho ran pute chuan an chhuhsak leh a. A pa Abrahama ang bawkin Isaaka chuan tuichhunchhuah avânga buaina a thlen chu a duh lo va, a mite chu tuichhunchhuah dang a laihtîr leh ta zâwk a ni. Chu pawh chu Philistin-ho chuan an chhuhsak leh a. Inrem a duh avângin Isaaka chu a chhûngkaw hung tak nên hmun dangah a insawn leh a. Chutah chuan a chhiahhlawhte chu tuichhunchhuah dang laihtîr lehin a hmingah Rehoboth a vuah ta a ni. A hnuah chuan, ram ṭhat lehzualna Beer-seba ramah chuan a insawn leh a, chutah Jehova chuan ani chu malsâwmin, a hnênah: “Hlau suh, i hnênah ka awm alâwm, mal ka sâwm ang chia, ka chhiahhlawh Abrahama avângin i thlahte chu ka la tipung dâwn asin,” tiin a hrilh a ni.—Gen. 26:17-25.
14. Philistin-ho lalin remna thu thlunpui a tum khân engtin nge Isaaka chuan remna siamtu a nihzia a lantîr?
14 Isaaka chuan a chhiahhlawhte laih tuichhunchhuah zawng zawng nei lêt tûra bei tûrin dikna leh chakna a nei a ni. A neihzia chu a hnua remna thu thlunpui tûra Philistin-ho lal leh a mi liante Beer-seba-a an va kal laia an thusawi: “LALPA chu i hnênah a awm tih chiang takin kan hria,” tih aṭang hian a lang chiang hle. Chutiang a ni chung pawhin, Isaaka chuan remna a duh avângin indo ai chuan vawi khat aia tam insawn kual chu a lo thlang zâwk a ni. Tûna remna thu thlunpui tûra an rawn pan ṭumah pawh Isaaka chuan remna siamtu a nihzia a lantîr leh a. “Ani chuan [a in lêngte] tân ruai a ṭhehsak a, tichuan an eiin an in ta a. Tin, zîng lamah chuan zîng takah an tho va, chhia an chham tawn a: tin, Isaakan anni chu a kaltîr a, . . . tlang takin an chhuak ta a,” tiin Bible chuan a sawi.—Gen. 26-31.
Jakoba Fapa Hmangaih Ber Chu Entawn Rawh
15. Engvângin nge Josefa chu a unaute’n an rem hleih theih loh?
15 Isaaka fapa Jakoba chu “mi ni chuah,” a nih loh leh mi tak leh sawisêlbo a ni chho va. (Gen. 25:27) Atîra kan sawi tâk ang khân, Jakoba chuan a unaupa Esauva nêna inrem dân kawng a dap a. Remna duhna kawnga a pa Isaaka entawn tûr siam chu a hlâwkpui tih rinhlelh rual a ni lo. A nih leh a fapate chungchângah eng nge sawi theih awm ve le? Jakoba chuan a fapa 12-te zîngah Josefa chu a hmangaih ber a. Josefa chu a pa duhzâwng ngai pawimawh tak, fapa thu âwih leh pate zah thiam tak a ni a. (Gen. 37:2, 14) Mahse, a ute chuan an thîk nasat êm avângin an rem hlei thei lo va. Râwng takin, Josefa chu salah an hralh a, an pa hnênah chuan ramsa kawlh tihhlum angin an sawi daih a ni.—Gen. 37:4, 28, 31-33.
16, 17. Engtin nge Josefa’n a unaute lakah remna duh mi a nihzia a târ lan?
16 Pathian Jehova chuan Josefa chu a awmpui tlat a. A hnuah Josefa chu Aigupta ram prime minister—Pharaoa hnuaia mi chiah—a lo ni ta hial a. Ṭâm nasa tak a tlâk avânga a unaute Aigupta rama an rawn kal pawh khân, Aigupta lal thuama a inthuam avângin Josefa a ni tih an hre thei lo. (Gen. 42:5-7) Josefa tân chuan amah leh a pa chunga an nunrâwnna avânga phuba lâk mai a va awl dâwn êm! Mahse, phuba lâk ahnêkin Josefa chuan remna siam a tum zâwk a. A unaute an inchhîr tak zet tih a chian hnu chuan, a nihna hriattîrin, an hnênah: “Heta kal tûra mi hralh avâng hian lungngai suh ula, mahni inhaw duh hek suh u: mite nunna chhandam tûrin Pathianin in hmaah mi lo tîr hmasa a nih hi,” tiin a hrilh a. Tin, a unaute zawng zawng chu a fâwp a, a ṭah khum ta ṭheuh va.—Gen. 45:1, 5, 15.
17 An pa Jakoba a thih hnu chuan, Josefa unaute chuan an chunga phuba a lâk duh mai an ring a. Chu thu Josefa hnêna an han hrilh chuan, ani chu “a ṭap ta a.” An hnênah: “Hlau suh u: nangmahni leh in fanau tê tête nên ka châwm zêl ang che u,” a ti a. Tichuan, remna duh mi Josefa chuan anni chu “a thlamuan a, ṭawngkam ṭha takin a be hlawm a.”—Gen. 50:15-21.
‘Keimahni Min Zirtîrna Tûra Ziak’
18, 19. (a) He thuziaka târ lan remna siamtute entawn tûr siam chu engtin nge i hlâwkpui? (b) A dawta thuziakah eng nge kan sawiho vang?
18 “Pathian Lehkha Thua chhelna leh thlamuanna hmua beiseina kan neih theihna tûrin, hmân laia ziak apiangte chu keimahni min zirtîrna turin ziak a ni si a,” tiin Paula chuan a ziak a. (Rom 15:4) Entawn tûr ṭha ber Pathian Jehova bâkah, Pathian Lehkha Thua chuang Abrahama te, Isaaka te, Jakoba te, leh Josefa te entawn tûr siam chu engtin nge kan hlâwkpui?
19 Pathian Jehova’n amah leh sual nei mihringte inkâra inlaichînna chhe tawh siam ṭha leh tûra a thiltihte hlut taka ngaihtuahna chuan theihtâwp chhuaha mi dangte nêna remna ûm tûrin min chêttîr a ni lâwm ni? Abrahama te, Isaaka te, Jakoba te, leh Josefa te entîrna chuan nu leh pate’n an fate chunga nghawng ṭha an neih theihzia a târ lang a. Chu bâkah, an chanchin chuan Pathian Jehova’n remna siam tumtute thawhrimna mal a sâwm ṭhinzia pawh a târ lang bawk. Chuvângin, Paula’n Pathian Jehova chu “remna Pathian” tia a sawi pawh hi a mak lo ve! (Rom 15:33; 16:20 chhiar rawh.) A dawta thuziak chuan Paula’n remna ûm a ṭûlzia a sawi uar chhan leh remna siamtu kan nih theih dân a sawi ang. (w11-E 08/15)
Eng Nge Kan Zir?
• Jokoba’n Esauva a tawh dâwn khân eng kawngin nge remna a zawn?
• Pathian Jehova’n amah nêna mihringte an lo inrem leh theih nâna hma a lâk dân chuan engtin nge a nghawng che?
• Remna siamtu Abrahama te, Isaaka te, Jakoba te, leh Josefa te entawn tûr siam aṭangin eng nge kan zir?
[Zirlai Atâna Zawhnate]
[Phêk 19-naa milemte]
Esauva nêna remna siam tûra Jakoba hma lâkna pawimawh ber chu eng nge ni?
