O Ieova “Le Atua o lē e Foaʻiina Mai le Filemu”

“Tau ina ia faatasi ma outou uma le Atua o lē e foaʻiina mai le filemu.”—ROMA 15:33.

1, 2. O le ā le tulaga faigatā o loo faamatala mai i le Kenese mataupu e 32 ma le 33, ma o le ā le iʻuga?

OLE nofoaga e i talaane o Penueli, e latalata i le vanu o Iapoka i le itu i sasaʻe o le vaitafe o Ioritana. Ua faalogo Esau i le tala o le a toe foʻi mai lona uso masaga o Iakopo. E ui ua mavae le 20 tausaga talu ona faatau atu e Esau lona tofi o le ulumatua i lona uso, ae o loo popole pea Iakopo ina neʻi ita faamoemoe Esau ma fasiotia o ia. Ua agaʻi atu Esau faatasi ma tane e 400 e faafetaui lona uso. Talu ai sa faatalitalia e Iakopo o le a lē talileleia mai o ia, o lea na ia auina muamua atu ai iā Esau le tele o meaalofa pe tusa e silia i le 550 manu lalata. A o avatu e auauna a Iakopo meaalofa o lafumanu eseese, na latou faapea atu iā Esau o meaalofa nei mai i lona uso.

² Ua oo i le taimi e la te fetaui ai! A o savali atu ma le lototele Iakopo iā Esau, ua faafitu ona ifo toʻele o ia i luma o Esau. Ua uma ona faia e Iakopo le gaoioiga e aupito sili ona tāua ina ia faatoʻafimālie ai le loto o lona uso. Sa tatalo Iakopo iā Ieova ia laveaʻiina o ia mai i lima o Esau. Pe na tali mai Ieova i lenei tatalo? Ioe. Ua faapea mai le Tusi Paia, “ua tamoʻe mai Esau e faafetaui iā te ia, ona fusi lea iā te ia ma punou i lona ua, ua ia sogi atu” iā te ia.—Kene. 32:11-20; 33:1-4.

3. O le ā ua tatou aʻoaʻoina mai le tala iā Iakopo ma Esau?

³ O le tala i le mea na tupu iā Iakopo ma Esau e faaalia mai ai, e tatau ona tatou faia ni taumafaiga maumauaʻi ma aogā e foʻia ai mataupu, pe a tulaʻi mai faafitauli ia e ono lamatia ai le filemu i le faapotopotoga Kerisiano. Sa taumafai Iakopo ia maua le filemu ma  Esau, ae e lē ona ua faia e Iakopo se mea sesē i lona uso, ma manatu ai e ao ona faatoese atu. E leai, sa manatu faatauvaa Esau i lona tofi o le ulumatua, ma na ia faatau atu iā Iakopo mo se ipu sitiū. (Kene. 25:31-34; Epe. 12:16) Peitaʻi, ua faataʻitaʻia mai i le auala na faalatalata atu ai Iakopo iā Esau, le tele e tatau ona tatou lotomalilie ai e faatumauina le filemu ma o tatou uso Kerisiano. Ua faailoa mai ai foʻi, e faamanuia e le Atua moni a tatou taumafaiga e faia faatasi ma le tatalo, ina ia maua le filemu. O loo iai i le Tusi Paia le tele o faaaʻoaʻoga e faatonuina ai i tatou ia avea ma ē e faatupuina le filemu.

Se Faaaʻoaʻoga Silisili e Timaʻia ai i Tatou

4. O le ā le sauniuniga a le Atua ina ia faasaoina ai tagata mai le agasala ma le oti?

⁴ O le faaaʻoaʻoga aupito sili ona mataʻina o sē e faatupuina le filemu, o Ieova—“le Atua o lē e foaʻiina mai le filemu.” (Roma 15:33) Seʻi manatu i le tele o gaoioiga ua faia e Ieova ina ia tatou maua ai se faiā filemu ma ia. Talu ai ua tatou fananau mai ma le agasala mai iā Atamu ma Eva, ua talafeagai ai iā i tatou “le totogi o le agasala.” (Roma 6:23) Peitaʻi, ona o le alofa tele o Ieova, na ia faatulaga ai se auala e faasaoina ai i tatou, e ala i le auina mai o lona Alo pele mai le lagi e fanau mai o se tagata lelei atoatoa. Na lotomalie lona Alo e faia faapea. Ma na ia faatagaina le fasiotia o ia e fili o le Atua. (Ioa. 10:17, 18) Na toe faatūina e le Atua moni lona Alo pele, o lē na mulimuli ane ia tuuina atu i lona Tamā le tāua o lona toto maligi, lea e fai ma togiola ina ia faasaoina ai tagata agasala ua salamō, mai le oti e faavavau.—Faitau le Eperu 9:14, 24.

5, 6. E faapefea i le toto maligi o Iesu, ona aafia ai le faiā ua faaleagaina i le va o le Atua ma tagata agasala?

⁵ E faapefea i le sauniuniga o le taulaga togiola a le Alo o le Atua, ona aafia ai le faiā ua faaleagaina i le va o le Atua ma tagata agasala? Ua taʻua i le Isaia 53:5: “Ua oo iā te ia le aʻoaʻiga lea e filemu ai i tatou, ma o ona manuʻa ua faamālōlōina ai i tatou.” Nai lo le avea ma fili o le Atua, ua mafai e tagata usiusitaʻi ona olioli i se faiā filemu ma Ia. “Ua . . . faasaʻolotoina i tatou [e Iesu] i le togiola e ala i lona toto, ioe, o le faamagaloina o a tatou agasala.”—Efe. 1:7.

⁶ Ua taʻua i le Tusi Paia: “Ua silafia e le Atua, e lelei ona nofo i totonu iā [Keriso] le tumu atoatoa.” O le māfuaaga, ona o Keriso o loo autū iai le faataunuuina o le finagalo o le Atua. O le ā le finagalo o le Atua? Ia “toe faaleleia . . . isi mea uma lava iā te ia, ina ia lelei ai e ala i le toto na faamaligiina” o Iesu Keriso. O “isi mea uma” ia ua aumaia e le Atua i totonu o se faiā filemu ma Ia, “o mea o i le lagi “ ma “mea o i le lalolagi.” O ā nei mea?—Faitau le Kolose 1:19, 20.

7. O ai ua faasino atu i ai “mea o i le lagi” ma “mea o i le lalolagi,” ia ua aumaia i totonu o se faiā filemu ma le Atua?

⁷ O le sauniuniga o le togiola, ua mafai ai e Kerisiano faauuina, o ē “ua taʻuamiotonuina” o ni atalii o le Atua, ona “olioli . . . i le filemu ma le Atua.” (Faitau le Roma 5:1.) O i latou nei ua faasino i ai o “mea o i le lagi,” ona ua iā i latou le faamoemoe mo le lagi, ma e “pule mai foʻi o ni tupu i le lalolagi” ma auauna o ni ositaulaga i le Atua. (Faaa. 5:10) Ae i le isi itu, “o mea o i le lalolagi,” e faasino atu i tagata salamō, o ē o le a mulimuli ane maua le ola e faavavau i le lalolagi.—Sala. 37:29.

8. O le ā le aafiaga iā te oe, pe a e manatunatu i le tele o mea ua faia e Ieova ina ia maua ai e tagata le filemu ma Ia?

⁸ I le faaalia o lona talisapaia moni mo le sauniuniga a le Atua, na tusi atu ai Paulo i Kerisiano faauuina i Efeso: “O le Atua o lē e tele le alofa mutimutivale, . . . ua ia faaola faatasi ai i tatou ma le Keriso e ui ina oti i tatou ona o a tatou mea sesē, ae o lona agalelei faifua ua ia faaola ai outou.” (Efe. 2:4, 5) E tusa po o lo tatou faamoemoe o le lagi po o le lalolagi, ae ua tatou nofo aitalafu i le Atua mo lona alofa mutimutivale ma le agalelei faifua. E faatumulia  o tatou loto i le agaga faafetai, pe a tatou iloiloina le tele o mea ua faia e Ieova, ina ia maua ai e tagata le filemu ma Ia. Pe a feagai ma tulaga e ono lamatia ai le filemu autasi i le faapotopotoga, pe e lē tatau ona avea lo tatou manatunatu ma le lotofaafetai i le faaaʻoaʻoga a le Atua, ma itu e uunaʻia ai i tatou e avea ma ē e faatupuina le filemu?

Aʻoaʻo Mai iā Aperaamo ma Isaako

9, 10. Na faapefea ona avea moni Aperaamo ma sē e faatupuina le filemu, i le auala na feutagaʻi ai ma Lota ina ua feteenaʻi a laʻua tausi manu?

⁹ E tusa ai ma le augātamā o Aperaamo, ua taʻua i le Tusi Paia: “ʻNa faatuatua Aperaamo iā Ieova, ma na ia silasila ai iā te ia o lē e amiotonu,” ma na taʻua ai o ia o le ʻuō a Ieova.’” (Iako. 2:23) Sa iloatino le faatuatua o Aperaamo e ala i lona tausia o le filemu. O se faataʻitaʻiga, ina ua faateleina lafumanu a Aperaamo, sa tupu se feteenaʻiga i le va o ana tausi manu, ma tausi manu a le atalii o lona uso o Lota. (Kene. 12:5; 13:7) O le auala sili e foʻia ai, o le nonofo eseese. O le a faapefea ona taulima e Aperaamo lenei tulaga faaeteetegatā? Nai lo le faaaogā o lona tulaga matua ma le silafaga a le Atua i lona tulaga, sa avea moni lava Aperaamo ma sē e faatupuina le filemu.

¹⁰ Na faapea atu Aperaamo i le atalii o lona uso, “Faamolemole, aua neʻi toe femisaaʻi i taʻua, po o ē e tausia aʻu lafumanu ma ē e tausia au lafumanu, auā o uso i taʻua.” Na faapea atili atu le augātamā: “Pe e lē o telē ea le fanua e te nofo ai? Faamolemole, seʻi o ta nonofo eseese ia. Pe afai e te alu i le itu tauagavale, ona ou alu lea i le itu taumatau, ae afai e te alu i le itu taumatau, ona ou alu lea i le itu tauagavale.” Sa ave e Lota le laufanua sa sili ona lelei, ae e leʻi ita faamoemoe ai Aperaamo iā te ia. (Kene. 13:8-11) Mulimuli ane, ina ua ave faapagota Lota e ʻautau na osofaʻi ane, e leʻi faatalatū Aperaamo e laveaʻi le atalii o lona uso.—Kene. 14:14-16.

11. Na faapefea ona tausisi Aperaamo i le filemu ma ona tuaoi Filisitia?

¹¹ Seʻi manatu foʻi i le auala na tausisi ai e Aperaamo le filemu ma ona tuaoi Filisitia i le nuu o Kanana. Na “faoa faamalosi” e tagata Filisitia le vaieli sa eli e auauna a Aperaamo i Peresepa. O le a faapefea i sē na laveaʻiina le atalii o lona uso, e ala i le faatoʻilaloina o tupu e toʻafā na puʻea faapagota o ia, ona tali atu i lenei gaoioiga? Nai lo le tau ma i latou ina ia toe maua mai le vaieli, na manatu Aperaamo e faataatia le mataupu ma ia aua neʻi talanoaina i lea taimi. Mulimuli ane, na asiasi atu le tupu Filisitia iā Aperaamo ina ia osia se feagaiga o le filemu. O i inā na faatoʻā lāgā ai e Aperaamo le mataupu i lona vaieli lea sa gaoia, ina ua uma ona ia tautō i le tupu o Filisitia o le a agalelei atu i ona atalii. Na faateʻia le tupu ina ua faalogo atu i le talanoa mai a Aperaamo, ma o lea na ia toe faafoʻi atu ai le vaieli iā Aperaamo. Ma sa faaauau ona aumau Aperaamo ma le filemu o se tagata ese i le nuu.—Kene. 21:22-31, 34.

12, 13. (a) Na faapefea ona faataʻitaʻi Isaako i le faaaʻoaʻoga a lona tamā? (e) Na faapefea ona faamanuia e Ieova Isaako ona o lona tausia o le filemu?

¹² Sa faaaʻoaʻo le atalii o Aperaamo o Isaako, i lona tamā e ala i le tausia o le filemu. E faamaonia lenei mea i le auala na feutagaʻi ai Isaako ma tagata Filisitia. Ina ua iai se oge i le nuu, na siitia atu e Isaako lona aiga mai i Pere-laaroi, o loo i le vaipanoa mātūtū o Nekepi, ae agaʻi atu i mātū i le laueleele lafulemu o tagata Filisitia i Kira. O i inā sa faamanuia ai e Ieova Isaako i le fuatele mai o fua o lona faatoʻaga ma faateleina ana lafumanu. Na amata ona lotoleaga tagata Filisitia iā te ia. Ona e leʻi mananaʻo tagata Filisitia e faateleina le tamaoaiga o Isaako e pei o lona tamā, na latou taofia ai vaieli ia sa eli e auauna a Aperaamo i lea vaipanoa. Na iʻu lava ina faatonu e le tupu o Filisitia Isaako ia ʻalu ese mai i lo latou vaipanoa.’ Na usitaʻi Isaako, o lē e tausia le filemu.—Kene. 24:62; 26:1, 12-17.

¹³ Ina ua ō mamao ese Isaako ma nonofo i  se isi nofoaga, sa eli e ʻau tausi manu a Isaako se isi vaieli. Ae sa finau mai tagata tausi manu o Filisitia, o i latou e ona le vai. I le pei o lona tamā o Aperaamo, e leʻi tau Isaako ma i latou ona o se vaieli. Nai lo lea, sa toe faatonu e Isaako ona tagata e toe eli se isi vaieli. Ae na toe finau mai foʻi tagata Filisitia o i latou e ona le vaieli lea. Ina ia tausia le filemu, sa toe siitia atu e Isaako lona ʻauaiga toʻatele i se isi vaipanoa. O i inā na eli ai e auauna a Isaako se vaieli, lea na faaigoa e Isaako o Reopo. Mulimuli ane sa toe siitia atu i le vaipanoa lafulemu o Peresepa, lea sa faamanuia ai o ia e Ieova ma fetalai mai: “Aua e te fefe, auā ou te faatasi ma oe, ou te faamanuia atu iā te oe, ma faatoʻateleina lau fanau ona o Aperaamo laʻu auauna.”—Kene. 26:17-25.

14. Na faapefea ona faamaonia le avea o Isaako o sē e faatupuina le filemu, ina ua taumafai le tupu Filisitia e osia se feagaiga o le filemu ma ia?

¹⁴ E mautinoa sa ono mafai ona tau Isaako mo lana aiā tatau, ia faaaogā vaieli uma ia sa eli e ana auauna. Aemaise foʻi, sa asiasi atu le tupu Filisitia ma ona alii sili iā Isaako i Peresepa, ma taumafai e osia se feagaiga o le filemu ma faapea atu iā Isaako: “Ua matou matuā mautinoa ua faatasi Ieova ma oe.” Ae ui i lea, ona o le tausia pea o le filemu, na manatu ai Isaako e sili ona toe siitia atu i se isi nofoaga, nai lo o le tau ma i latou. Sa faamaonia foʻi e Isaako i inei o ia o sē e faatupuina le filemu. Ua faamatala mai i faamaumauga e faapea: “Ona ia faia lea o se taumafataga mo [ana mālō], ma ua latou aai ma feinu. Ua latou usupō i le taeao ma ua tautō le tasi i le isi. Ona aauina atu lea e Isaako o i latou ma le filemu.”—Kene. 26:26-31.

Lesona Mai le Atalii sa Sili Ona Alofa i ai Iakopo

15. Aiseā na lē mafai ai ona tautatala atu ma le filemu uso o Iosefa iā te ia?

¹⁵ Sa ola aʻe le atalii o Isaako o Iakopo, ma avea o “se tagata e lē ponā.” (Kene. 25:27) E pei ona talanoaina i le amataga o le suʻesuʻega, sa taumafai Iakopo ia la maua le filemu ma lona uso o Esau. E lē taumatea, sa maua e Iakopo le tele o aogā mai le faaaʻoaʻoga a lona tamā o Isaako, o le tausia o le filemu. Ae faapefea atalii o Iakopo? Mai i ona atalii e toʻa sefulu lua, sa sili ona alofa Iakopo iā Iosefa. O Iosefa o se atalii e usiusitaʻi ma faaaloalo, ma sa ia tausia lelei manaʻoga o lona tamā. (Kene. 37:2, 14) Ae peitaʻi, ona o le matuā lotoleaga o uso matutua o Iosefa, sa lē mafai ai ona latou tautatala atu ma le filemu iā te ia. Ona o le lē alolofa, na latou faatau atu Iosefa e fai ma pologa, ma faavaleaina lo latou tamā e talitonu i le tala ua fasiotia e se manu feʻai Iosefa.—Kene. 37:4, 28, 31-33.

16, 17. Na faapefea ona faamaonia le avea o Iosefa ma sē e tausia le filemu ma ona uso?

¹⁶ Sa faamaonia na faatasi Ieova iā Iosefa. Mulimuli ane, na avea Iosefa ma palemia o Aikupito—o lē e pule lona lua iā Farao. Ina ua ō atu uso o Iosefa i Aikupito ona o se oge tele, e latou te leʻi iloa o Iosefa lea, ona o lona ofu tele faa-Aikupito. (Kene. 42:5-7) Maʻeu le faigofie mo Iosefa i lenā taimi, ona toe taui atu i ona uso ona o lo latou agaleaga iā te ia ma lona tamā! Ae nai lo le tauimasui, sa taumafai Iosefa e faatupu le filemu ma i latou. Ina ua manino ua salamō ona uso, sa ia faailoa atu o ia iā i latou ma faapea atu: “Aua tou te faanoanoa, ma aua foʻi tou te feita iā te outou lava, ona o lo outou faatauina o aʻu i inei; auā na auina mai aʻu e le Atua e muamua iā te outou ina ia faasaoina ai ola. “ Ona ia sogi atu lea i ona uso uma ma tagi ona o i latou.—Kene. 45:1, 5, 15.

¹⁷ Ina ua mavae le maliu o lo latou tamā o Iakopo, sa manatu uso o Iosefa o le a toe tauimasui Iosefa iā i latou. A o faamatala atu iā Iosefa lo latou popolega, ona ʻmaligi ai lea o loimata’ o Iosefa ma tali atu: “Aua tou te fefefe. Ou te avatu pea meaʻai iā te outou ma a outou fanau.” Na “faamāfanafana [atu] iā i latou ma tautala atu ma le mautinoa” iā i latou Iosefa, o lē na tausia le filemu.—Kene. 50:15-21.

 “Na Tusia e Faatonu ai i Tatou”

18, 19. (a) O ā aogā ua e maua i le iloiloina o faaaʻoaʻoga a i latou e faatupuina le filemu, sa talanoaina i lenei mataupu? (e) O le ā le manatu o le a iloiloina i le mataupu o sosoo mai?

¹⁸ Na tusi Paulo: “O mea uma na tusia i aso ua mavae, na tusia e faatonu ai i tatou, ina ia tatou maua le faamoemoe e ala i lo tatou tumau, ma le faamāfanafana mai o Tusitusiga Paia.” (Roma 15:4) O ā aogā ua tatou aʻoaʻoina, e lē gata mai le faaaʻoaʻoga silisili a Ieova, ae o tala foʻi i le Tusi Paia e uiga iā Aperaamo, Isaako, Iakopo ma Iosefa?

¹⁹ Pe e lē avea ea le manatunatu ma le lotofaafetai i mea ua faia e Ieova, e toe faaleleia ai le faiā ua faaleagaina i le va o ia ma tagata agasala, ma pogai e uunaʻia ai i tatou e faia mea uma e tatou te mafaia, ina ia tausisia ai le filemu ma isi? Ua faaalia mai i faaaʻoaʻoga a Aperaamo, Isaako, Iakopo, ma Iosefa, e mafai ona iai se taaʻiga lelei a mātua i a latou fanau. E lē gata i lea, ua faailoa mai foʻi i nei tala, e faamanuia e Ieova taumafaiga a ē e taumafai e faatupu le filemu. E lētioa ona taʻua e Paulo Ieova o “le Atua o lē e foaʻiina mai le filemu”! (Faitau le Roma 15:33; 16:20.) O le a iloiloina i le mataupu o loo sosoo mai, le māfuaaga na faamamafa ai e Paulo le manaʻoga ia tatou tausisi i le filemu, ma le auala e avea ai i tatou o ni ē e faatupuina le filemu.

O le ā na E Aʻoaʻoina?

• O le ā le auala na saʻilia ai e Iakopo le filemu, ina ua alu atu e faafetaui Esau?

• Ua faapefea ona aafia oe i mea ua faia e Ieova ina ia maua ai e tagata le filemu ma Ia?

• O le ā ua e aʻoaʻoina mai i faaaʻoaʻoga a ē e faatupuina le filemu, e pei o Aperaamo, Isaako, Iakopo ma Iosefa?

[Fesili mo le Suʻesuʻega]

[Ata i le itulau 23]

O le ā le laasaga aupito sili ona tāua sa uia e Iakopo, ina ia maua ai le filemu ma Esau?