Yehovah, „a Gado di e gi freide”
Yehovah, „a Gado di e gi freide”
„Meki a Gado di e gi freide de nanga un alamala.”—ROM. 15:33.
1, 2. Sortu span tori skrifi na ini Genesis kapitel 32 nanga 33? San pasa te fu kaba?
TU BRADA, Yakob nanga Esau, de fu miti makandra krosibei fu Penuwel, krosibei fu Yabok-lagipresi, na owstusei fu Yordan-liba. Esau yere taki en twelengi brada Yakob e drai kon na oso baka. Sowan tutenti yari pasa Esau ben seri en reti leki fosi pikin gi Yakob. Yakob frede taki en brada e mandi nanga en ete èn taki a wani kiri en. Makandra nanga 400 man, Esau e go miti en brada di a no si someni yari langa. Fu di Yakob frede taki Esau o du en ogri, a e seni den futuboi fu en meki den tyari meti leki kado gi en. Ibri leisi te den futuboi ben e tyari moro meti, den taigi Esau taki den meti na kado di en brada seni gi en. Ala nanga ala, Yakob seni moro leki 550 meti gi Esau.
2 Te fu kaba den brada miti! Nanga deki-ati Yakob waka go miti Esau, dan a boigi gi en. A no du dati wán leisi nomo, ma seibi leisi. Ma fosi dati, Yakob du a moro prenspari sani fu meki en bun baka nanga en brada. A begi Yehovah fu Esau no du en ogri. Yehovah piki a begi fu en? Iya. Bijbel e taigi wi: „Esau lon go miti en. A brasa en, a bosi en.”—Gen. 32:11-20; 33:1-4.
3. San wi e leri fu a tori fu Yakob nanga Esau?
3 A tori fu Yakob nanga Esau e sori taki efu wi abi problema nanga trawan na ini a Kresten gemeente, dan wi musu du ala muiti fu lusu den problema dati. Efu wi no e du dati, dan freide no o de na ini a gemeente. Yakob ben du muiti fu meki en bun nanga en brada, aladi a no ben du Esau wan ogri èn a no ben abi fu aksi en pardon. Esau ben de a wan di no sori warderi gi a reti di a ben abi leki fosi pikin. Na en seri a reti dati gi Yakob, soso fu kisi wan preti supu (Gen. 25:31-34; Hebr. 12:16). Ma a fasi fa Yakob go na Esau e sori o furu muiti wi musu du fu abi freide nanga wi Kresten brada nanga sisa, noso fu libi bun nanga den. A tori disi e sori tu taki te wi e begi a tru Gado fu yepi wi fu meki sani bun baka nanga trawan, dan a e blesi den muiti di wi e meki. Bijbel abi furu tra eksempre di e sori san wi musu du fu libi bun nanga trawan.
A moro bun eksempre gi wi
4. San Gado du fu frulusu libisma fu sondu nanga dede?
4 A moro bun eksempre fu wan sma di abi freide nanga trawan noso di e libi bun nanga trawan, na Yehovah. En na „a Gado di e gi freide” (Rom. 15:33). Prakseri omeni Yehovah du, so taki wi kan de mati fu en. Leki bakapikin fu Adam nanga Eva, wi abi sondu. Sobun, wi musu fu kisi „a pai fu sondu” èn dati na dede (Rom. 6:23). Ma fu di Yehovah lobi wi so te, meki a seti sani fu frulusu wi. A seni en lobi Manpikin komoto fu hemel meki a gebore leki wan libisma di no abi sondu, dan a meki a dede gi den sondu fu wi. A Manpikin ben de klariklari fu du san en Papa wani. A gi pasi taki den feanti fu Gado kiri en (Yoh. 10:17, 18). A tru Gado gi en lobi Manpikin wan opobaka. Baka dati a Manpikin gi a Papa a waarde fu en brudu di ben o de wan lusu-paiman fu frulusu ala sma di abi berow fu den sondu. Na so den ben o kisi na okasi fu no dede noiti moro.—Leisi Hebrewsma 9:14, 24.
5, 6. Fa a lusu-paiman fu Yesus e yepi libisma fu tron mati fu Gado?
5 Fu di libisma abi sondu, meki den tron feanti fu Gado. Fa a lusu-paiman fu Yesus e yepi libisma? Yesaya 53:5 e taki: „Den fon en, so taki sani kan waka bun gi wi. A kisi soro, so taki wi kan kon betre.” Libisma di e gi yesi na Gado kan tron en mati now, na presi fu de en feanti. „Nanga yepi fu Yesus wi kon fri. A pai a lusu-paiman nanga a brudu fu en. Na so wi e kisi pardon fu wi sondu.”—Ef. 1:7.
6 Bijbel taki: „Gado feni en bun taki Yesus bun dorodoro na ini ala sani.” Disi wani taki dati Yesus na a moro prenspari sma di Yehovah e gebroiki fu du san a abi na prakseri. San Yehovah abi na prakseri fu du? A abi na prakseri fu ’meki ala tra sani kon bun baka nanga en, nanga yepi fu a brudu’ fu Yesus Krestes. „Ala tra sani” di Gado e meki kon bun baka nanga en na den „sani na ini hemel” èn den „sani na grontapu”. San na den sani disi?—Leisi Kolosesma 1:19, 20.
7. San na den „sani na ini hemel” èn den „sani na grontapu” di kon bun baka nanga Gado?
7 A lusu-paiman fu Yesus meki taki salfu Kresten di Gado „e si leki reti-ati sma”, kon de manpikin fu en èn den kon „de bun nanga Gado” (Leisi Romesma 5:1.) Na den sma disi Bijbel e kari den „sani na ini hemel”, fu di den abi a howpu fu libi na ini hemel, fu „tiri grontapu leki kownu” èn fu dini leki priester gi Gado (Openb. 5:10). Ma den „sani na grontapu” na den libisma di abi berow èn di sa kisi têgo libi na grontapu te fu kaba.—Ps. 37:29.
8. Fa na eksempre fu Yehovah e yepi yu te yu abi problema nanga trawan na ini a gemeente?
8 Nanga tangi gi san Yehovah du, Paulus skrifi den salfu Kresten na ini Efeise: „Gado abi bun furu sari-ati èn . . . a meki wi kon na libi makandra nanga Krestes, aladi den fowtu fu wi ben meki wi de leki dede sma. Sobun, na bun-ati fu Gado meki unu kisi frulusu” (Ef. 2:4, 5). Awinsi wi abi a howpu fu libi na hemel noso na grontapu, wi de nanga furu tangi taki Gado sori wi sari-ati nanga bun-ati. Te wi e prakseri omeni Yehovah du so taki libisma kan de en mati, dan disi e meki wi de nanga tangi trutru. Son tron wi kan abi problema nanga trawan èn dati kan tyari dyugudyugu kon na ini a gemeente. Te disi e pasa, wi musu prakseri na eksempre fu Gado èn du muiti fu libi bun nanga wi brada nanga sisa.
San wi kan leri fu Abraham nanga Isak
9, 10. Fa Abraham sori taki a ben wani libi bun nanga Lot, di trobi kon na mindri den skapuman fu den?
9 Bijbel e taki fu a famiri-edeman Abraham: „’Abraham ben poti bribi na ini Yehovah. Fu dati ede Gado ben si en leki wan reti-ati sma’ èn den ben kari en ’Yehovah mati’” (Yak. 2:23). A bun fasi fa Abraham ben e libi nanga trawan e sori taki a ben abi bribi. Fu eksempre, di Abraham kisi moro nanga moro meti, den skapuman fu en nanga den di fu en brada pikin Lot kisi trobi (Gen. 12:5; 13:7). A ben de krin taki Abraham nanga Lot ben musu prati. Fa Abraham ben o lusu a problema disi? Abraham ben moro owru èn a ben de wan bun mati fu Yehovah. Toku a no ben feni taki na en musu taki san o pasa. Na presi fu dati a sori taki a ben wani libi bun nanga Lot.
10 Abraham taigi Lot: „Luku, yu nanga mi no musu meki trobi èn den skapuman fu mi nanga den skapuman fu yu, no musu meki trobi tu, bika wi na famiri.” A taki tu: „Yu kan go na sortu sei fu a kondre yu wani. Kon meki wi prati. Efu yu go na a kruktu-anusei, dan mi o go na a reti-anusei. Ma efu yu go na a reti-anusei, dan mi o go na a kruktu-anusei.” Ne Lot teki a moro bun pisi fu a kondre di abi fatu gron. Abraham meki Lot du san a wani èn a no ben mandi nanga en (Gen. 13:8-11). Wi sabi dati, fu di bakaten di feanti grabu Lot, Abraham no draidrai fu frulusu en.—Gen. 14:14-16.
11. Fa Abraham du muiti fu libi bun nanga den Filisteasma di ben libi na ini en birti?
11 Prakseri tu fa Abraham du muiti fu libi bun nanga den Filisteasma di ben tan na ini en birti na Kanan. Nanga tranga den Filisteasma ben teki wan watrapeti abra di den futuboi fu Abraham ben diki na Berseiba. Na presi taki Abraham go feti fu kisi a watrapeti baka, a bosroiti fu no taki noti èn fu libi a tori. Bakaten, a Filistea kownu go na Abraham fu meki wan frubontu nanga en fu no o feti. Ne Abraham sweri fu libi bun nanga den bakapikin fu a kownu. Baka di Abraham du a sani disi, dan fosi a taigi a kownu taki den ben fufuru a peti fu en. A kownu skreki di a yere a sani disi èn a gi Abraham a peti baka. Na so Abraham tan libi na ini wan kondre di no de fu en èn a tan libi bun nanga den sma drape.—Gen. 21:22-31, 34.
12, 13. (a) Fa Isak teki na eksempre fu en papa? (b) Fa Yehovah blesi Isak fu di a du muiti fu libi bun nanga trawan?
12 Neleki en papa Abraham, na so Isak du muiti fu libi bun nanga trawan. Disi de fu si na a fasi fa a ben e libi nanga den Filisteasma. Di angriten ben de na ini a kondre, Isak froisi gowe nanga en osofamiri fu Beyer-Lakai-Rowi di ben de na ini Negeb-sabana. A go na a presi Gerar di ben de fu den Filisteasma èn di ben abi fatu gron. Yehovah blesi Isak so taki den gron fu en ben e gi furu nyanyan èn a ben kon abi furu meti tu. Ne den Filisteasma bigin dyarusu na en tapu. Den no ben wani Isak fu kon gudu leki en papa. Dati meki den tapu den peti di den futuboi fu Abraham ben diki na ini a kontren drape. Te fu kaba, a Filistea kownu taigi Isak fu ’froisi komoto na ini a kontren fu den’. Isak du san a kownu taigi en, fu di a no ben wani meki trobi nanga den Filisteasma.—Gen. 24:62; 26:1, 12-17.
13 Baka di Isak froisi en kampu gowe, den skapuman fu en diki wan tra peti. Ne den Filistea skapuman feni taki a watra na fu den. Neleki en papa Abraham, Isak no feti fu wan peti ede. Na presi fu dati, Isak meki den man fu en diki wan tra peti, ma den Filisteasma teki a peti dati tu. Fu di Isak no ben wani meki trobi nanga den, a froisi a bigi kampu fu en go na wan tra presi. Drape den futuboi fu en diki wan peti di Isak kari Rehobot. Bakaten, a froisi go na Berseiba di ben abi fatu gron. Drape Yehovah blesi en èn a taigi en: „No frede, bika mi de nanga yu. Fu mi futuboi Abraham ede, meki mi o blesi yu èn mi o meki yu kisi furu bakapikin.”—Gen. 26:17-25.
14. Di a Filistea kownu ben wani meki wan frubontu nanga Isak, dan fa Isak sori taki a ben wani libi bun nanga en?
14 A no de fu taki dati Isak ben abi a reti fu gebroiki den peti di den futuboi fu en diki èn a ben man feti gi dati. A Filistea kownu nanga den heihei man fu en ben kon na Isak na Berseiba èn den ben wani meki wan frubontu nanga en fu no feti. Den taki: „Wi si krin taki Yehovah de nanga yu.” Ma fu di Isak no ben wani meki trobi nanga den, meki a bosroiti fu froisi na presi fu feti èn disi pasa moro leki wán leisi. Ete wan tron Isak sori taki a ben wani libi bun nanga trawan. Bijbel e taki: „A sreka wan bigi nyanyan gi den, dan den nyan èn den dringi. Mamanten, den opo frukufruku èn den meki wan sweri nanga makandra. Baka dati Isak meki den gowe èn den prati leki mati.”—Gen. 26:26-31.
Leri fu na eksempre fu Yosef
15. Fu san ede den brada fu Yosef no ben man taki na wan switi fasi nanga en?
15 Isak, a manpikin fu Yakob, ben de „wan reti-ati man” (Gen. 25:27). Soleki fa wi si kaba, dan Yakob du muiti fu meki en bun nanga en brada Esau. A no de fu taki dati Yakob leri furu fu en papa Isak di ben du muiti fu libi bun nanga trawan. Fa a ben de nanga den manpikin fu Yakob? Fu ala den 12 manpikin, Yosef ben de a wan di Yakob ben lobi moro. Yosef ben gi yesi na en papa èn a ben abi lespeki gi en. Yakob ben kan frutrow en (Gen. 37:2, 14). Ma den bigi brada fu Yosef ben kon dyarusu so te, taki den no ben man taki na wan switi fasi nanga en. Den ben abi so wan bita-ati gi Yosef taki den seri en leki srafu èn den meki den papa bribi taki wan ogri meti kiri en.—Genesis 37:4, 28, 31-33.
16, 17. Fa Yosef sori taki a ben wani libi bun nanga den brada fu en?
16 Yehovah ben de nanga Yosef. Baka wan pisi ten, Yosef tron a moro prenspari man baka Farao, a kownu fu Egepte. Di wan bigi angriten ben de na ini Kanan, dan Yosef brada go na Egepte fu bai nyanyan. Di den miti Yosef drape, den no ben sabi taki na en, kande fu di a ben weri krosi leki wan heihei man fu Egepte (Gen. 42:5-7). Disi ben de wan moi okasi gi Yosef fu pai den gi na ogri di den du nanga en èn nanga en papa! Ma na presi fu pai ogri nanga ogri, Yosef pruberi fu meki en bun nanga den brada fu en. Di a si taki den brada fu en ben sari trutru fu na ogri di den du, a taigi den suma na en. A taki: „No sari èn no krutu nanga makandra taki un seri mi, fu di Gado seni mi go na un fesi fu meki unu tan na libi. Dan Yosef bosi ala den tra brada fu en, a brasa den èn a krei.”—Gen. 45:1, 5, 15.
17 Baka di den papa Yakob dede, den brada fu Yosef denki taki a ben o puru atibron na den tapu. Di den fruteri Yosef disi, Yosef „bari krei” èn a taki: „No frede. Mi o sorgu taki unu nanga den pikin fu unu kisi nyanyan.” Yosef sori taki a ben wani libi bun nanga den. A „trowstu den èn a taki sani fu meki den firi korostu.”—Gen. 50:15-21.
Eksempre di „skrifi fu leri wi wan sani”
18, 19. (a) San yu leri fu den eksempre di skrifi na ini na artikel disi? (b) San wi o luku na ini a tra artikel?
18 Paulus skrifi: „Ala sani di sma skrifi fositen, ben skrifi fu leri wi wan sani. Disi e yepi wi fu horidoro èn fu kisi trowstu fu Gado Buku, so taki wi kan abi howpu” (Rom. 15:4). San wi leri fu a tumusi bun eksempre fu Yehovah èn fu den eksempre fu Abraham, Isak, Yakob nanga Yosef di skrifi na ini Bijbel?
19 Te wi e prakseri omeni muiti Yehovah du fu meki sondu libisma kon bun baka nanga en, dan disi musu gi wi deki-ati fu du ala muiti fu libi bun nanga trawan. Na eksempre fu Abraham, Isak, Yakob nanga Yosef e sori taki papa nanga mama kan de bun eksempre gi den pikin fu den. Boiti dati, den tori disi e sori taki Yehovah e blesi den sma di e du muiti fu libi bun nanga trawan noso fu abi freide nanga den. Dati meki wi kan frustan taki Paulus e kari Yehovah „a Gado di e gi freide”! (Leisi Romesma 15:33; 16:20.) Na ini a tra artikel wi o luku fu san ede Paulus taki dati a prenspari fu tan libi bun nanga makandra èn fa wi kan du dati.
San yu leri?
• Di Yakob ben o miti Esau, dan san a du fu meki en bun baka nanga en?
• Te yu e prakseri san Yehovah du so taki libisma kan de en mati, dan san yusrefi wani du tu?
• San yu leri fu den eksempre fu Abraham, Isak, Yakob nanga Yosef?
[Aksi fu a tori disi]
[Prenki na tapu bladzijde 23]
San na a moro prenspari sani di Yakob du fu meki en bun nanga Esau?
