Jeová mak “Maromak dame nian”
Jeová mak “Maromak dame nian”
“Maromak dame nian hela ho imi hotu.”—ROM 15:33.
1, 2. Iha Gênesis kapítulu 32 no 33 fó-hatene kona-ba situasaun saida? Ikusmai saida mak akontese?
HANOIN toʼok situasaun tuirmai neʼe: Maun-alin naʼin-rua atu hasoru malu. Sira sei hasoru malu besik Penuel, besik foho-leet Jaboc, iha mota Jordaun nia parte leste. Maun-alin sira-neʼe mak Esaú no Jacob, no ba tempu kleur ona sira la hasoru malu. Tinan 20 liubá, Esaú faʼan tiha ninia direitu nuʼudar oan-primeiru ba ninia alin, Jacob. Kuandu Esaú rona katak Jacob hakarak atu fila fali ba nia rai, nia bá atu hasoru malu ho Jacob. Esaú lori mós mane naʼin-400. Jacob hanoin katak ninia maun sei rai odi hela ba nia no hakarak oho nia. Nuneʼe Jacob fahe ninia atan sira ba grupu balun no haruka sira atu lori animál nuʼudar prezente ba Esaú. Kuandu grupu ida-idak toʼo ba Esaú, sira hatete ba nia katak animál sira-neʼe mak prezente husi ninia alin. Jacob haruka animál hamutuk 550 liu.
2 Saida mak akontese kuandu maun-alin sira-neʼe ikusmai hasoru malu fali? Ho aten-brani Jacob bá atu hasoru Esaú no nuʼudar nia laʼo nia hakruʼuk ba rai laʼós dala ida deʼit, maibé ba dala hitu! Antes neʼe, Jacob halo buat ida neʼebé importante liu. Nia halo orasaun ba Maromak Jeová no husu atu proteje nia husi Esaú nia liman. Maromak Jeová hatán nia orasaun. Bíblia fó-hatene mai ita katak Esaú halai hasoru Jacob, no komesa hakoʼak no reʼi nia.—Gên 32:11-20; 33:1-4.
3. Saida mak ita aprende husi istória kona-ba Jacob no Esaú?
3 Istória kona-ba Esaú no Jacob hatudu katak ita tenke hakaʼas an atu halo buat naran deʼit atu rezolve lalais problema iha kongregasaun kristaun. Se lae, ida-neʼe bele halakon dame no unidade iha ita-nia leet. Hanoin toʼok kona-ba Jacob nia ezemplu. Nia la halo sala ida. Tan neʼe, nia la presiza husu deskulpa ba ninia maun. Tuir loloos, Esaú mak ida neʼebé faʼan nia direitu nuʼudar oan primeiru ho hahán bikan ida. Maski nuneʼe, Jacob halo buat hotu neʼebé nia bele atu halo dame. (Gên 25:31-34; Ebr 12:16, MF) Jacob nia ezemplu hatudu katak ita tenke hakaʼas an atu haburas dame ho maluk kristaun sira. Ida-neʼe mós hatudu katak kuandu ita husu Maromak nia ajuda, nia sei hatán ita-nia orasaun. Bíblia fó sai ezemplu barak tan neʼebé hatudu oinsá mak ita bele halo dame ho ema seluk. Mai ita haree ezemplu balu.
Ezemplu diʼak liu neʼebé ita presiza banati-tuir
4. Maromak halo saida atu salva ema husi sala no mate?
4 Maromak Jeová hatudu ezemplu neʼebé diʼak liu hotu kona-ba halo dame. Nia mak “Maromak dame nian”. (Rom 15:33) Hanoin toʼok kona-ba buat hotu neʼebé Maromak halo ona hodi ita bele sai ninia belun. Tanba ita mak Adão no Eva nia bei-oan, ita hotu mak ema sala-naʼin. No “sala nia kolen mak mate”. (Rom 6:23) Maibé tanba Maromak hadomi tebetebes ita, nia hakarak salva ita husi sala no mate. Nuneʼe, nia haruka ninia Oan-Mane, Jesus, neʼebé nia hadomi atu mai iha rai hodi moris nuʼudar ema perfeitu no mate atu kasu ita-nia sala. Jesus mós kontente atu halo tuir nia Aman nia hakarak no fó nia moris atu salva ita. (Joao 10:17, 18) Depois neʼe, Maromak Jeová fó moris-hiʼas ba Jesus, no tuirmai Jesus saʼe ba lalehan. Iha neʼebá Jesus fó ba Maromak folin husi ninia raan neʼebé fakar ona. Sakrifísiu neʼe sei salva ema hotu neʼebé hakribi sira-nia sala.—Lee Ebreu 9:14, 24.
5, 6. Oinsá mak Jesus nia sakrifísiu ajuda ema atu hadame malu fali ho Maromak?
5 Tanba sala, ema hotu sai inimigu ho Maromak. Maibé oinsá mak Jesus nia sakrifísiu bele ajuda ita? Isaías 53:5 hatete: “Nia simu kastigu atu ita hetan dame, no tan ninia kanek ita hetan kura.” Jesus nia sakrifísiu loke dalan ba ema neʼebé halo tuir Maromak atu sai nia belun. Bíblia mós hatete: “Iha Kristu, ho nia raan, ita hetan maksoin no perdua ba ita-nia sala.”—Ef 1:7.
6 Bíblia hatete: “Maromak hakarak duni katak ninia hahalok hotu hela iha nia [Jesus].” (Kol 1:19, MF) Ida-neʼe katak Maromak uza Jesus atu kumpre ninia hakarak. Entaun, saida mak Maromak nia hakarak? Bíblia esplika katak “Maromak hakarak hadame buat hotu-hotu ho Nia An” liuhusi Jesus nia “raan neʼebé nia fakar”. Liafuan “buat hotu-hotu” katak Maromak hadame nia an ho buat neʼebé “iha lalehan” no buat neʼebé “iha rai”. Maibé, saida mak buat sira-neʼe?—Lee Koloso 1:20.
7. Saida mak buat sira neʼebé “iha lalehan” no buat sira neʼebé “iha rai”?
7 Jesus nia sakrifísiu loke dalan ba ema kose-mina sira atu “sai ema loos” nuʼudar Maromak nia oan tanba sira “dame malu ona ho Maromak”. (Lee Roma 5:1.) Bíblia bolu sira buat neʼebé “iha lalehan” tanba Maromak fo moris-hiʼas ba sira iha lalehan atu hamutuk ho Jesus. Iha neʼebá sira sei “ukun raiklaran tomak” no serbí nuʼudar Maromak nia amlulik sira. (Apok 5:10) Buat sira neʼebé “iha rai” mak ema sira-neʼebé hakribi sira-nia sala no iha esperansa atu hetan moris ba nafatin iha rai.—Sal 37:29.
8. Hodi hanoin kona-ba buat neʼebé Maromak Jeová halo tiha ona atu hadame malu ho ema, ida-neʼe book ita atu halo saida?
8 Apóstolu Paulo nia liafuan ba ema kose-mina sira iha Éfeso hatudu katak nia agradese tebes ba Jesus nia sakrifísiu. Paulo hatete: “[Maromak] hawaʼin nia laran-luak mai ita. Maski ita mate tanba ita-nia sala, Nia halo ita moris hiʼas ho Kristu; husi grasa mak imi hetan maksoin.” (Ef 2:4, 5) Maski ita iha esperansa atu moris iha lalehan ka iha esperansa atu moris iha rai, ita hotu hafolin tebes Maromak nia laran-luak no laran-diʼak. Ita sente agredese tebes ba Maromak kuandu ita hanoin kona-ba buat hotu neʼebé Maromak Jeová halo ona, hodi ema bele hadame malu ho nia. Dala ruma, ita hasoru problema sira-neʼebé bele estraga unidade iha kongregasaun laran. Kuandu ida-neʼe akontese, ita presiza hanoin didiʼak kona-ba Maromak nia ezemplu no ida-neʼe bele book ita atu nafatin haburas dame iha ita-nia maluk sira-nia leet.
Aprende husi Abraão no Isaac nia ezemplu
9, 10. Oinsá mak Abraão hatudu katak nia hakarak haburas dame ho Lot kuandu situasaun susar mosu?
9 Bíblia koʼalia kona-ba Abraão hodi dehan: “‘Abraão fiar Maromak, no Maromak sura ida-neʼe nuʼudar nia justisa,’ no ema hanaran nia Maromak nia belun.” (Tgo 2:23) Abraão hatudu nia fiar ba Maromak Jeová hodi haburas dame ho ema seluk. Porezemplu, hanoin toʼok kona-ba tempu neʼebé problema mosu entre Abraão nia bibi-atan sira no ninia sobriñu, Lot, nia bibi-atan sira. (Gên 12:5; 13:7) Abraão no Lot deside katak hodi rezolve problema neʼe, diʼak liu se sira haketak malu. Haree toʼok saida mak Abraão halo iha situasaun susar neʼe. Maski nia idade liu Lot no iha relasaun espesiál ho Maromak Jeová, maibé nia la hanoin katak nia mak bele foti desizaun uluk kona-ba rai neʼebé nia atu hela. Nia hatudu katak nia hakarak atu haburas nafatin dame ho ninia sobriñu.
10 Abraão hatete ba ninia sobriñu: “Favór, keta husik haksesuk malu mosu entre haʼu no Ita no entre haʼu-nia bibi-atan sira ho Ita-nia bibi-atan sira, tanba ita hotu maun-alin sira.” Nia hatutan tan: “Rai hotu neʼe ita-nian, loos ka lae? Favór, haketak an husi haʼu. Se Ita bá sorin karuk, nuneʼe haʼu sei bá sorin loos; maibé se Ita bá sorin loos, nuneʼe haʼu sei bá sorin karuk.” Lot hili parte husi rai neʼebé diʼak liu hotu, neʼebé buras liu, maibé Abraão simu ida-neʼe no la hirus. (Gên 13:8-11) Ita hatene kona-ba neʼe tanba bainhira inimigu sira lori Lot nuʼudar dadur, Abraão bá lalais atu salva nia.—Gên 14:14-16.
11. Oinsá mak Abraão buka dame ho ema Filístia?
11 Hanoin mós kona-ba dalan neʼebé Abraão haburas dame ho ema Filístia neʼebé hela besik nia iha rai-Kanaan. Hodi uza violénsia, ema Filístia hadau Abraão nia bee-matan ida neʼebé ninia atan sira keʼe besik fatin naran Berseba. Saida mak Abraão halo? Iha tempu neʼe nia la halo ka hatete buat ida. Duké funu hasoru sira, Abraão nonook deʼit. Liutiha neʼe, Filístia nia liurai mai vizita Abraão atu halo aliansa dame nian. Abraão simu ida-neʼe no promete atu hatudu laran-diʼak ba liurai neʼe nia bei-oan sira. Depois neʼe Abraão fó-hatene ba liurai kona-ba bee-matan neʼebé ema hadau husi nia. Liurai neʼe hakfodak atu rona kona-ba neʼe, no nia fó fali kedas bee-matan neʼe ba Abraão. Nuneʼe Abraão hela nafatin ho dame nuʼudar ema estranjeiru ida iha rai neʼe.—Gên 21:22-31, 34.
12, 13. (a) Oinsá mak Isaac halo tuir nia aman nia ezemplu? (b) Oinsá mak Maromak Jeová fó bensaun ba Isaac nia hakaʼas-an atu halo dame?
12 Isaac mós gosta atu buka dame ho ema seluk hanesan ho nia aman Abraão. Nia hatudu hahalok diʼak ba ema Filístia sira. Tanba rai-hamlaha iha tempu neʼebá Isaac muda ninia umakain husi área Beer-Lahai-Roí neʼebé maran toʼo fatin neʼebé buras liu naran Gerar, besik área Négueb neʼebé iha ema Filístia nia rai. Maromak Jeová fó bensaun ba Isaac hodi halo ninia toʼos fó fuan barak, no nia animál sira mós aumenta. Maibé ema Filístia sente laran-moras ba Isaac no sira lakohi Isaac sai riku liu. Tan neʼe, sira halo nakonu ninia bee-matan hotu ho rai. Ikusmai ema Filístia nia liurai fó-hatene Isaac: “Sees husi ami-nia hela-fatin.” Isaac halo tuir liurai nia hakarak neʼe tanba nia hakaʼas an atu buka dame.—Gên 24:62; 26:1, 12-17.
13 Depois Isaac muda dook tiha, ninia bibi-atan sira keʼe bee-matan foun. Maibé bibi-atan sira husi Filístia dehan katak bee neʼe mós sira-nian. Hanesan ho ninia aman, Isaac la haksesuk malu ho sira. Nia haruka ninia ema sira atu keʼe bee-matan foun. Lakleur, ema Filístia mós dehan katak bee-matan neʼe sira-nian. Dala ida tan, tanba Isaac hakarak buka dame, nia muda ninia umakain tomak no sasán hotu ba fatin seluk. Iha fatin foun neʼe, Isaac nia atan sira keʼe bee-matan ida tan, no Isaac bolu bee-matan neʼe Reobot. Tuirmai, nia muda ba área neʼebé buras liu naran Berseba, no iha neʼebá Maromak fó bensaun ba nia hodi hatete: “Keta taʼuk, tanba haʼu hamutuk ho ó, no haʼu sei fó bensaun ba ó no halo ó-nia bei-oan sai barak, tanba haʼu-nia atan Abraão.”—Gên 26:17-25.
14. Oinsá mak Isaac hatudu katak nia hakaʼas an atu halo dame kuandu liurai Filístia buka atu halo aliansa dame nian ho sira?
14 Tuir loloos, se Isaac hakarak, nia bele defende ninia direitu atu uza bee-matan sira-neʼebé nia halo. Maski nuneʼe, Isaac muda ba fatin barak hodi la haksesuk malu ho ema. Nia halo ida-neʼe tanba hakarak atu iha dame ho ema. Liurai Filístia hatene katak Maromak Jeová mak fó bensaun ba buat hotu neʼebé Isaac halo. Kuandu liurai no ninia ema-boot sira mai vizita Isaac iha Berseba atu halo aliansa dame nian ho Isaac, sira hatete: “Ami haree ho klaru ona katak Jeová hamutuk ho ó.” Iha tempu neʼe, Isaac mós hatudu katak nia hakarak halo dame ho liurai neʼe. Bíblia hatete: “Depois nia prepara han-hemu boot ba sira no sira han no hemu. Iha dadeer tuirmai sira hadeer sedu no sira halo promete ba malu. Depois neʼe Isaac husik sira bá no sira bá ho dame.”—Gên 26:26-31.
Aprende husi José nia ezemplu
15. Tanbasá mak José nia maun sira koʼalia ba nia ho hirus deʼit?
15 Bíblia hatudu katak Isaac nia oan, Jacob, mak “mane neʼebé laran-moos”. (Gên 25:27) Hanesan ita aprende ona, Jacob hakaʼas an atu halo dame ho ninia maun, Esaú. Klaru katak Jacob aprende husi ninia aman, Isaac, nia ezemplu. Jacob nia oan sira mós aprende husi sira-nia aman nia ezemplu ka lae? Husi oan-mane naʼin-12, Jacob hadomi liu José. José sempre halo tuir no respeitu ninia aman no Jacob tau fiar ba nia. (Gên 37:2, 14) Maibé, Bíblia hatete katak José nia maun sira sai laran-moras toʼo sira koʼalia ba nia ho hirus deʼit. Sira odi tebes nia no sira faʼan tiha nia nuʼudar atan. Depois neʼe, sira koʼalia bosok ba sira-nia aman katak animál fuik mak oho tiha José.—Gên 37:4, 28, 31-33.
16, 17. Oinsá mak José hatudu katak nia hakaʼas an atu halo dame ho ninia maun sira?
16 Maibé, Maromak Jeová fó bensaun ba José. Ikusmai, José sai primeiru ministru iha rai-Egiptu, neʼe katak Faraun mak liurai boot no José iha pozisaun segundu. Kuandu hamlaha boot mosu iha rai-Kanaan, José nia maun sira bá toʼo Egiptu atu sosa ai-han. Kuandu sira hasoru José iha neʼebá, sira la rekoñese nia, karik tanba nia hatais hanesan Egiptu nia ema-boot sira. (Gên 42:5-7) Iha tempu neʼe, José bele selu fali hahalok aat neʼebé ninia maun sira halo ba nia no ba ninia aman. Duké halo ida-neʼe, José koko atu halo dame ho sira. Kuandu José haree katak ninia maun sira arrepende ona sira-nia sala, José fó sai nia an ba sira katak nia mak sira-nia alin. Nia hatete: “Keta sente laran-susar no hirus ba imi-nia an tanba imi faʼan haʼu; tanba ida-neʼe akontese atubele salva ema nia moris, tan neʼe mak Maromak haruka haʼu uluk imi.” Tuirmai, nia komesa reʼi ninia maun sira no tanis ho sira.—Gên 45:1, 5, 15.
17 Depois, kuandu sira-nia aman Jacob mate, José nia maun sira hanoin karik nia sei selu fali aat ba sira. Kuandu sira koʼalia kona-ba neʼe ho José, nia “tanis” no hatete ba sira: “Keta taʼuk. Haʼu rasik sei fó ai-han ba imi no imi-nia oan.” Iha situasaun neʼe mós, José hatudu katak nia buka atu halo dame. Nia “fó kmaan no koʼalia hodi halo sira fiar”.—Gên 50:15-21.
“Hakerek duni atu hanorin ita”
18, 19. (a) Oinsá mak ezemplu sira kona-ba halo dame ajuda ita? (b) Saida mak ita sei aprende iha lisaun tuirmai?
18 Paulo hatete: “Buat neʼebé uluk hakerek tiha ona, hakerek duni atu hanorin ita, atu ho laran makaʼas iha terus no ho ksolok neʼebé mai husi Eskritura, ita bele hetan esperansa.” (Rom 15:4) Saida deʼit mak ita aprende husi Maromak Jeová nia ezemplu neʼebé diʼak liu hotu no ezemplu husi Abraão, Isaac, Jacob no José?
19 Se ita hanoin kona-ba buat hotu neʼebé Maromak Jeová halo tiha ona hodi loke dalan ba ita atu sai ninia belun, ida-neʼe sei book ita atu hakaʼas an hodi buka dame ho ema seluk, loos ka lae? Abraão, Isaac, Jacob, no José hatudu katak inan-aman bele sai ezemplu diʼak ba oan sira hodi hanorin sira atu buka dame ho ema seluk. Liután neʼe, ita mós aprende katak Maromak Jeová fó bensaun ba ema neʼebé hakaʼas an atu buka dame. Tan neʼe, Paulo hatete katak Jeová mak “Maromak dame nian”! (Lee Roma 15:33; 16:20.) Lisaun tuirmai, ita sei haree tansá mak Paulo hatete katak ita presiza buka nafatin atu halo dame no oinsá mak ita bele halo ida-neʼe.
Saida mak Ita aprende?
• Iha dalan saida deʼit mak Jacob buka dame ho Esaú kuandu sira atu hasoru malu?
• Hodi hatene kona-ba buat neʼebé Maromak Jeová halo atu hadame ho ema, oinsá mak ida-neʼe kona Ita-nia moris?
• Saida mak Ita aprende husi Abraão, Isaac, Jacob no José nia ezemplu?
[Pergunta estudu nian]
[Dezeñu iha pájina 23]
Buat importante saida mak Jacob halo atu buka dame ho Esaú?
