O Kuila Saí Muthu Uene mu Bheka o Kuiibha Kuoso?

O KABHITANGU ka masoladi ka Nações Unidas ku ixi ia Ruanda, mu ku xinganeka o ima ia iibha ia bhiti mu ixi íii ku muvu ua 1994, uambe: “Eme nga di menekena ni diabhu.” Mu kuzuela o ima ia iibha ia bhiti ué mu thembu ienioió, diiala dia mukuá uambe: “Se saí muthu uala ni phata, kuila kuene Satanaji, eze ni eme ku dikungu mua texi nzungule ia athu mu ixi ia Ruanda.” O kuila o kuiibha kuoso, Diabhu uene mu ku bheka?

Athu avulu ka xikina kuila o kuiibha kuoso kuene mu ngongo, ene mu ku bheka ku muthu ua iibha ki tu tena ku mu mona. Saí iá a banza kuila o kuiibha kuijila mukonda dia ituxi ietu i tua lundula, ni kuila o kima ki bheka o kuiibha ku mundu, o ukexilu uetu ua iibha. A mukuá amba kuila, saí kibuka kia athu jimvuama, ni athu ala ni kutena, ni kibuka kia kisangela, a tu kondoloka, ene mu suínisa o athu ku tumina o mundu. Maji saí iá amba kuila o nguvulu ia ixi iâ, ni jinguvulu ja mundu, ene ala ni kikuma ku ima ioso ia iibha, ni hadi iene mu tala.

O kuila kiene ué ki u banza? Mukonda diahi o kuiibha, o ujibhangânga, ni hadi ioso, iene mu di muanga ku mundu uoso lelu, sumbala athu a bhanga ioso phala ku i zubha? Mukonda diahi o athu ala kála ala mu njila iambata ku kalunga, mu ku dituna kuívua o itendelesu ia tambula? O kuila saí muthu uene mu bhekela o kuiibha kuoso? Mu kidi nanhi ua mu tumina o mundu? O kitambuijilu ki tena ku ku sasumukisa.