Sualna Zawng Zawng Phênah Hian Tuemaw A Awm Em?

KUM 1994 chhûnga Rwanda rama nunrâwnna râpthlâk tak a hmuh hnuah United Nations sipai pâwl hotupa chuan Diabola hmaichhana hmu ang mai niin a insawi a. Chu mi kum chuan chu rama hnam insuatna chu titâwp lo tûrin hotute lam aṭanga thupêk a dawng a ni. Chu tih laia nunrâwnna râpthlâk tak hmu vetu, mi dang pakhat pawhin: “Setana a awm lo ti in la awm cheu a nih chuan, Rwanda rama mitthi ruang phûm khâwmna hmunah hian min rawn hmu rawh u,” a ti bawk a ni. Chutiang nunrâwnna râpthlâk tak chu Diabola hnathawh a ni tak zet em?

Mi tam zâwk chuan duh rêng vânga tharum thawhna leh nunrâwnna hi hmuh theih loh thlarau thil siam sual tak hnathawh niin an ngai lo va. Mi tam tak chuan mihringte rochun sual avâng leh a chhan bul ber chu kan pianpui mahni hmasialna ṭha lo tak vâng niin an ngai a ni. Mi dang chuan khawvêla mi hausa leh thiltithei a rûka inzawm pâwlin khawvêl an awp theih nân kum sâwmbi têl chhûng mipui an chawk let vêl niin an ngai bawk. Tin, rorêl dik lohna leh hrehawm tawrhna kan hmuh zawng zawngte hi sawrkâr leh rorêltute avânga lo awm nia ngai pawh an awm bawk.

Nang eng nge i ngaih ve dân? Engvângin nge theihtâwpa tihreh tum a ni chung pawhin tûn lai khawvêlah suahsualna te, nunrâwnna te, leh hrehawm tawrhna te a tam êm êm? Engvângin nge mihringte hian vaukhânna an dawn fote laka beng an chhut ngawn tlat a, mahni intihchhiatna lam pana an kal luih tlat ni? Chûng zawng zawng phênah chuan tuemaw a awm em? Khawvêl awptu dik tak chu tu nge ni? A chhânna chu mak i ti hle mai thei a ni. (w11-E 09/01)