Na go na le yo a Bakago Bobe ka Moka?

“KE DUMEDIŠITŠE diabolo ka letsogo.” Se ke seo se boletšwego ke molaodi wa madira a Ditšhaba tše Kopanego kua Rwanda, ge a be a nagana ka go palelwa ga bona ke go kgaotša polao ya molokwanarite nageng yeo ka 1994. Ge a hlalosa ditiro tše sehlogo tše makatšago tša nakong yeo, motho yo mongwe o ile a re: “Ge e ba go sa na le yo a nago le sebete sa go latola Sathane, anke a kopane le nna lebitleng leo go lona go boloketšwego batho ba bantši kua Rwanda.” Na ruri bošoro bjoo bjo bo šiišago bo bakilwe ke Diabolo?

Batho ba bantši kudu ga ba tšee bošoro bjo bo šiišago le ditiro tše sehlogo e le tšeo di bakwago ke sebopiwa se kgopo sa moya seo se sa bonagalego. Ba bantši ba nagana gore dilo tše bjalo di bakwa ke bobe bjo ba nago le bjona ka tlhago le gore sebaki se segolo sa bobe ke maikwelo a rena a mabe a tlhago. Ba bangwe ba na le kgopolo ya gore sehlopha sa batho ba humilego le ba nago le matla, e lego sehlopha sa lefase ka bophara sa ka sephiring, se be se dutše se hlalefetša batho ka nywagasome e le gore se buše lefase. E bile go na le bao ba pharago mebušo ya ditšhaba le babuši molato bakeng sa go hloka toka ka moka le tlaišego tšeo ba di bonago.

Wena o dumela’ng? Ke ka baka la’ng bobe, ditiro tše sehlogo le tlaišego di atile gakaakaa lefaseng ka moka lehono go sa šetšwe maiteko ao a dirwago a go di thibela? Ke ka baka la’ng batho ba bonagala ba itahlela tseleng ya go ikgobatša, ba ithiba ditsebe ge ba lemošwa leboelela? Na go na le yo a bakago dilo tše ka moka? Ge e le gabotse ke mang yo a bušago lefase? Mohlomongwe o ka makatšwa ke karabo.