Okuti Kuna Umwe Ukahi Konyima Yovivi?

O MUTUMINI umwe womatolopa o Estados Unidos mo Ruanda, wati “ame nelikuatesapo neliapu,” etyi ehevilile okutalameka ovita motyilongo otyo menima 1994. Omukuavo wamona ovilwa ovio vionya wati: “Inkha umwe nkhele ketavela okuti kuna Satanasi, ambase kelangalo liapakwa ovanthu ovanyingi mo Ruanda.” Okuti onya oyo, ovilinga umwe vie Liapu?

Ovanthu ovanyingi kavetavela okuti oungangala novilwa vionya, ovilinga viondingavivi ihamoneka. Vamwe vasoka okuti ovipuka ovio vituka kouvi ukahi mokati kovanthu, nokuti oungangala utuka kouvi wetu muene. Ovakuavo vasoka okuti otyikundyi tyimwe tyovahona novatumini, vaundapela kumwe tyihamoneka ouye auho, okuhongiliya ovanthu omanima omanyingi opo vatumine ouye. Iya tupu, kuna vana vapopia okuti ovatumini ovo vekahi nokueta ovivi nononkhumbi ambuho veete.

Iya ove utavela tyi? Oityi ovivi, noungangala, noonya, nononkhumbi hono vitualelako okuliyawisa ouye auho, namphila ovanthu valinga ononkhono mbokuvimanako? Oityi ovanthu vamonekela ngoti vahanda vala okuliipaa, tyihatehelela omalondolo apitaululwa apeho? Okuti kuna ou ukahi konyima yatyiho otyo? Olie tyilityili utumina ouye? Ekumbululo liomapulo oo, lipondola okukuhuvisa.