¿Pin ñak’ariyta paqarichin?

ONU soldadokunaq jefenmi, Ruanda llaqtapi nirqan: “Saqraq munasqantan ruwaysirqani”, nispa. ¿Imaraykun chayta nirqan? 1994 watapin Ruanda llaqtapi runakuna wañuchinakusharqanku, chaytan mana hark’asqachu ONU kamachisqanta kasukuspa. Huk runan chayta rikuspa nillarqantaq: “Ruanda llaqtapi t’oqo ukhupi askha wañusqakunata rikuspa, manan pipas ninmanchu: ‘manan Saqraqa kanchu’ nispaqa”, nispa. ¿Saqrachu tanqashan chhayna millay ruwaykunaman?

Askha runakunan mana creenkuchu chay ruwaykuna millay espiritukunaq munayninman hina ruwakusqanta. Wakinmi yuyaykunku runakuna payllapaq imatapas munasqanrayku millay kawsay q’oñirisqanta. Wakintaq tumpanku qhapaq atiyniyoq runakunaman, paykunas unay watakunaña pakallapi yuyaykushanku kay pachata munaychakunankupaq. Kallankutaqmi gobiernokunaman autoridadkunaman tumpaqkunapas.

Qanri, ¿imaninkitaq chaykunamanta? ¿Imaraykutaq astawan mast’arikushan millay kawsay, wañuchinakuy, cheqninakuy, ñak’ariypas? ¿Imaraykun runakuna mana kasukuspa millaykunata ruwanku mana allinninkupaq kashaqtin? ¿Pin chayta ruwachishan? ¿Pipunitaq kay pachatari kamachishan? Qatimuqpi chay tapuykunata kutichisun.