¿Wi tiku tlawa kaʼanalh putum tuku nitlan?

LA KOMO kmakgachipalh Akgskgawini chuna wa chatum comandante tiku xpulalin soldados akxni lakapastaka pi ONU nitu la tlawalh xlakata xkamakgtayalh tiku xkamakgnimaka kRuanda kkata 1994. Achatum tiku na akxilhli akxni la kamakgnika latamanin, uma tuku lichuwinalh: «Putum tiku akxilhli niku xkamaknukan, o xkaʼakgtapukan tiku xkamakgnikan nila nawan pi nitu lama Satán». Pero ¿wa Akgskgawini xkuenta putum tuku nitlan lama?

Latamanin ni kanajlakgo pi putum tuku nitlan chu talamakgnit nema anan wa xkuenta chatum nitlan espíritu. Lhuwa lakpuwankgo pi xlakata akinin lu chuna lu nitlan likatsiyaw wa tuku matsuki putum tuku nitlan anan. Amakgapitsi limawakakgo tiku kgalhikgo lhuwa tumin chu limapakgsin nema akglhuwata kata tsekg lakkaxwilimakgolh la naʼakgchipakgo Katiyatni. Pero na wilakgolh tiku kalimawakakgo putum tuku nitlan chu tapatin pi wa xkuentakan mapakgsinanin chu tiku pulalinkgo kachikinin.

Chu wix, ¿tuku lakpuwana? ¿Tuku xlakata anan lhuwa tuku nitlan, tiku lixkajni likatsikgo, talamakgnit chu tapatin maski kamasputuputunkan? ¿Tuku xlakata latamanin, ni kuenta tlawakgo tastakyaw wata lamasputuputunkgo? ¿Wi tiku xkuenta putum tuku lama? ¿Tiku xlikana mapakgsi uma kakilhtamaku? Max lu kaks nalilakawana akxni nakatsiya xtakgalhtin.