ʼE ʼi Ai Koa He Tahi ʼAē ʼe Tupu Mai Ai Te Kovi Fuli Pē?
ʼE ʼi Ai Koa He Tahi ʼAē ʼe Tupu Mai Ai Te Kovi Fuli Pē?
“NEʼE au ʼalofa mo te Tēvolo.” Neʼe ko te ʼu palalau ʼaia neʼe fai e te kamutoa ʼo te kautau ʼo te ʼu Puleʼaga Fakatahi ʼi Rwanda, ʼi tana fakakaukauʼi tanatou mole lava fakagata ia te fakapō ʼo te lanu kātoa ʼi te fenua ʼaia, ʼaē neʼe hoko ʼi te taʼu 1994. ʼI tana talanoa ki te aga fekai fakalialia ʼi te temi ʼaia, ko te tahi tagata neʼe sio ki te ʼaluʼaga ʼaia neʼe ina ʼui fēnei: “Kapau ko he tahi ʼe ina fakafihiʼi te maʼuli moʼoni ʼo Satana, ke haʼu ʼo mā felāveʼi ʼi te koga meʼa ʼaē neʼe lī kiai pea mo tanu kiai te ʼu sino ʼo te hahaʼi ʼaē neʼe tāmateʼi ʼi Rwanda.” Ko te taʼi ʼu aga fakalialia ʼaia ʼe ko te gāue moʼoni koa ʼa te Tēvolo?
Tokolahi te hahaʼi ʼe mole natou manatu nātou ko te lahi ʼaupitō ʼo te agamālohi pea mo te aga fekai, ʼe ko te gāue ʼaia ʼo te laumālie agakovi mo fakapulipuli. ʼE manatu e te tokolahi ko te taʼi ʼu aga ʼaia ʼe ko te fua ʼo te kovi ʼaē ʼe ʼi te tagata fuli pē, pea ko te tupuʼaga tāfito ʼo te kovi ʼe ko tatatou pē ia ʼu holi ki te kovi. Ko ʼihi ʼe natou lau ʼe ko te hahaʼi koloaʼia pea mo mālolohi, ʼe natou faʼu he faʼahiga kautahi ʼe felōgoi ʼi te mālamanei ʼi hona ʼaluʼaga fakafufū, ʼaē ʼe natou takitaki te maʼuli ʼo te hahaʼi talu mai ni ʼu taʼu moʼo puleʼi te mālamanei. Pea ʼe mahino ia, ʼe ʼi ai nātou ʼaē ʼe natou tukugākoviʼi te ʼu puleʼaga pea mo te ʼu hahaʼi takitaki, ki te ʼu aga heʼe faitotonu pea mo te ʼu mamahi fuli pē ʼaē ʼe natou sisio kiai.
Koteā ʼaē ʼe kotou tui kiai? He koʼē iā ʼaho nei kua mafola ʼi te mālamanei te kovi, mo te aga fekai mo te ʼu aga fakalialia pea mo te ʼu mamahi, logolā te ʼu faiga moʼo fakagata te ʼu aga ʼaia? He koʼē ko te ʼu hahaʼi ʼe mole natou tokagaʼi te ʼu fua kovi ʼo tanatou ʼu aga pea mo hagē kā natou fakaʼauha pē ia nātou totonu? ʼE ʼi ai koa he tahi ʼaē ʼe tupu mai ai te kovi? Ko ai moʼoni koa ʼaē ʼe ina puleʼi te mālamanei? ʼE lagi kotou punamaʼuli anai ki te tali ki te ʼu fehuʼi ʼaia.