?Wan yɛ ɔ sie mɛn’n sakpasakpa ɔ?

ATRƐKPA’N, amun nin a wunman be nga be yo sa tɛtɛ’n be su kpɛnngbɛn’m be nun kun le. ?I sɔ’n kle kɛ sran sɔ’m be nunman lɛ? Sran sɔ’m be si fia kpa. Be yo i sɔ naan sran’m b’a siman kɛ be yɛ be o sa tɛtɛ’m be ɲrun ɔn. Wie liɛ bɔbɔ’n, be o bisua’n nun lɔ kpɛkun be sunman sran mun kɛ be yo sa tɛ gua su wa. Zronali’m be nun’n, be kan sa tɛtɛ kpanngban be ndɛ. Be nun nɲɔn kun yɛle drɔgi atɛ yolɛ’n annzɛ sran atɛ yolɛ’n annzɛ tekle bolɛ mɔ sran akpasua wie’m be fa be kunndɛ be sika su’n. I sɔ ndɛ’m be yo maan e wun wafa nga sran sɔ’m be aeliɛ’m be saci sran mun’n. Yɛ be yo maan e wun i wlɛ kɛ i sɔ sran akpasua’m be o lɛ sakpa, naan kusu be le be su kpɛnngbɛn mun.

Biblu’n m’ɔ ti Ɲanmiɛn nuan Ndɛ’n ɔ kle e kɛ Satan ɔ o lɛ sakpa. Ɔ kle e kɛ Satan ti kɛ sa tɛ yofuɛ’m be su kpɛn kun m’ɔ le kwlalɛ kpa’n sa. Naan kɛ ɔ ko yo naan i klun sa’n w’a kpɛn su’n, ‘ɔ yi atrɛ’ kpɛkun ɔ ‘fa sa tɛtɛ wafa’n kwlaa lakalaka’ sran mun. I kpa bɔbɔ’n, Biblu’n waan ɔ “kaci i wun kɛ anz b’ɔ kpaja’n sa.” (2 Tɛsalonikfuɛ Mun 2:9, 10; 2 Korɛntfuɛ Mun 11:14) Asa kusu’n, Satan i osu ng’ɔ yaci’n, ɔ kle kɛ ɔ o lɛ sakpa. Sanngɛ sran sunman be lafiman su kɛ aolia nun sran klunwifuɛ kpa kun o lɛ sakpa. É wá fá e ɲin é síe i mmusu’m be si Satan i su ndɛ nga Biblu’n kan’n su. Sanngɛ ka naan y’a yo sɔ’n, maan e dun mmua e kan ato ndɛ wie mɔ maan sran kpanngban be bumɛn i kɛ Satan o lɛ sakpa’n be ndɛ.

◼ “?Ngue ti yɛ Ɲanmiɛn m’ɔ ti sran klofuɛ’n kó yí mmusu’m be si Satan ɔn?” Biblu’n waan Ɲanmiɛn ti sran kpa naan fɔ nunmɛn i nun. Ɔ maan, kɛ be se kɛ ɔ yili anzi klunwifuɛ kun m’ɔ laka sran yɛ sa tɛ yolɛ’n ti i junman’n, nanwlɛ ndɛ sɔ’n ti kekle. Ng’ɔ ti nanwlɛ’n yɛle kɛ Biblu’n kanman kɛ Ɲanmiɛn yili i sɔ anzi’n. Sanngɛ ɔ kan Ɲanmiɛn i ndɛ se kɛ: “I yɛ ɔ ti kɛ yɛbuɛ sa i yɛ n talo i-ɔ, sa ng’ɔ yo be’n be ti kpa lele tra su. I atin’m be ti seiin. Ɔ ti Nyanmiɛn kun b’ɔ kaci-man, ɔ di-man ndɛ kwlɛ. Ɔ yo sa’n i nuan su sɛsɛsɛ, ɔ di nanwlɛ.”—Mmla’n 32:4; Jue Mun 5:5.

Ndɛ bɔbɔ ba’n ng’ɔ fata kɛ e bu i akunndan’n yɛ: ?Sɛ Ɲanmiɛn yi sran kun mɔ fɔ nunmɛn i nun’n, ɔ kwla yo sa tɛ? Ɲanmiɛn w’a yiman sran nin anzi mun kɛ mannzin mɔ lika nga be to i ti lɛ’n, lɛ yɛ ɔ kɔ’n sa. Sanngɛ kɛ ɔ yili be’n ɔ yoli maan be kwla fa ajalɛ nga be klo’n. Ɔ maan sran kun m’ɔ si ngwlɛlɛ mɔ fɔ nunmɛn i nun’n, ɔ kwla fa ajalɛ kɛ ɔ́ yó sa tɛ annzɛ sa kpa. Kɛ mɔ anzi nin klɔ sran nga Ɲanmiɛn yili be’n be kwla fa be klunklo ajalɛ’n i ti yɛ kɛ be yo sa kun’n, sran kun kwla se kɛ sa sɔ’n ti kpa annzɛ ɔ ti tɛ ɔ.

Ɔ maan kɛ mɔ Ɲanmiɛn mannin anzi nin klɔ sran’m be atin kɛ be fa be tiaun ajalɛ’n ti’n, sɛ be waan bé yó sa tɛ’n be kwla yo. Be tiaun ajalɛ nga be kwla fa’n, sran wie’m be fali be liɛ’n yoli sa tɛ ngunmin. Kɛ Zezi kán Satan i su ndɛ’n, ɔ yili i sɔ liɛ’n i nglo. Ɔ seli kɛ: ‘W’a kwlá tranman nanwlɛ nun’ kun. (Zan 8:44, Jésus-Christ i amanien fè) Ndɛ sɔ’n kle weiin kɛ anzi nga ɔ kacili mmusu’m be si Satan’n, i klikli nun’n fɔ nunmɛn i nun naan blɛ kun nun’n, ‘ɔ trannin nanwlɛ’n nun.’ * Ɲanmiɛn Zoova yoli maan anzi nin klɔ sran’m be kwla fa be klunklo ajalɛ. Afin ɔ klo be yɛ ɔ lafi be su.—An  nian kuku nga be flɛ i  “?Sran kun mɔ fɔ nunmɛn i nun’n ɔ kwla kaci sa tɛ yofuɛ?” m’ɔ o fluwa’n i bue 6 nun.

◼ “Mmusu’m be si Satan ti Ɲanmiɛn i sa nun sran” Sran wie’m be waan Biblu’n nun’n Zɔb fluwa’n kle sɔ. Fluwa kun waan kɛ mmusu’m be si Satan seli kɛ ‘ɔ fin asiɛ’n su lɔ wlanwlanlɛ kan’n,’ junman kunngba nga Pɛrsi nvle nun lɔ sonja nga be kpla lika’m be nian’n be dili’n, i wie yɛ ɔ dili ɔ. Kɛ be ko kɔ ko ba’n nn be su yiyi nun bé klé be famiɛn’n. (Zɔb 1:7) ?Sɛ Ɲanmiɛn yɛ ɔ sunmannin Satan kɛ ɔ ko kpla lika’n nian’n, nn ngue ti yɛ Satan kó sé Ɲanmiɛn ekun kɛ ‘ɔ fin asiɛ’n su lɔ wlanwlanlɛ kan’ ɔn? Zɔb fluwa’n nun’n, be kɛnmɛn i mlɔnmlɔn kɛ Satan ti Ɲanmiɛn i janvuɛ. Afin i dunman Satan mɔ be fa be flɛ i fluwa sɔ nun’n, i bo’n yɛle “ɲrun tanndanfuɛ.” I sɔ’n kle kɛ i yɛ ɔ ti be nga be fa be ɲin be wlawla Ɲanmiɛn’n be ti’n niɔn. (Zɔb 1:6) ?Sɛ ɔ ti sɔ’n niɔn, ɔ yo sɛ ti yɛ sran wie’m be wa buli i kɛ Ɲanmiɛn yɛ ɔ sunman Satan kɛ ɔ yo ninnge mun ɔn?

Klistfuɛ klikli’m be blɛ su bɔbɔ’n, Zuifu’m be Ɲanmiɛn fluwa nga be finman Ɲanmiɛn’n be waan mmusu’m be si Satan nin Ɲanmiɛn be ko di sran’m be wun gua naan i ti’n, Ɲanmiɛn i klun sa yɛ Satan yo ɔ. Laa sa’m be su like suanfuɛ kun mɔ be flɛ i Jeffrey Burton Russell klɛli i fluwa’n nun kɛ Martin Luther m’ɔ ti Plotɛstan’m be su kpɛn kun’n, ɔ buli i kɛ Satan ti “kɛ sɔsɔ annzɛ tokpo sa Ɲanmiɛn sa nun. Naan Ɲanmiɛn fɛ i di i fie’n nun junman.” (Mephistopheles) Russell kan gua su kɛ Satan klo sran’m be sa tɛ yolɛ kɛ nga  “tokpo’n fa klo ijre tutulɛ’n sa.” Sanngɛ i kwlaa yoli o, Ɲanmiɛn m’ɔ le tinmin’n, i sa nun yɛ tokpo’n wo ɔ. Ɔ maan Ɲanmiɛn i klun sa yɛ tokpo sɔ’n yo ɔ. I ndɛ sɔ’n, Aflansi bian nga be flɛ i Jean Calvin m’ɔ suan Ɲanmiɛn i su like’n, ɔ fali su. Sanngɛ ndɛ nga Luther kannin be’n, be loli be nga be klo sa i nuan su yolɛ’n, be nun kaka be ngasi. Be usa be wun kɛ: ?Ɲanmiɛn kun m’ɔ klo sran’n, ngue ti yɛ ɔ yaci sran’m be nun mɔ be wun ɲrɛnnɛn mɔ i kpa’n ɔ fa ɲrɛnnɛn’n yi be su ɔ? (Zak 1:13) Luther i ndɛ sɔ mun ɔ nin ɲrɛnnɛn sa nga sran’m be yoli be afuɛ 1901 nun lele fa ju 2000 nun’n, be yo maan sran be bumɛn i kɛ Ɲanmiɛn nin Satan be o lɛ sakpa.

◼ “Sa tɛ ng’ɔ o e nun’n yɛ be flɛ i Satan’n niɔn” Sɛ e se kɛ sa tɛ ng’ɔ o e nun’n yɛ be flɛ i Satan’n, Biblu’n nun ndɛ wie’m be wlɛ wunlɛ’n yó kekle. I wie yɛle ndɛ ng’ɔ o Zɔb 2:3-6 nun’n. ?Ɲanmiɛn nin wan yɛ be kokoli yalɛ’n niɔn? ?Sa tɛ ng’ɔ o Zɔbu nun’n yɛ Zoova nin i be kokoli yalɛ yɛ, annzɛ sa tɛ wie o i bɔbɔ nun yɛ ɔ nin i be kokoli yalɛ ɔ? ?Zɔbu i nzuɛn kpa’n ti’n, Ɲanmiɛn yí i ayɛ naan kasiɛn su’n, Ɲanmiɛn bɔbɔ kunngba’n w’a fa sa tɛ wie w’a sɛ i w’a nian? Sɛ e se kɛ Ɲanmiɛn i klun akunndan’n ti kɛ ngalɛ sa’n, nn e su se kɛ i klun yo wi. Sɛ ɔ ti sɔ kusu’n, be kwlá kɛnmɛn i ndɛ seman kɛ “ɔ yo-man gblɛgblɛ sa mun.” (Jue Mun 92:16) Ɲanmiɛn w’a kplinman su bɔbɔ kɛ ‘ɔ́ fɛ́ i sa kán’ Zɔbu naan ɔ́ yó i like yaya. Ɔ ti weiin kɛ nán sa tɛ ng’ɔ o e nun’n yɛ be flɛ i Satan’n niɔn. Kusu’n, nán sa tɛ wie yɛ ɔ o Ɲanmiɛn nun yɛ be flɛ i sɔ ɔ. Sanngɛ aolia nun sran kun m’ɔ kacili Ɲanmiɛn i kpɔfuɛ’n yɛ be flɛ i mmusu’m be si Satan’n niɔn.

?Wan yɛ ɔ sie mɛn’n niɔn?

Andɛ’n, sran kaka be waan lalafuɛ ndɛ yɛle kɛ be se kɛ Satan o lɛ’n. ?Sanngɛ kɛ e nian klunwi sa nga be yo be mɛn’n nun’n, sɛ nán Satan cɛ yɛ ɔ o be sin’n, nn wan ɔn? Kɛ mɔ sran’m be lafiman su kɛ mmusu’m be si Satan o lɛ sakpa’n ti’n, sran kpanngban be kacili be sin sili Ɲanmiɛn yɛ like nga ɔ timan yolɛ liɛ’n yɛ be yo ɔ.

Fluwa klɛfuɛ kun mɔ be flɛ i Charles-Pierre Baudelaire seli kɛ: “Satan i gblɛ’m be nun danfuɛ’n yɛle kɛ ɔ yo naan y’a bumɛn i kɛ ɔ o lɛ sakpa.” Kɛ mɔ Satan fia yo sa mun ti’n, ɔ ti kekle man sran kpanngban kɛ be lafi Ɲanmiɛn su. Afin sɛ mmusu’m be si Satan nunman lɛ sakpa’n, sran kpanngban bé bú i kɛ sa tɛ nga be ju sran’m be su’n, be fin Ɲanmiɛn. I sɔ’n ti’n, be kwla yaci i su lafilɛ. ?Nɛ́n i sɔ li yɛ Satan kunndɛ ɔ?

Mmusu’m be si Satan yo kɛ be nga be yo sa tɛtɛ’n be su kpɛnngbɛn mun sa. Yɛle kɛ ɔ fia yo ninnge mun naan like ng’ɔ kunndɛ’n i nuan w’a yia. ?Like benin yɛ ɔ kunndɛ ɔ? Biblu’n tɛ su kɛ: “Mɛn nga i min’n ɔ sacili [be nga be lafiman Ɲanmiɛn su’n] be akunndan’n naan Krist b’ɔ fa Nyanmiɛn’n i wafa ng’ɔ ti’n i kwlaa i jasin fɛ’n, b’a wun-mɛn i wlɛ.”—2 Korɛntfuɛ Mun 4:4.

Sanngɛ kosan cinnjin kpa kun ekun te o lɛ. Yɛle kɛ: ?Ngue yɛ Ɲanmiɛn wá fá yó gblɛfuɛ tɛ sɔ m’ɔ fia yo maan ɲrɛnnɛn’n tɔ sran’m be su’n niɔn? É wá yíyí nun ndɛ ng’ɔ́ bá lɛ’n nun.

[Ja ngua lɛ ndɛ’n]

[Ndɛ kwle, bue 5]

?Mmusu’m be si Satan ti Ɲanmiɛn i sa nun sran annzɛ ɔ ti i ɲrun tanndanfuɛ?

[Kuku/​Foto, bue 6]

 ?Sran kun mɔ fɔ nunmɛn i nun’n ɔ kwla kaci sa tɛ yofuɛ?

Kannzɛ kɛ Ɲanmiɛn yili anzi nin klɔ sran’n fɔ nunman be nun’n, sanngɛ nán like kwlaa yɛ be kwla yo ɔ. I wie yɛle Adam liɛ. Kannzɛ bɔbɔ fɔ nunmɛn i nun’n, sanngɛ ɔ fata kɛ ɔ si kɛ nán like kwlaa yɛ sɛ ɔ yo ɔ, i bo’n gúa kpa mɛ́n i ɔ. Yɛle kɛ sɛ ɔ di nnɔtiɛ annzɛ yɛbuɛ mma annzɛ waka’n, saan ɔ́ wún i ɲrun. Sɛ ɔ ti kɛ ɔ fuli kpɔlɛ nglonglo kpa kun su naan ɔ tu kpɛnnin’n, nn ɔ wuli annzɛ like yaya kpa wie yoli i.

I kunngba’n, sɛ Ɲanmiɛn yi klɔ sran annzɛ anzi kun naan fɔ nunmɛn i nun’n, ɔ kwlá seman kɛ ɔ́ yó like nga ɔ fɔn Ɲanmiɛn mmla’n kpɛkun i bó’n gúa kpa mɛ́n i. Ɔ maan kɛ klɔ sran annzɛ anzi kun faman atin nga Ɲanmiɛn mɛnnin i kɛ ɔ fɛ i klunklo ajalɛ’n ɔ yoman like ng’ɔ nin i fata’n, ɔ fɔn kpɛkun ɔ tɔ sa tɛ nun ndɛndɛ.—Bo Bolɛ 1:29; Matie 4:4.