O Cei Sara Mada e Liutaka Tiko na Vuravura?

KENA irairai ni o se sega ni sotava e dua na nodra boso na daubasulawa. Kena ibalebale beka oya ni sega ni bula dina tiko? Era matai na vunitaka na kedra itukutuku na nodra boso na daubasulawa, e rawa mada ga nira tuvanaka mai valeniveivesu na ka me caka. Ia na itukutuku e dau tabaki ena niusiveva me baleta na wainimate gaga, nodra isoqosoqo na saqamua kei ira era volitaki tamata e vakadeitaka nira bula dina tiko na nodra boso na daubasulawa era dau veivakaleqai. Eda kila kina nira bula dina tiko o ira qori ni sa vakamawe tu na nodra cakacaka ena bula ni kawatamata.

E tukuni ena Vosa ni Kalou ni bula dina tiko o Setani. Me vaka ga e dua na daubasulawa rogo, e dau vakayagataka tale ga o Setani na “ivakatakilakila lasu” kei “na ka tawadodonu” me yaco kina na nona inaki. E tukuna na iVolatabu ni “vukici koya tiko ga me agilosi ni rarama.” (2 Cesalonaika 2:9, 10; 2 Korinica 11:14) Sa vakamawe tu nikua na cakacaka ni Tevoro, e vakadeitaka qori ni bula dina tiko. Ia e dredre mera vakabauta e levu ni tiko e dua na kabula vakayalo ca. Meda raica mada eso na vakasama kei na rai cala sa takalevu tu nikua, e vakavuna na nodra sega ni vakabauta e levu ni bula dina tiko na Tevoro. Oti, eda na qai dikeva vinaka na ka e tukuna na iVolatabu me baleta na Tevoro.

◼ “E rawa vakacava vua na Kalou dauloloma me bulia na Tevoro?” E tukuna na iVolatabu ni vinaka qai uasivi na Kalou, ena rairai veicalati kina me nanumi ni a bulia e dua e dau vakavu ca. E sega ni tukuna na iVolatabu ni a bulia e dua va qori na Kalou, e kaya ga: “A Uluvatu! sa sega ni cala na nona cakacaka: Ni sa dodonu na nonai valavala kecega. A Kalou vosa dina, ka sega ni ca, sa yalododonu ka daucaka dodonu ko koya.”—Vakarua 32:4; Same 5:4.

Meda raica mada se rawa vua e dua a bulia na Kalou me uasivi me cakava na ka ca. A sega ni buli keda na Kalou meda vaka na misini, ia e solia na galala meda vakatulewa. Koya gona, na ibulibuli vuku e uasivi e rawa ni vakatulewataka me cakava na ka vinaka se na ka ca.

Ena sega ni rawa gona me solia na Kalou na galala ni vakatulewa vei ira na nona ibulibuli, qai tarovi ira mera kua ni caka ca ke ra sa vakatulewataka mera cakava oya. A vakamacalataka o Jisu na kena vakatanitaki na galala ni vakatulewa ni tukuna me baleta na Tevoro: “E sega ni dei ena dina.” (Joni 8:44) Qori e vakaraitaka ni uasivi ena gauna a buli kina qai “dei ena dina” na kabula vakayalo a qai vuki me Tevoro. * Ni lomani ira nona ibulibuli na Kalou o Jiova qai nuitaki ira, a solia kina vei ira na galala ni vakatulewa.—Raica na kato  “E Rawa ni Valavala ca e Dua na iBulibuli Uasivi?” ena tabana e 6.

◼ “E qarava na Kalou na Tevoro” Era nanuma eso ni vakamacalataki na vakasama qori ena Jope. Ni tukuni na Tevoro a “dauveilakoyaki e vuravura,” e kaya e dua na ivakamacala vakaivolatabu  ni oya e dusia na ka era dau cakava na yamata e Perisia makawa, era dau veilakoyaki mera vakauitukutuku vua na nodra tui. (Jope 1:7) Ia ke yamata dina ni Kalou na Tevoro, na cava ga me tukuna kina vua na Kalou ni a ‘tu mai vuravura qai veilakoyaki voli kina’? E sega sara ga ni tukuna na ivolatukutuku ena Jope ni Tevoro e ito ni Kalou, e vakatoka ga na Tevoro me o Setani, kena ibalebale “Dauveivorati” qai vakaraitaka ni meca nabadua ni Kalou. (Jope 1:6) E tekivu ga vakacava na vakasama ni qarava na Kalou na Tevoro?

A se tekivu sara na vakasama qori ena imatai ni senitiuri S.K. Na ivola sega ni uqeti vakalou me vaka na “Book of Jubilees” kei na “Common Rule” ni dua na lotu ribatani e Qumran, e tukuna ni Kalou e veidinadinati kei na Tevoro, ia e dau cakava ga na ka e vinakata na Kalou. Ena nona ivola na Mephistopheles, e vakamacalataka kina na daunitukutuku makawa o J. B. Russell ni nanuma o Martin Luther e dua e liutaka na tauyavu ni lotu Tawase, ni Tevoro e iyaya ni cakacaka ni Kalou, “me vaka na iqaso se iqava e vakayagataka ena nona iteitei.” E tomana o Russell ni nanuma o Luther “e marau na iqava me kauta laivi na co ca,” ia ena tiko ga ena liga kaukaua ni Kalou me vakayacora na lomana. Na ivakavuvuli qori i Luther a qai ciqoma e muri na daunicioloji mai Varanise o John Calvin, ia qori e veicalati  sara ga kei na nodra rai e levu me baleta na lewadodonu. E rawa vakacava vua na Kalou dauloloma me vakatara na ca, me vakavuna tale ga? (Jemesa 1:13) Na ivakavuvuli qori kei na veika vakadomobula e yaco ena ika20 ni senitiuri e vakavuna na nodra sega ni vakabauta e levu ni bula dina tiko na Kalou kei na Tevoro.

◼ “E Tevoro ga na ca e tiko e lomada” Ke dina qori, ena dredre me kilai eso na tikinivolatabu. Kena ivakaraitaki, o cei erau veivosaki kei na Kalou me vaka e tukuni ena Jope 2:3-6? A vosa tiko beka ina dua na ka ca e tiko e lomai Jope se a vosavosaiyalona tiko ga? Ena rawa beka ni vakacaucautaka na itovo i Jope na Kalou qai vakadonuya me vakatovolei ena ka ca e tu e lomana? E Kalou ca ke va qori na nona inaki, qai veicalati kei na kena tukuni ni “sa sega vua na caka cala.” (Same 92:15) Ia e sega ni dina qori, ni a sega ni via ‘dodoka na ligana’ na Kalou me vakamavoataki Jope. E sega gona ni Tevoro na ca e tiko e lomada se dua na ka ca e cakava na Kalou, ia e dua na kabula vakayalo a vakavuna ga vakataki koya me meca ni Kalou.

O Cei Sara Mada e Liutaka Tiko na Vuravura?

Era nanuma e levu ni sega ni veiganiti me vakabauti nikua ni bula tiko na Tevoro. Ia e sega ni bau kune e dua na ivakamacala veiganiti me vakadeitaki kina ni sega ni vakavuna tiko na ca na Tevoro. Na nodra sasaga eso me kua ni vakabauti ni bula dina tiko na Tevoro e vakavuna na nodra sega ni via qarava na Kalou e levu, ra sega tale ga ni muria na ivakatagedegede savasava.

A vola na dauniserekali ena ika19 ni senitiuri o Charles-Pierre Baudelaire “ni ilawaki levu duadua ni Tevoro, oya me saga meda kua ni vakabauta ni bula dina tiko o koya.” Na nona vunitaka na Tevoro na kena itukutuku dina e vakatitiqataki tale ga kina ni bula dina tiko na Kalou. Ke sega ni bula dina tiko na Tevoro, ena nanumi ga ni vakavuna tiko na veika ca na Kalou. Qori sara ga na ka e vinakata na Tevoro meda vakabauta.

Me vaka ga e dau cakava na nodra boso na daubasulawa, e dau vunitaka tale ga na Tevoro na kena itukutuku dina me yaco kina na nona inaki. Na cava na nona inaki? E tukuna na iVolatabu: “[E] vakamatabokotaka na nodra vakasama na kalou ni veika vakavuravura qo, me kua ni cilavi ira kina na tawavakabauta na itukutuku vinaka lagilagi me baleti Karisito, na iyaloyalo ni Kalou.”—2 Korinica 4:4.

E dua tale na taro bibi me saumi. Na cava ena cakava na Kalou vua na iliuliu e dau vunitaka na kena itukutuku dina qai vakavuna tiko na veika ca kei na rarawa? Ena veivosakitaki qori ena ulutaga e tarava.

[iVakamacala e ra]

[Tikina bibi ena tabana e 5]

E qarava na Kalou na Tevoro se dau vorati koya?

[Kato/iYaloyalo ena tabana e 6]

 E Rawa ni Valavala ca na iBulibuli Uasivi?

E vakaiyalayala ga na galala e soli vei ira na ibulibuli vuku ni Kalou, dina nira buli mera uasivi. A vinakati me doka o Atama na iyalayala e kotora vua na Dauveibuli. Kena ivakaraitaki, ke kania na qele, qereqere, se kau, ena vakaleqai koya ga. Ke vorata na lawa e vauca na idre ni vuravura qai lade mai na barinivatu, ena mate se mavoa vakaca.

Era va tale ga qori na ibulibuli uasivi ni Kalou se mani tamata se agilosi—era na sotava ga na ca ke ra beca na ka e vakatabuya na Kalou. Ena rawarawa nona sikalutu lai cala sara e dua na ibulibuli vuku ke vakatanitaka na nona galala ni vakatulewa.—Vakatekivu 1:29; Maciu 4:4.