Sin-o Gid ang Nagagahom sa Kalibutan?

KON wala ka makakita sang mga lider sang sindikato, buot bala silingon nga wala sila nagaluntad? Ang mga lider sang sindikato maayo magtago sang ila identidad ukon nagakontrol pa gani sa iban nga kriminal bisan napriso sila. Ang mga balita parte sa droga, prostitusyon, pagbaligya sa mga tawo, kag iban pa, nagapahanumdom sa aton nga makahalalit ang mga lider sang sindikato. Ang halit nga ila ginahimo sa komunidad nagapamatuod nga nagaluntad sila.

Ginapakita sang Biblia nga si Satanas isa ka matuod nga persona. Pareho sa isa ka lider sang sindikato, ginatinguhaan niya nga matuman ang iya plano paagi sa “butig nga mga tanda” kag “di-matarong nga pagpangdaya.” Ang matuod, ‘ginahimo niya ang iya kaugalingon nga anghel sang kapawa,’ siling sang Biblia. (2 Tesalonica 2:9, 10; 2 Corinto 11:14) Ang mga halit nga ginahimo sang Yawa nagapamatuod man nga nagaluntad sia. Pero ang kalabanan nga tawo wala nagapati nga may malaut nga espiritu nga persona. Antes naton usisaon ang ginasiling sang Biblia parte sa Yawa, hibaluon naton ang pila ka sala nga pagpati nga nangin rason kon ngaa madamo ang wala nagapati nga ang Yawa matuod nga persona.

▪ “Paano ang mahigugmaon nga Dios makatuga sang Yawa?” Suno sa Biblia, ang Dios maayo kag perpekto, gani daw imposible nga matuga sia sang malaut kag makahalalit nga persona. Wala nagsiling ang Biblia nga nagtuga sia sang malaut nga persona. Sa baylo, nagsiling ini parte sa Dios: “Ang Igang, ang iya binuhatan himpit; kay ang tanan niyang dalanon katarungan. Dios sang katutum kag walay kalautan, matadlong kag matarung sia.”—Deuteronomio 32:4; Salmo 5:4.

Gani, dapat naton hibaluon kon bala ang isa ka perpekto nga persona nga gintuga sang Dios makahimo sing sala. Ang mga tinuga sang Dios indi mga robot, kundi ginhatagan niya sila sing kahilwayan sa pagpili, ukon ikasarang sa paghimo sing desisyon. Gani, ang perpekto kag maalam nga mga tinuga makadesisyon sa paghimo sing maayo ukon malain. Ang matuod, ang mga buhat lamang sang maalam nga mga tinuga, tawo man ukon espiritu, nga may kahilwayan sa pagpili ang mahukman nga maayo ukon malain.

Gani, indi makatarunganon nga hatagan sang Dios ang iya mga tinuga sing kahilwayan sa pagpili kag dayon punggan niya sila sa paghimo sing malain kon gusto nila. Ginpatuhuyan ni Jesus ang sala nga paggamit sang kahilwayan sang nagsiling sia parte sa Yawa: “Wala sia magpabilin nga malig-on sa kamatuoran.” (Juan 8:44) Ginapakita sini nga ang isa nga nangin Yawa isa anay ka perpekto nga espiritu nga persona, nga “malig-on sa kamatuoran.” * Ginhatagan ni Jehova nga Dios ang iya mga tinuga sing kahilwayan sa pagpili bangod ginahigugma niya sila kag nagasalig sia sa ila.—Basaha ang kahon nga  “Mahimo Bala Madula ang Pagkaperpekto?” sa pahina 6.

 ▪ “Ang Yawa alagad sang Dios” Para sa iban, ini nga ideya makita sa tulun-an sang Job. Suno sa isa ka reperensia, ang ginasugid sang Biblia nga ang Yawa ‘naglibutlibut sa duta’ nagapatuhoy sa papel sang mga espiya nga Persianhon sang una, nga naglakbay kag nagreport sa ila hari sang ila nakita. (Job 1:7) Pero, kon ang Yawa espiya gid man sang Dios, ngaa ginpaathag pa niya sa Dios nga gikan sia sa “paglibutlibut sa duta”? Wala ginapakita sang tulun-an sang Job nga ang Yawa kakunsabo sang Dios, kundi gintawag sia nga Satanas, nga nagakahulugan “Manugpamatok.” Buot silingon, sia ang panguna nga Kaaway sang Dios. (Job 1:6) Kon amo, diin naghalin ang ideya nga ang Yawa alagad sang Dios?

Sang nahauna nga siglo C.E., ginpakita sang apokripal nga mga libro, pareho sang “Book of Jubilees” kag “Common Rule” sang sekta sa Qumran, nga ang Yawa nagapakignegosyar sa Dios kag nagapasakop sa Iya. Sa iya libro nga Mephistopheles, ang historian nga si J. B. Russell nagpaathag nga suno sa Protestante nga Repormador nga si Martin Luther, ang Yawa instrumento sang Dios, “pareho sang garab ukon sadol nga ginagamit niya sa pagkultibar sang iya hardin.” Ginapahangop sini, siling pa ni Russell, nga “ang sadol nanamian sa pagkuha sang mga hilamon,” pero nagapabilin ini sa gamhanan nga kamot sang Dios, gani ginatuman sini ang  Iya kabubut-on. Para sa madamo nga tumuluo, ang panudlo ni Luther, nga ginbaton sang ulihi sang Pranses nga teologo nga si John Calvin, indi gid makatarunganon. Daw indi mapatihan nga tugutan ukon pahanabuon sang mahigugmaon nga Dios ang kalautan. (Santiago 1:13) Bangod sini nga doktrina, lakip ang makahaladlok nga mga hitabo sang ika-20 nga siglo, madamo ang wala nagpati nga nagaluntad ang Dios kag ang Yawa.

▪ “Ang Yawa prinsipio lamang sang kalautan” Kon ang Yawa prinsipio lamang sang kalautan, ang pila ka bersikulo sa Biblia mabudlay hangpon. Halimbawa, sa Job 2:3-6, sin-o ang ginaistorya sang Dios? Nagapakighambal bala sia sa prinsipio sang kalautan nga ara kay Job, ukon nagaistorya lang sia sa iya kaugalingon? Isa pa, nagakaigo bala nga dayawon anay sang Dios ang maayo nga kinaiya ni Job kag dayon tugutan niya nga tilawan si Job sang isa ka prinsipio sang kalautan? Kon amo sina ang Dios, masiling nga malain sia kag kabaliskaran sa ginasiling sang Biblia nga “wala sing pagkadimatarung sa iya.” (Salmo 92:15) Pero indi amo sina ang Dios kay wala niya ‘gin-untay ang iya kamot’ para halitan si Job. Maathag nga ang Yawa indi prinsipio sang kalautan ukon malain nga personalidad sang Dios, kundi isa ka espiritu nga persona nga naghimo sa iya kaugalingon nga Kaaway sang Dios.

Sin-o Gid ang Nagagahom sa Kalibutan?

Para sa madamo, indi na uso ang pagpati nga nagaluntad ang Yawa. Pero sin-o pa abi ang ginhalinan sang tanan nga kalautan kon wala sang Yawa? Ang matuod, bangod sa pagpati nga wala nagaluntad ang Yawa, madamo ang nagasikway sa Dios kag sa tanan nga prinsipio sa moral.

“Ang pinakaepektibo nga daya sang yawa,” sulat sang ika-19 nga siglo nga mamalaybay nga si Charles-Pierre Baudelaire, “amo nga papatihon kita nga wala sia nagaluntad.” Bangod ginatago sang Yawa ang iya identidad, madamo ang nagaduhaduha kon bala nagaluntad ang Dios. Kon wala sang Yawa, mahimo nga ang Dios ang basulon sa tanan nga kalautan. Indi bala nga amo gid sina ang gusto sang Yawa?

Pareho sa lider sang sindikato, ginatago sang Yawa ang iya identidad para matuman ang iya plano. Ano ina nga plano? Ang Biblia nagasabat: “Ginbulag sang dios sining sistema sang mga butang ang mga hunahuna sang mga di-tumuluo, agod ang kapawa sang mahimayaon nga maayong balita tuhoy kay Cristo, nga larawan sang Dios, indi magsilak.”—2 Corinto 4:4.

May isa pa ka importante nga pamangkot. Ano ang himuon sang Dios sa sining sekreto nga ginahalinan sang tanan nga kalautan kag pag-antos? Binagbinagon ini sa masunod nga artikulo.

[Nota]

[Blurb sa pahina 5]

Ang Yawa bala alagad sang Dios ukon manugpamatok sa Dios?

[Kahon/Retrato sa pahina 6]

 Mahimo Bala Madula ang Pagkaperpekto?

Ang pagkaperpekto nga ginhatag sang Dios sa iya maalam nga mga tinuga limitado. Bisan pa gintuga si Adan nga perpekto, dapat niya hibaluon ang mga limitasyon nga ginpatuman sa iya sang iya Manunuga. Halimbawa, kon magkaon sia sang higko, bato, ukon kahoy, mahalitan gid sia. Kon maglumpat sia sa pil-as, masamaran gid sia ukon mapatay pa gani.

Sing kaanggid, kon lapason sang perpekto nga tinuga, tawo man ukon anghel, ang mga prinsipio sa moral nga ginapatuman sang Dios, mahalitan gid sia. Gani, kon gamiton sing indi eksakto sang maalam nga tinuga ang iya kahilwayan sa pagpili, madali sia makahimo sing sala.—Genesis 1:29; Mateo 4:4.