Kwestin Blong Olgeta We Oli Ridim Magasin Ya . . .

?Amagedon Hem i Wanem?

▪ Plante man, taem oli harem tok ya “Amagedon” oli tingbaot bigfala trabol we bambae i spolem olgeta samting. Maet oli tingbaot wan niuklia faet. No maet oli ting se graon bambae i seksek bigwan, wota bambae i ron bigwan, bambae ol bigfala wef oli kasem olgeta ples long wol, no sam narafala samting olsem. Long Baebol, tok ya Amagedon i no minim wan long ol samting ya. ?Hem i minim wanem?

Tok ya “Amagedon” i stap long buk blong Revelesen. Baebol i yusum tok ya blong tokbaot wan faet we i defren long ol narafala faet. Hemia “faet long bigfala Dei blong God ya we i gat olgeta paoa.” Long faet ya, “ol king blong evri ples long wol” oli faet agens long God laswan. Plante narafala vas tu oli tokbaot wan faet olsem.—Revelesen 16:14-16; Esikel 38:22, 23; Joel 3:12-14; Luk 21:34, 35; 2 Pita 3:11, 12.

?Wanem bambae i hapen long bigfala faet ya? Buk blong Revelesen i tokbaot wan vison we i eksplenem samting we bambae i hapen. Hem i talem se: “Ol king blong wol wetem ol soldia blong olgeta we oli kam wanples blong kilim man ya we i stap sidaon long hos, mo blong kilim ol soldia blong hem.” “Man ya we i stap sidaon long hos,” hemia Jisas Kraes, Pikinini blong God. God i putumap Jisas blong i lidim plante enjel, blong oli faet agensem ol enemi blong God mo oli winim olgeta. (Revelesen 19:11-16, 19-21) Jeremaea 25:33 i talemaot se ol nogud man we bambae oli lus oli plante we plante. Hem i talem se: “Ol dedbodi blong ol man ya we mi bambae mi kilim olgeta, bambae oli finisim olgeta ples long wol.”

?From wanem i mas gat Amagedon? Ol neson oli no wantem save long hae rul blong God. Oli wantem leftemap olgeta nomo. (Ol Sam 24:1) Ol Sam 2:2 i tokbaot fasin blong olgeta blong agensem God, i se: “Ol king blong olgeta oli girap, oli putum wan tok we i agens long Hae God, mo i agens long king ya tu we hem i makemaot hem i putumap hem blong mekem wok blong hem.”

Olgeta ya we oli rebel agensem God oli olsem ol man we oli go stap long graon blong narafala man, nao oli no wantem muvaot long graon ya. Oli tekem graon ya i blong olgeta. Be i no hemia nomo. Oli spolem graon ya tu. Ol neson tede oli stap spolem wol ya mo oli sakem doti long win mo solwota. Tok blong God i talemaot trabol ya, i se: “Ol man we oli no save yu oli kros tumas, be naoia i taem blong yu yu kros long olgeta.” Ale bambae God i “spolem ol man ya we oli stap spolem wol.” (Revelesen 11:18) God i mekem desisen se bambae hem i yusum faet ya blong Amagedon, blong stretem problem long saed blong hu i gat raet blong rulum ol man.—Ol Sam 83:18.

?Amagedon bambae i kamtru wetaem? Pikinini blong God i talemaot klia se: “Dei blong samting ya, mo taem blong hem, i no gat man i save. Ol enjel blong heven, mo mi tu we mi Pikinini blong God, be mifala i no save. Papa blong mi, hem nomo i save.” (Matiu 24:36) Be Jisas Kraes, King ya we i Go blong Faet, i givim woning long saed blong Amagedon se: “Yufala i lesin. Bambae mi mi kamtru long yufala olsem we man blong stil i kam. Man we i stap lukaot gud, . . . bambae hem i save harem gud.” (Revelesen 16:15) Taswe, faet ya we i kasem olgeta ples long wol, bambae i kamtru long taem ya we Kraes i stap rul olsem King. Ol profet tok blong Baebol oli soemaot se Jisas i stap rul finis.

Ol man we oli gohed blong mekem nogud fasin bambae oli lus long Amagedon. Be “wan bigfala hip blong ol man” bambae i sef. (Revelesen 7:9-14) Bambae oli luk ol tok ya i kamtru se: “Bambae i no longtaem, ol man nogud oli lus. Bambae yu save lukaot olgeta, be bambae yu no save faenem olgeta. Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.”—Ol Sam 37:10, 11.

[Tok blong makem poen long pej 20]

“Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting”