Mme Andikot N̄wed Nnyịn Ẹbụp Ẹte . . .

Nso idi Armageddon?

▪ Ke ini ediwak owo ẹkopde ikọ oro “Armageddon,” mmọ ẹsikere ke enye edi ekọn̄ nuclear, oro edi, ekọn̄ emi ẹdade ata okop-odudu bọmb ẹsobo kpukpru n̄kpọ, mîdịghe ẹkere ke enye ada aban̄a ikpọ unyekisọn̄ ye mme oto-obot afanikọn̄ eken, m̀mê idem ọkpọsọn̄ ufiop emi ẹkemede ndiwot kpukpru owo. Edi idịghe se Bible okotde Armageddon edi oro. Bible ọdọhọ ke Armageddon edi nso?

Ikọ oro “Armageddon,” (“Har–Magedon”) odu ke n̄wed Ediyarade. Enye edi ata san̄asan̄a ekọn̄, kpa “ekọn̄ akwa usen Abasi Ata Ọkpọsọn̄,” emi ẹtan̄de “ndidem ofụri isọn̄” ẹbok man ẹn̄wana ye Abasi. Enyene mme itie N̄wed Abasi en̄wen emi ẹtịn̄de n̄kpọ ẹban̄a ekọn̄ emi.—Ediyarade 16:14-16; Ezekiel 38:22, 23; Joel 3:12-14; Luke 21:34, 35; 2 Peter 3:11, 12.

Ekọn̄ emi editie didie? N̄wed Ediyarade etịn̄ ke ndamban̄a usụn̄ nte ekọn̄ emi editiede. Enye ọdọhọ ete: “Ndidem isọn̄ ye udịmekọn̄ mmọ [ẹsop] idem ọtọkiet ẹte in̄wana ekọn̄ ye andidoro ke edem enan̄-mbakara ye udịmekọn̄ esie.” “Andidoro ke edem enan̄-mbakara” emi edi Jesus Christ Eyen Abasi emi Abasi emekde ete asan̄a ye ata ediwak angel okosobo mme asua imọ. (Ediyarade 19:11-16, 19-21) Jeremiah 25:33 etịn̄ nte ke ẹyewot mbon emi mîbakke Abasi ọkwọkudịm. Enye ọdọhọ ete: “Mmọ eke Jehovah ediwotde ke usen oro ẹyetọn̄ọ ke utịt isọn̄ kiet ẹna ẹsịm utịt isọn̄ eken.”

Ufọn ekọn̄ Armageddon? Mme owo ẹdọhọ ke mmimọ inyene unen ndikara ererimbot, idịghe Abasi. (Psalm 24:1) Psalm 2:2 owụt nte mmọ ẹsọn̄de ibuot ye Abasi, ete: “Ndidem isọn̄ ẹdaha ẹda, ikpọ owo ẹnyụn̄ ẹsop idem ọtọkiet nte owo kiet ndibiọn̄ọ Jehovah ye enye emi enye eyetde aran.”

Mmọ ẹnyụn̄ ẹtie nte mbon ntịme emi ẹdụn̄de ke ufọk owo, edi ẹdọhọ ke mmimọ ikam inyene ufọk oro, ẹnyụn̄ ẹbiat ufọk oro. Mme owo ẹnen̄ede ẹbiat isọn̄ emi. N̄wed Abasi ama etetịn̄ ke n̄kpọ editie ntem, ete: “Mme idụt ẹkeyat esịt, ndien iyatesịt [Abasi] ama edi.” Abasi oyosobo “mbon oro ẹbiatde isọn̄.” (Ediyarade 11:18) Armageddon ke Abasi edida ebiere m̀mê anie enyene unen ndikara ubonowo.—Psalm 83:18.

Ini ewe ke ẹdin̄wana ekọn̄ Armageddon emi? Eyen Abasi ama etịn̄ ata nnennen nnennen ete: “Baba owo kiet ifiọkke usen ye hour oro, mme angel ke heaven ifiọkke, Eyen inyụn̄ ifiọkke, ke mîbọhọke Ete ikpọn̄.” (Matthew 24:36) Jesus Christ emi edide Edidem-An̄wanaekọn̄ ama ọnọ ikọt Abasi item ke ini enye eketịn̄de n̄kpọ aban̄a ekọn̄ emi, ete: “Sese! Ami mmọn̄ ndi nte inọ. Owo emi atabade idap . . . okop inemesịt.” (Ediyarade 16:15) Ntre, ekọn̄ ofụri ererimbot emi enyene n̄kpọ ndinam ye ukara Christ emi edide mme ntịn̄nnịm ikọ Bible ẹwụt ke ama ọtọtọn̄ọ ke heaven.

Sụk ndiọi owo emi mînyịmeke ndikpụhọde ke ẹdisobo ke Armageddon, ndien “akwa otuowo” ẹyebọhọ. (Ediyarade 7:9-14) Mmọ ẹyekụt nte Psalm 37:10, 11 edisude. Itien̄wed oro ọdọhọ ete: “Ayak esisịt, idiọkowo ididụhe aba; afo oyonyụn̄ etịn̄ enyịn ke ebiet esie, ndien enye ididụhe. Edi mbon nsụkidem ẹyeda isọn̄ ẹnyene, ediwak emem oyonyụn̄ adat mmọ esịt.”

[Se ẹwetde ke ikpọ abisi ke page 10]

“Mbon nsụkidem ẹyeda isọn̄ ẹnyene, ediwak emem oyonyụn̄ adat mmọ esịt”