Kanbiọ Wehiatọ Mítọn lẹ Tọn

Etẹwẹ Amagẹdọni zẹẹmẹdo?

▪ Na mẹsusu, hogbe lọ “Amagẹdọni” zẹẹmẹdo nujijọ delẹ he na hẹn vasudo pligidi wá taidi awhàn nuzanusẹvaun tọn, nugbajẹmẹji jọwamọ tọn he gbloada taun lẹ, kavi nugbajẹmẹji lẹdo tọn he yozò hihla aigba tọn nọ hẹnwa. To Biblu mẹ, hogbe ehe ma zẹẹmẹdo depope to onú ehelẹ mẹ. To whelọnu lo, etẹwẹ Amagẹdọni zẹẹmẹdo sọgbe hẹ Biblu?

Owe Osọhia tọn mẹ wẹ hogbe lọ “Amagẹdọni” sọawuhia te to Biblu mẹ. E nọ dlẹnalọdo awhàn vonọtaun de, “awhàn azán daho Jiwheyẹwhe Ganhunupotọ lọ tọn,” ehe mẹ “ahọlu aigba fininọ lẹpo tọn lẹ” pli dopọ nado funawhàn godo tọn de sọta Jiwheyẹwhe te. Wefọ susu devo lẹ sọ dlẹnalọdo awhàn mọnkọtọn.—Osọhia 16:14-16; Ezekiẹli 38:22, 23; Joẹli 3:12-14; Luku 21:34, 35; 2 Pita 3:11, 12.

Etẹwẹ awhàn ehe na bẹhẹn? Owe Osọhia tọn yí hogbe yẹhiadonu tọn lẹ zan dọmọ: “Ahọlu aigba ji tọn lẹ . . . gọna awhànpa yetọn lẹ pli dopọ nado funawhàn hẹ omẹ lọ he sinai to osọ́ ji podọ hẹ awhànpa etọn.” Mẹhe “sinai to osọ́ ji” lọ wẹ Visunnu Jiwheyẹwhe tọn, Jesu Klisti, he yin dide gbọn Jiwheyẹwhe dali nado deanana awhànpa angẹli lẹ tọn bo gbawhàn kẹntọ Jiwheyẹwhe tọn lẹ tọn. (Osọhia 19:11-16, 19-21) Jelemia 25:33 do obá he mẹ vasudo gbẹtọ jijọ-madi-Jiwheyẹwhe lẹ tọn ehe na gbloada jẹ hia dọmọ: “Alántọṣiọ OKLUNỌ tọn lẹ na tin to azán enẹ gbè sọn opodo de aigba lọ tọn yèdọ jẹ opodo awetọ aigba lọ tọn.”

Naegbọn Amagẹdọni dona wá dandan? Akọta lẹ gbẹ́ nado kẹalọyi nupojipetọ-yinyin Jiwheyẹwhe tọn, ṣigba bo nọ to yetọn titi zedaga. (Psalm 24:1) Nukundiọsọmẹ yetọn yin zẹẹmẹ basina to Psalm 2:2 mẹ dọmọ: “Ahọlu aigba tọn lẹ ṣite, ogán lẹ sọ to núbla do OKLUNỌ go, podọ do mẹyiamisisadode etọn go.”

Na nugbo tọn, atẹṣitọ ehelẹ taidi mẹhe wá ṣí aigba mẹdevo tọn ji ma biọgbè, ṣigba bo nọ sọalọakọ́n dọ aigba emitọn wẹ bo nọ ṣì i zan bosọ nọ hẹn ẹn gble. Mọdopolọ to egbehe, akọta lẹ to aigba lọ husudo bosọ to lẹdo etọn hẹnflu. Ohó Jiwheyẹwhe tọn dọ dọdai gando ninọmẹ ylankan ehe go dọmọ: “Homẹgble akọta lẹ, homẹgble [Jiwheyẹwhe tọn] sọ wá.” Enẹwutu, Jiwheyẹwhe na “husudo mẹhe to aigba husudo lẹ.” (Osọhia 11:18) Amagẹdọni wẹ Jiwheyẹwhe na yizan nado didẹ whẹho he fọndote gando mẹhe tindo jlọjẹ nado dugán do gbẹtọvi lẹpo ji go.—Psalm 83:18.

Whetẹnu wẹ Amagẹdọni na wá? Visunnu Jiwheyẹwhe tọn dọ hezeheze dọmọ: “Na nuhe dù azán enẹ po gànmẹ lọ po, mẹdepope ma yọnẹn, etlẹ yin angẹli olọn tọn lẹ kavi Visunnu lọ lọsu, adavo Otọ́ lọ kẹdẹ.” (Matiu 24:36) Etomọṣo, to whenue Jesu Klisti, Ahọlu-Awhànfuntọ lọ to hodọ gando Amagẹdọni go, e yí avase ehe dogọ dọmọ: “Pọ́n! Yẹn ja taidi ajotọ de. Ayajẹnọ wẹ omẹ lọ he gbọṣi nukle.” (Osọhia 16:15) Enẹwutu, awhàn lẹdo aihọn pé ehe tindo kanṣiṣa hẹ tintin tofi Klisti tọn, ehe dọdai Biblu tọn lẹ dohia dọ e ko wá aimẹ.

Amagẹdọni na và mẹylankan he ma jlo na diọ lẹ sudo, podọ “gbẹtọ susugege de” na luntọ́n. (Osọhia 7:9-14) Yé na mọ hẹndi dọdai ehe tọn dọmọ: “Na whenu pẹẹde, mẹylankan lẹ ma na tin ba: nugbo, hiẹ na yí sọwhiwhe do lẹn otẹn etọn pọ́n, e ma nasọ tin. Ṣigba homẹmiọnnọ lẹ na dugu aigba tọn; yé na hẹn homẹhun yede to jijọho susu mẹ.”—Psalm 37:10, 11.

[Nudọnamẹ tangan lẹ to weda 32]

“Homẹmiọnnọ lẹ na dugu aigba tọn; yé na hẹn homẹhun yede to jijọho susu mẹ”