Leeqkuna tapukuyanqan

¿Imataq Armagedón?

▪ Pï më nunakunam Armagedón palabrata wiyarqa pensayan hinantin Patsa ushakänampaq kaqta: nunakuna rurayanqan armakunawan kar, hatun desgraciakunawan kar o alläpa achachëwan karpis. Pero Bibliaqa manam tsënö kanqantatsu nin. Tsëqa, ¿imapaqtaq Biblia parlan Armagedón nirqa?

Armagedón (o Har-magedón) nishqan shutiqa Apocalipsis o Revelación nishqan librochömi yurin. Tsë shutiwanqa parlëkan huk hatun guërrapaqmi, “Llapan Pwedeq Dyospa jatun junaqni[mpaq]”, y tsë hunaqqa “patsachow llapan reykunaman” ëllukäyanqa tsë kutillana Diospa contran peleayänampaq. Hina tsë guërrapaqqa, Bibliapa huk textonkunachöpis parlanmi (Apocalipsis 16:14-16, QKW; Ezequiel 38:22, 23; Joel 3:12-14; Lucas 21:34, 35; 2 Pedru 3:11, 12).

¿Imanöraq tsë guerra qallanqa? Apocalipsis librom willakun huk igualatsikïwan, kënömi nin: “Ricarerqä llutepa soldaduncunawan patsacho llapan reycuna [...] shëcayaqta[m]. Pecunam listu quecayarqan tse yulaq cawallun montashqawan, y peta qatir shamicaqcunawan pelyayänanpaq”. ¿Pitaq tsë “cawallun montashqa[qa]”? Chikeqninkunata ushakätsinanrëkur ángel tröpakunata pushanampaq Dios akranqan Tsurin Jesucristum (Apocalipsis 19:11-16, 19-21). Tsë guërrachöqa Diosta mana wiyakuyanqanrëkurmi mëtsika nunakuna ushakäyanqa, tsëmi Jeremías 25:33 texto kënö nin: “Tsë hunaq Jehová wanutsinqan nunakunaqa kayanqa patsapa huk kuchumpita hasta huknin kuchunyaqmi”.

¿Imanirtaq precisan Armagedón kanan? Ciëlochö y Patsachöpis Dioslla autoridadyoq kanqanta mana kaqpaq churar hinantin nacionkuna puëdeqtukuyaptinmi (Salmo 24:1). Salmo 2:2 textochömi willakun Diosta imanö qallapäyanqanta, kënömi nin: “Patsapa reyninkunam sharkuyashqa, y precisaq mandakoqkunam huknölla ëllukäyashqa Jehoväpa y akrashqampa contran”.

Kë mana wiyakoq nacionkunaqa, imëka huk nacionchö documentonnaq täraq nunakuna imatapis mana pëkunapa kaqta dueñotukurkur, lluta utilizar ushakätseqnömi kayan. Patsatam ushakëkätsiyan y imëka kaqkunatam rakchatëkäyan. ¿Tsënöllatsuraq imëyaqpis kanqa? Manam, Bibliaqa kënömi nin: “Llapan naciuncunapis piñashgam cayargan. Pero rabiayniquiwan castiganayquipag junag chamushganam”. Awmi, kikin Jehovämi “cay munduta mana allita rurarnin ushacätsigcunata, ushacatsin[ga]” (Apocalipsis 11:18, NTCN). Y Armagedontam Diosqa utilizanqa llapan nunakunata gobernanampaq pëlla derëchoyoq kanqanta rikätsikunampaq (Salmo 83:18).

¿Imëraq tsë guerra qallëkamunqa? “Ime öra o ime junaq cumplicänanpaq caqtaqa manam pipis musyayantsu, ni sielucho quecaq anjelcunapis, ni noqa Diospa tsurinpis, sinoqa quiquin Dios Yayallam musyan” nirqanmi Jesus (Mateo 24:36). Pero tsëpita tiempowanqa, tsë guërrachö Jesus reynö peleanampaq kaptinmi kënö nirqan: “Mäcoq mäcoq quecayë, porqui noqaqa shamushaq derepentitam imeca suwanopis. ¡Cushicuyätsun allita rurar mäcoq mäcoq shuyecayamaqcuna!” (Apocalipsis 16:15). Kë ninqanmi rikätsikun Armagedonqa Cristu gobernanqan witsanchö kanampaq kaqta, y Biblia willakunqankunata alli estudiarqa rikantsik tsë witsankunachöna kawëkanqantsiktam.

Armagedón guërrachöqa hutsankunapita mana wanakoqkunallam wanuyanqa, pero “mana yupetapis puedipaq, mantsaquepaq alli shuyni nunacuna[m]” salvakuyanqa (Apocalipsis 7:9-14). Tsë guërrata kawëkar pasaqkunaqa kushishqam rikäyanqa Biblia kënö ninqan cumplikaqta: “Ichik tiempollachönam mana allita ruraqkunaqa kayanqanatsu, mëchö këkäyanqanta ashirpis manam tarinkinatsu. Pero manshukunapaqmi patsaqa kanqa, y tsëchömi yamë këta tarirnin kushishqa kawakuyanqa” (Salmo 37:10, 11).

[32 kaq päginachö ninqan]

“Manshukunapaqmi patsaqa kanqa, y tsëchömi yamë këta tarirnin kushishqa kawakuyanqa”