Ua Fesili Mai le ʻAufaitau . . .

O le ā le uiga o Amaketo?

▪ E taʻu loa le upu “Amaketo,” e manatu le toʻatele i se faaumatiaga mataʻutia—taua faaniukilia, mala faalenatura mataʻutia, po o se “Amaketo e māfua mai i mea o le siʻosiʻomaga,” lea e amata i le faateteleina o le vevela o le lalolagi. Ae i le Tusi Paia, e lē o faamatalaina ai faapea lea upu. O le ā tonu la le uiga o Amaketo o loo taʻua i le Tusi Paia?

O loo iai le upu “Amaketo” i le tusi o le Tusi Paia o Faaaliga. E faasino atu i se taua e tutasi, “le taua o le aso tele o le Atua o Lē e ona le malosi uma lava,” lea e faapotopoto uma ai “tupu o le lalolagi uma,” mo le taua mulimuli ma le Atua. E tele foʻi isi mau i le Tusi Paia o loo iai ni faamatalaga e faasino atu i lenā taua.—Faaaliga 16:14-16; Esekielu 38:22, 23; Ioelu 3:12-14; Luka 21:34, 35; 2 Peteru 3:11, 12.

O ā mea o le a tutupu i lea taua? I se gagana faafaatusa, o loo faamatalaina i le tusi o Faaaliga: “[O] tupu o le lalolagi ma a latou ʻautau, ua faapotopoto e siitaua atu i lē o loo tiʻetiʻe i le solofanua ma lana ʻautau.” O “lē o loo tiʻetiʻe i le solofanua” o le Alo o le Atua, o Iesu Keriso, o lē na tofia e le Atua e taʻitaʻia le ʻautau tele o agelu malolosi i le manumalo i fili o le Atua. (Faaaliga 19:11-16, 19-21) Ua faaalia mai i le Ieremia 25:33 le faaumatiaga atoatoa o ē e amioleaga: “O i latou e fasia e Ieova i lea aso, e amata mai lava i le tasi pito o le lalolagi e oo atu i le isi pito o le lalolagi.”

Pe e talafeagai le oo mai o le taua o Amaketo? O loo faamamaluina e atunuu i latou lava, ae teena le pule silisili a le Atua. (Salamo 24:1) O loo faamatalaina i le Salamo 2:2 lo latou faauamaaa e faapea: “Ua tutū faatasi tupu o le lalolagi, ma ua taupulepule faatasi alii sili, e faasagatau iā Ieova ma lē na ia faauuina.”

Ua pei nei tagata fouvale o ē e nonofo i fanua o isi e aunoa ma se faatagaga, ae e latou te faaaogāsesēina ma faaleagaina foʻi. I aso nei, o loo faaleagaina e atunuu le lalolagi ma le siʻosiʻomaga. Na valoia i le Afioga a le Atua lea tulaga leaga e faapea: ʻUa ita foʻi nuu, ma ua oo mai ai le toʻasā o le Atua.’ Ona ʻfaafanoina ai lea o i latou o loo faaleagaina le laueleele’ e le Atua. (Faaaliga 11:18) O le taua o Amaketo o le auala lea ua faatagaina e le Atua, ina ia foʻia ai le finauga po o ai e iai le aiā e pulea tagata uma.—Salamo 83:18.

O afea e oo mai ai le taua o Amaketo? Na taʻua manino e le Alo o le Atua: “A o lea aso ma lea itula e lē iloa e se tasi, e oo lava i agelu i le lagi po o le Atalii, ua na o le Tamā lava.” (Mataio 24:36) E ui i lea, ae na lapataʻi mai foʻi Iesu Keriso le Tupu Toa, e tusa ai o le taua o Amaketo e faapea: “Faauta! ou te alu atu e pei o se gaoi. E fiafia o lē e mataala.” (Faaaliga 16:15) O lea la, e iai le fesootaʻiga o lenei taua i le lalolagi aoao ma le faatasi mai o Keriso, lea e pei ona faaalia mai i valoaga o le Tusi Paia ua faataunuuina i aso nei.

E na o ē e amioleaga ma e lē salamō o le a faaumatia i le taua o Amaketo, ae o le a faasaoina “se motu o tagata e toʻatele.” (Faaaliga 7:9-14) O le a latou vaaia le faataunuuga o nei upu: “Ua toeitiiti lava ona lē toe iai lea o le tagata amioleaga; e te mafaufau foʻi i le mea sa iai o ia, a ua leai lava. A o ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu.”—Salamo 37:10, 11.

[Ata i le itulau 10]

“O ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu”