Leisiman e aksi . . .

San na Armagedon?

▪ Furu sma di e yere a wortu „Armagedon” e prakseri wan bigi pori di o kon na heri grontapu. Iya, den e prakseri a feti di sma o feti nanga ogri-ati fetisani, bigi rampu di o kon soleki gronseki noso bigi frudu, noso rampu srefi di o pasa fu di grontapu e kon faya moro nanga moro. A wortu disi di skrifi na ini Bijbel, no abi fu du nanga nowan fu den sani dati. Ma san na a Armagedon di Bijbel e taki fu en?

A wortu „Armagedon” („Har–Magedon”), skrifi na ini a Bijbel buku Openbaring. A abi fu du nanga wan feti di no o de leki nowan trawan èn „a feti [dati] na a bigi dei fu Gado na Almaktiwan”. Na a ten dati, „ala den kownu na heri grontapu” o kon na wán gi a lasti feti nanga Gado. Furu tra tekst na ini Bijbel e taki tu fu a feti dati.​—Openbaring 16:14-16; Esekièl 38:22, 23; Yoèl 3:12-14; Lukas 21:34, 35; 2 Petrus 3:11, 12.

San o pasa na a feti disi? Na wan agersi fasi, a buku Openbaring e taki: ’Den kownu fu grontapu, nanga den legre fu den ben kon makandra fu feti nanga a sma di ben e sidon na tapu na asi èn nanga a legre fu en.’ A „sma di ben e sidon na tapu na asi” na Gado en Manpikin, Yesus Krestes. Gado poti en leki fesiman fu den legre fu den engel, fu wini den feanti fu Gado (Openbaring 19:11-16, 19-21). Yeremia 25:33 e sori omeni sma o kisi pori fu di den no wani gi yesi na Gado. A e taki: „Den dedeskin fu den sma di Yehovah kiri na a dei dati o panya fu a wan sei fu grontapu te na a tra sei.”

Fu san ede Armagedon musu kon? Den sma fu grontapu e weigri fu si Gado leki a Moro Hei Tiriman, na presi fu dati den wani tiri densrefi (Psalm 24:1). Psalm 2:2 e sori fa den sma disi tranga-ede: „Den kownu fu grontapu na gensman èn den heihei man kon makandra leki wán man fu gens Yehovah nanga en salfuwan.”

Fu taki en leti, den sma disi de leki tranga-ede sma di go libi na wan presi di no de fu den. Boiti dati, den no e sorgu bun gi a presi èn den e pori en. Den sma na ini a ten disi e pori grontapu èn den e doti en. Gado Wortu ben taki na fesi taki a sari sani dati ben o pasa. A ben taki: „Ma den kondre kisi bigi atibron èn [Gado] srefi kisi atibron.” Dan Gado ben o „pori den wan di e pori grontapu” (Openbaring 11:18). Nanga yepi fu Armagedon, Gado o tyari kon na krin suma abi a reti fu tiri a heri libisma famiri.​—Psalm 83:18.

O ten Armagedon o kon? Gado Manpikin ben taki krin: „Nowan sma sabi a dei nanga a yuru dati. Iya, srefi den engel fu hemel nanga a Manpikin no sabi, ma soso a Tata sabi” (Mateyus 24:36). Toku a Fetiman-Kownu Yesus Krestes ben gi sma a warskow disi: „Luku bun! Mi o kon leki wan fufuruman. Koloku fu a sma di tan na ai” (Openbaring 16:15). Sobun, a bigi feti disi abi fu du nanga a ten te Krestes o kon èn a ten disi di Bijbel profeititori e taki fu en, doro kaba.

Armagedon o pori soso den ogriwan di e weigri fu kenki den fasi fu den, ma „wan bigi ipi sma” o pasa a feti dati libilibi (Openbaring 7:9-14). Den o si a kontru fu den wortu disi: „Ete wan syatu pisi ten èn den ogriwan no sa de moro. Yu o luku pe den ben de fosi, ma den no sa de moro. Ma den safri-ati sma o kisi grontapu èn den o prisiri srefisrefi, fu di freide o de pasa marki.”​—Psalm 37:10, 11.

[Prenspari pisi na tapu bladzijde 10]

„Den safri-ati sma o kisi grontapu èn den o prisiri srefisrefi, fu di freide o de pasa marki”