Mpin U Mbaôron Takerada Ne . . .

Armagedon Kanyi?

▪ Ior kpishi ka vea ungwa ishember i “Armagedon” la yô, ve yem henen kwagh u mtim u una wua ior kpishi yô; ka ve hen ér mtim ne una lu ityav mbi a nôngo sha tar sha ubom mba bughur wuan ior kpishi shin uaahe mba vesen mba sha gbaaôndo, gayô mtsee u tar u lu tseen kpishi ne, una na yô, tar cii ua hia. Kpa gbenda u i er kwagh u ishember ne ken Bibilo la zua sha mhen ne môm tsô kpaa ga. Nahan yô, Armagedon u Bibilo i er kwagh na la kanyi?

Ishemberti i “Armagedon” shin “Har-Magedon” la, due ken Bibilo ken takerada u Mpase. Ka ityav mbi hemban cii, “ityav mbi iyange i vesen i Aôndo, Uhembanagee” mbi a kohol “utor mba sha tar sha won cii” sha u nôngon ityav mbi masetyô a Aôndo yô. Avur agen ken Ruamabera kpishi kpa ter kwagh u imba uitya la.—Mpase16:14-16; Esekiel 38:22, 23; Yoel 3:12-14; Luka 21:34, 35; 2 Peteru 3:11, 12.

Kanyi ia due ken ityav mbini? Takerada u Mpase ôr se kwagh ne sha injakwagh ér: “Utor mba shin tar man akumautya a ve, ve kohol sha u nôngon ityav a Un u A tem sha nyinya la man shi akumautya a Na” la. Un u a “tem sha nyinya” la ka wan u Aôndo, Yesu Kristu, un u Aôndo a ver un ér a̱ hemen akumautya a mbatyomov mba shaav u hemban mbaihyomov mba Aôndo la. (Mpase19:11-16, 19-21) Yeremia 25:33 pase er a tim mba civir Aôndo ga mbara kpishi yô, ér: “Mba TER A woo ve la, vea lu hen inya, á hii sha ikighirtar ngin zan zan á za ar ikighirtar ngira”

Er nan ve ityav mbi Armagedon mbira mbi lu hange hangee? Akuraior venda hemen u Aôndo, gema mba yôôn u ve. (Pasalmi 24:1) Pasalmi 2:2 pase kwagh u mhendan ve la ér: “Utor mba sha won ve mough ahendan, mbatarev kpaa ve zua sha u henen akaa a num sha TER man Un u TER A ver Un tor la.”

Inja na yô, mbahembanato mban mba er ior mba ve za tem hen ijiir i i lu i ve ga, ve ngohol i, i hingir i ve, tseegh ga, shi ve lu nzughul a i, vihin i kera kpaa yô. Akuraior nga vihin tar nyian shi nzughul a uharegh mba sha tar kpaa. Mkaanem ma Aôndo tsengaôron imba mvihi u tar ne ér: “Akuraior yuwe kpa iyugh You [i Aôndo] gema va.” Aôndo maa una “tim mba ve lu vihin tar la.” (Mpase 11:18) Armagedon ka gbenda u Aôndo a ver sha u sôron ikyaa i or u nan kom u hemen uumace sha won cii la yô.—Pasalmi 83:18.

Ka hanma shighe a nôngo ityav mbi Armagedon laa? Wan u Aôndo pase wang ér: “Kpa kwagh u iyange la man shighe la yô, ma or fa ga, shin mbatyomov mba Shaav shin Wan kpaa ga, saa Ter tseegh.” (Mateu 24:36) Shin er ma or nan fe iyange la ga nahan kpa, shighe u Kurutya Yesu Kristu u a lu Tor la, lu ôron kwagh u Armagedon la, a seer icintan ne ér: “Nenge, M ngu van er ormbaiv nahan. Or u nan lu per . . . yô, i saan nan iyol.” (Mpase 16:15) Sha nahan yô, ityav mbi tar cii ne gba bende sha kwagh u m-ande u Kristu, man akaaôron a profeti a Bibilo tese ér Kristu ande hegen.

Armagedon una tim mbaaferev mba ve vende u geman asema mbara tseegh, gadia “zegeikpelaior” ia war Armagedon. (Mpase 7:9-14) Vea nenge er mkaanem man ma a kure yô, ma kaa ér: “Gadia shi côhin tsô iferor á kera lu ga; mimi je, ú nenge sha ijiir i nan, nan nan kpaa, kpa nana lu ga. Kpa mbaasemaleghlegh yô, vea ya dyako u tar, á saan ve iyol sha mngee u bem.”—Pasalmi 37:10, 11.

[Mkaanem ma sha peeji 32]

“Mbaasemaleghlegh yô, vea ya dyako u tar, á saan ve iyol sha mngee u bem”