Ol Man i Askim . . .

Armagedon i Makim Wanem Samting?

▪ Planti man, taim ol i harim dispela tok “Armagedon,” ol i tingim wanpela bikpela bagarap tru​—⁠olsem nuklia woa, bikpela guria o saiklon samting, o graun i kamap hat moa na dispela bai kamapim bikpela bagarap long envairomen. Tasol long Baibel dispela tok Armagedon i no makim wanpela bilong ol dispela samting, nogat. Olsem na long Baibel dispela tok Armagedon i makim wanem samting?

Dispela tok “Armagedon” i stap long Buk Revelesen. Em i makim wanpela narakain pait, em “pait long dispela bikpela de bilong God i Gat Olgeta Strong,” na long dispela taim “ol king bilong olgeta hap graun” bai bung long mekim dispela laspela pait wantaim God. I gat sampela skripsa moa long Baibel i stori long dispela pait.​—⁠Revelesen 16:​14-16; Esekiel 38:​22, 23; Joel 3:​12-14; Luk 21:​34, 35; 2 Pita 3:​11, 12.

Wanem ol samting i insait long dispela pait? Buk Revelesen i tok piksa olsem: “Ol king bilong graun wantaim ol ami bilong ol, ol i kam bung wantaim bilong pait long dispela man i sindaun long hos na long lain ami bilong en.” Dispela “man i sindaun long hos” em Pikinini Bilong God, Jisas Krais, em man God i makim bilong i go pas long lain ami bilong ol ensel bilong winim pait long ol birua bilong God. (Revelesen 19:​11-16, 19-21) Tok bilong Jeremaia 25:33 i kamapim klia olsem bikpela bagarap tru bai painim ol man i givim baksait long God, em i tok: “Long dispela taim Bikpela bai i kilim i dai planti manmeri moa na bai bodi bilong ol i stap nabaut long olgeta hap bilong graun.”

Bilong wanem Armagedon i mas kamap? Ol kantri i sakim wok bos bilong God na ol i tok ol yet i gat strong bilong bosim ol. (Song 24:⁠1) Tok bilong Song 2:2 i kamapim klia pasin bikhet bilong ol, em i tok: “Ol king bilong olgeta hap graun, ol i redi long pait. Na ol hetman i bung na painim rot bilong daunim Bikpela na dispela man em i makim bilong bosim ol manmeri bilong en.”

Tru tumas, ol dispela bikhetman i olsem ol man i go sindaun nating long ol haus i no bilong ol, na i no dispela samting tasol, nogat, ol i mekim nabaut tu na bagarapim ol samting. Ol lain manmeri long nau i wok long bagarapim dispela graun na win na wara samting. Baibel i tok profet long dispela samting nogut olsem: “Olgeta lain manmeri i belhat, na [God i] kamapim belhat bilong [em].” Na long dispela taim God bai “bagarapim ol man i wok long bagarapim graun.” (Revelesen 11:18) Armagedon em i rot God i makim bilong stretim bek tok long husat i gat rait long bosim ol manmeri.​—⁠Song 83:⁠18.

Armagedon bai kamap long wanem taim? Pikinini Bilong God i tok: “I no gat wanpela man i save long dispela de na dispela aua, ol ensel long heven i no save, na Pikinini tu i no save, Papa tasol i save.” (Matyu 24:36) Tasol maski i olsem, taim King Bilong Mekim Pait, Jisas Krais, i toktok long Armagedon, em i givim tok lukaut olsem: “Harim! Mi bai kam olsem wanpela stilman. Man i no slip na ol i no rausim klos bilong en, em i ken amamas.” (Revelesen 16:15) Olsem na dispela pait bai kamap long taim Krais i kam i stap pinis, em dispela taim nau yumi stap long en olsem Baibel i tok profet long en.

Armagedon bai bagarapim ol man nogut em ol i no laik senisim pasin bilong ol, tasol ol “bikpela lain manmeri” ol bai abrusim bagarap long dispela pait. (Revelesen 7:​9-14) Ol bai lukim truim bilong dispela tok: “I no longtaim na bai ol man nogut i lus olgeta. Bai yu wok long painim ol long ples bilong ol, tasol yu no inap lukim ol. Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”​—⁠Song 37:​10, 11.

[Rait long pes 10]

“Ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap”