Uiraa a te feia taio . . .

Eaha o Aramagedo?

▪ No te taata e rave rahi, e ati ïa mai te tamaˈi atomi aore ra te ati natura e pohe ai ehia rahiraa taata. Mea taa ê râ ta te Bibilia faataaraa i te taˈo “Aramagedo.” Eaha ïa?

O te buka Apokalupo te faahiti ra ia Aramagedo. E tamaˈi otahi teie, “te tamaˈi i taua mahana rahi o te Atua Puai hope ra” i reira “te hui arii o te fenua nei e o te ao atoa” e putuputu ai no te aro i te Atua. Te faahiti atoa ra te tahi atu mau irava i teie tamaˈi, mai te Apokalupo 16:14-16; Ezekiela 38:22, 23; Ioela 3:12-14; Luka 21:34, 35 e te Petero 2, 3:11, 12.

Eaha te tupu i teie tamaˈi? Te parau taipe maira te Apokalupo e ‘ua putuputu te mau arii o te ao nei e ta ratou mau nuu, e aro ia ˈna o te parahi ra i nia i te puaahorofenua e tana ra nuu.’ O Iesu Mesia, te Tamaiti a te Atua, ‘te parahi ra i nia i te puaahorofenua.’ O ˈna ta te Atua i maiti ei aratai i te mau nuu melahi no te haamou i to ˈNa mau enemi. (Apokalupo 19:11-16, 19-21) Ehia rahiraa taata ino te mou? Te pahono maira te Ieremia 25:33 e “tei pohe ia Iehova ra ia tae i te reira ra anotau, e riro ïa mai te hopea mai o te fenua, e tae noa ˈtu i te tahi hopea o te fenua.”

No te aha ia tupu iho â ˈi Aramagedo? Aita te mau nunaa i hinaaro e na te Atua e faatere, na ratou râ. (Salamo 24:1) Te parau ra hoi te Salamo 2:2 e “te tiatia ra te hui arii o te fenua nei i nia, e te amui atoa ra te hui raatira e mârô ia Iehova, e ta ˈna i faatahinu.”

Ua parau teie mau orure hau e o ratou te fatu o te fenua. I teie râ mahana, ua ino e ua viivii te fenua ia ratou. Ua tohu te Bibilia i teie tupuraa peapea mau, i te na ôraa: “I riri na te mau fenua, e ua itea mai to [te Atua] riri.” No reira Iehova e haamou ai i te feia e faaino ra i te fenua. (Apokalupo 11:18) Ua faaoti te Atua e maoti Aramagedo e haapapuhia ˈi o vai mau â te tia ia faatere i te huitaata.—Salamo 83:18.

Afea Aramagedo e tupu ai? Ua parau roa te Tamaiti a te Atua: “Area te reira mahana e te reira hora, e ore roa te hoê e ite, e ore hoi te mau melahi o te raˈi; maori râ o tau Metua anaˈe.” (Mataio 24:36) Ua faaara râ Iesu Mesia, te Arii Aito, no nia ia Aramagedo: “Inaha, mai te eiâ ra to ˈu haereraa ˈtu. E ao to te ara.” (Apokalupo 16:15) Ua taaihia ïa teie tamaˈi rahi i te ariiraa te Mesia i teie mahana ia au i te mau parau tohu Bibilia.

O te feia ino anaˈe te mou i Aramagedo. E “feia rahi roa” râ te ora ˈtu. (Apokalupo 7:9-14) E ite ratou i te tupuraa o te Salamo 37:10, 11: “No parahirahi aˈe te paieti ore, e aita ra; oia â ïa, e hiˈo â oe i to ˈna vahi, e aita nei. Area te feia mǎrû ra, e parahi ïa i te fenua, e oaoa ratou i te rahi o te hau.”

[Parau iti faaôhia i te api 20]

“Area te feia mǎrû ra, e parahi ïa i te fenua, e oaoa ratou i te rahi o te hau”