Kalata Ukufuma ku Congo (Kinshasa)

Mwi Samba lya Lupili lwa Mulilo

AKASUBA nga kaletula mu musumba wa Goma, mu muulu mulakashikila. Cila bushiku Ulupili lwa Nyiragongo, ulwaba pa mpili ishipuulika sana mu calo, lulamoneka bwino. Lyonse pa lupili palafutumuka intumba ya cushi iifuma mu cilindi icaba pa kati ka lupili. Mu nshita ya bushiku intumba ya cushi ilakashika cee pa mulandu wa mulilo uwaba muli ici cilindi.

Mu ciSwahili, ulu lupili balwita ukuti Mulima ya Moto, e kutila Ulupili lwa Mulilo. Umuku ulupili lwa Nyiragongo lwalekelesheko ukupuulika ni mu 2002. Ifipe fyonse ifya bena mupalamano ne fibusa fyesu fyalyonaike. Pa kuya ku ncende yaba mupepi uko ine na balume bandi tushimikila, tupita mu mbali ya fimabwe ifyapangike ilyo ulupili lwapuulike, kabili lyonse njelenganya ifyo cingaba ukwenda pa mweshi. Abantu bena tabakosa imitima nge fi fimabwe. Balisansamuka, kabili balitemwa ukukutika ku mbila nsuma tubashimikila. Ici e calenga ukuti tuleipakisha ukubombela muli iyi ncende yaba mwi samba lya Lupili lwa Mulilo!

Bushiku bumo pa Cibelushi ulucelo, ine na balume bandi twali no kuya mu kushimikila ne fibusa ifyaishile mu kututandalila e lyo na bamishonari banensu mu nkambi ya mbutushi iya ku Mugunga, iyabela ku masamba, ku nse ya musumba. Abengi abekala muli iyi nkambi babutwike ku mwabo pantu balebasansa.

Twaimine ulucelo, twalonga impapulo sha ciFrench, iciSwahili, ne sha ciKinyarwanda muli motoka, no kwima ubulendo. Ilyo twaleya mu musebo uwaonaika nga nshi, twatendeke ukukumanya abantu abengi, abalumendo balekunkulusha ifibala mu mbali ya musebo na banakashi abale-enda busaka busaka nabasenda ififulukutu pa mutwe ninshi nabafwala ne fitenge ifisuma. Twalekumana ne myotoka shalesenda abaleya ku maliketi na ku ncito. Muli iyi ncende mwaisula amayanda ayafitulukila ayo bakuulila ne fimuti kabili mu mbali bapentamo bluu.

Awe twafikile pa Ng’anda ya Bufumu iya mu Ndosho apo twali no kukumanina na ba Nte banensu abo twali no kuya nabo mu kushimikila mu nkambi ya mbutushi. Nalipapile ukumona abaice, bamukamfwilwa, abana ba nshiwa, na balemana. Abengi pali aba balipita sana mu macushi lelo baliba ne nsansa pantu basalapo ukulakonka amafunde ya mu Baibolo. Balicetekela sana amalayo yaba mu Baibolo, kabili balafwaisha ukushimikilako bambi. Bonse pamo twali 130 kabili ilyo twakumene panono no kulanda pa mashiwi ya mu Baibolo  ayengasansamusha abantu, twaninine amaminibasi yasano e lyo na motoka imbi.

Ilyo papitile nalimo amamineti 30, twalifikile mu nkambi, umo batanike amatenti yabuuta ayengi nga nshi. Pa kati ka nkambi pali ifimbusu ifya busaka ifingi ne fisankano ifya kucapilapo ifya kufwala. Mwali abantu abengi, abalecapa, abaleipika, abaletongola cilemba, na balepyanga pa lubansa lwabo.

Twakumenye abaume ba Papa Jacques, abakalamba ba ncende imo iya mu nkambi. Balisakamikwe pa fyo bengakusha bwino abana muli shino nshita sha-afya. Balitemenwe sana ilyo twabashilile icitabo citila Ifipusho Abacaice Bepusha—Ifyasuko Fibomba kabili batile bakacibelenga e lyo pa numa bakalonganika abantu pa kuti babebeko ifyo bakasambililamo.

Ilyo twaendeleko fye panono, twasangile banakulu bantu ba Mama Beatrice. Balitwipwishe umulandu Lesa asuminishisha ifyabipa ukulacitika. Balemona kwati Lesa alebakanda pantu abalume babo balibepeye mu nkondo, umwana wabo umwanakashi akusha fye umwana eka pantu takwata umulume e lyo umwana wabo umwaume balimwiba kabili palipita imyeshi ukutula apo bamwibila. Kabili tabaishiba na uko aba.

Ilyashi lya bulanda ilyatushimikile ba Mama Beatrice lyalengele ntontonkanye pa fyo Yobo aumfwile ilyo bamwebele imbila sha bulanda. Twalibalondolwelele umulandu tuculila no kuti te Lesa uwalebakanda pa macushi balepitamo. (Yobo 34:10-12; Yakobo 1:14, 15) Twabashimikile no kuti nomba line Lesa akabomfya Ubufumu bwakwe ukufumya ifyabipa pano calo. Ilyo twalelanshanya nabo, batendeke ukumwentula kabili batile bakatwalilila ukusambilila Baibolo no kulapepa kuli Lesa ukuti alebafwa.

Bonse fye twali-ipakishe ukushimikila mu nkambi, kabili twalimwene ukuti Yehova alitwafwile ukusansamusha aba bantu no kubalenga ukuba ne subilo. Ilyo twalefuma mu nkambi, abantu abengi baikete amatrakiti, ama magazini, ne fitabo ilyo baletufishapo.

Ilyo twalebwelelamo, naletontonkanya pali balya bantu. Ndomfwa bwino sana nga natontonkanya pali bulya bushiku bwaibela. Ndebukisha ifyo ba Papa Jacques batashishe ilyo twabashiliile icitabo, ifyo ba Mama Beatrice basansamwike ilyo twabashimikile, ne fyo twaposhenye mu minwe na bamama bamo ifi abalemwentula fye pantu tabaishibe ululimi lwandi. Ndatontonkanya na pa balumendo na bakashana abaleipusha amepusho ayacindama kwati bakalamba. Aba bantu ndabakumbwa pantu balishipa ica kuti te mulandu na macushi ubwingi bapitamo, baba fye aba nsansa.

Muli ici calo, tulamona uko abantu abengi babombesha ukwesha ukwafwa abantu abalecula. Ubu bushiku, bwaliweme pantu twabomfeshe Baibolo ukulanga abantu ifyo amafya yakapwa. Naliba ne nsansa sana ukubombako uyu mulimo uwa kwafwa abantu ukwishiba ifyo aya macushi tupitamo yakapwa.